1, 2. Bua tshinyi mbikole bua kumanya tshidi muoyo wetu wa mu tshimfuanyi?

 FUANYIKIJABI ne: mu dinda dikuabu pautshidi pa bulalu, udi umvua tshintu tshikusama bikole mu tshiadi ne tshikupangisha bua kupuyakana. Udi mua kudiebeja ne: ‘Tshidi mua kuikala disama dia muoyo anyi?’ Kulengulula bualu abu ki nkubumana to. Nunku, mbimpe ulombe bua baya nebe mu lupitadi bua bakuondope. Munganga udi mua kukuenza mateta bimpe, pamuapa ne biamu bidi bikumbanyine. Yeye mupete disama lukasa ne mutuadije kukuondopa, udi mua kupanda.

² Netuambe tshinyi bua muoyo wetu wa mu tshimfuanyi? Bidi mua kuikala bikole bua kumanya tshidiwu. Bua tshinyi? Bualu Bible udi wamba ne: ‘Mutshima udi upita bintu bionso kudinga muntu, ne udi utamba kunyanguka; mmuntu kayi udi mua kuumanya?’ (Yel. 17:9) Nunku, muoyo wetu udi mua kutudinga, utuambila ne: tutshidi tutendelela Nzambi mu mushindu muimpe, pabi bantu bakuabu badi baditatshisha buetu tuetu mbamona ne: kudi malu adi aleja mutudi tuenda tupambuka. Bua tshinyi muoyo udi mua kutudinga? Bualu matekete etu adi mua kuikala atuluisha ne Satana ne bulongolodi buende badi batupangisha bua kujingulula tshidi muoyo wetu. Tudi mua kulongela kudi Yelemiya ne bena Yuda ba mu tshikondo tshiende pa bidi bitangila dikonkonona dia muoyo wetu.

3. Bantu ba bungi batu batendelela nzambi kayi?

³ Bena Yuda ba bungi bakaleja muvua muoyo wabu mumane kunyanguka. Bakela Nzambi umuepele mulelela nyima bua kutendelela nzambi ya bena Kanâna, kabayi bamona bu  kudi bualu to. Yehowa wakabebeja ne: ‘Kadi nzambi yebe iwakudienzela idi penyi? Yoyi ibike, biamanyayi mua kukusungila mu dituku dia dikenga diebe. Bualu bua bu mudi bungi bua misoko yebe mbu mudi bungi bua nzambi yebe.’ (Yel. 2:28) Buetu tuetu, bidi mua kuikala bikole bua kuela meji ne: tudi batendeledi ba nzambi ya dishima. Kadi nkonga miaku mukuabu udi wamba bua “nzambi” ne: “Mmuntu anyi tshintu tshidi ne mushinga wa bungi menemene.” Bantu ba bungi lelu batu bateka mudimu wabu, makanda abu a mubidi, mêku abu ne bintu bidibu banange pa muaba wa kumpala mu nsombelu wabu. Bakuabu batu bamona manaya, bantu badi bende lumu, malu a sianse, ngendu anyi bilele bia kuabu bu bidi ne mushinga wa bungi menemene. Bantu ba bungi batu bipatshila bintu ebi bafika too ne kudinyanga malanda abu ne Mufuki wabu. Bena Kristo badiku mua kunyanguka anu bu bena Yuda ba mu matuku a Yelemiya anyi?

4. Bantu bavua bamba ne: ‘Dîyi dia Yehowa didi penyi? Dilue mpindieu!’ bavuaku bamba nanku ne muoyo mujima anyi?

⁴ Kakuyi mpata, nebikuambuluishe bua kumanya tshivua tshifikishe Yelemiya ku diamba ne: muoyo wa bantu mmunyanguke. Wakamona muvua bantu bamba ne: ‘Dîyi dia Yehowa didi penyi? Dilue mpindieu!’ (Yel. 17:15) Kadi bavuaku bamba nanku ne muoyo wabu mujima anyi? Nshapita wa Yelemiya eu udi utuadija ne mêyi aa: ‘Bubi bua ba mu Yuda budi bufundibue ne tshiamu tshia kutapa natshi maleta ne ku lusongo lua dibue dia diamant; budi butapibue pa dibue dia mu mitshima yabu.’ Tshilumbu tshivua ne: bena Yuda bavua ‘beyemena bantu, bavuija bantu bu diboko diabu dia bukole, ne bumusha mutshima wabu kudi Yehowa.’ Kadi kuvua bantu bakese bavua beyemena Nzambi, bakeba buludiki buende ne mabenesha ende.​—Yel. 17:1, 5, 7.

