1, 2. Bua tshinyi kabivua bimpe bua Yehoyakima kuibakisha nzubu wa dibalasa?

 MUKALENGE YEHOYAKIMA uvua wibakisha nzubu wa dibalasa wa tshilala kulu. Uvua mulongolole bua nzubu ya munda ikale minene. Madidishi ende avua ne bua kuikala manene bua ikale abueja nsese ya dîba ne lupepele bua yeye ne bena mu dîku diende kusombamu bimpe. Bavua ne bua kulamika mabaya a mupuya muimpe a mitshi ya cèdre ya ku Lebanona ku bimanu bua kubilengeja. Bavua ne bua kulabamu mukubu mukunzubile wa ku ba bende uvua bantu banene bakeba ne muoyo mujima.​—Yel. 22:13, 14.

² Bivua bikengela makuta a bungi bua kujikija nzubu au. Tshikondo atshi, mu tshibutshilu tshia bena Yuda kamuvua makuta a bungi to, bualu bavua batula makuta bua malu a mvita ne bua kufuta bena Ejipitu bitadi. (2 Bak. 23:33-35) Kadi Yehoyakima wakapeta anu mushindu wa kuibakisha nzubu wende mupiamupia. Kavua ufuta bantu bavua bamuibaka to, uvua ubangata bu bapika bende ne umona mudimu mukole uvuabu benza bu kabu kantu kavuabu bafila bua kukuatshisha bukalenge buende.

3. Ndishilangana kayi divua pankatshi pa Yehoyakima ne tatuende? Bua tshinyi?

³ Nzambi wakatuma Yelemiya bua kupisha Yehoyakima bua muoyo wende mubi. a Wakamuvuluija ne: tatuende Yoshiya  uvua muleje bapele ne bena mudimu luse lua bungi ne uvua ubapesha bintu. Wakabakuila too ne ku tubadi. Yehowa wakakoka ntema ya Yehoyakima ku mushindu uvua Yoshiya wangata bantu bapuekele ne mushinga wamba ne: ‘Bualu ebu kabuena bukuatshisha muntu bua kummanya anyi?’—Bala Yelemiya 22:15, 16.

4. Bua tshinyi kumanya Yehowa kudi ne mushinga buebe wewe?

⁴ Bu mudi nsombelu wa mu bulongolodi bua Satana ebu wenda anu unyanguka, tudi dijinga ne diambuluisha ne bukubi bitu Yehowa upesha bantu badi bamumanye bimpe. Ke bualu kayi tudi ne bua kukolesha malanda etu nende. Tudi kabidi ne bua kuikala ne ngikadilu ya buena yende bua tuetu kuyisha bimpe lumu luimpe. Kadi udi mua kudiebeja ne: ‘Ntshinyi tshidi muena Kristo ne bua kuenza bua kumanya Yehowa bimpe bu Yoshiya?’

5, 6. (a) Ntshinyi tshitu ngikadilu mimpe ya tatu yenzela bana bende? (b) Bishilangane ne tshivua Yehoyakima muenze, kumanya Yehowa kudi kutuenzela tshinyi?

⁵ Ela meji mutu ngikadilu mimpe ya tatu yambuluisha bana bende. Tshilejilu, padibu bamumona wambuluisha bantu badi mu lutatu, bobu pabu nebikale ne tshibidilu tshia kupeshangana bintu. Padibu bamona mudiye wenzela mamuabu malu ne dinanga ne umunemeka, nebibambuluishe bua kunemena bantu bakaji. Padibu bamona ne: tatuabu katu musue bilumbu mu malu a makuta ne utu wamba anu bulelela, nebibasake bua kumuidikija. Bushuwa, padi bana bamanya ngikadilu ya tatuabu ne mutuye wenza malu, padibu bakola nebajinge bua kuenzela bantu malu anu mutu tatuabu wenza.

