1, 2. (a) Ntshikena-kumona kayi tshivua Yelemiya mupete tshiakaleja muikala malu avuaye ne bua kumanyisha bantu? (b) Bua tshinyi udi ne bua kukonkonona malu avua Yelemiya mumanyishe?

 NZAMBI wakebeja Yelemiya muprofete wende mupiamupia ne: “Udi umona tshinyi?” Wakandamuna ne: ‘Ndi mmona luesu lunene lua mâyi adi asaba, ne mpala walu (anyi ntaku) udi utangila ku Nord.’ Tshikena-kumona atshi tshiakaleja muikala malu avua Yelemiya ne bua kuikala wambila bantu. (Bala Yelemiya 1:13-16.) Yehowa uvua umumanyisha ne: makenga avua ne bua kuitshikila mu buloba bua  Yuda anu bu mâyi adi asaba mu luesu bualu bantu ba bungi kabatshivua bamulamate to. Bua tshinyi udi wela meji ne: luesu luvua lutangile ku Sud? Bivua biumvuija ne: makenga avua ne bua kufumina ku Nord, mbuena kuamba ne: bena Babulona bavua ne bua kufumina ku Nord bua kulua kukuata bena Yuda. Ke tshiakenzeka. Munkatshi mua bidimu bionso bivua Yelemiya muprofete, wakamona muvua mâyi adi asaba apumuka mu luesu too ne ku dibutuka dia Yelushalema.

² Babulona katshienaku to, kadi wewe udi ne bua kukonkonona malu avua Yelemiya muambe. Bua tshinyi? Bualu tudi mu ‘matuku a ku nshikidilu’ adi bantu ba bungi bamba mudibu bena Kristo kadi Nzambi kayi wanyisha bitendelelu biabu to. (Yel. 23:20, NW) Kadi anu bu Yelemiya, wewe ne Bantemu nebe nudi nuambila bantu muikala Nzambi mua kubalumbuluisha ne nubapesha ditekemena.

3. (a) Malu adi mu mukanda wa Yelemiya mmafunde mu mushindu kayi? (b) Nshapita 2 wa mukanda eu udi ne tshipatshila kayi?

³ Bidi bimueneka ne: pamutu pa Yelemiya kufunda malu muvuawu alondangana, wakambila muntu mukuabu bua kuafunda ku ndekelu kua mudimu wende wa buprofete. (Yel. 25:1-3; 36:1, 4, 32) Malu adi mu mukanda wa Yelemiya ki mmalondangane muvuawu menzeke to, bualu Yelemiya uvua mufunde bitupa bia bungi bilondeshile biena-bualu biabi. Nunku, bidi mua kuikala bimpe bua wewe kuanji kumanya nsombelu uvuaku tshikondo tshivuabu bafunde mukanda wa Yelemiya ne wa Muadi ne mushindu uvua malu malondangane. Tangila kazubu kadi mu dibeji dia 19. Wewe mumanye uvua mukalenge mu Yuda tshikondo kampanda, ne imue misangu mumanye malu avua enzekamu ne avua enzeka pabuipi ne Yuda, nebikuambuluishe bua kumvua bimpe malu avua Yelemiya muambe anyi muenze. Dîba adi, malu avua Nzambi muambile bantu bende mukana mua Yelemiya neakuambuluishe.

4-6. Mmalu kayi avua menzeke mu tshisamba tshia Nzambi mu bidimu bia bungi kumpala kua Yelemiya kuluaye muprofete?

⁴ Yelemiya uvua muprofete mu tshikondo tshivua malu munkatshi mua dishintuluka bikole. Kuvua dikokangana dikole pankatshi pa bena Ashû, bena Babulona ne bena Ejipitu. Bidimu bitue ku 93 kumpala kua Yelemiya kutuadija mudimu wende wa buprofete, bena Ashû bakatshimuna bukalenge bua bisa dikumi bia Isalele buvua ku Nord ne kuya ne bantu ba bungi mu bupika. Tshikondo atshi Yehowa wakaluila Yelushalema ne Hezikiya mukalenge wa lulamatu mvita pavuabu babaluisha kudi bena Ashû. Udi mua kuvuluka muvua Nzambi mushipe mu tshishima basalayi ba bena Ashû 185 000. (2 Bak. 19:32-36) Manashe uvua muana wa Hezikiya ne bidi bimueneka ne: Yelemiya wakaledibua mu bukokeshi buende bua bidimu 55, mu tshikondo tshivua bena Ashû bakuate mukalenge Manashe ku bupika.​—2 Kul. 33:10, 11.