5. Ntshinyi tshivua bena Yuda benza pavua Yehowa ubambila tshia kuenza?

⁵ Tshivua mu muoyo wa bantu ba bungi tshiakamuenekela ku tshivuabu benza ne malu avua Nzambi ubambila. (Bala Yelemiya 17:21, 22.)  Tshilejilu, dituku dia nsabatu divua dia kuikisha ku midimu ya bianza ne kuenza malu a ntendelelu. Bena Yuda kabavua ne bua kuenza midimu yabu anyi kutuma bantu bakuabu bua kubenzelayi dituku dia nsabatu to. Kadi malu avuabu benza akaleja tshivua muoyo wabu. ‘Bobu kabakumvua, kabakateleja matshi abu, kadi bakakolesha mitshima yabu bua kabumvu biabu, kabitabuji diyisha.’ Nansha muvuabu bamanye mikenji ya Nzambi, bavua ne wabu mushindu wa kumona malu ne bavua ne bia kuenza dituku dia nsabatu.​—Yel. 17:23; Yesh. 58:13.

6, 7. (a) Muena Kristo udi mua kuela meji kayi mabi nansha mudi kasumbu ka mupika katubela lelu? (b) Ntshinyi tshidi mua kufikila dibuela dietu dia mu bisangilu?

⁶ Lelu katuena ku mukenji wa nsabatu to. Kadi tudi mua kulongela ku tshivua bantu benza, tshivua tshileja muvua muoyo wabu. (Kolos. 2:16) Tudi bateke malu etu ne bibidilu bietu ku luseke bua kuenza disua dia Nzambi. Tudi tujingulula mudibi mua kuikala bibi bua kudisunguila mushindu utudi mua kusankisha Nzambi. Imue misangu tudi mua kuikala kabidi bamanye bantu badi badifile bikole mu dienza disua dia Nzambi ne bapete ditalala bua bualu abu. Nunku, mmunyi mutudi mua kudidinga?

⁷ Anu muvuabi bienzekele bantu ba bungi ba mu matuku a Yelemiya, muena Kristo udi mua kuikala udishima padiye wela meji ne: muoyo wende kawena mua kumudinga. Tshilejilu, udi mua kudiambila ne: ‘Ndi ne bua kuenza mudimu bua kudisha bena mu dîku dianyi.’ Ki mbibi to. Kadi netuambe tshinyi bikala bualu ebu bumufikisha ku diela meji ne: ‘Ndi ne bua kulonga tulasa tua bungi bua kupeta mudimu muimpe?’ Bualu ebu ki mbubi to, ne budi mua kumufikisha ku diamba ne: ‘Bikondo mbishintuluke. Bua kupeta mudimu muimpe lelu, bidi bikengela kulonga tulasa tubandile anyi tua iniversite.’ Mbitekete bua yeye kutuadija kupepeja mibelu mimpe idi kasumbu ka mupika wa lulamatu ne wa budimu katupesha bua tulasa tubandile ne kutuadija kupumbisha bisangilu. Mu tshilumbu etshi, bena Kristo bakuabu  mbadifuanyikije ku kakese ku kakese ne bena panu ne ngelelu wabu mubi wa meji. (Ef. 2:2, 3) Ke bualu kayi Bible udi utudimuija ne: ‘Kanudifuanyikiji ku malu a mu tshikondo etshi.’​—Lomo 12:2. a

8. (a) Ntshinyi tshidi muena Kristo mua kuditumbishila? (b) Bua tshinyi kabiena bikengela anu kumanya malu adi atangila Nzambi ne avuaye muenze?

