1. Ntshinyi tshiakamba Yelemiya bua milayi ya Yehowa pakabutulabu Yelushalema?

 YELUSHALEMA udi mu kabutu. Muishi wa kapia kavua bena Babulona batue utshidi ubanda mulu. Yelemiya utshidi uvuluka mbila ivua bantu bavuabu bashipa bela. Nzambi ukavua mumumanyishe tshivua ne bua kuenzeka, ne malu akenzeka anu muvuaye muambe. Ke bualu kayi Yelemiya wakamba ne: ‘Yehowa wakuenza bualu ebu buakupangadijaye bua kuenza.’ Yelushalema wakapeta dikenga dinene ditambe.​—Bala Muadi 2:17.

2. Yelemiya wakamona dikumbana dia mulayi kayi ukavuabu bamanyishe bidimu bia bungi kumpala?

² Yelemiya wakamona dikumbana dia milayi ya bungi ivua Nzambi mumuambile bua kumanyisha tshisamba tshiende, too ne ya kale. Bidimu bia bungi kumpala, Mose wakambila  bena Isalele ne: bobu batumikile Nzambi nebapete “disanka,” kadi bobu babenge kumutumikila nebapete ‘mulawu.’ Yehowa uvua musue bua bantu bende bapete disanka, bualu mulawu anyi dikenga divua ne bua kubakuata pavuabu babenga kumutumikila divua ne bua kuikala dibi menemene. Mose wakabadimuija ne: bobu babenge kutumikila Yehowa ne bamuluishe ‘nebadie munyinyi wa bana babu balume ne bana babu bakaji.’ Yelemiya wakalua kuambulula pende mêyi aa. (Dut. 30:19, 20; Yel. 19:9; Lew. 26:29) Bantu bakuabu badi mua kudiebeja ne: ‘Bualu budi bukuatshisha buôwa bua mushindu eu buvuaku buenzeke anyi?’ Eyowa, buakenzeka pavua bena Babulona batshintshimike Yelushalema, dîba divua biakudia bijike mu tshimenga. Yelemiya wakamba ne: ‘Bianza bia bakaji badi ne mitshima ya luse biakulamba bana babu baledibue pa kapia; bakalua biakudia biabu mu tshikondo tshia kubutuka kua muana mukaji wa bana betu.’ (Muad. 4:10) Divua diakabi dibi ditambe!

3. Bua tshinyi Nzambi uvua utumina tshisamba tshiende baprofete?

³ Yehowa kavua utuma baprofete bu mudi Yelemiya anu bua kumanyisha mikenji mibi to. Uvua musue bua tshisamba tshiende tshilekele kumutombokela. Uvua musue bua benji ba malu mabi bakudimune mitshima yabu. Ezela wakaleja bualu ebu patoke pakambaye ne: ‘Yehowa Nzambi wa bankambua babu, wakananukila kubatumina bambi bende bualu bua wakadi ne bantu bende ne muaba wende luse.’​—2 Kul. 36:15; bala Yelemiya 26:3, 12, 13.

4. Ntshinyi tshivua Yelemiya umvua bua mikenji ivuaye umanyisha bantu?

⁴ Yelemiya uvua umvuila bena mu tshisamba tshiabu luse anu bu Yehowa. Ke tshiudi mua kumona mu mêyi akambaye kumpala kua dibutuka dia Yelushalema. Dikenga dikavua disemene adi divua dimutonde bikole. Bantu bavua mua kudiepuka bu bobu bateleje mêyi a Yelemiya ne baatumikile. Ela meji muvua Yelemiya udiumvua pavuaye umanyisha bantu mikenji ya kudi Nzambi. Wakadila wamba ne: ‘Ndi nyingalala! Ndi nyingalala! Ndi ne kanyinganyinga too  ne ku mutshima wanyi mene! Mutshima wanyi udi ukumakuma munda muanyi; tshiena mua kupuwa talalaa; bualu bua mutshima wanyi wakumvua dîyi dia mpungi didi dibisha bantu bua kuluanganabu mvita.’ (Yel. 4:19) Kavua mua kushala mupuwe bua dikenga dikavua pabuipi to.

