1. Bua tshinyi Yelemiya ne baprofete bakuabu ba Yehowa kabavua bapuwe?

 KUTUADIJILA anu mu tshidimu tshia 647 kumpala kua Yezu, bena mu Yelushalema bavua bumvua Yelemiya ubambila mu misesu yabu ne miaba mikuabu ne: ‘Umvuayi dîyi dia Yehowa.’ Yelemiya kakalekela kubambila mêyi au. Nansha bidimu 40 panyima pa dibutuka dia tshimenga, wakatungunuka ne kubambila mêyi a muomumue. (Yel. 2:4; 42:15) Nzambi wa Bukole Buonso uvua utuma baprofete bua bena Yuda bumvue mibelu yende ne balekele malu mabi. Anu mutukadi bamone mu mukanda eu, Yelemiya uvua umue wa ku baprofete banene ba Nzambi. Wakamuambila pavuaye mumutume ne: ‘Juka, ubambile mêyi onso andi nkuambila. Kuzakadi bua bualu buabu.’ (Yel. 1:17) Mudimu au kauvua mudimu mutekete to. Yelemiya wakapeta ntatu ya bungi, kadi uvua muenzejibue bua kuukumbaja. Wakamba ne: ‘Mutshima wanyi udi ukumakuma munda muanyi; tshiena mua kupuwa.’​—Yel. 4:19.

2, 3. (a) Mmushindu kayi uvua bayidi ba Yezu bidikije Yelemiya? (b) Bua tshinyi udi ne bua kuidikija Yelemiya?

² Yelemiya mmushile batendeledi bakuabu ba Yehowa tshilejilu tshimpe mu mushindu uvuaye muenze mudimu wende wa buprofete. (Yak. 5:10) Tshilejilu, matuku makese panyima pa Pentekoste wa mu 33, bamfumu ba bena Yuda bakakuata mupostolo Petelo ne Yone ne kubakandika bua kuyisha. Udi mumanye muvuabu bandamune ne: ‘Katuena  bamanye mua kuenza bualu bukuabu, anu kuambila bantu malu atuakumona ne atuakumvua.’ (Bien. 4:19, 20) Bobu bamane kukanyina Petelo ne Yone bua kubenzela bibi musangu uvua ulonda, bakabalekela. Udi mumanye bimpe ne: bantu ba lulamatu abu kabakalekela kuyisha to.

³ Udiku mumone mudi mêyi a Petelo ne Yone adi mu Bienzedi 4:20 apetangana ne a Yelemiya anyi? Bu muudi muena mudimu wa Yehowa Nzambi mu matuku makole aa, kuenaku mudisuike pebe bua kuamba ne: ‘Tshiena mua kupuwa’ anyi? Tumonayi mutudi mua kulama tshisumi tshietu anu bu Yelemiya bua kutungunuka ne kuyisha lumu luimpe nansha mudi nsombelu wenda unyanguka.

4. Ntshinyi tshivua bena mu Yelushalema wa kale ba bungi benza?

⁴ Kuenaku mushindike ne: dilaya dia Nzambi dia kulengeja malu mu bukokeshi bua Muanende ke lumu ludi lutambe mikuabu yonso anyi? Kadi bantu ba bungi lelu badi bakula anu bu muvua bena Yuda bambile Yelemiya musangu mukuabu ne: ‘Tudi tuamba bua dîyi diebe diwakutuambila mu dîna dia Yehowa ne: Katuena tukumvuila.’ (Yel. 29:19; 44:16) Yelemiya uvua umvua mêyi a nunku bikole. Ke mudibi kabidi bua Bantemu ba Yehowa lelu, bualu bantu ba bungi batu babambila ne: ‘Malongesha enu kaatu ansankisha.’ Padi bantu babenga kututeleja, bidi mua kutekesha tshisumi tshietu. Ntshinyi tshiudi mua kuenza bikala bualu bua nunku buenzeka mu teritware wenu, buenzekela bamue bantu mu tshisumbu tshienu anyi wewe muine?

5. (a) Ntshinyi tshivua Yelemiya wenza pavua bantu babenga kumuteleja? (b) Bua tshinyi bantu badi babenga kuteleja lumu luimpe mbena diakabi?

