1. Mmidimu kayi ibidi ivua Yelemiya mukumbaje?

 YEHOWA uvua mupeshe Yelemiya midimu ibidi. Wa kumpala uvua wa ‘kujula ne kushimbula, kubutula ne kunyanga.’ Muibidi uvua wa ‘kuasa ne kukuna.’ Yelemiya wakenza mudimu wa kumpala pavuaye muele patoke malu mabi a bena Yuda ba lutambishi ne kuleja muikala Nzambi ne bua kubanyoka bobu ne bena Babulona. Kadi uvua muakule kabidi bua milayi ivua ipesha bantu ditekemena bua matuku atshilualua. Wakakula bua kuibaka tshivua Nzambi mupangadije bua kuibaka ne kukuna tshivuaye mupangadije bua kukuna. Tshilejilu, Yelemiya wakakumbaja mudimu wende muibidi pakalejaye muvua bena Yuda ne bua kupingana mu ditunga diabu.​—Yel. 1:10; 30:17, 18.

2. Bua tshinyi Yehowa uvua munyoke tshisamba tshiende? Wakatshinyoka mu mushindu kayi?

² Pavua Yelemiya mumanyishe ne: Nzambi neapingaje bena Yuda mu ditunga diabu kabivua biumvuija ne: Nzambi uvua mudianjile kubengeleka anyi mubenge kulonda mikenji yende ya buakane to. Uvua ne bua kubanyoka bualu bavua bamutombokele. (Bala Yelemiya 16:17, 18.) Mu matuku a Yelemiya, lutulu lua Yehowa luakatua ku tshibungubungu bualu anu bena Yuda bakese ke bavua ‘benza malu mimpe’ anyi ‘bakeba malu malelela.’ Yehowa wakamba ne: “Kukudimuna mutshima wanyi kudi kuntonda.” (Yel. 5:1; 15:6, 7) Bena Yuda abu bavua ‘bapingane ku malu mabi a bankambua babu bavua babenga kumvua’ mêyi a Yehowa. Pashishe bavua bamufikishe munda ne ditendelela diabu dia nzambi ya dishima. (Yel. 11:10; 34:18) Yehowa uvua ne bua  kupingaja bantu bende mu njila anyi kubanyoka ne “kulumbulula kuakane.” Dîba adi, bamue bavua mua kuitaba bilema biabu ne kupingana kudiye.​—Yel. 30:11; 46:28.

3. Bua tshinyi udi ne bua kukonkonona mulayi udi wakula bua tshipungidi tshipiatshipia?

³ Nzambi wakambila Yelemiya bua kuakula bua tshipungidi tshipiatshipia tshivua ne bua kuambuluisha bantu bikole munkatshi mua bidimu bia bungi. Patudi tubala milayi ya Yelemiya, tudi tumona bua tshinyi tudi ne bua kukonkonona mulayi udi wakula bua tshipungidi tshipiatshipia. Tshivua ne bua kupingana pa muaba wa tshivua Nzambi mudie ne bena Isalele pavuabu bumbuke mu Ejipitu, tshivua Mose mutuangaji watshi. (Bala Yelemiya 31:31, 32.) Pavua Yezu Kristo mubanjije Tshivulukilu tshia lufu luende, wakakula bua tshipungidi tshipiatshipia etshi. Nunku, tshidi ne mushinga wa bungi kutudi. (Luka 22:20) Mupostolo Paulo wakakula pende bua tshipungidi etshi pakafundilaye bena Ebelu. Wakambulula mêyi a Yelemiya ne kuleja mushinga watshi. (Eb. 8:7-9) Kadi tshipungidi tshipiatshipia ntshinyi? Bua tshinyi bivua bikengela kutshienza? Mbanganyi badimu ne mmushindu kayi uditshi mua kukuambuluisha wewe? Tukonkononayi malu aa.

