1, 2. (a) Ntatu kayi itu bena Kristo bapeta bua balunda? (b) Bua tshinyi tudi ne bua kukonkonona mushindu uvua Yelemiya musungule balunda bende?

 UDI mua kuenza tshinyi bobu bakubikile kudi bena mudimu nebe, bena mutumba anyi balongi nebe mu tshibilu tshia Nowele? Newenze tshinyi bikala mfumuebe wa mudimu ukulomba bua kushima anyi kuenza bualu budi mikenji ya ditunga mikandike? Newenze kabidi tshinyi bamfumu ba mbulamatadi bobu bakuambile bua kuenza bualu budi mua kukubuejakaja mu malu a pa buloba? Imue misangu kondo kebe ka muoyo nekakuambile bua kubenga kuenza malu aa, nansha mudibi mua kufikisha bantu ku dikupuekesha milongo anyi ku dikuenzela malu mabi.

² Anu mutuabimona, Yelemiya uvua upetangana ne ntatu ya mushindu eu bikole. Wewe mukonkonone bantu bavua Yelemiya upetangana nabu mu mudimu wende, bidi mua kukuambuluisha. Bamue ba kudibu bavua bateta kumutekesha mu mikolo bua alekele mudimu wende. Yelemiya uvua ne bua kupetangana nabu misangu ya bungi, kadi kabavua balunda bende to. Tshidibi, bidi mua kukuambuluisha bua kumanya balunda bavua Yelemiya musungule, bavua bamukuatshisha ne bamukankamija bua atungunuke ne mudimu wende. Bushuwa, mushindu uvua Yelemiya  musungule balunda udi mua kutulongesha malu a bungi.

3. Ntshinyi tshivua Sedekiya ukeba kudi Yelemiya? Yelemiya wakenza tshinyi?

³ Mukalenge Sedekiya wakakonka Yelemiya malu misangu ya bungi kumpala kua kubutulabu Yelushalema. Bua  tshinyi? Uvua ukeba bua amuambile malu avua mua kumukankamija avua atangila bukalenge buende. Uvua musue Yelemiya amumanyishe ne: Nzambi neasungile bena Yuda kudi baluishi babu. Sedekiya wakatuma bantu kudi Yelemiya umusengelela ne: ‘Ndi nkusengelela bua kutukonkelaku kudi Yehowa bua bualu buetu; bualu bua Nebukadanesâ, mukalenge wa Babulona udi uluangana netu mvita. Bumue Yehowa neatuenzele bimpe bu mudi midimu yende yonso ya kukema, bua Nebukadanesâ umuke kutudi.’ (Yel. 21:2) Mukalenge kavua musue kutumikila tshivua Nzambi mumuambile bua kudifila mu bianza bia bena Babulona. Muntu mukuabu wakafuanyikija Sedekiya ne “mubedi udi upingana njila ne njila kudi munganga bua amukankamije, kadi ubenga kuangata manga adibu bamufundila.” Netuambe tshinyi bua Yelemiya? Sedekiya uvua mua kumunanga bu yeye umuambila malu avuaye musue kumvua. Kadi bua tshinyi Yelemiya kavua mushintulule malu avuaye wamba bua kuepuka ntatu? Wakabenga bua kuenza nanku bualu Yehowa uvua mumuambile bua kumanyisha ne: Yelushalema uvua ne bua kubutuka.​—Bala Yelemiya 32:1-5.