⁵ Yelemiya wakafunda mukanda wa 1 Bakelenge ne 2 Bakelenge, ne tudi tubalamu ne: Manashe wakibakulula bitendelelu bia pa mikuna bivua tatuende mupule. Wakibaka bioshelu bua Bâla ne bua bintu bia mu diulu too ne ku ntempelo wa Yehowa. Wakashipesha kabidi bantu ba bungi bavua kabayi ne bualu, kulambula too ne muanende kudi nzambi wa dishima. Mu tshikoso, ‘wakenza malu mabi a bungi ku mêsu kua Yehowa.’ Bua malu ende mabi onso aa Nzambi wakamba ne: dikenga dinene divua ne bua kukuata Yelushalema ne Yuda mujima anu mukavuadi dikuate Samalea ne Isalele. (2 Bak. 21:1-6, 12-16) Pakafua Manashe, muanende Amona wakatungunuka ne kutendelela nzambi ya dishima anu bu tatuende. Kadi malu akavua pa kushintuluka. Panyima pa bidimu bibidi bakashipa Amona ne Yoshiya muanende wa bidimu 8 kuangataye bukalenge mu 659 kumpala kua Yezu.

⁶ Mu bukokeshi bua Yoshiya bua bidimu 31, bena Babulona bakapita bena Ashû bukole. Yoshiya wakamona ne: ke dîba dia kumbusha bena Yuda ku bukokeshi bua matunga makuabu.  Wakenza malu mashilangane ne tatuende ne kakuende bualu yeye wakenzela Yehowa mudimu ne lulamatu ne kushintulula malu a bungi mu ntendelelu. (2 Bak. 21:19–22:2) Mu tshidimu tshia 12 tshia bukokeshi bua Yoshiya, wakumbusha bioshelu bivua pa mitu pa mikuna ne mpingu ya bitendelelu bia dishima mu bukalenge buende bujima ne kutuma dîyi bua balongolole ntempelo wa Yehowa. (Bala 2 Kulondolola 34:1-8.) Mu tshidimu tshia 13 tshia bukokeshi bua Yoshiya (647 kumpala kua Yezu) ke muvua Nzambi muteke Yelemiya muprofete wende.

7, 8. (a) Bukokeshi bua mukalenge Yoshiya buvua bushilangane ne bua Manashe ne Amona bavua bamudianjidile ku tshinyi? (b) Yoshiya uvua muntu wa mushindu kayi? (Tangila kazubu kadi mu  dibeji dia 20.)

⁷ Pavuabu balongolola ntempelo mu tshidimu tshia 18 tshia bukokeshi bua mukalenge muimpe Yoshiya, muakuidi munene wakapeta “mukanda wa Mikenji ya Mose.” Mufundi wa mukalenge wakamubadilawu. Yoshiya wakitaba bilema bia tshisamba tshiabu, kukeba bulombodi bua Yehowa kudi muprofete mukaji Huleda ne kuambila bantu bende bua kutumikila mikenji ya Nzambi. Huleda wakamanyisha Yoshiya ne: Yehowa uvua ne bua kutumina bena Yuda “malu makole” bua dibenga kumulamata diabu. Kadi bu muvua Yoshiya wangata ntendelelu mukezuke ne mushinga, malu makole au avua ne bua kulua panyima pa lufu luende.​—2 Bak. 22:8, 14-20.