4. Tshipungidi tshia Mikenji tshivua ne mudimu kayi?

⁴ Bua kumanya mushinga udi nawu tshipungidi tshipiatshipia, tudi ne bua kuanji kumanya tshipatshila tshivua natshi tshipungidi tshia kale anyi tshia Mikenji. Tshivua tshiambuluishe bena Isalele mu malu a bungi pavuabu bindile kankanunuina kalaya kavua ne bua kupetesha bantu ba bungi masanka. (Gen. 22:17, 18) Pavua bena Isalele bitabe tshipungidi tshia Mikenji, bakalua “bantu” ba Nzambi. Mu tshipungidi atshi, bena Lewi bavua benza mudimu wa buakuidi bua tshisamba tshijima. Pavua Yehowa mutshipunge ne bena Isalele ku mukuna wa Sinai, wakakula bua ‘bukalenge bua bakuidi ne tshisamba tshia tshijila,’ kadi kavua muleje dîba  divua bualu ebu ne bua kuenzeka ne mushindu uvuabu mua kuenzeka to. (Ekes. 19:5-8) Tshipungidi atshi tshiakalua kuleja patoke ne: bena Isalele kabavua mua kukumbaja mikenji yatshi yonso to. Nunku tshiakela mibi yabu patoke. Ke bualu kayi bavua ne bua kufila milambu pa tshibidilu bua Nzambi kubabuikidila mibi yabu. Biakamueneka ne: bivua bikengela mulambu mupuangane uvuabu ne bua kufila anu musangu umue. Bushuwa, bantu bavua ne dijinga dikole dia kubabuikidilabu mibi yabu bua kashidi.​—Gal. 3:19-22.

5. Bua tshinyi Yehowa wakalaya tshipungidi tshipiatshipia?

⁵ Nunku tudi tuenda tumvua bua tshinyi Nzambi wakasaka Yelemiya bua kuakula bua tshipungidi tshipiatshipia patshivua tshia kumpala katshiyi tshianji kufua. Bua dinanga ne luse luende, Yehowa uvua musue kuambuluisha bisamba bia bungi bua kashidi. Ku butuangaji bua Yelemiya wakamba bua bena mu tshipungidi tshipiatshipia ne: ‘Nembabuikidile mibi yabu, ne tshiena mvuluka malu mabi abu kabidi.’ (Yel. 31:34) Nansha muvua Nzambi mufile mulayi au mu matuku a Yelemiya, udi upesha bantu bonso ditekemena dilenga. Mushindu kayi?

6, 7. (a) Ntshinyi tshitu bantu bakuabu bumvua bua mibi yabu? (b) Kukonkonona tshipungidi tshipiatshipia kudi mua kukukankamija ku tshinyi?

⁶ Tutshidi bena mapanga ne misangu ya bungi tutu tumona mudi bualu ebu bulelela. Ke tshidi tshilejilu tshia muanetu mukuabu uvua uluangana ne butekete kampanda tshileja. Udi wamba ne: “Pamvua nkuluka kabidi mu butekete abu, mvua ndiumvua bibi be! Mvua ngela meji ne: kakuvua tshimvua mua kuenza bua kumbuikidilabu to. Bivua binkolela bua kusambila. Mvua ntuadija masambila anyi ngamba ne: ‘Yehowa, tshiena mumanye ni wateleja disambila dianyi edi, kadi . . . ’” Bena Kristo bakuabu batu bakuluka tshiakabidi mu butekete buabu anyi bavua benze bubi batu bamona anu bu ne: kudi “ditutu” didi dipangisha masambila abu bua kufika kudi Nzambi. (Muad. 3:44) Bakuabu pabu batu badilumbuluisha bua malu mabi avuabu benze kukadi bidimu bia bungi.  Nansha bena Kristo ba tshitembu batu misangu mikuabu bamba malu atu alua kubanyingalaja pashishe.​—Yak. 3:5-10.