4. Mmapangadika kayi atudi ne bua kuangata pa bidi bitangila balunda bu mudi ku mudimu?

⁴ Mu mishindu mikuabu, nsombelu webe mmufuanangane ne wa Yelemiya. Kakuyi mpata utu upetangana ne bena mutumba, bena mudimu anyi balongi nebe matuku onso. Kadi neudie nabu bulunda nansha mudibi bimueneka ne: ki mbasue kuteleja malu adi Nzambi wamba ne kuatumikila anyi? Yelemiya kavua mua kuepuka Sedekiya to, bualu uvua anu mukalenge nansha muvuaye ubenga kulonda mibelu ya Nzambi. Kadi Yelemiya kavua muenzejibue bua kuitaba meji mabi a mukalenge anyi kukeba dianyisha diende to. Bu Yelemiya muenze tshivua mukalenge Sedekiya musue, mukalenge uvua mua kumupesha bintu bungi tshianana. Kadi Yelemiya wakabenga bua kupona mu diteta dia kulua mulunda wa Sedekiya. Bua tshinyi? Bualu uvua mudisuike  bua kutungunuka ne kuenza tshivua Yehowa mumuambile. Tshilejilu tshiende tshidi mua kutuambuluisha bua kumona bikala balunda batudi basungule batusaka bua kutungunuka ne kuenzela Nzambi mudimu. Kuena mua kuepuka bantu badi kabayi benzela Nzambi mudimu, nansha ku mudimu, mu tulusa anyi ku mitumba to. (1 Kol. 5:9, 10) Kadi udi mumanye ne: wewe musungule balunda ba mushindu eu, udi mua kunyanga bulunda buebe ne Nzambi.

5, 6. Ntshinyi tshivua bantu bakuabu benze bua kupangisha Yelemiya bua kuenza mudimu wende?

⁵ Ki nganu Sedekiya nkayende uvua uteta mua kutekesha Yelemiya mu mikolo to. Muakuidi mukuabu diende Pashû “wakakuma” Yelemiya mfimbu mitue ku 39. (Yel. 20:2; Dut. 25:3) Banene bakuabu ba mu Yuda bakenza bualu bua muomumue ne kuelabu Yelemiya mu ‘nzubu  wa lukanu.’ Bakamuela mu buloko bubi butambe ne panyima pa mutuku a bungi wakabanga kutshina ne: uvua mua kufuilamu. (Bala Yelemiya 37:3, 15, 16.) Pashishe, bakalua kumupatula bua matuku makese, ne banene bakuabu kusakabu Sedekiya bua kumushipa. Buabu buobu, uvua utekesha basalayi bena Yuda mu mikolo. Ke bualu kayi bakalua kumuela mu tshina tshivuabu balamina mâyi tshivua ne bitotshi muvuaye mua kufuila. (Yel. 38:1-4) Tukavua bamone ne: bakasungila Yelemiya ku lufu lubi elu. Kadi malu aa adi aleja muvua bantu bavua ne bua kuambuluisha Yelemiya babenge malu avuaye wamba ne bamukudimukile.

⁶ Baluishi ba Yelemiya kabavua anu bantu bavua ne bukokeshi to. Dituku dikuabu, bantu ba mu musoko wabu wa Anatota anyi bena mutumba bende bakamukanyina bua kumushipa yeye mutungunuke ne kuenza mudimu wa buprofete. (Yel. 11:21) Bakamukanyina bualu kabavua basue malu avuaye ubambila to. Kadi Yelemiya wakasungula bua kuikala mulunda wa Yehowa pamutu pa kuikala mulunda wa bena mutumba nende. Kuvua bantu bakuabu bakateta bua kumuenzela bibi. Tshilejilu, pavua Yelemiya muenze  mutshi wa tshikokedi bua kusaka bena Yuda bua kukokela mukalenge wa Babulona ne kushalabu ne muoyo, Hananya wakumbusha tshikokedi tshia dibaya atshi pa nshingu wa Yelemiya ne kutshitshibula. Bilondeshile muprofete wa dishima eu, Yehowa uvua muambe ne: ‘Ngakutshibula mutshi wa tshikokedi wa mukalenge wa Babulona.’ Hananya wakafua anu tshiotshi tshidimu atshi, ne biakamueneka ne: Yelemiya ke uvua muprofete mulelela. (Yel. 28:1-11, 17) Bobu bamane kubutula Yelushalema anu muvua Yelemiya muambe, Yohanana ne bamfumu bakuabu ba basalayi bakabenga bua kutumikila dîyi dia Nzambi bua kushala mu Yuda. Bakambila Yelemiya ne: ‘Wewe udi wamba mêyi a mashimi. Yehowa Nzambi wetu kakukutuma bua kutuambila ne: Kanuyi mu Ejipitu bua kushikamamu.’ Bakabenga kutumikila Nzambi pakaluabu kuenzeja Yelemiya ne Baluka bua kuya nabu mu Ejipitu.​—Yel. 42:1–43:7.