⁸ Mukalenge Yoshiya wakadifila kabidi bikole mu mudimu wa diumusha ntendelelu wa dishima. Wakaya too ne mu buloba buvua bukalenge bua ku Nord kumpala bua kupula bioshelu bia pa mutu pa mikuna ne tshioshelu tshia ku Betele. Wakenzeja kabidi tshibilu tshia Kupita kua Yehowa tshia pa buatshi. (2 Bak. 23:4-25) Ela meji muvua bualu ebu mua kuikala busankishe Yelemiya. Kadi bivua bikole bua kufikisha  bantu ku dishintulula bienzedi biabu. Manashe ne Amona bavua basake bantu ku ditendelela dia nzambi ya dishima, ne anu bantu bakese ke bavua bashale batendelela Yehowa. Nansha muvua Yoshiya mushintulule malu, Nzambi wakasaka Yelemiya bua kuleja ne: nzambi ya bena Yuda ivua ya bungi anu bu misoko yabu. Bena mu ditunga dia Yelemiya bavua anu bu mukaji wa masandi, bualu bavua balekele Yehowa bua kuya kutendelela nzambi ya bisamba bia bende. Yelemiya wakamba ne: ‘Bu mudi bungi bua misesu ya mu Yelushalema, mbu mudi bioshelu binuakuashila tshintu etshi tshia bundu, bioshelu mene bia kuoshilapu Bâla musenga wa manananshi.’​—Bala Yelemiya 11:1-3, 13.

9. Mmalu kayi avua menzeke mu matunga avua manyunguluke Yuda mu bidimu bia ndekelu bia bukokeshi bua Yoshiya?

⁹ Anu muvua malu avua Yelemiya wambila bena Yuda kaayi abashintulula, kaakashintulula kabidi bisamba bivua bibanyunguluke bivua biluangana bua kupeta bukokeshi bua tshitupa tshiabu atshi. Mu 632 kumpala kua Yezu, biluilu bia bena Babulona ne bena Madai biakakuata Ninewe, tshimenga tshikulu tshia bena Ashû. Bidimu bisatu pashishe, Palô Neko wa mu Ejipitu wakaya ne biluilu biende ku Nord bua kuambuluisha bena Ashû bavua mu mvita. Bua bualu kampanda budi Bible kayi muleje, Yoshiya wakateta bua kuluisha bena Ejipitu ku Megido bua kubapingaja kuabu, kadi bakamutapa mputa munene wakamufikisha ku lufu. (2 Kul. 35:20-24) Lufu lua Yoshiya elu luvua mua kukebesha dishintuluka kayi mu malu a tshididi ne a ntendelelu mu Yuda? Ntatu kayi mikuabu ivua Yelemiya mua kupeta?

10. (a) Mmu mushindu kayi mudi tshikondo tshiakalonda lufu lua Yoshiya tshifuanangane ne tshietu? (b) Kukonkonona bienzedi bia Yelemiya nekutuambuluishe ku tshinyi?

¹⁰ Ela meji muvua Yelemiya mumvue pakapetaye mukenji wa lufu lua Yoshiya! Wakanyingalala bikole ne kuimba musambu wa madilu bua mukalenge. (2 Kul. 35:25) Tshivua tshikondo tshia ntatu ya bungi ne diluangana dia matunga  makuabu divua dikengeshisha bena Yuda. Bena Ejipitu, bena Ashû ne bena Babulona bavua baluangana bafuila bua kukokesha tshitupa tshiabu atshi. Pakafua Yoshiya, malu a ntendelelu akashintuluka pawu. Tshivua ndekelu wa tshikondo tshivua Yelemiya wenza mudimu wende bimpe ne ntuadijilu wa makenga ende. Dishintuluka dia buena edi ditu dienzekela bana betu ba bungi lelu patubu babakandika bua kuenza mudimu wetu wa kuyisha mu ditalala ne batuadija kubakengesha. Nnganyi udi mumanye bungi bua bana betu badi mua kupeta dishintuluka dia mushindu eu mu katupa kakese emu? Ntshinyi tshidi bualu ebu mua kutuenzela? Ntshinyi tshitudi ne bua kuenza bua kulama muoyo wetu mutoke? Tuetu balame nkonko eyi mu lungenyi, nebituambuluishe bua kumona ntatu ivua Yelemiya mutantamene.