⁷ Muntu nansha umue kedi meji ne: kena mua kuenza bualu bubi to. (1 Kol. 10:12) Nansha mupostolo Paulo wakitaba ne: uvua wenza bilema. (Bala Lomo 7:21-25.) Bua bualu ebu tudi ne bua kuvuluka tshipungidi tshipiatshipia. Nzambi wakalaya ne: bualu bunene buvuatshi ne bua kuenza buvua bua ne: kavua ne bua kuvuluka mibi ya bantu to. Edi ndisanka dinene ditambe! Bualu buvua Nzambi mumanyishe ebu buvua ne bua kuikala bulenge Yelemiya bikole ne bidi ne bua kutulenga petu patudi tulonga malu a tshipungidi tshipiatshipia ne tumona muditshi tshituambuluisha.

8, 9. Ntshinyi tshidi Yehowa mufile bua kumona mua kubuikidila bantu mibi?

⁸ Paudi umanya Yehowa bimpe, udi umona mudiye munange bantu bena mapanga ne ubafuila luse. (Mus. 103:13, 14) Pavua Yelemiya muakule bua tshipungidi tshipiatshipia wakaleja ne: Yehowa ‘neababuikidile mibi yabu’ ne kakuvuluka malu mabi abu kabidi. (Yel. 31:34) Udi mua kufuanyikija muvua Yelemiya udiebeja mushindu uvua Nzambi mua kufuila bantu luse elu. Wakumvua ne: pavua Nzambi muakule bua tshipungidi tshipiatshipia, uvua wakula bua muvuaye ne bua kumvuangana ne bantu anyi kupunga nabu dîyi. Mu mushindu kampanda, Yehowa uvua ne bua kukumbaja tshivuaye muambe mukana mua Yelemiya ku diambuluisha dia tshipungidi etshi bu mudi kubuikidila bantu mibi. Bantu bavua ne bua kulua kumvua malu makuabu adi atangila dilongolola dia Nzambi edi ne tshivua Masiya ne bua kuenza.

⁹ Udi mua kuikala mumanye baledi batu bengeleka bana babu, kabayi babanyoka. Udi wela meji ne: Yehowa mmufuanangane nabu anyi? Nansha kakese. Tudi tuamba nunku  pa kumona mushindu udi tshipungidi tshipiatshipia tshienzeke. Nansha muvuabi bisame Nzambi bikole, wakalonda mikenji yende ya buakane bua kulongolola mushindu muimpe wa kubuikidila bantu mibi pamutu pa kuyijimija tshianana. Udi mua kumanya tshidi bualu ebu bumvuija paudi ukonkonona tshivua Paulo mufunde pavuaye wakula bua tshipungidi tshipiatshipia. (Bala Ebelu 9:15, 22, 28.) Wakakula bua ‘dipikudibua’ ne kuamba ne: ‘Bikalaku kakuyi kumatshisha kua mashi panshi, kakuena kubuikidila kua mibi nansha.’ Mu tshipungidi tshipiatshipia, mashi kaavua aleja mashi a milambu ya ngombe ne ya mbuji ivuabu bafila mu tshipungidi tshia Mikenji to. Mashi a Yezu ke akambuluisha bua kuenza tshipungidi tshipiatshipia. Ku diambuluisha dia mulambu mupuangane eu Yehowa udi mua ‘kubuikidila bantu mibi yabu ne malu mabi abu’ bua kashidi. (Bien. 2:38; 3:19) Kadi mbanganyi bavua ne bua kuikala mu tshipungidi etshi bua Nzambi kubabuikidila mibi? Ki mbena Yuda to, bualu Yezu uvua muambe ne: Nzambi uvua ne bua kubenga bena Yuda bavua bafila milambu ya nyama bilondeshile Mikenji ya Mose ne uvua ne bua kukeba tshisamba tshikuabu. (Mat. 21:43; Bien. 3:13-15) Tshisamba atshi ke “bena Isalele ba Nzambi” ne ntshienza ne bena Kristo bela manyi a nyuma muimpe. Mu tshikoso tudi mua kuamba ne: tshipungidi tshia Mikenji tshivua pankatshi pa Nzambi ne  bena Isalele ba kale, kadi tshipiatshipia tshidi pankatshi pa Yehowa Nzambi ne bena Isalele ba Nzambi, ne Yezu ke udi mutuangaji watshi.​—Gal. 6:16; Lomo 9:6.