7. Ndutatu kayi lua kushala mulamate Nzambi luudi nalu?

⁷ Munkatshi mua bidimu bia bungi Yelemiya uvua munyunguluka kudi baluishi bende ne bantu bavua kabayi batumikila Nzambi. Ela meji bua nsombelu wende. Bivua bitekete bua kuitabaye bulunda bua bantu bavua kabayi banemeka Nzambi ne Dîyi diende. Bavua bamunyunguluke ku nseke yonso. Netuambe tshinyi buebe wewe? Udi mua kuikala utuilangana ne bantu ba buena bavua banyunguluke Yelemiya. Newitabe bua kuikalabu balunda bebe nansha mudibu bakuluisha ne tshikisu ne baluisha Nzambi webe peshi bamueneka bu bantu bimpe anyi? Nebikaleku bimpe bua kudia bulunda ne bantu badi kabayi bangata milayi ya Nzambi ne mushinga anyi? Bu Yelemiya muikale pa muaba webe, uvuaku mua kuitaba bua kudia bulunda ne bantu badi kabayi batumikila Dîyi dia Nzambi mu nsombelu wabu  peshi badi beyemena bantu anyi? (2 Kul. 19:2) Nzambi uvua muleje Yelemiya patoke bua tshivua ne bua kufikila bantu bavua beyemena bantu nabu pamutu pa kueyemena Nzambi. (Bala Yelemiya 17:5, 6.) Udi umona bualu ebu bishi?

8. Leja ntatu itu bena Kristo ba muaba unudi bapeta mu malu a bulunda.

⁸ Bena Kristo bakuabu mbamone ne: badi mua kutuma midimu yabu ya bianza kumpala padibu basomba bikole ne bantu batu babasumba bintu, badia nabu ne banua nabu. Kadi kuenza nunku kudi mua kubafikisha ku disomba ne bantu babi ne ku njiwu bu mudi ya miyuki ya malu a busenji peshi ku dikuatshika dia maluvu. Ke bualu kayi bena Kristo ba bungi badi mu malu a mishinga batu babenga kudia bulunda ne bantu babi, nansha mudibi mua kubapangisha makuta a bungi anyi bintu bikuabu. Bia muomumue, mfumuetu wa mudimu anyi bena mudimu netu kabena bamona kuibila bu bualu bubi to. Kadi bena Kristo balelela kabena balonda bikadilu bia bantu badi babanyunguluke to. Imue misangu, kuangata mapangadika mu malu aa kakutu kutekete to. Tudi ne dianyisha dia bungi bua bilejilu bu mudi tshia Yelemiya, bualu uvua ne nsombelu uvua umuambuluisha bua kuikala ne kondo ka muoyo kimpe, kadi nangananga bua kulama malanda mimpe ne Nzambi.

9. Njiwu kayi itudi mua kupeta tuetu basue kuenza tshidi bantu bonso benza?

⁹ Bamue bena Yuda bavua baseka Yelemiya bua malu avuaye wenza ne wamba. (Yel. 18:18) Nansha nanku, yeye uvua mudisuike bua kuikala mushilangane nabu bualu bobu bavua benda ‘mu njila uvuabu badisunguile.’ (Yel. 8:5, 6) Yelemiya uvua mene muitabe bua ‘kushikama pa nkayende’ imue misangu pamutu pa kusomba ne bantu bavua mua kumunyanga. (Bala Yelemiya 9:4, 5; 15:17.) Netuambe tshinyi buebe wewe? Anu muvuabi mu matuku a Yelemiya, lelu bantu badi babenga bua kulamata Nzambi anu bua kulonda njila udibu badisunguile. Batendeledi ba Yehowa batu  misangu yonso ne budimu patubu basungula balunda babu. Kabiena biumvuija ne: Yelemiya kavua ne balunda to. Kuvua bantu bavua bamusungila ne bamuambuluisha. Bavua banganyi? Wewe mubamanye nebikuambuluishe bikole.