11. Mmalu kayi akenzeka mu Yuda pakafua Yoshiya?

¹¹ Bena Yuda bakateka Yehoaza muana wa Yoshiya mukalenge mu Yelushalema. Yehoaza eu uvuabu babikila kabidi ne: Shaluma wakakokesha anu ngondo isatu patupu. Pakalua Palô Neko ufuma ku diluisha bena  Babulona, wakumbusha mukalenge mupiamupia eu, kuya nende mu Ejipitu ne Yelemiya wakamba ne: Yehoaza ‘kena upingana kabidi.’ (Yel. 22:10-12; 2 Kul. 36:1-4) Neko wakateka Yehoyakima, muana mukuabu wa Yoshiya pa muaba wende. Yehoyakima kakalonda tshilejilu tshimpe tshia tatuende to. Pamutu pa kutungunuka ne mudimu wa diakaja ntendelelu mulelela, yeye wakatendelela nzambi ya dishima.​—Bala 2 Bakelenge 23:36, 37.

12, 13. (a) Mmalu kayi avua enzeka mu ntendelelu ku ntuadijilu kua bukokeshi bua Yehoyakima? (b) Ntshinyi tshivua bamfumu ba tshitendelelu tshia bena Yuda benzele Yelemiya?

¹² Ku ntuadijilu kua bukokeshi bua Yehoyakima, Yehowa wakambila Yelemiya bua kuya ku ntempelo ne kupisha patoke bena Yuda bua malu mabi avuabu benza. Bavua bangata ntempelo wa Yehowa bu tshijimba tshivua tshibalama. Kadi bu bobu kabayi balekele ‘kuiba, kushipa bakuabu, kuenda masandi, kuditshipa ne mashimi, kuoshila Bâla musenga wa manananshi ne kulonda nzambi ya patupu,’ Yehowa uvua ne bua kulekela ntempelo wende. Uvua kabidi ne bua kulekela bena mpala ibidi bavua bamutendelelamu anu muvuaye mulekele ntenta wa kusambakena mu Shilo mu matuku a muakuidi munene Eli. Ditunga dia Yuda divua ne bua ‘kulua tshipela tshia patupu.’ (Yel. 7:1-15, 34; 26:1-6) a Bivua bikengela Yelemiya ikale ne dikima dia bungi bua kumanyisha bantu bualu abu. Bidi bimueneka ne: wakabuamba kumpala kua bantu ba bungi too ne kua bantu banene ba mu ditunga. Kudi bana betu lelu badi batshina bua kuyisha mu misesu anyi kuyisha bantu banene, nunku badi dijinga ne dikima. Kadi tuikale bashindike ne: Nzambi neatukuatshishe anu muvuaye mukuatshishe Yelemiya.​—Eb. 10:39; 13:6.

¹³ Bu muvua malu a ntendelelu ne a tshididi mashintuluke bikole mu Yuda, mmushindu kayi uvua bamfumu ba  tshitendelelu mua kuangata mêyi a Yelemiya? Muprofete muine udi wamba ne: ‘Bakuidi ne baprofete ne bantu bonso bakankuata bamba ne: Wewe neufue bulelela.’ Bakamba ne tshiji tshionso ne: ‘Muntu eu udi ne bua kufua.’ (Bala Yelemiya 26:8-11.) Kadi baluishi ba Yelemiya bakapangila bua kumushipa. Yehowa uvua nende bua kumupandisha. Yelemiya kakalekela lonji lua baluishi bende anyi bungi buabu bumutshingisha to. Ke tshitudi petu ne bua kuenza.

14, 15. (a) Mmudimu kayi uvua Yelemiya ne mufundi wende Baluka batuadije mu tshidimu tshinayi tshia bukokeshi bua Yehoyakima? (b) Yehoyakima uvua muntu wa bishi? (Tangila kazubu kadi mu  dibeji dia 25.)

¹⁴ Mu tshidimu tshinayi tshia bukokeshi bua Yehoyakima, Yehowa wakambila Yelemiya bua kufunda mêyi onso avuaye mumuambile katshia ku bukokeshi bua Yoshiya. Nunku, Yelemiya wakambila Baluka mufundi wende bua kufunda malu onso avua Nzambi mumuambile mu bidimu 23 bishale. Mêyi ende a dilumbuluisha avua atangila bakalenge ne makalenge matue ku 20. Yelemiya wakambila Baluka bua kubala muvungu uvuaye mufunde ne dîyi dikole ku nzubu wa Yehowa. Bua tshinyi? Yehowa wakamba ne: ‘Bumue bena Yuda nebumvue bua makenga andi mpangadija bua kubenzela, bua bobu balekele muntu ne muntu kuenda mu njila wende mubi; bua meme mmanye mua kubabuikidila malu mabi abu ne bubi buabu.’​—Yel. 25:1-3; 36:1-3.