⁸ Bushuwa, mu tshisumbu tshia bena Kristo ba kumpala muvua bantu babanji ne pamuapa bende lumu tshikondo atshi. Ke mudibi kabidi bua bena Kristo bakuabu lelu. Mmushindu kayi udibu ne bua kudimona bua malu adibu benza ne mmushindu kayi utudi tuetu ne bua kubamona? Yehowa  udi utuandamuna ku butuangaji bua Yelemiya. (Bala Yelemiya 9:23, 24.) Pamutu pa kuditumbisha bua malu adi bantu benza, muntu udi ne meji udi witaba ne: kumanya Mukalenge wa diulu ne buloba ke kudi ne mushinga kupita bionso. (1 Kol. 1:31) Kadi kupeta meji a kudi Yehowa ne kumumanya kudi kumvuija tshinyi? Bushuwa, bantu ba mu matuku a Yelemiya bavua bamanye dîna dia Nzambi. Bavua kabidi bamanye tshivuaye muenze bua kusungila bankambua babu ku Mbuu Mukunze, pavuabu babuele mu buloba bulaya, mu tshikondo tshia Balumbuluishi ne pavua bakalenge bimpe bakokesha. Nansha nanku, kabavua bamanye Yehowa bimpe ne kabavua bamuitabuja ne muoyo wabu mujima to. Kadi bavua bamba ne: ‘Tshiena ne tshilumbu; bulelela, tshiji tshia Nzambi tshiakumuka kundi.’​—Yel. 2:35.

9. Bua tshinyi tudi bashindike ne: kudi mushindu wa muntu kushintululaye muoyo wende? Bidi mua kuenzeka bishi?

⁹ Bena Yuda bavua Yelemiya wambila malu a kudi Nzambi bavua ne bua kushintulula muoyo wabu. Bavua mua kushintuluka bualu Nzambi wakamba bua bena Yuda bavua ne bua kualukila kuabu ne: ‘Nembape mitshima ya kumanya ne: Meme ndi Yehowa; bobu nebikale bantu banyi, ne meme nengikale Nzambi wabu; bualu bua nebapingane kundi.’ (Yel. 24:7) Lelu kabidi, bantu badi mua kushintuluka. Yonso wa kutudi udi mua kulengeja muoyo wende wa mu tshimfuanyi. Kudi malu asatu manene adi mua kutuambuluisha: kudilongela Dîyi dia Nzambi ne muoyo mujima, kumvua bimpe malu adi Nzambi utuenzela ne kutumikila malu ende atudi tulonga. Katufuanyi bantu ba mu matuku a Yelemiya to, kadi tuitabe  bua Nzambi atete mioyo yetu. Tudi kabidi mua kuteta mioyo yetu ku diambuluisha dia Bible ne patudi tumona malu adi Yehowa muenze bua diakalenga dietu. (Mus. 17:3) Tuetu benze nunku, netuleje mutudi ne meji.

10, 11. (a) Bua tshinyi Yelemiya wakaya kutangila mufumbi wa ngesu? (b) Yehowa udi ufumba bantu bilondeshile tshinyi?

¹⁰ Satana mmusue kufumba bantu bonso anu mu mushindu umue, kadi Nzambi yeye udi ufumba muntu ne muntu bilondeshile tshidiye. Ke tshidi tshivua tshienzekele Yelemiya tshileja. Dituku dikuabu, Nzambi wakamuambila bua kuya kua mufumbi wa ngesu. Mufumbi au uvua wenza mudimu, kadi pavua luesu luvuaye ufumba lunyanguka, uvua wangata dîma adi ne wenza nadi luesu lua mushindu mukuabu. (Bala Yelemiya 18:1-4.) Bua tshinyi Nzambi wakambila Yelemiya bua kutangila bualu ebu, ne budi butulongesha tshinyi?