10, 11. (a) Yelemiya uvua usungula balunda bende bilondeshile tshinyi? (b) Mbanganyi bavua balunda ba Yelemiya? Nkonko kayi idi ijuka bua balunda abu?

¹⁰ Yelemiya uvua mudie bulunda ne bantu ba mushindu kayi? Ku bulombodi bua Yehowa, wakapisha misangu ne misangu bantu bavua ne muoyo mubi, bashimangana, benzelangana malu mabi, bena tshikisu, bavua kabayi baditeka pa muaba wa bakuabu ne bena tshiendenda, mbuena kuamba ne: bantu bonso bavua balekela ntendelelu mulelela bua kutendelela nzambi ya dishima. Wakabela bena Yuda nende ne: ‘Buonso buenu nulekele kuenda mu njila mibi, nulengeje bienzedi bienu ne malu anudi nuenza.’ (Yel. 18:11) Nansha pakavuabu babutule Yelushalema, Yelemiya wakatumbisha “malu makane” a Nzambi, “luse” luende ne ‘bujalame’ buende. (Muad. 3:22-24) Yelemiya uvua musue kuikala anu ne balunda bavua balamate Yehowa.​—Bala Yelemiya 17:7.

¹¹ Tudi bamanye ne: Yelemiya uvua ne balunda bu mudi Ebede-meleke, Baluka, Selaya ne bana ba Shafana. Tudi mua kudiebeja ne: ‘Bavua bantu ba mushindu kayi? Mmalanda kayi avuabu nawu ne Yelemiya? Bua tshinyi tudi mua kuamba ne: bavua balunda bimpe? Mmushindu kayi uvuabu bambuluishe Yelemiya bua kulama muoyo wende mutoke?’ Patudi tuandamuna nkonko eyi, tuele meji ku nsombelu wetu.

12. (a) Bilondeshile tshimfuanyi tshidi mu dibeji dia 58, mmudimu kayi uvua Yelemiya ne Baluka benza pamue? (b) Selaya uvua nganyi? Ntshinyi tshitudi bamanye bua bualu buende?

¹² Bidi bimueneka ne: Baluka muana wa Neliya ke uvua mulunda munene wa Yelemiya. Yelemiya wakamupesha  bujitu bunene bua kufunda mêyi a kudi Yehowa avuaye umuambila ne kuya kuabala munkatshi mua bantu ba bungi ne pashishe kumpala kua banene ba mu Yuda. (Yel. 36:4-8, 14, 15) Baluka uvua mutuishibue anu bu Yelemiya ne: malu avua Nzambi muambe neakumbane. Balunda babidi aba bakapeta ntatu ya muomumue mu bidimu 18 bia bimvundu bia ku ndekelu kua bukokeshi bua bena Yuda. Bavua benza mudimu wa Nzambi pamue bikole. Bonso bakapeta ntatu ne kusokomabu baluishi babu. Yehowa wakakankamija yonso wa kudibu. Bidi bimueneka ne: Baluka uvua wa mu dîku dia bafundi bavua bamanyike bikole mu Yuda. Bible udi umubikila ne: “Mufundi,” ne muanabu Selaya uvua muntu munene mu mbulamatadi wa ditunga. Anu bu Baluka, Selaya wakalua pende kuenza mudimu ne Yelemiya bua kumanyisha malu a kudi Yehowa. (Yel. 36:26; 51:59-64) Dijinga dia bana babidi ba Neliya dia kuenza mudimu ne Yelemiya mu tshikondo tshikole atshi, divua ne bua kuikale dimukankamije ne dimukoleshe bikole. Wewe pebe udi mua kupeta dikankamija ne bukole kudi bantu banudi nuenza nabu mudimu wa Yehowa ne lulamatu.