¹⁵ Pavua muena mudimu wa mukalenge Yehoyakima mumubadile muvungu, mukalenge wakaukosolola ne kuosha. Pashishe kutumaye dîyi bua balue ne Yelemiya ne Baluka. “Kadi Yehowa wakabasokoka.” (Bala Yelemiya 36:21-26.) Bua bienzedi bibi bia Yehoyakima Yehowa wakamba ku butuangaji bua muprofete wende ne: “Nebamujike bu mudibu bajika nyama wa mpunda.” Bavua ne bua ‘kumukoka panshi ne kumuimansha panyima pa bibi bia Yelushalema.’ (Yel. 22:13-19) Tudiku mua kuamba ne: Yelemiya uvua wela kalela muaba eu anyi?

16. Mmalu kayi mimpe avua Yelemiya mumanyishe?

¹⁶ Nansha muvua Yelemiya umanyisha mikenji ya dipisha nayi bantu, kavua muprofete uvua umanyisha anu makenga to. Uvua kabidi umanyisha malu mimpe avua alua kumpala. Tshilejilu, wakamanyisha muvua Yehowa ne bua kusungila bena Isalele bakese kudi baluishi babu ne kubapingaja mu buloba buabu muvuabu ne bua kusomba mu ditalala. Nzambi uvua ne bua kuenza ‘tshipungidi tshipiatshipia’ ne tshia “tshiendelele” ne tshisamba tshiende ne kufunda mikenji  yende mu mioyo yabu. Uvua ne bua kubabuikidila mibi yabu ne kuyipua muoyo bua kashidi. Pashishe, muana wa mu ndelanganyi ya Davidi uvua ne bua ‘kujadika kulumbulula kuimpe ne buakane mu buloba.’ (Yel. 31:7-9; 32:37-41; 33:15) Milayi eyi ivua ne bua kukumbana mu bidimu bivua bilonda too ne mu bikondo bietu ebi ne kutupesha ditekemena bua matuku atshilualua. Kadi mu matuku a Yelemiya, baluishi ba bena Yuda batshivua batungunuka ne kufuilakana bukokeshi bua tshitupa tshiabu tshia buloba.​—Bala Yelemiya 31:31, 33, 34; Ebelu 8:7-9; 10:14-18.

17, 18. Mmalu kayi akenzeka mu matunga makuabu ne mu Yuda ku ndekelu kua bukokeshi bua Yehoyakima ne bua Sedekiya?

¹⁷ Mu 625 kumpala kua Yezu, bena Babulona ne bena Ejipitu bakaluangana mvita mikole mu Kâkemisha mutantshi wa kilometre mitue ku 600 ku Nord kua Yelushalema pabuipi ne musulu wa Pelata. Mukalenge Nebukadenesâ wakatshimuna biluilu bia Palô Neko ne kunyenga bena Ejipitu bukokeshi bua tshitupa tshia buloba atshi. (Yel. 46:2) Nebukadenesâ wakatuadija kukokesha Yuda ne wakenzeja Yehoyakima bua kulua muena mudimu wende. Kadi bidimu bisatu pashishe, Yehoyakima wakamutombokela. (2 Bak. 24:1, 2) Ke Nebukadenesâ ne biluilu biende kulua mu Yuda mu 618 ne kunyunguluka Yelushalema. Tshinkabi muvua tshikondo atshi mua kuikala tshikole too ne bua Yelemiya muprofete wa Nzambi. Bidi bimueneka ne: Yehoyakima wakafua pavuabu batshintshimike Yelushalema. b Muanende Yehoyakina wakadifila  kudi bena Babulona yeye mumane kuenza anu ngondo isatu mu bukalenge bua Yuda. Nebukadenesâ wakapawula bintu bimpe bionso bia mu Yelushalema, kuya ne Yehoyakina mu bupika pamue ne dîku dia mukalenge, banene ba mu ditunga, mbuena kuamba ne: bantu bavua ne bukole ne bena bukitu bonso. Munkatshi mua bantu bavuabu baye nabu mu bupika muvua Danyele, Hananiya, Mishaele ne Azaliya.​—2 Bak. 24:10-16; Dan. 1:1-7.