⁵ Tangila meji akapeta Yelemiya pavua bena Yuda ba bungi kabayi bamuteleja. Ku ntuadijilu kua mudimu wende,  Yehowa wakamuleja manyoka avuaye mulongoluele bantu. (Bala Yelemiya 4:23-26.) Yelemiya wakamona ne: bantu ba bungi bavua mua kupanda bu bobu bateleje bivuaye ubambila ne babitumikile. Lelu, bantu badi mu nsombelu wa muomumue, too ne ba mu teritware webe. Yezu wakamba bua “dituku adi” dikala Nzambi ne bua kulumbuluisha bantu babi ne: ‘Nedilue kudi bonso badi bashikame pa buloba buonso. Tabalayi misangu yonso, nutendelele Nzambi bua kuikala ne bukole bua kupanduka mu malu aa onso alua, ne bua kuimana ku mêsu kua Muana wa muntu.’ (Luka 21:34-36) Mêyi a Yezu aa adi aleja ne: bantu badi babenga kuteleja lumu luimpe mbena diakabi.

6. Bua tshinyi udi ne bua kutungunuka ne kuyisha nansha bantu bobu kabayi bakuteleja?

⁶ Kadi bantu badi bitaba bua kuteleja dîyi dia Yehowa ditudi tubambila ne baditumikila nebapete masanka a bungi. Nzambi mmutupeshe mushindu wa kupanduka ne kubuela mu bulongolodi buende bupiabupia. Mu mushindu kampanda, ke muvuabi bua mudimu wa Yelemiya. Bena Yuda bavua mua kupanduka. (Bala Yelemiya 26:2, 3.) Yelemiya wakenza bidimu bia bungi wenda ubalomba bua ‘bumvue’ dîyi dia Nzambi mulelela ne ‘balukile’ kudiye. Katuena bamanye bungi bua bantu bavua banyingalale ne bashintuluke bua mêyi a Yelemiya to. Kadi kuvua bavua bashintuluke ne ke mudibi kabidi bua matuku etu aa. Bu mutudi tutungunuka ne kuyisha lumu luimpe, tutu tumvua ne: bantu bavua kabayi batuteleja mbashintuluke. (Tangila kazubu kadi kamba ne: “ Muntu utu ubenga kututeleja udi mua kushintuluka” kadi mu dibeji dia 184.) Bualu ebu kabuenaku butusaka bua kutungunuka ne kuyisha lumu luimpe bua kusungila mioyo ya bantu anyi?

7. Mmushindu kayi uvua baluishi batete bua kuimanyika mudimu wa Yelemiya?

⁷ Misangu ya bungi baluishi ba Yelemiya bavua bakeba kumushipa anyi kuimanyika mudimu wende. Baprofete ba dishima bavua bamuelesha mpata ku mêsu kua bantu bonso. (Yel. 14:13-16) Pavua Yelemiya wendakana mu misesu ya Yelushalema, bantu bavua bamupenda ne bamuseka. (Yel. 15:10) Kuvua baluishi bavua bakeba mishindu mikuabu ya kumuendeshila lumu lubi. (Yel. 18:18) Bakuabu bakatuadija kumujana bua kupambuisha bantu bavua banange malu makane ku malongesha avua Yelemiya uyisha. (Muad. 3:61, 62) Yelemiya wakalekela kuyisha anyi? Tòo, kadi wakatungunuka ne kuyisha. Ntshinyi tshiakamuambuluisha bua kutungunuka?

8. Pavua baluishi benda bavudija mishindu ya kukengesha Yelemiya, ntshinyi tshiakenzaye?

⁸ Yelemiya wakakokesha bua kuluangana ne baluishi bende bualu uvua weyemena Yehowa. Ku ntuadijilu kua mudimu wende, Nzambi wakamuambila ne: neamuambuluishe ne neamulame. (Bala Yelemiya 1:18, 19.) Yelemiya wakeyemena dilaya edi ne Yehowa kakamulekela to. Pavua baluishi benda bavudija mishindu ya dimukengesha, yeye uvua wenda upeta dikima, muoyo mukole ne dinanukila. Tangila muvua ngikadilu eyi mimuambuluishe.

9, 10. Mmalu kayi avua menzekele Yelemiya adi ne bua kukusaka bua wikale ne dikima?