10. (a) Nnganyi udi “lutonga” lua Davidi? (b) Mmunyi mudi bantu mua kupetela masanka kudi “lutonga” elu?

¹⁰ Yelemiya wakabikila Masiya uvua ne bua kulua ne: “Lutonga” lua Davidi. Bivua bikumbanyine bua amubikile nanku. Patshivua Yelemiya wenza mudimu wa buprofete, bakakosa mutshi uvua uleja dîku dia bukalenge dia Davidi. Kadi tshikuku tshiawu katshivua tshifue to. Pakakumbana tshikondo, Yezu wakaledibua mu ndelanganyi ya mukalenge Davidi. Bakamubikila ne: “Yehowa udi buakane buetu” bua kuleja mudi Nzambi wangata buakane ne mushinga wa bungi. (Bala Yelemiya 23:5, 6.) Yehowa wakitaba bua Muanende mulela umue kukenga pa buloba ne kufua. Pashishe, bilondeshile buakane buende, Yehowa uvua ne bua kubuikidila bantu mibi yabu ku diambuluisha dia mulambu wa “lutonga” lua Davidi. (Yel. 33:15) Bualu ebu buakambuluisha bamue bantu bua ‘kubingishibua bua muoyo’ ne kuedibua manyi a nyuma muimpe bua kulua bena mu tshipungidi tshipiatshipia. Anu mutuabimona, bua kuleja mudi Nzambi munange buakane bikole, tshipungidi etshi tshidi tshiambuluisha too ne bantu badi kabayi benamu.​—Lomo 5:18.

11. (a) Mikenji ya tshipungidi tshipiatshipia mmifunda pa tshinyi? (b) Bua tshinyi mikenji ya tshipungidi tshipiatshipia idi isankisha ‘mikoko mikuabu’?

¹¹ Udiku musue kumanya malu makuabu adi aleja mudi tshipungidi tshipiatshipia tshishilangane ne tshia kale anyi? Bipungidi ebi mbishilangane bikole bualu bavua ne bua kufunda mikenji yabi miaba mishilangane. (Bala Yelemiya 31:33.) Mikenji dikumi ya mu tshipungidi tshia Mikenji ivua mifunde pa mabue akalua kujimina. Kadi Yelemiya wakamanyisha ne: bavua ne bua kufunda mikenji ya tshipungidi tshipiatshipia mu mioyo ya bantu ne kayivua ne bua kujimina. Bena Kristo bela manyi badi mu tshipungidi tshipiatshipia mbanange mikenji yatshi bikole. Netuambe tshinyi bua ‘mikoko mikuabu’ idi kayiyi mu  tshipungidi tshipiatshipia idi mitekemene bua kupeta muoyo wa tshiendelele pa buloba? (Yone 10:16) Bobu pabu mbanange mikenji ya Nzambi. Mu mushindu kampanda, badi anu bu benyi bavua mu Isalele, bavua bitabe Mikenji ya Mose ne yoyi kubambuluisha.​—Lew. 24:22; Nom. 15:15.

12, 13. (a) Mikenji ya tshipungidi tshipiatshipia ntshinyi? (b) Bua tshinyi kuena udiumvua muenzejibue bua kuenzela Nzambi mudimu mu ‘mikenji ya Kristo’?