¹⁸ Nebukadenesâ wakateka Sedekiya muana mukuabu wa Yoshiya mukalenge mu Yuda. Yeye ke wakalua mukalenge  wa ndekelu wa pa buloba wa mu ndelanganyi ya Davidi. Bukokeshi buende buakajika pakabutulabu Yelushalema ne ntempelo wende mu 607 kumpala kua Yezu. (2 Bak. 24:17) Kadi bidimu 11 bia bukokeshi bua Sedekiya bivua bia bimvundu bia bungi mu Yuda. Bidi bimueneka ne: Yelemiya uvua ne bua kueyemena anu Nzambi uvua mumuteke muprofete.

19. Ntshinyi tshivua bantu ba mu matuku a Yelemiya benze pavuaye mubambile dîyi dia Nzambi? Bua tshinyi bualu ebu budi bukutangila pebe?

¹⁹ Tetabi kuditeka pa muaba wa Yelemiya. Kutuadijila mu tshikondo tshia Yoshiya, Yelemiya uvua mumone muvua malu a tshididi mashintuluke bikole ne muvua tshisamba tshia Nzambi tshienda tshimuela nyima. Kadi uvua mumanye ne: malu avua ne bua kunyanguka kabidi bikole. Bantu ba mu musoko wabu bakamuambila ne: ‘Kuambi dîyi mu dîna dia Yehowa kabidi bua wewe kufu ku bianza bietu.’ (Yel. 11:21) Nansha pakakumbana milayi ya Yelemiya, bena Yuda bakamuambila ne: ‘Tudi tuamba bua dîyi diebe diwakutuambila mu dîna dia Yehowa ne: Katuena tukumvuila.’ (Yel. 44:16) Pabi mioyo ya bantu ivua mu njiwu anu bu mudibi lelu. Malu audi uyisha nga Yehowa anu bu muvuabi bua Yelemiya. Bu mudibi nanku, udi mua kuvudija tshisumi tshiebe mu mudimu wa kuyisha paudi ukonkonona muvua Yehowa mulame muprofete wende mu tshikondo tshiakafikisha ku kabutu ka Yelushalema.

20. Bua tshinyi bukokeshi bua Sedekiya buvua bukebele Yelemiya ntatu ya bungi? (Tangila kazubu kadi mu  dibeji dia 29.)

²⁰ Pamuapa mu bukokeshi bua Sedekiya ke muvua Yelemiya  mumone mabika ne mala mu mudimu wende wa buprofete. Anu bu bakokeshi ba bungi bavua bamudianjidile, Sedekiya wakatungunuka ne ‘kuenza malu avua mabi ku mêsu kua Yehowa.’ (Yel. 52:1, 2) Uvua ku bukokeshi bua bena Babulona ne Nebukadenesâ wakamuenzeja mutshipu mu dîna dia Yehowa bua akokele mukalenge wa Babulona. Nansha nanku, Sedekiya wakalua kumutombokela. Anu mu tshiotshi tshikondo atshi, baluishi ba Yelemiya bavua bamuenzeja bikole bua aditeke ku luseke lua bantomboji.​—2 Kul. 36:13; Yeh. 17:12, 13.

21-23. (a) Mbisumbu kayi bibidi biakenzeka mu Yuda mu bukokeshi bua Sedekiya? (b) Ntshinyi tshiakenzelabu Yelemiya bualu wakabenga kubuelakana mu malu au? Bua tshinyi bidi mua kutuambuluisha?