⁶ Bia muomumue, muena Kristo udi mumanye Yehowa bu muvua Yoshiya mumumanye kena witaba patupu ne: Yehowa udi Mfumu mutambe bunene to. Padiye ubala Bible, udi ufika ku dimanya mutu Yehowa wenzela bantu malu  ne udi ujinga kumuidikija. Udi ufika ku dimunanga padiye udienzeja dituku dionso bua kunanga malu adiye munange ne kukina adiye mukine. Kadi muntu udi ulengulula mikenji ya Nzambi ne malongesha ende kena mua kumumanya to, bualu udi ubenga bua amulombole. Mmufuanangane ne Yehoyakima uvua muoshe muvungu uvua ne mêyi a Yehowa avuaye mumuambile ku butuangaji bua Yelemiya.​—Bala Yelemiya 36:21-24.

7. Bua tshinyi udi ne bua kumanya Yehowa anu bu mukalenge Yoshiya?

⁷ Bua tuetu kuenza mudimu wa tshijila bimpe ne kupeta diakalenga dia kuikala mu buloba bupiabupia, tudi ne bua kumanya Yehowa. (Yel. 9:24) Tukonkononayi ngikadilu mikese ya Nzambi itudi tupeta mu mikanda ya Yelemiya. Patudi tuyikonkonona, keba mushindu uudi mua kumumanya bimpe ne kumuidikija bu muvua mukalenge Yoshiya muenze.

8. Luse lujalame ntshinyi?

⁸ Mu miakulu ya bungi bitu bikole bua kumvuija ngikadilu wa Yehowa udi Bible ubikila ne: luse lujalame. Bilondeshile nkonga miaku mukuabu udi umvuija miaku ya mu Bible, muaku wa mu tshiena Ebelu eu udi uleja ngikadilu udi ukongoloja bukole, lulamatu ne dinanga. Udi wamba kabidi ne: “Diumvuija dionso didi kadiyi dikongoloja bukole, lulamatu ne dinanga kadiena diumvuija muaku eu bimpe to.” Nunku, muntu udi ne luse lujalame kena anu muntu muimpe patupu to. Kadi udi uditatshisha bikole bua bakuabu ne wenza muende muonso bua kukumbaja majinga abu,  nangananga mu malu a ntendelelu. Udi wenza nanku bualu mmusue kusankisha Nzambi wa Bukole Buonso.

9. Mushindu uvua Yehowa muenzele bena Isalele malu udi uleja tshinyi?

⁹ Mushindu muimpe wa kumvua tshidi ngikadilu wa “luse lujalame” umvuija nkukonkonona mutu Nzambi wenzela batendeledi bende balelela malu katshia ku kale. Yehowa wakalama bena Isalele ne kubadisha bidimu 40 bivuabu benze mu tshipela. Pakabuelabu mu buloba bulaya, wakabapesha balumbuluishi bua kubasungila kudi baluishi babu ne kubapingaja ku ntendelelu mulelela. Yehowa uvua mubalamate mu bikondo bimpe ne bibi munkatshi mua bidimu bia bungi, ke bualu kayi wakabambila ne: ‘Ngakukunanga ne dinanga dia tshiendelele, nunku ngakunanukila kukuleja luse lujalame.’​—Yel. 31:3. b

10. Anu mudi tshilejilu tshia bena Yuda bavua mu Babulona tshileja, mmunyi mudi Yehowa uleja luse lujalame mu mushindu utuye uteleja masambila?

 ¹⁰ Mu matuku etu aa, Nzambi udi utungunuka ne kuleja luse luende lujalame bua kuambuluisha batendeledi bende. Tuangate tshilejilu tshia disambila. Yehowa utu uteleja masambila onso adi bantu benza ne muoyo mujima, kadi udi utamba kuteleja a batendeledi bende badi badilambule kudiye. Nansha patudi tusambila bua bualu bumue bidimu ne bidimu, kena utshioka to, kadi udi anu ututeleja ne lutulu. Musangu mukuabu wakapesha Yelemiya mukenji wa kutumina bamue bena Yuda bavua mu bupika mu Babulona. Bavua mutantshi wa kilometre 800 ne ntempelo, kule ne mêku abu ne balunda babu bavua mu Yuda. Nansha nanku, Yehowa kakabenga kuteleja milombu yabu ne masambila avuabu benza bua kumutumbisha to. Paudi wela meji bua masambila autu wenza ne muoyo mujima, tshinka muvua bena Yuda bakole ku muoyo pakumvuabu mêyi a Nzambi adi mu Yelemiya 29:10-12.​—Bala.