¹² Udi mua kuandamuna bishi bobu bakuebeje ne: ‘Mikenji idibu bafunde mu mioyo ya bena Kristo bela manyi ntshinyi?’ Mikenji eyi ke idibu kabidi babikila ne: ‘Mikenji ya Kristo.’ Bakanji kuyipesha bena Isalele ba Nzambi badi mu tshipungidi tshipiatshipia. (Gal. 6:2; Lomo 2:28, 29) Mu tshikoso, tudi mua kuamba ne: ‘Mikenji ya Kristo’ mmimanyine pa dinanga. (Mat. 22:36-39) Mmunyi mudibu bafunda mikenji eyi mu mioyo ya bela manyi? Mpadibu balonga Dîyi dia Nzambi ne bamusambila. Nunku, bena Kristo balelela bonso badi ne bua kuenza malu abidi a ntendelelu mulelela aa, nansha aba badi kabayi mu tshipungidi tshipiatshipia, kadi badi basue bua tshibambuluishe.

¹³ Bible udi ubikila kabidi ‘mikenji ya Kristo’ ne: ‘mikenji miakane tshishiki ya budishikaminyi’ ne ‘mikenji ya budishikaminyi.’ (Yak. 1:25; 2:12) Bantu ba bungi bavua baledibue mu tshipungidi tshia Mikenji, kadi kakuena muntu nansha  umue udi muledibue mu tshipungidi tshipiatshipia anyi mu mikenji ya Kristo to. Kabatu benzeja bantu badi bitabe mikenji ya Kristo bua kuenzela Nzambi mudimu to. Kadi badi basanka padibu bamanya ne: Nzambi udi mua kufunda mikenji yende mu mitshima yabu ne padibu bamanya kabidi ne: bantu bonso lelu badi mua kupetela masanka ku tshipungidi tshivua Yelemiya mumanyishe.

14. Mbanganyi badi tshipungidi tshipiatshipia tshiambuluisha?

¹⁴ Padi bantu bakuabu bamanya ne: anu bantu 144 000 ke badi mu tshipungidi tshipiatshipia, badi bela meji ne: anu bobu ke baditshi tshiambuluisha. Badi mua kuikala bela meji nunku bualu anu bela manyi ke batu badia diampa ne banua mvinyo udi uleja ‘mashi a tshipungidi’ mu Tshivulukilu tshia lufu lua Kristo tshitu tshienzeka tshidimu tshionso. (Mâko 14:24) Kadi vuluka ne: bantu badi mu tshipungidi etshi badi ne bua kudisangisha ne Yezu bu ‘kankanunuina’ ka Abalahama kadi ne bua kupetesha bisamba bionso masanka. (Gal. 3:8, 9, 29; Gen. 12:3) Mu mushindu kampanda ku diambuluisha diatshi, Yehowa neakumbaje mulayi wende wa kubenesha bisamba bionso ku butuangaji bua ‘kankanunuina’ ka Abalahama.

15. Mmudimu kayi wikala bela manyi nawu?

¹⁵ Yezu Kristo udi tshitupa tshia kumpala tshia kankanunuina ka Abalahama udi wenza mudimu wa muakuidi munene ne mmufile mulambu mupuangane udi wambuluisha bua kubuikidila bantu mibi yabu ne malu abu mabi. (Bala Ebelu 2:17, 18.) Kadi Nzambi ukavua muakule bua ‘bukalenge bua bakuidi ne tshisamba tshia tshijila’ kale menemene.  (Ekes. 19:6) Mu Isalele wa kale, bakuidi bavua ba mu tshisa tshishilangane ne tshia bakalenge. Nunku, mmushindu kayi uvua mulayi wa tshisamba tshia bakalenge ne bakuidi mua kukumbana? Mupostolo Petelo wakafundila bantu bavua nyuma wa Nzambi mulengeje mukanda wende wa kumpala. (1 Pet. 1:1, 2) Wakababikila ne: ‘Bakuidi ba bukalenge ne tshisamba tshia tshijila, bantu badi bikale ba Nzambi.’ (1 Pet. 2:9) Nunku bena Kristo bela manyi badi mu tshipungidi tshipiatshipia nebenze mudimu bu bindondi bia muakuidi munene. Ela meji tshidi bualu ebu bumvuija. Matuku onso aa tudi tuluangana ne bubi budi ‘bukokesha bantu.’ Bakuidi bindondi aba badi ne lutatu lua muomumue patshidibu pa buloba. (Lomo 5:21) Mbamanye mutu bantu bumvua padibu benza bilema ne bashala badipisha. Nunku bobu ne Kristo nebamanye mua kuditeka pa muaba wetu patudi tuluangana ne matekete etu.