²¹ Ku ntuadijilu kua bukokeshi bua Sedekiya, bantu bakalua mu Yelushalema bafumina kudi bakalenge ba bena Edome, Moaba, Amona, Tulo ne Sidona. Pamuapa bavua bajinga bua Sedekiya adisangishe kudibu bua kuluisha Nebukadenesâ. Kadi Yelemiya wakambila Sedekiya bua kukokela bena Babulona. Mu diumvuangana ne bualu abu, Yelemiya wakapesha bantu bavuabu batume abu bikokedi bua kuleja ne: bisamba biabu bivua ne bua kukuatshila bena Babulona mudimu. (Yel. 27:1-3, 14) Tshivua Yelemiya muenze atshi katshiakasankisha bantu to, ne Hananya wakanyangakaja kabidi malu bikole. Hananya uvua muprofete wa dishima uvua wamba patoke muvua Nzambi mumuambile ne: nebumbuke ku bupika bua bena Babulona. Kadi Yehowa wakamba mukana mua Yelemiya ne: Hananya muena dishima au uvua ne bua kufua munda mua tshidimu tshimue, ne ke tshiakenzeka.​—Yel. 28:1-3, 16, 17.

²² Mu Yuda muakenzeka bisumbu bibidi: tshia bantu bavua basue kukokela bena Babulona, ne tshia bavua basue kubatombokela. Mu 609 kumpala kua Yezu, Sedekiya wakatombokela bena Babulona ne kukebaye diambuluisha kudi biluilu bia bena Ejipitu. Nunku Yelemiya kavua ne tshikuabu tshia kuenza to, uvua anu ne bua kutantamena  tshiji tshia bantomboji. (Yel. 52:3; Yeh. 17:15) Nebukadenesâ ne biluilu biende bakapingana mu Yuda bua kujikija buntomboji, kukuatabu misoko yonso ya mu Yuda ne kutshintshimika Yelushalema kabidi. Mu tshikondo tshikole atshi, Yelemiya wakambila Sedekiya ne bantu bende ne: bena Babulona bavua ne bua kukuata Yelushalema. Bantu bavua bashala mu tshimenga bavua ne bua kufua. Kadi bavua badifila kudi bena Kasada bavua ne bua kupanda.​—Bala Yelemiya 21:8-10; 52:4.

²³ Banene ba mu Yuda bakamba muvua Yelemiya muena tshitungu uvua mutue ku tshia bena Babulona. Pakabambilaye bulelela, bakamukuma ne kumuela mu buloko. (Yel. 37:13-15) Nansha nanku, Yelemiya kakatekesha mukenji wa kudi Yehowa to. Ke bualu kayi, banene abu bakitabijija Sedekiya bua kushipa Yelemiya. Bakela muprofete eu mu tshina tshivuabu balamina mâyi muvua mushale anu bitotshi bua afue. Kadi Ebede-meleke muena Atiopa uvua wenza mudimu mu nzubu wa mukalenge wakamusungila. (Yel. 38:4-13) Nansha lelu, Bantemu ba Yehowa ba bungi batu bamba kujimija mioyo yabu bualu badi babenga kubuelakana mu bimvundu bia bena tshididi. Nunku, malu akenzekela Yelemiya adi mua kukuambuluisha bua kutantamena ntatu.

24. Umvuija malu avua menzeke mu 607 kumpala kua Yezu.

²⁴ Ndekelu wa bionso mu 607 kumpala kua Yezu, bena Babulona bakabuela mu tshimenga tshia Yelushalema ne kutshikuata. Biluilu bia Nebukadenesâ biakosha ntempelo wa Yehowa, kupula bimanu bia tshimenga ne kushipa banene ba mu Yuda. Sedekiya wakateta bua kunyema kadi bakamukuata ne kupingana nende kumpala kua Nebukadenesâ. Kushipabu bana ba Sedekiya mu mêsu ende, pashishe Nebukadenesâ kumushipa mêsu, kumusuika ne kuya nende mu Babulona. (Yel. 39:1-7) Mêyi akamba Yelemiya bua Yuda ne Yelushalema akakumbana bulelela. Kadi pamutu pa kusanka, muprofete wa Nzambi wakadila bua dikenga divua dikuate tshisamba tshiende. Tudi mua kumanya muakumvuaye  patudi tubala mukanda wa Muadi. Malu adimu adi ne bua kutulenga bikole.

25, 26. (a) Mmalu kayi akalonda dibutuka dia Yelushalema? (b) Ntshinyi tshiakenza bena mu tshikondo tshia Yelemiya pavuaye mubambile malu panyima pa dibutuka dia Yelushalema?