11, 12. (a) Ntshinyi tshivua Yehowa mulamine bena mu Yelushalema? (b) Ndiambuluisha kayi didi dindile muntu yonso udi mupete dinyoka didi dimuakanyine?

 ¹¹ Tudi tumona tshijadiki tshikuabu tshia luse lujalame lua Yehowa mu mushindu utuye umona malu. Bu muvua dibutuka dia Yelushalema disemene ne bena mu tshimenga batungunuka ne kutombokela Nzambi, mmalu kayi avua mabindile? Bavua mua kufua ne nzala anyi ku muele wa mvita wa bena Babulona. Bavua nansha mua kulala mu bupika bikole ne kufuila ku ba bende. Kadi Yehowa uvua mulamine bantu bavua mua kunyingalala ne kushintulula nsombelu wabu ‘dîyi dimpe.’ Wakabalaya bua ‘kubavuluka.’ Uvua ne bua kubumbusha mu Babulona ne ‘kubapingaja mu muaba eu,’ mbuena kuamba ne: mu ditunga diabu. (Yel. 27:22) Dîba adi bavua mua kuela mbila bamba ne: ‘Sakidilayi Yehowa wa misumba, bualu bua Yehowa udi muimpe, bua luse luende ludi lujalame tshiendelele.’​—Yel. 33:10, 11.

¹² Bu mudi Yehowa ne luse lujalame, utu ukankamija bantu badi mu nsombelu idi imueneka mipite bukole ku mêsu kua bantu. Kudi bantu lelu bavua mu tshisumbu tshia bena Kristo kadi bavua bapete dinyoka diakane divuabu bakengela. Batshidi mua kuikala badipisha bikole bua bubi buvuabu benze ne belakana bua kudisangisha kabidi ne batendeledi ba Nzambi. Badi mua kuikala badiebeja bikala Yehowa mua kubabuikidila ne kubanyisha kabidi. Nzambi wa Bukole Buonso udi ne ‘dîyi dimpe’ bua bantu bonso ba mushindu eu. Badi mua kupeta diambuluisha bua kushintulula lungenyi luabu ne bienzedi biabu. Malu atudi babale mu tshikoso tshishale adi abatangila kabidi, bualu Yehowa ‘neabapingaje mu muaba wabu,’ mmumue ne: munkatshi mua batendeledi bende badi ne disanka.​—Yel. 31:18-20.

13. Bua tshiyi mushindu uvua Yehowa muambuluishe Yelemiya udi ukukankamija?

¹³ Bu mudi Yehowa Nzambi wa luse lujalame, utu kabidi  ukuatshisha batendeledi bende ba lulamatu. Mu matuku a ndekelu a bulongolodi bua Satana aa, tudi ne bua kuikala bashindike ne: Yehowa neambuluishe bantu bonso badi bakeba Bukalenge buende kumpala kua bionso ne neabalame. Tuvuluke ne: pakavua Yelushalema pa kubutuka, Yehowa wakadisha Yelemiya ne wakamulama. Kakalekela muprofete wende nansha musangu umue to. (Yel. 15:15; bala Muadi 3:55-57.) Wewe muikale ne lutatu lukole, ikala mushindike ne: Yehowa udi uvuluka bienzedi biebe bia lulamatu. Bu mudiye ne luse lujalame, mmusue kukuambuluisha bua ‘kujiminyi.’​—Muad. 3:22, NW.