⁹ Musangu mukuabu, bakuidi ne baprofete bavua batombokele Nzambi bakaya ne Yelemiya kudi banene ba mu Yuda bua bamushipe. Bualu abu buakatshingisha Yelemiya bua kupuwaye anyi? Tòo. Diandamuna diende diakaleja muvua batontolodi abu bashime ne nunku banene ba mu Yuda kubengabu kumushipa.​—Bala Yelemiya 26:11-16; Luka 21:12-15.

¹⁰ Vuluka ne: Pashû muena mudimu wa ku ntempelo mumane kuteleja mukenji uvua nawu Yelemiya, wakamuela  mu bikunyi. Uvua mua kuikala muele meji ne: kunyoka Yelemiya mushindu au kuvua mua kumufikisha ku dipuwa. Ke bualu kayi wakamulekela dituku diakalonda. Kadi nansha muvua Yelemiya ne mubidi utakanyika bua dikenga divuaye mupete, wakaya kudi Pashû ne kumuambila dinyoka divua Yehowa mumulongoluele. Nansha dikengeshibua kadivua dipuwishe Yelemiya to. (Yel. 20:1-6) Bua tshinyi? Yeya nkayende wakamba ne: ‘Yehowa udi nanyi bu muena bukitu mukole ne mukuatshishi wa buôwa, nenku bankengeshi nebalenduke, kabena bampita bukole.’ (Yel. 20:11) Yelemiya kavua utshina nansha pavuaye kumpala kua baluishi ba tshikisu. Uvua weyemena Yehowa bikole ne ke tshiudi pebe mua kuenza.

11, 12. (a) Mmushindu kayi uvua Yelemiya muleje budimu pavua Hananya umuluisha? (b) Kulama “lutulu” kudi mua kuambuluisha ku tshinyi?

¹¹ Mbimpe tuvuluke ne: Yelemiya kavua unekesha mu malu avuaye wenza to. Uvua ne budimu pavuaye kumpala kua baluishi. Uvua mumanye dîba divuaye ne bua kumbuka kumpala kuabu. Tshilejilu, tangila tshivuaye muenze ne Hananya. Muprofete wa dishima eu mumane kuamba kumpala kua bantu ne: mulayi wa Yehowa kauvua ne bua  kukumbana, Yelemiya wakamupingaja mu njila ne kuleja bantu mua kumanya muprofete mulelela. Yelemiya uvua muteke tshikokedi tshia mabaya pa makaya pende bua kuleja muvua bena Babulona ne bua kukokesha bena Yuda, kadi Hananya wakumvua tshiji ne kutshitshibula. Katuena bamanye tshivua Hananya mua kuenza pashishe to. Nunku ntshinyi tshiakenza Yelemiya? Bible udi wamba ne: ‘Yelemiya muprofete wakaya mu njila wende.’ Eyowa, Yelemiya wakumbuka muaba au. Pashishe Yehowa wakamutumina dîyi bua kualukila ne kuambila Hananya ne: Bena Babulona nebakokeshe bena Yuda ne yeye muine neafue.​—Yel. 28:1-17.

¹² Tshilejilu tshia mu Bible etshi tshidi tshituleja ne: patudi tuyisha, mbimpe tuikale ne dikima ne budimu. Padi muntu ubenga kuteleja malu a mu Bible atudi tumuambila, ufika munda ne utukanyina ne lonji, tudi mua kushiyangana nende mu buimpe, kuya ku nzubu mukuabu. Katuena ne bua kukokangana ne bantu bua lumu luimpe lua Bukalenge bua Nzambi to. Patudi tulama “lutulu,” tudi tushiya mpunga wa kuambuluisha muntu au dîba dikuabu didi mua kuikala diakanyine.​—Bala 2 Timote 2:23-25; Nsu. 17:14.