²⁵ Ntshinyi tshivua tshienzekela Yelemiya pavua malu onso aa enda enzeka? Banene ba mu Yelushalema bavua bamuele mu buloko, kadi bena Babulona bakamupatula ne kumuenzela malu mimpe. Pashishe Yelemiya wakadisangana munkatshi mua bena Yuda bavuabu baya nabu ku bupika, kadi bakamulekela. Utshivua ne bia bungi bia kuenza mu mudimu wa Nzambi ne utshivua ne mudimu wa kuenza munkatshi mua bantu bavua bapanduke. Nebukadenesâ wakateka Gedaliya ngovena wa ditunga divuaye mukuate ne kulayaye bantu bavua bashale mu Yuda ne: bobu batungunuke ne kumukokela, nebasombe mu ditalala. Kadi bena Yuda bavua bualu abu kabuyi busankisha bakashipa Gedaliya. (Yel. 39:13, 14; 40:1-7; 41:2) Yelemiya wakabela bena Yuda bavua bashale bua batungunuke ne kusomba mu ditunga ne kabatshinyi mukalenge wa Babulona. Kadi bakokeshi babu bakamba muvua Yelemiya muena dishima ne kunyemabu batangile mu Ejipitu. Bakenzeja Yelemiya ne Baluka bua babalonde. Kadi Yelemiya wakamanyisha kabidi ne: Nebukadenesâ nealue kukuata ditunga dia Ejipitu ne kukengesha bena Yuda bavua baye kusokomamu.​—Yel. 42:9-11; 43:1-11; 44:11-13.

²⁶ Musangu eu kabidi, bena mu ditunga dia ba Yelemiya bakabenga bua kuteleja muprofete wa Nzambi mulelela. Bua tshinyi? Bavua badiambila ne: ‘Katshia tualekela kuoshila mukalenge mukaji musenga wa manananshi ne kumupongoluela milambu ya bia kunua, tuakukengela bintu bionso, tuakufua ku muele wa mvita ne ku tshiyole.’ (Yel. 44:16, 18) Bualu ebu budi buleja mukavua bena mu  tshikondo tshia Yelemiya banyanguke bikole. Kadi budi butukankamija patudi tumona ne: muntu mupange bupuangane udi mua kushala mulamate Yehowa nansha yeye munkatshi mua bantu babi.

27. Ntshinyi tshitudi bamanye bua matuku a ndekelu a mudimu wa Yelemiya?

²⁷ Bualu bua ndekelu buvua Yelemiya mufunde buakenzeka mu 580 kumpala kua Yezu ne budi buleja muvua Ewile-melodaka uvua mupingane Nebukadenesâ mu nkuasa mupatule Yehoyakina mu buloko. (Yel. 52:31-34) Tshikondo atshi, Yelemiya uvua ne bua kuikala ne bidimu bitue 90. Katuena bamanye bimpe tshivua tshimuenzekele ku ndekelu kua muoyo wende to. Kadi bidi bimueneka ne: wakaya kufuila mu Ejipitu muikale anu ne lulamatu, ne mumane kuenza mudimu wa buprofete munkatshi mua bidimu bitue ku 67. Wakenza mudimu wende eu munkatshi mua bidimu bivua ntendelelu mulelela mutumbe ne munkatshi mua bivule pavua bantu ba bungi batombokele Nzambi. Kuvua bantu bavua batshina Nzambi bavua bamuteleja. Kadi ba bungi bavua babenga bivuaye wamba ne baleja patoke muvuabu bamukine. Biakapangisha Yelemiya bua kuenza mudimu wende anyi? Nansha kakese. Yehowa uvua mumuambile anu ku ntuadijilu ne: ‘Nebaluangane nebe, kadi kabena bakupita bukole; bualu bua meme ndi nebe bua kukupandisha.’ (Yel. 1:19) Mudimu wetu wa Bantemu ba Yehowa lelu udi anu bu wa Yelemiya. Nunku, tumanyayi ne: bantu nebatuenzele malu anu muvuabu benzele Yelemiya. (Bala Matayo 10:16-22.) Nunku, mmalongesha kayi atudi mua kupetela kudi Yelemiya ne mmushindu kayi utudi mua kuenza mudimu wetu? Netuandamune nkonko eyi mu nshapita udi ulonda.