14. Mmalu mabi kayi audi umona enzeka lelu?

¹⁴ Kutu bantu batu benza bidimu bia bungi mu buloko bua malu adibu kabayi benze to. Misangu mikuabu tubadi  tutu tukosela muntu tshibawu tshia lufu, kadi balua kumona ne: kavua ne bualu bobu bamane kumushipa. Mu matunga makuabu, baledi batu bapanyisha bana babu ku bupika bua kudisha mêku abu. Utu umvua bishi pautu umona malu mabi a nunku? Udi wela meji ne: Yehowa yeye utu umvua bishi? Bible udi uleja patoke ne: mmusue kumbusha malu onso atu akebesha malu mabi aa. Anu yeye nkayende ke udi mua kuumbusha. Nunku, bapele ne bantu badi bakenga kabayi ne bualu badi ne bua kukola ku muoyo bualu Yehowa Nzambi wa buakane udi wenza malu adi akengela bua kubasungila ku ntatu yabu.​—Yel. 23:5, 6.

15, 16. (a) Mbualu kayi budi butangila Yehowa buvua Yelemiya muleje? (b) Bua tshinyi udi mua kueyemena mikenji ya Nzambi ne malu adiye mulaye?

¹⁵ Mu tshikondo tshia Yelemiya, kuvua bantu bavua bamanye mudi Nzambi munange buakane bikole. Tshilejilu, Yelemiya wakaleja muvuaku mushindu wa bena Isalele kunyingalala bua mibi yabu ne kuenza malu avua aleja muvuabu bashintuluke, bienze anu bu ne: bavua baditshipa bamba ne: ‘Bu mudi Yehowa ne muoyo, mu bushuwa, mu kulumbulula kuakane ne mu buakane.’ (Yel. 4:1, 2) Bidi nanku, bualu malu mabi kaena ne muaba mu malu adi Yehowa mulongolole to. Kadi kudi malu makuabu adi aleja mudiye munange buakane.

¹⁶ Nzambi utu ukumbaja mêyi ende misangu yonso ne katu muena mpala ibidi to. Bantu ba bungi kabatu bakumbaja malu adibu balaya bakuabu, kadi Yehowa katu wenza nanku to. Nansha mikenji idiye muelele bintu bidiye mufuke bua diakalenga dietu kayitu ishintuluka to. (Yel. 31:35, 36) Tudi kabidi mua kueyemena malu adiye mulaye ne mapangadika adiye wangata, bualu bitu anu bimpe.​—Bala Muadi 3:37, 38.

17. (a) Ntshinyi tshitu Yehowa wenza padiye ulumbuluisha bantu? (b) Bua tshinyi udi mua kueyemena mushindu udi bakulu balumbuluisha mu tshisumbu? (Tangila kazubu kadi kamba ne: “ Badi balumbuluisha pa muaba wa Yehowa.”)

 ¹⁷ Patu Yehowa ulumbuluisha bantu, katu wimanyina pa malu adi amueneka ku mêsu to. Utu utangila malu onso too ne adi kaayi amueneka bua kumanya tshidi tshienzeke. Utu kabidi ukonkonona tshidi tshisake muntu bua kuenza bualu kampanda. Lelu baminganga badi mua kutangila muoyo wa muntu padiwu ukuma ku diambuluisha dia biamu bia pa buabi bua kumanya ni udi usama. Peshi badi mua kukonkonona tuonyi tutu tutata mashi. Kadi Yehowa mmubapite kule ne kule bualu udi ukonkonona muoyo wa mu tshimfuanyi wa muntu ne umona tshidi tshimusake bua kuenza bualu kampanda. Udi kabidi mua kukonkonona  tuonyi tua mu tshimfuanyi tudi tuleja mudi muntu udiumvua menemene. Nunku yeye udi mua kumona tshivua tshisake muntu bua kuenza bualu kampanda ne tshidiye umvua bua tshivuaye muenze. Bungi bua malu adiye umona padiye ukonkonona muntu kaena amunyungulula mutu to. Mmupite balumbuluishi banene bonso bualu yeye utu wenza mudimu bimpe ne malu adiye umona bua kujadika tshiatufikila matuku adi kumpala.​—Bala Yelemiya 12:1a; 20:12.