5. Bua tshinyi Yelemiya uvua mutuishibue ne: malu avuaye umanyisha neakumbane?

⁵ Bua tshinyi Yelemiya uvua mushindike ne: malu avuaye umanyisha neakumbane? (Yel. 1:17; 7:30; 9:22) Bualu uvua ne ditabuja dikole ne uvua mulonge Mukanda wa Nzambi ne mumanye ne: Yehowa udi Nzambi utu ukumbaja milayi yende. Malu akavua menzeke avua aleja muvua Yehowa ne bukokeshi bua kumanyisha malu avua amueneka bu avua kaayi mua kuenzeka ku mêsu kua bantu, bu mudi dipikula dia bena Isalele mu Ejipitu. Yelemiya uvua mumanye bimpe tshivua tshienzeke pavua bena Isalele bumbuke mu Ejipitu ne mumanye kabidi mêyi a Yoshua, umue wa ku bantu bavuapu. Yoshua wakavuluija bena Isalele nende ne: ‘Nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe tshimue tshiakanulaya Yehowa Nzambi wenu; nuakapeta bintu bionso, kanuakapanga tshintu nansha tshimue.’​—Yosh. 23:14.

6, 7. (a) Bua tshinyi udi ne bua kukonkonona milayi ya Yelemiya? (b) Ntshinyi tshidi mua kukuambuluisha bua kuikala mushindike ne: malu audi uyisha neakumbane?

⁶ Bua tshinyi udi ne bua kutungunuka ne kukonkonona milayi ivua Yelemiya mumanyishe? Tshia kumpala, bualu kuvua malu avua amujadikila ne: Yehowa neakumbaje milayi yende. Tshibidi, bualu amue malu avua Nzambi mumuambile adi enda akumbana mpindieu, ne neumone dikumbana dia makuabu kumpala eku. Tshisatu, bualu milayi yonso ivua Yelemiya mumanyishe mu dîna dia Nzambi ne tshisumi tshivuaye natshi bidi bileja ne: uvua muena mudimu wa Nzambi wa pa buende. Mulongeshi munene kampanda wakamba  ne: “Yelemiya udi anu muprofete wa pa buende nansha patudi tumufuanyikija ne baprofete bakuabu.” Bua muvua Yelemiya mumanyike bu muprofete munene, bivua bienzeka ne: pavua Yezu wakula, bamue bantu bavua bela meji ne: uvua ne bua kuikala Yelemiya.​—Mat. 16:13, 14.

⁷ Anu bu Yelemiya, udi mu tshikondo tshidi milayi minene ya mu Bible yenda ikumbana. Anu bu yeye, udi kabidi ne bua kuikala mushindike ne: Nzambi neakumbaje milayi yende. (2 Pet. 3:9-14) Ntshinyi tshiudi ne bua kuenza bua kuikala ne dishindika dia mushindu eu? Tungunuka ne kukolesha ditabuja diebe dia ne: Nzambi neakumbaje milayi idi mu Dîyi diende. Ke bualu kayi, mu nshapita eu netukonkonone imue milayi ivua Yelemiya mumanyishe ne mumone dikumbana diayi. Netukonkonone mikuabu yakalua kukumbana pashishe. Kadi kudi mikuabu idi ikutangila mpindieu ne mu matuku atshilualua. Dikonkonona edi dikoleshe ditabuja diebe mu Dîyi dia Nzambi bua wikale mutuishibue ne: ‘Neenze tshidiye mupangadije.’​—Muad. 2:17.

8, 9. Bible mmukanda wa pa buawu ku tshinyi?

⁸ Kutu bantu ba bungi batu bateta bua kumanyisha malu enzeka mu matuku atshilualua. Ela meji ku bamanyi ba malu a mpetu, bena malu a tshididi, bena lubuku ne bantu batu bamanyisha bikalaku munya anyi mvula. Kakuyi mpata, ukadi mumone mutubi bikole bua kumanyisha ne bujalame buonso malu nansha makese ikala ne bua kuenzeka pamuapa mu matuku makese anyi mbingu. Kadi Bible yeye utu umanyisha malu ne bujalame buonso. (Yesh. 41:26; 42:9) Milayi yonso ikavua pa kukumbana ne ivua ne bua kulua kukumbana ivua  Yelemiya mumanyishe ivua milelela. Ya bungi ya kudiyi ivua itangila bantu basunguluke anyi bisamba. Tuanji kukonkonona mikese ivua mikumbane mu matuku ende.