16. Ndikankamija kayi didi “tshisumbu tshinene tshia bantu” tshipetela mu Buakabuluibua 7:9, 14?

¹⁶ Mu Buakabuluibua 7:9, 14 badi baleja bena mu “tshisumbu tshinene tshia bantu” bavuale “mayeka matoke” adi aleja mudibu ne muoyo mutoke ku mêsu kua Nzambi. Lelu badi benda balongesha bena mu musumba munene eu bua kupandukabu ku “dikenga dinene.” Nunku, nansha mpindieu bantu aba badi balua bakane mu mushindu kampanda kumpala kua Yehowa Nzambi, bualu udi ubabala bu bantu bakane ne ubavuija balunda bende. (Lomo 4:2, 3; Yak. 2:23) Edi ndiakalenga dinene be! Wewe muikale wa musumba munene, ikala mushindike ne: Nzambi mmusue kukuambuluisha paudi udienzeja bua kushala mukezuke ku mêsu kuende.

17. Mmushindu kayi udi Yehowa kayi ‘uvuluka’ kabidi mibi?

¹⁷ Ntshinyi tshidi tshienzekela mibi ya bantu badi Nzambi wanyisha? Anu mutukadi bamone, Yehowa wakamba ku butuangaji bua Yelemiya ne: ‘Nembabuikidile mibi yabu, ne tshiena mvuluka malu mabi abu kabidi.’ (Yel. 31:34) Nzambi udi wenzela bela manyi bualu ebu ku diambuluisha dia mulambu wa Yezu. Bia muomumue, udi ubuikidila bena mu  musumba munene mibi yabu anu ku diambuluisha dia ‘mashi a tshipungidi.’ Pavua Yelemiya muambe ne: Nzambi ‘kakuvuluka’ kabidi mibi kavua musue kuamba ne: uvua mua kupeta tshipua muoyo ne kupanga kuyivuluka to. Kadi bidi bileja ne: padi Yehowa unyoka muntu udi munyingalale bua mibi yende ne umufuila luse, udi uyikupula mu meji ende. Tuangate tshilejilu tshia mibi ivua mukalenge Davidi muenze ivua itangila Beta-sheba ne Uliya. Davidi wakapeta dinyoka ne kukengaye bua mibi yende ayi. (2 Sam. 11:4, 15, 27; 12:9-14; Yesh. 38:17) Kadi Nzambi kakashala umubadilayi to. (Bala 2 Kulondolola 7:17, 18.) Anu mudi tshipungidi tshipiatshipia tshileja, padi Yehowa ubuikidila muntu mibi yende ku diambuluisha dia mulambu wa Yezu, kena uyivuluka kabidi to.​—Yeh. 18:21, 22.

18, 19. Tshipungidi tshipiatshipia tshidi tshitulongesha tshinyi bua difuilangana luse?

¹⁸ Nunku, tshipungidi tshipiatshipia tshidi tshileja mudi Yehowa wenzela bantu bapange bupuangane malu mimpe, nansha bela manyi badimu nansha bantu badi ne ditekemena dia kusomba pa buloba. Ikala mushindike ne: padi Yehowa mumane kukubuikidila mibi yebe, kena ukubadilayi kabidi to. Nunku dilaya dia Nzambi dia tshipungidi tshipiatshipia didi dipesha yonso wa kutudi dilongesha. Diebeja ne: ‘Ntuku ngidikija Yehowa pa kubenga kubaluluila bakuabu bilema biabu binkadi muambe ne: ndi mubabuikidile anyi?’ (Mat. 6:14, 15) Bualu ebu budi bukumbanyina bilema bikese ne binene bu mudi padi mulume anyi mukaji muena Kristo muende masandi. Padi muntu udibu benzele bibi ufuila mukuende udi muende masandi ne munyingalale luse, kabienaku bimpe bua kubenga ‘kuvuluka bubi abu kabidi’ anyi? Nansha mudi kubenga kubaluluila bakuabu mibi kakuyi kupepele, kudi kutuambuluisha bua kuidikija Yehowa. a