18, 19. Kumanya buakane bua Nzambi kudi kutuenzela tshinyi?

¹⁸ Nunku udi ne bua kueyemena Yehowa nansha mutu imue misangu muoyo webe ukupisha bua malu mabi auvua muenze kale. Kupu muoyo ne: Yehowa kena bu mulumbuluishi udi ukeba tshia kunyokela muntu to, kadi Mmulumbuluishi udi ne luse ne musue kuambuluisha bantu. Muoyo wowu ukupisha bua malu a kale anyi bua tshilumbu tshia muntu mukuabu, lomba Yehowa bua kumbusha “bilumbu” anyi dielakana diudi nadi bua uapue muoyo. c Nzambi udi mua kukuambuluisha bua umone mudiye musue bua utungunuke ne kumuenzela mudimu wa tshijila.​—Bala Muadi 3:58, 59.

¹⁹ Mbimueneke ne: Nzambi wa buakane buonso mmusue bua bantu badi bakeba bua abanyishe benze malu makane. (Yel. 7:5-7; 22:3) Kuyisha lumu luimpe katuyi tusunguluja bantu mmushindu muimpe wa kuleja buakane bua Nzambi. Paudi upinganyina bantu bauvua muyukile nabu ne ubalongesha Dîyi dia Nzambi, udi uleja buakane buende  mu mushindu muimpe udi mua kubambuluisha. Mmushindu kayi? Mmusue bua bantu ba mishindu yonso balonge malu ende ne basungidibue. (Muad. 3:25, 26) Nunku, udi ne diakalenga dinene dia kuikala muenzejanganyi wa mudimu ne Nzambi ne dia kuleja buakane buende mu mudimu udi usungila bantu.

20. (a) Yelemiya wakaleja tshinyi bua mutu Yehowa wenzela bantu malu? (b) ‘Kukudimuna mutshima’ kudi kupetangana ne luse lua Yehowa ku tshinyi? (Tangila kazubu kadi kamba ne: “ Mmushindu kayi udi Yehowa ‘ukudimuna mutshima wende’?”)

²⁰ Bantu ba bungi batu bamona mukanda wa Yelemiya ne wa Muadi bu mikanda idi imanyisha anu malu mabi. Kadi badi bapua muoyo ne: Yehowa mmulayamu bua kufuila batendeledi bende luse. Wakambila bena Yuda ne: ‘Buonso buenu nulekele kuenda mu njila mibi, nulengeje bienzedi bienu ne malu anudi nuenza.’ Musangu mukuabu Yelemiya wakabasengelela ne: ‘Nulengeje njila yenu ne bienzedi bienu bibi, nutumikile dîyi dia Yehowa Nzambi wenu, ne Yehowa neakudimune mutshima wende bua makenga avuaye muambe bua kunutumina.’ (Yel. 18:11; 26:13) Mu matuku etu aa, Yehowa udi utungunuka ne kubuikidila bantu bonso badi banyingalala ne muoyo mujima ne balekela kuenza malu mabi.

21. Ntshinyi tshidi Yehowa ukeba padiye ufuila muntu luse?

²¹ Yehowa katu ubuikidila bantu anu mukana patupu to, kadi utu wenza malu adi aleja mudiye mubafuile luse. Wakambila bena Yuda mukana mua Yelemiya ne: ‘Wewe Isalele mundekedi, pingana kundi. Tshiena nkutangila ne tshiji. Tshiena ngikala ne tshiji tshiendelele.’ (Yel. 3:12) Nzambi kena ushala mufikile muntu udiye ufuila luse munda to. Kadi nansha mudi bualu bubi buenzeke, yeye mmusue kulengeja malanda adi manyanguke. Nansha muntu muenze bubi bua mushindu kayi,  yeye munyingalale ne muoyo mujima ne mulombe Nzambi luse, Yehowa ‘neamupingaje,’ neamuanyishe kabidi ne neamubeneshe. (Yel. 15:19) Bualu ebu budi ne bua kusaka muntu yonso udi munyange malanda ende ne Nzambi mulelela bua kupingana kudiye. Kuenaku umona ne: luse lua Yehowa ludi lutukoka kudiye anyi?​—Bala Muadi 5:21.