¹¹ Yehowa uvua musue kuleja Yelemiya ne bena Isalele ne: udi ne bukokeshi bua kufumba bantu ne bisamba bu mudiye musue. Mmushindu kayi udi Nzambi ukuata mudimu ne dîma? Yehowa mmushilangane ne bantu batu bafumba ngesu, bualu yeye katu wenza bilema to, ne katu unyanga mudimu wende ku bukole to. Yehowa udi ufumba bantu bilondeshile tshidibu benza padiye ubafumba.​—Bala Yelemiya 18:6-10.

12. (a) Ntshinyi tshivua Yehoyakima muenze pavua Yehowa uteta bua kumufumba? (b) Tshilejilu tshia Yehoyakima tshidi tshikulongesha tshinyi?

¹² Nunku, mmushindu kayi udi Yehowa ufumba muntu ne muntu? Lelu udi utamba kuenza mudimu ne Dîyi diende.  Padi muntu udibala ne uditumikila, udi uleja tshidiye ne Nzambi udi mua kumufumba. Tuangatayi tshilejilu tshia mukalenge Yehoyakima bua kumona muvua bantu ba mu matuku a Yelemiya mua kushintuluka mu malu avuabu benza dituku dionso. Mikenji ivua yamba ne: muntu kavua ne bua ‘kukengesha muntu uvua mubuele mu mudimu wa difutu.’ Kadi ke tshivua mukalenge au muenze bualu uvua wenzeja bena Isalele nende mudimu kayi ubafuta bua kuibaka ‘nzubu munene uvua ne nzubu mikuabu minene munda.’ (Dut. 24:14; Yel. 22:13, 14, 17) Nzambi wakateta mua kufumba Yehoyakima ku diambuluisha dia mêyi avuaye umuambila ku butuangaji bua baprofete bende. Kadi mukalenge wakalonda majinga mabi a mu muoyo wende. Wakamba ne: ‘Tshiena ngumvua nansha,’ ne wakatungunuka ne kulonda bibidilu biende bia ku buana. Ke bualu kayi Nzambi wakamba ne: ‘Nebajike Yehoyakima bu mudibu bajika nyama wa mpunda, bamukoka panshi ne bamuimansha.’ (Yel. 22:19, 21) Ki mbimpe tuikale tuamba ne: ‘Ke muanyi muntu’ to. Lelu Nzambi kena utuma baprofete bu Yelemiya to, kadi udi utuambila tshia kuenza. Kasumbu ka mupika wa lulamatu kadi katuambuluisha bua kumanya mikenji ya mu Bible ne kuyitumikila. Mikenji eyi idi mua kuikala itangila malu atudi tuenza dituku dionso edi bu mudi mvuadilu wetu, mushindu utudi tudilengeja, mijiki ne maja atu bantu baja mu bibilu bia mabaka anyi bikuabu. Netuitabe bua Nzambi atufumbe ku diambuluisha dia Dîyi diende anyi?

13, 14. (a) Bua tshinyi bantu bavua ne bapika bena Ebelu bakitaba bua kubalekela? (b) Ntshinyi tshivua tshileje muvua mioyo ya bantu bavua ne bapika abu?

¹³ Tuangate tshilejilu tshikuabu. Bena Babulona bakateka Sedekiya bua kukokesha mu Yuda mu dîna diabu. Kadi Sedekiya wakabenga tshivua Nzambi mumuambile mukana mua Yelemiya, ne kutombokaye. (Yel. 27:8, 12) Ke bualu kayi bena Babulona bakalua kutshintshimika Yelushalema. Mukalenge ne banene ba mu bukalenge buende bakamona ne: bivua bikengela kuenza bualu kampanda bua kutumikila mikenji  ya Nzambi bua abanyishe. Bu muvua Sedekiya mumanye ne: bapika bena Ebelu bavua ne bua kumbuka ku bupika mu tshidimu tshia muanda mutekete tshia bupika buabu, wakadia tshipungidi bua kubalekela bonso. (Ekes. 21:2; Yel. 34:14) Bu muvua Yelushalema munyunguluka kudi baluishi, bantu bakamona ne: bivua bikengela kulekela diakamue bapika babu.​—Bala Yelemiya 34:8-10.