13. Anu mudibi bileja mu dibeji dia 63, mmunyi muvua Ebede-meleke muleje muvuaye mulunda muimpe wa Yelemiya?

¹³ Ebede-meleke uvua pende mulunda wa Yelemiya. Pavua banene ba mu Yuda bafikile Yelemiya munda ne bamuele mu tshina tshia mâyi bua afuilemu, bakamusungila kudi Ebede-meleke muena Atiopa, muntu wa ku ba bende. Uvua muntu mutungula, mbuena kuamba ne: uvua wenza mudimu mu nzubu wa mukalenge. Wakaya kudi Sedekiya ne dikima dionso pavuaye musombe ku tshiibi tshia Benyamina bua kumulomba kumpala kua bantu bonso dianyisha dia kupatula Yelemiya mu tshina tshia mâyi atshi. Wakangata  bantu 30 bua kuenza nabu mudimu au, bualu uvua mua kuikala wela meji ne: baluishi ba Yelemiya bavua mua kumuluisha. (Yel. 38:7-13) Katuena bamanye bimpe malanda avua pankatshi pa Ebede-meleke ne Yelemiya to. Kadi bu muvuabu bonso babidi banange Yehowa, tudi mua kuamba ne: bavua balunda bimpe. Ebede-meleke uvua mumanye ne: Yelemiya uvua muprofete wa Yehowa. Wakamba muvua bienzedi bia banene ba mu Yuda “bibi” ne wakitaba bua kujimija mudimu wende bua kuenza malu mimpe. Bushuwa, Ebede-meleke uvua muntu muimpe. Ke bualu kayi Yehowa wakamujadikila ne: ‘Nenkupandishe mu dituku dia dikenga dia Yelushalema bualu bua wewe wakungeyemena.’ (Bala Yelemiya 39:15-18.) Yehowa wakaleja patoke muvuaye mumuanyishe. Ki mbalunda ba mushindu eu baudi musue kuikala nabu anyi?

14. Ntshinyi tshitudi bamanye bua dîku dia Shafana ne malanda avua pankatshi pabu ne Yelemiya?

¹⁴ Yelemiya uvua kabidi mulunda wa bana ba Shafana basatu ne munkana wende umue. Bavua mu dîku dia  bantu banene bualu Shafana uvua mufundi wa mukalenge Yoshiya. Pavua baluishi ba Yelemiya basue kumushipa bua musangu wa kumpala, ‘tshianza tshia Ahikama, muana wa Shafana ke tshiakakuatshisha Yelemiya bua kabamufidi mu bianza bia bantu.’ (Yel. 26:24) Ahikama uvua ne muanabu uvuabu babikila ne: Gemaleya. Pavua Baluka mubale mukenji wa kudi Nzambi kumpala kua bantu, Mikaya muana wa Gemaleya wakamuteleja ne kuya kuambila tatuende ne banene bakuabu. Bu muvuabu batshina tshiji tshia Yehoyakima, bakambila Yelemiya ne Baluka bua kuya kusokoma. Pakabenga mukalenge mukenji wa kudi Nzambi, Gemaleya uvua munkatshi mua bantu bavua bamusengelela bua kuoshi muvungu to. (Yel. 36:9-25) Yelemiya wakapesha Elasa muana mukuabu wa Shafana mukanda uvua ne milayi ya kudi Nzambi bua kuupesha bena Yuda bavua mu bupika mu Babulona. (Yel. 29:1-3) Nunku, mu dîku dia Shafana muvua bana basatu ne munkana umue bavua bambuluishe muprofete wa Nzambi. Ela meji muvua Yelemiya mua kuikala wanyisha bantu abu. Bavua balunda ki mbualu bavua banange biakudia bia muomumue, maluvu a muomumue anyi bualu bavua banange manaya amue to. Bulunda buabu buvua buimanyine pa tshintu tshia mushinga mukole.

15. Ntshilejilu kayi tshimpe tshidi Yelemiya mutushile mu disungula dia balunda?

¹⁵ Tshilejilu tshia malanda avua Yelemiya nawu ne bantu babi ne bantu bimpe tshidi mua kutulongesha malu a bungi. Mukalenge, bantu banene ba bungi, baprofete ba dishima ne bamfumu ba basalayi bavua bamusaka bua kushintulula mukenji wa kudi Nzambi. Kadi Yelemiya kakitaba nansha kakese. Bualu ebu buakenza bua bantu abu bamukine, kadi Yelemiya kavua ukeba bulunda buabu to. Mulunda wende munene uvua Yehowa. Yelemiya uvua mudisuike bua kuitaba ntatu ya kudi bamue bantu pamutu pa kulekela lulamatu luende kudi Nzambi. (Bala Muadi 3:52-59.) Anu mutudi babimone, ki nganu Yelemiya nkayende uvua mudisuike bua kutungunuka ne kuenzela Yehowa mudimu to.