22, 23. Paudi widikija Yehowa mu difuilangana luse, ntshinyi tshiudi ne bua kuipatshila?

²² Muntu yeye mukuenzele bibi anyi mukuambe mêyi mabi, newidikije Yehowa anyi? Pa bidi bitangila bena Yuda, Nzambi wakamba ne: uvua ne bua ‘kulengeja’ bavuaye mufuile luse. (Bala Yelemiya 33:8.) Udi ulengeja muntu udi munyingalale mu ngumvuilu wa ne: kena uvuluka kabidi tshilema tshiende, kadi udi umupesha ntuadijilu mupiamupia mu mudimu wende. Kabiena biumvuija ne: bu mudi Nzambi mumufuile luse, udi umulengeja ku bubi butuakapiana ne ulua mupuangane, tuambe ne: kayi kabidi ne bubi to. Kadi tshivua Nzambi muambe bua kulengeja bantu tshidi mua kutupesha dilongesha. Tudi ne bua kudienzeja bua kupua muoyo bilema bia bakuabu, ne bualu ebu budi bumvuija ne: tudi balengeje mushindu utudi tubamona mu muoyo wetu. Mmushindu kayi?

²³ Fuanyikijabi ne: muledi webe udi ukupesha luesu luvuaye  pende mupiane kudi baledi bende. Udiku mua kuluimansha padilu lufika anyi lukuata manyanu anyi? Kuena mua kuenza nanku to, kadi newenze muebe muonso bua kulusukula bimpe, kumbusha manyanu onso bualu udi musue bua luikale luimpe ne luengelela. Bia muomumue, udi ne bua kudienzeja bua kubenga kulamina muena Kristo nebe udi mukuenzele bibi munda. Kuikadi ne tshilele tshia kupinganyina pa mêyi mabi avuaye muambe anyi bualu bubi buvuaye mukuenzele. Paudi ubipua muoyo, udi ulengeja tshimfuanyi tshiende mu muoyo webe. Bu muukadi mumbushe meji mabi auvua nawu bua muntu au, udi mpindieu mua kupetulula nende malanda avua amueneka bu manyanguke bua kashidi.

24, 25. Mmalu kayi mimpe atudi tupeta patudi tumanya Yehowa bu mukalenge Yoshiya?

²⁴ Tudi bakonkonone anu ngikadilu mikese ya Yehowa ne mishindu ituye wenzela bantu malu itudi tujingulula patudi tumumanya bimpe. Tudi tumona ne: kumanya Yehowa bimpe kudi kutusaka bua kumutendelela mu mushindu udiye musue. Patudi tumanya Yehowa bimpe anu bu mukalenge Yoshiya, netupete disanka didi dikale padi umue wa ku ngikadilu yende.

²⁵ Kumanya Yehowa bimpe menemene kudi kutuambuluisha bua kulengeja malanda etu ne bantu bakuabu. Patudi tudienzeja bua kuikala ne luse lujalame, kuenza malu makane ne kufuila bakuabu luse anu bu Yehowa, netusombe bimpe ne bena Kristo netu mu tshisumbu ne netunangangane bikole. Netumanye kabidi mua kulongesha bantu bimpe patudi tubapinganyina ne tulombola malonga a Bible adi aya kumpala. Nsombelu wetu neasankishe bantu badi banyisha bulelela. Dîba adi, netumanye mua kubambuluisha bua kutendelelabu Yehowa mu mushindu udiye musue ne kulonda ‘njila muimpe.’​—Yel. 6:16.