¹⁴ Pashishe, tshiluilu tshia bena Ejipitu tshiakalua bua kuambuluisha Yelushalema ne kufikishabu bena Babulona ku diumbuka. (Yel. 37:5) Bantu bavua balekele bapika babu bakenza tshinyi? Bakabenzeja bua kualukila ku bupika. (Yel. 34:11) Bidi bimueneka ne: pavua bena Yuda mu njiwu, bavua bamona muvuabi bikengela kutumikila mikenji ya Nzambi, bienze anu bu ne: ditumikila edi divua mua kujimija malu mabi avuabu benze. Kadi pavua njiwu ijimina, bavua balukila ku malu abu mabi. Nansha muvuabu baleje ne: bavua bitabe tshivua mikenji yamba, malu akaluabu kuenza akaleja ne: mu mioyo yabu kabavua basue kutumikila tshivua Nzambi ubambila mu Dîyi diende ne kuitaba bua dibafumbe to.

15. Udi musue bua Yehowa akufumbe mu mushindu kayi? Umvuija.

¹⁵ Tudi mua kumanya tshidi Bible wamba bua bualu kampanda busunguluke ku diambuluisha dia tshisumbu tshia Yehowa tshia pa buloba bujima. Tshilejilu, tudi mua kuikala bamanye tshitudi ne bua kuenza padi muena Kristo utuenzela bibi. (Ef. 4:32) Tudi mua kuamba mudi mibelu ya mu Bible mikale mimpe ne yambuluisha. Kadi netuleje ne: tudi dîma dia mushindu kayi? Netuitabe bushuwa bua Yehowa atufumbe anyi? Bikala muoyo wetu muimpe, netulengeje bienzedi bietu.  Dîba adi, Yehowa mufumbi wetu munene neatuvuije tshintu tshimpe tshidiye mua kukuata natshi mudimu. (Bala Lomo 9:20, 21; 2 Timote 2:20, 21.) Pamutu pa kuikala ne muoyo bu wa Yehoyakima anyi wa bantu bavua ne bapika mu bukokeshi bua Sedekiya, tudi ne bua kuitaba bua Yehowa atufumbe bua kuenza mudimu muimpe.

16. Mbualu kayi bua mushinga buvua Yelemiya mumanye bimpe?

¹⁶ Nansha Yelemiya bakamufumba kudi Nzambi. Wakenza tshinyi? Tudi tumanya tshivuaye muenze patudi tubala mêyi ende a ne: ‘Muntu kena ne bukole munda muende bua kuendesha nabu biendedi biende bimpe.’ Ke yeye kusengelela Yehowa ne: “Yehowa, umbele.” (Yel. 10:23, 24) Nuenu bansonga, nudiku mua kuidikija Yelemiya anyi? Nenuangate mapangadika a bungi kumpala eku. Kudi bansonga bakuabu badi basue ‘kuendesha biendedi biabu’ nkayabu. Nenukebe buludiki bua Nzambi panudi nuangata mapangadika anyi? Anu bu Yelemiya, nenuitabe ne didipuekesha dionso ne: muntu kena ne bukole bua kudilombola anyi? Nuvuluke ne: nuenu bakebe buludiki bua Nzambi, neanufumbe.

17-19. (a) Bua tshinyi Yelemiya wakenza luendu lule mutangile ku Pelata? (b) Mmushindu kayi uvua ditumikila dia Yelemiya ditetshibue? (c) Malu avua Yelemiya muenze bua mukaba akamuambuluisha ku tshinyi?