13. Bua tshinyi Yehowa wakambila Yelemiya ne: ‘Kuikadi ne buôwa’? Bua tshinyi tudi ne bua kukonkonona mêyi aa?

¹³ Nsombelu uvua mu Yelushalema kumpala kua kumubutulabu mu 607 kumpala kua Yezu uvua unyingalaja batendeledi balelela bikole. Nunku udi mua kumvua bua tshinyi Nzambi wakambila Yelemiya ne: ‘Kuikadi ne buôwa.’ (Yel. 1:8; Muad. 3:57) Yehowa wakamuambila bua kuambila batendeledi bende bakuabu mêyi a muomumue. (Bala Yelemiya 46:27.)  Bualu ebu budi butulongesha tshinyi? Mu matuku mabi a ku nshikidilu aa, kudi misangu itudi mua kumvua buôwa. Dîba adi, tudiku tumvua padi Yehowa utuambila ne: ‘Kuikadi ne buôwa’ anyi? Tuvua bamone mu mukanda eu muvua Nzambi mukuatshishe Yelemiya mu tshikondo tshivua tshienza buôwa atshi. Tukonkononayi tshivua tshienzeke mu tshikoso ne tumone tshitudi mua kulongelaku.

14, 15. (a) Ndutatu kayi luvua Yelemiya mupete? (b) Mmushindu kayi uvua Yehowa mukumbaje dilaya diende dia kulama Yelemiya?

¹⁴ Bu muvua bena Babulona batshintshimike Yelushalema, nzala yakabuela mu tshimenga. Bantu ba bungi kabatshivua ne biakudia to. (Yel. 37:21) Nansha muvuaku nzala, bakakuata Yelemiya ne kumuela muaba uvuaye mua kufuila. Bantu banene ba mu Yuda bakenzeja mukalenge Sedekiya uvua tshitaba mvinyingu bua itabe dilomba diabu. Ke bobu kuela Yelemiya mu tshina tshile tshivuabu balamina mâyi muvua mushale anu bitotshi nkayabi. Pavua Yelemiya udina mu bitotshi abi, kakamona mushindu uvuaye mua kupatukamu to. Bu wewe muikale mu lutatu alu, kuvuaku mua kumvua buôwa anyi?​—Yel. 38:4-6.

¹⁵ Nansha muvua Yelemiya muntu bu tuetu, wakeyemena dîyi divua Yehowa mumuambile dia ne: kakumulekela to. (Bala Yelemiya 15:20, 21.) Yehowa wakakumbajaku dilaya diende adi anyi? Tudi bamanye ne: wakadikumbaja. Wakasaka Ebede-meleke bua kubenga kutua ku tshia banene ba mu Yuda ne kusungila Yelemiya. Mukalenge wakamuitabila bua kupatula Yelemiya mu tshina tshivuabu bamuele bua kafuidi mu bitotshi.​—Yel. 38:7-13.

16. Yehowa uvua musungile bantu bavua bamulamate ku njiwu kayi?

¹⁶ Yelemiya utshivua anu mu njiwu nansha pakamupatulabu mu tshina. Ebede-meleke wakasengelela mukalenge bua Yelemiya ne: ‘Yeye udi mua kufua mu muaba udiye, bualu bua tshiyole; bualu bua kakuena biakudia bikuabu mu musoko eu.’ (Yel. 38:9) Bua mushindu uvua biakudia bikepe bikole mu Yelushalema, bantu bakatuadija kudiangana. Kadi  musangu eu kabidi, Yehowa wakasungila muprofete wende. Pashishe wakambila Yelemiya bua kuambila Ebede-meleke ne: neamusungile pende. (Yel. 39:16-18) Yelemiya uvua anu muvuluke mêyi a Yehowa a ne: ‘Ndi nebe bua kukupandisha.’ (Yel. 1:8) Bu muvua Nzambi wa Bukole Buonso mulame bantu babidi bavua bamulamate aba, kakuvua muluishi anyi tshiyole tshia nzala tshivua mua kubenzela bibi to. Bakapanduka mu tshimenga tshivua dikenga dikuate atshi. Ndilongesha kayi ditudi tupeta? Yehowa uvua mulaye bua kulama bantu bende ne ke tshiakenzaye.​—Yel. 40:1-4.