 ¹⁹ Tudi mua kutumikila dilongesha didi ditangila tshipungidi tshipiatshipia edi nansha kudi muntu uvuabu bipate mu tshisumbu, kadi munyingalale ne mupingane. Newenze tshinyi bikalaye uvua mukuenzele bualu bubi butambe anyi mukuendeshile lumu lubi? Kadi mpindieu udibu bamupingaje mu tshisumbu, mmunyi mudi Yelemiya 31:34 mua kutuambuluisha bua mushindu utudi tumumona ne tumuenzela malu? Netumufuile luse ne kubenga kumubaluluila bubi buende anyi? (2 Kol. 2:6-8) Bushuwa, ebu mbualu budi muntu yonso udi wanyisha tshipungidi tshipiatshipia ne bua kuditatshisha bua kuenza mu nsombelu wende.

20. Mmunyi muudi mushilangane ne bantu ba bungi ba mu matuku a Yelemiya?

²⁰ Mu matuku a Yelemiya, bena Yuda ba bungi bavua anu bu bavua bamba ne: “Yehowa kena wenza malu mimpe, kena wenza malu mabi.” (Sef. 1:12) Nansha muvuabu ne dimanya ndambu dia tshidi Yehowa ne malu atuye wenza, bavua bamona ne: kakuenza bualu to, ne kavua umona malu mabi avuabu benza to. Kadi wewe udi mumanye ne: utu umona malu onso. Udi umunemeka bikole ne udienzeja bua kubenga kuenza malu mabi. (Yel. 16:17) Udi mumanye kabidi mudiye Tatu muimpe. Udi umona malu mimpe atudi tuenza, nansha bantu bakuabu baamona anyi kabayi baamona.​—2 Kul. 16:9.

21, 22. Bua tshinyi kabiena bikengela bakuambile kabidi ne: ‘Umanye Yehowa’?

²¹ Nzambi wakaleja bualu bukuabu bua mushinga bua mu tshipungidi tshipiatshipia pakambaye ne: ‘Nenteke mikenji yanyi munda muabu, nenyifunde mu mitshima yabu;  meme nengikale Nzambi wabu. Kabena bayishangana kabidi muntu yonso ne muena mutumba nende ne muntu yonso ne muanabu bamba ne: Umanye Yehowa; bualu bua buonso buabu nebammanye.’ (Yel. 31:33, 34) Bela manyi batshidi pa buloba mbaleje mudibu ne mikenji ya Nzambi mu mioyo yabu. Mbanange malongesha adi mu Dîyi diende pamutu pa kueyemena malongesha a bantu. Badi balongesha bena mu musumba munene malu adibu balonga mu  Bible ne disanka dionso. Nunku bantu badi ne ditekemena dia kusomba pa buloba mbafike pabu ku dimanya Yehowa ne ku dimunanga. Badi batumikila bulombodi buende ne muoyo umue ne beyemena malu adiye mulaye. Kakuyi mpata, udi pebe ukumbaja malu aa. Udi mufike ku dimumanya bimpe ne mudie nende malanda. Edi ndiakalenga dinene diudi nadi.

²² Ntshinyi tshidi tshikuambuluishe bua kukolesha malanda ebe ne Yehowa? Kakuyi mpata utshidi uvuluka misangu iuvua mumone muvuaye muandamune masambila ebe. Bualu ebu mbukuambuluishe bua kunanga Nzambi muimpe eu bikole menemene. Udi pamuapa uvuluka kabidi muvuaye mukuambuluishe bua kuvuluka mvese kampanda uvua mukupeshe bukole bua kutantamena lutatu kansanga. Kupu muoyo malu a mushindu eu to. Paudi utungunuka ne kulonga Dîyi dia Yehowa, dimanya diebe neditungunuke ne kuvula ne nedikupeteshe masanka.