¹⁷ Mudimu wa Yelemiya uvua umulomba bua kutumikila tshivua Nzambi umuambila. Bu wewe muikale Yelemiya, uvuaku mua kulonda bualu buonso buvua Nzambi ukuambila anyi? Musangu mukuabu, Yehowa wakambila Yelemiya bua kukeba mukaba wa tshilamba tshia lin ne kuuvuala. Pashishe, wakamuambila bua kuenza luendu bua kuya ku musulu wa Pelata. Wewe mutangile karte, neumone ne: uvua ne bua kuenza luendu lua kilometre mitue ku 500. Pakafika Yelemiya muaba au, Nzambi wakamuambila bua kusokoka mukaba mu mutanta wa dibue ne kupingana ku Yelushalema. Pashishe, Nzambi wakamuambila bua kupingana bua kuangata mukaba au. (Bala Yelemiya 13:1-9.) Bua ngendu yonso ayi, Yelemiya wakenza kilometre mitue ku 1 900. Bantu bakuabu kabatu bitaba ne: uvua mua kuenza luendu lule lua mushindu eu luvua mua  kumuangata ngondo ya bungi to. b (Eze. 7:9) Pabi, ke tshivua Nzambi muambile Yelemiya bua kuenza ne ke tshiakenzaye.

¹⁸ Fuanyikijabi Yelemiya wenda mu mikuna ya Yudeya ne pashishe, bilondeshile njila uvuaye mulonde, udi upitshila mu tshipela mutangile ku musulu wa Pelata. Bionso abi anu bua kusokoka mukaba wa tshilamba tshia lin. Bena mutumba nende bavua mua kuikala badiebeje kuvuaye muye matuku bungi nanku. Pakapinganaye, kavua kabidi ne mukaba to. Pashishe Nzambi wakamuambila bua kuenza kabidi luendu lule alu bua kuangata mukaba ukavua mubole ne ‘kauyi ne mudimu kabidi.’ Ela meji muvuabi mua kuikala bipepele bua kudiambila ne: ‘Ebi biantondi. Tshiena mumone tshindi ngenzela luendu elu to.’ Kadi bu mukavua Nzambi mumufumbe, kakamba nanku to. Pamutu pa kudilakana, wakenza tshiakamuambilaye.

¹⁹ Nzambi wakamumvuija malu anu panyima pa yeye mumane kuenza luendu luibidi. Bionso bivua Yelemiya muenze abi bivua ne bua kumuambuluisha bua kuambila bantu tshivua Yehowa ukeba kuenza. Wakamba ne: ‘Bantu aba babi badi bapidia kumvua mêyi anyi, badi benda mu tshitshu tshia mu mitshima yabu, bakalonda nzambi mikuabu bua kuyikuatshilabu mudimu ne bua kuyitendelelabu, nebikale bu mukaba eu udi kauyi ne mudimu kabidi.’ (Yel. 13:10) Eu uvua mushindu muimpe mutambe uvua Yehowa ulongesha bantu bende. Bu muvua Yelemiya mutumikile ne muoyo mujima mu bualu buvua bumueneka bu bukese, biakamuambuluisha bikole bua kulenga mioyo ya bantu.​—Yel. 13:11.

20. Bua tshinyi ditumikila diebe didi mua kukemesha bantu bakuabu? Kadi ntshinyi tshiudi ne bua kuikala mushindike?

²⁰ Nzambi kena ulomba bena Kristo bua kuenza ngendu mile bua kupetabu dilongesha kampanda to. Kadi nsombelu webe wa buena Kristo udiku ukemesha bena mutumba nebe ne  bantu bakuabu peshi udiku ubasaka bua kukuamba mêyi mabi anyi? Bualu ebu budi mua kutangila mvuadilu webe ne mushindu uudi udilengeja, tulusa tuudi usungula bua kulonga, mudimu uudi musue kuenza anyi mushindu uudi umona dinua maluvu makole. Neudisuike bua kutumikila mêyi a Nzambi anu bu Yelemiya anyi? Mapangadika audi wangata bualu udi muitabe bua Nzambi afumbe muoyo webe adi mua kukufikisha ku diyisha bantu bimpe. Mu mishindu yonso, kutumikila malu adi Yehowa utuambila mu Dîyi diende ne kuitaba mibelu idiye utupesha ku butuangaji bua kasumbu ka mupika wa lulamatu nekukupeteshe masanka a kashidi. Pamutu pa kulekela muoyo webe ukudinga, udi mua kulua bu Yelemiya. Nunku, disuika bua kuitaba bua Nzambi akufumbe, akuvuije tshintu tshidiye mua kuenza natshi mudimu bua kashidi.