16, 17. (a) Ndiambuluisha kayi didi mutendeledi wa Yehowa mua kupeta kudi mulunda muimpe? (b) Nkuepi kuudi mua kupeta balunda bimpe nansha wewe mu ditunga kayi?

¹⁶ Ebede-meleke uvua mulunda muimpe bualu uvua witabuja Yehowa ne umueyemena. Uvua ne dikima dia bungi bualu wakapandisha Yelemiya. Baluka wakitaba bua kusomba bikole ne Yelemiya ne kumuambuluisha bua kumanyisha bantu mêyi a kudi Yehowa. Balunda bimpe badi mu tshisumbu tshia bena Kristo lelu badi mua kutuambuluisha anu bu muvua bantu aba benze. Tshilejilu, Cameron muanetu wa bakaji wa bidimu 20 udi mpanda-njila wa pa tshibidilu udi ne dianyisha dia bungi bua muvua muanetu Kara udi pende mpanda-njila mumuambuluishe. Cameron udi wamba ne: “Tshilejilu tshia Kara ne mêyi ende biakankankamija bua kuteka Yehowa pa muaba wa kumpala mu nsombelu wanyi.” Bana betu babidi aba mbasombe mu misoko idi kule umue ne mukuabu, kadi Kara uvua ne tshibidilu tshia kubikila Cameron anyi kumufundila bua kumanya ni uvua bimpe ne bua kukankamijangana. Cameron udi wamba ne: “Kara uvua mumanye malu onso avua enzeka mu dîku dietu. Uvua mumanye tshivua tshienzekele  yayanyi ne muvuabi bingenze bibi pavuaye mutomboke ne mulekele bulelela. Wakangambuluisha mu tshikondo atshi tshionso, ne tshiena mumanye tshimvua mua kuenza bu yeye kayi mungambuluishe to. Uvua mungambuluishe bikole be!”

¹⁷ Udi mua kupeta balunda bimpe mu tshisumbu tshia bena Kristo, nansha bobu bena mulongo nebe anyi kabayi bena mulongo nebe. Bena Kristo nebe badi ne ditabuja dimue nebe, bipatshila bia muomumue ne biebe, mbanange Yehowa anu bu wewe, badi ne ditekemena dia buena diebe ne pamuapa badi ne ntatu iudi nayi. Udi mua kueleshangana nabu diboko mu mudimu wa Nzambi. Badi mua kukukankamija paudi mu ntatu ne wewe pebe udi mua kubakankamija. Nebasanke paudi uya kumpala mu mudimu wa Yehowa. Pashishe, bulunda bua nunku budi mua kutungunuka kashidi ne tshiendelele.​—Nsu. 17:17; 18:24; 27:9.

18. Mushindu uvua Yelemiya musungule balunda bende udi ukulongesha tshinyi?

¹⁸ Mushindu uvua Yelemiya musungule balunda bende udi utulongesha bualu bua mushinga ebu: Kuena mua kudia bulunda ne bantu badi kabayi bitabuja malongesha a mu Bible ne kushala mulamate ditabuja diebe to. Kuenza malu bilondeshile bualu ebu kudi ne mushinga lelu anu muvuabi mu matuku a Yelemiya. Bua kutungunuka ne kuenza mudimu uvua Yehowa mumupeshe ne kupeta mabenesha a kudiye, Yelemiya uvua muitabe bua kuikala mushilangane ne bantu ba bungi ba mu tshikondo tshiende. Kabienaku nanku buebe wewe anyi? Yelemiya wakasungula balunda bavua ne ditabuja bu diende ne bavua bamuambuluisha bua kukumbaja mudimu wende. Bushuwa, lelu muena Kristo wa lulamatu yonso udi mua kulongela ku mushindu uvua Yelemiya musungule balunda bende ne meji.​—Nsu. 13:20; 22:17.