17. Bua tshinyi udi ne bua kueyemena dilaya dia Yehowa dia kulama batendeledi bende?

¹⁷ Mulayi wa Yezu udi wakula bua nshikidilu wa tshikondo etshi ukadi mutangile ku tshibungubungu. Mu katupa kakese emu, ‘bimanyinu nebikale mu dîba ne mu ngondo ne mu mitoto; pa buloba nepikale dikenga dikole dia bantu; bantu nebafue tshipuka bua buôwa ne bua ditekemena dia malu alua pa buloba.’ (Luka 21:25, 26) Tudi ne bua kuindila bua kumona muikala bimanyinu ebi ne bua kuenzeka ne mushindu wakuatshishabi bantu ba bungi buôwa. Kadi nansha koku kuenzeke malu a mushindu kayi, ikala anu mushindike ne: Yehowa mmusue kusungila bantu bende ne udi ne bukole bua kubasungila. Kadi bantu badiye kayi  wanyisha nebapete diakabi. (Bala Yelemiya 8:20; 14:9.) Udi mua kusungila batendeledi bende nansha padibu mu lutatu lukole bienze anu bu ne: badi muinshi mua tshina tshile tshia mâyi. Mêyi avua Nzambi muambile Ebede-meleke neakumbanyine batendeledi bende. Adi amba ne: ‘Yehowa udi wamba ne: Nenkusungile bushuwa, wewe kuena ushipibua ku muele wa mvita, kadi muoyo webe newikale kuudi bu tshintu tshinyenga mu mvita, bualu bua wewe wakungeyemena.’​—Yel. 39:18.

18. (a) Mmêyi kayi avua mashintulule nsombelu wa Yelemiya? (b) Dîyi dia Nzambi didi mu Yelemiya 1:7 didi diumvuija tshinyi buebe wewe?

¹⁸ Nsombelu wa Yelemiya wakashintuluka bikole pakamuambila Nzambi ne: ‘Neuye kudi muntu yonso kundi nkutuma, newambe mêyi onso angakuambila.’ (Yel. 1:7) Kutuadijila dîba adi, dijinga diende dinene divua anu dia kumanyisha bantu ‘dîyi dia Yehowa.’ Mbambulule tshiambilu etshi njila ne njila mu mukanda wa Yelemiya. Mu nshapita wa ndekelu, Yelemiya udi ulonda muvuabu bakuate Yelushalema ne baye ne Sedekiya mukalenge wa bena Yuda wa ndekelu mu bupika. Yelemiya wakatungunuka ne kulongesha bena Yuda ne kubasengelela bua kutumikila Yehowa too ne pakenzekaku malu avua aleja ne: mudimu wende wajiki.

19, 20. (a) Bua tshinyi mudimu wa Yelemiya udi mua kuikala tshilejilu kuudi? (b) Ndiumvuangana kayi didi pankatshi pa kuyisha lumu luimpe ne kuikala ne disanka? (c) Mmushindu kayi udi kukonkonona mukanda wa Yelemiya ne wa Muadi kukuambuluishe?

¹⁹ Mudimu uvua Yelemiya muenze ne udi Bantemu ba Yehowa benza lelu mmifuanangane mu malu a bungi. Anu bu Yelemiya, udi wenzela Nzambi mulelela mudimu mu tshikondo tshidiye ulumbuluisha bantu. Kudi majitu makuabu adi akuangata dîba ne bukole buebe, kadi mudimu wa kuyisha lumu luimpe ke udi ne mushinga  wa bungi tshikondo tshietu etshi. Ku diambuluisha diawu, udi utumbisha dîna dinene dia Nzambi ne witaba mudiye ne bukenji bua kuikala Mfumu wa diulu ne buloba. (Bala Muadi 5:19.) Udi kabidi uleja muudi munange bantu nebe paudi ubambuluisha bua kumanya Nzambi mulelela ne tshidiye wambila bantu bua kuenza bua kushalabu ne muoyo.​—Yel. 25:3-6.

²⁰ Yelemiya wakamba bua mudimu uvua Nzambi mumupeshe ne: ‘Mêyi ebe akadi kundi bu disanka ne akasankisha mutshima wanyi; bualu bua badi bambikila ku dîna diebe, wewe Yehowa Nzambi wa misumba.’ (Yel. 15:16) Muntu yonso udi umvua muoyo wende umusaka bua kuakula mu dîna dia Nzambi mulelela udi mua kupeta pende disanka dia buena edi. Nunku, bualu ebu bukusake bua kutungunuka ne kumanyisha bantu mêyi a Yehowa anu bu Yelemiya.