23. Mmunyi mudi kumanya Yehowa kukuambuluisha bua kubenga kutungunuka ne kudipisha?

²³ Kudi disanka dikuabu dinene didi tshipungidi tshipiatshipia tshitupetesha mpindieu. Kumanya ne: Yehowa udi utufuila luse bilondeshile tshipungidi etshi kudi kutuambuluisha bua kubenga kutungunuka ne kudipisha. Tshilejilu, bantu bavua batule mafu ku bukole kumpala kua kumanyabu mikenji ya Nzambi badi mua kuikala badipisha ne bumvua bibi bualu bavua bashipe muana uvua wenda ukola munda. Bakuabu badi badiumvua nanku bualu bavua bashipe bantu mu mvita. Mulambu wa Yezu udi ne mushinga wa bungi mu tshipungidi tshipiatshipia bualu udi wambuluisha bua kufuila bantu badi banyingalala ne muoyo mujima luse. Bu mudibi nanku, katuenaku mua kuikala bashindike ne: padi Yehowa utufuila luse, udi umona anu bu ne: tshilumbu ntshimane kujika anyi? Katuena ne bua kuimanyina pa mibi ikadi Yehowa mutubuikidile ne muoyo mujima to.

24. Ndikankamija kayi diudi upeta mu muyuki udi mu Yelemiya 31:20?

 ²⁴ Tudi tupeta tshijadiki tshia mudi Yehowa musue kufuila bantu luse mu Yelemiya 31:20. (Bala.) Bidimu bia bungi kumpala kua Yelemiya, Yehowa wakanyoka bena mu bukalenge bua bisa dikumi bia Isalele (bivuabu baleja mpala kudi tshisa tshinene tshia Efelayima) bualu bavua batendelela nzambi ya dishima. Bakaya nabu mu bupika. Kadi Nzambi uvua munange bantu ba mu tshisamba tshiende etshi bikole ne wakabumvuila luse. Uvua mubanange anu bu ‘muana udibu bakongoluela.’ Pavuaye ubavuluka, ‘mutshima wende uvua ubajinga.’ Muyuki eu utudi tupeta mu nshapita udiye wakula bua tshipungidi tshipiatshipia udi uleja mudi Yehowa ne muoyo mule kudi bantu badi banyingalala bua mibi ivuabu benze kale.

25. Bua tshinyi udi ne bua kusakidila Yehowa bua tshipungidi tshipiatshipia?

²⁵ Mulayi wa Yehowa wa kubuikidila bantu mibi ku diambuluisha dia tshipungidi tshipiatshipia neukumbane tshishiki ku ndekelu kua bukokeshi bua bidimu tshinunu bua Kristo. Yeye pamue ne bakuidi bindondi 144 000 nebapingaje bantu ba lulamatu ku bupuangane. Panyima pa diteta dia ndekelu, bantu nebalue bena mu dîku dia Yehowa didi dienza ne batendeledi bende ba mu diulu ne ba pa buloba. (Bala Lomo 8:19-22.) Bubi buvua butatshishe bantu aba bonso munkatshi mua bidimu bipite bungi. Kadi dîba adi, nebapete “budishikaminyi bua butumbi bua bana ba Nzambi” tuambe ne: nebumbuke ku bupika bua bubi ne lufu. Ke bualu kayi ikala mushindike ne: ku diambuluisha dia tshipungidi tshipiatshipia tshidi Nzambi muenze ne dinanga dionso, udi mua kupeta masanka a bungi. Udi mua kuapeta mpindieu ne bua kashidi ne tshiendelele ku butuangaji bua “lutonga” lua Davidi ne kupeta “buakane mu buloba.”​—Yel. 33:15.