⁹ Nnganyi udi mua kumanyisha lelu eu muikala nsombelu pa buloba mu tshidimu tshimue anyi bibidi kumpala eku? Tshilejilu, mmumanyi kayi udi mua kumanyisha ne bujalame buonso dishintuluka dienzeka mu malu a makalenge a pa buloba? Kadi nyuma wa Nzambi wakasaka Yelemiya bua kumanyisha muvua bukokeshi bua bena Babulona ne bua kualabala. Wakamba ne: Babulona uvua ‘lupanza lua or’ luvua Yehowa mua kupongolola nalu tshiji tshiende kudi bena Yuda ne bimenga bia bungi ne bisamba bivua pabuipi nabu bua kubabueja mu bupika ku bukole. (Yel. 51:7) Ke tshiakamona Yelemiya ne bantu ba tshikondo tshiende.​—Tangila Yelemiya 25:15-29; 27:3-6; 46:13.

10. Ntshinyi tshivua Yehowa mumanyishe bua bakalenge banayi ba mu Yuda?

¹⁰ Yehowa wakamanyisha kabidi ku butuangaji bua Yelemiya tshivua ne bua kuenzekela bakalenge banayi ba mu Yuda. Wakamba bua Yehoaza anyi Shaluma muana wa mukalenge Yoshiya ne: bavua ne bua kuya nende mu bupika ne kavua mua kupingana kabidi mu Yuda. (Yel. 22:11, 12) Ke tshiakenzeka. (2 Bak. 23:31-34) Wakamba kabidi ne: bavua ne bua kujika Yehoyakima uvua ne bua kupinganyina Yehoaza “bu mudibu bajika nyama wa mpunda.” (Yel. 22:18, 19; 36:30) Bible kena uleja mushindu uvuaye mufue anyi tshivuabu benze ne mubidi wende to, kadi udi uleja ne: muanende Yehoyakina wakamupingana mu nkuasa pavuabu batshintshimike Yelushalema. Yelemiya wakamanyisha ne: bavua ne bua kuya ne Yehoyakina (uvuabu babikila kabidi ne: Yekoniya anyi Yekonya) mu bupika ku Babulona ne uvua ne bua kufuilamu. (Yel. 22:24-27; 24:1) Ke muakenzekabi. Kadi netuambe tshinyi bua mukalenge wa ndekelu Sedekiya? Yelemiya wakamanyisha ne: bavua ne bua kumufila mu bianza bia bena lukuna bende bavua ne bua kumukengesha bibi bitambe. (Yel. 21:1-10) Ntshinyi tshiakenzeka? Bena lukuna bakamukuata, kushipa bana bende mu mêsu  ende, kumushipa mêsu ne kuya nende mu Babulona muakayaye kufuila. (Yel. 52:8-11) Bushuwa, milayi yonso eyi yakakumbana.

11. Hananya uvua nganyi? Ntshinyi tshivua Yehowa muambe bua bualu buende?

¹¹ Mu Yelemiya nshapita wa 28 badi bamba ne: mu bukokeshi bua Sedekiya, muprofete wa dishima Hananya wakamba ne: bena Babulona kabakukokesha Yelushalema bu muvua Yehowa muambe ku butuangaji bua Yelemiya to. Wakabenga kuteleja dîyi dia Nzambi ne kuambaye ne: tshikokedi tshivua Nebukadenesâ muteke pa makaya a bena Yuda ne bisamba bikuabu tshivua ne bua kutshibuka. Kadi Yehowa wakasaka Yelemiya bua kuela mashimi a Hananya patoke, kuambululaye ne: bisamba bia bungi nebikuatshile bena Babulona mudimu ne kuleja ne: tshidimu katshiakukumbana muprofete wa dishima au kayi mufue to. Ke tshiakenzeka.​—Bala Yelemiya 28:10-17.

12. Ntshinyi tshivua bantu ba bungi ba mu matuku a Yelemiya badiambila pavuaye ubamanyisha bua dibutuka dia Yelushalema?

¹² Tshidibi, mikenji ivua Nzambi wambila Yelemiya ivua itangila nangananga dibutuka dia Yelushalema. Yelemiya wakamba njila ne njila muvua Yelushalema ne bua kubutuka bu bena Yuda kabayi balekele kutendelela nzambi ya dishima, malu mabi ne tshikisu. (Yel. 4:1; 16:18; 19:3-5, 15) Bantu ba bungi ba mu matuku a Yelemiya bavua bela meji ne: Yehowa kavua mua kuenza bualu bua mushindu eu to. Bavua badiambila ne: bu muvua ntempelo wa Nzambi mu Yelushalema, kavua mua kuitaba bua kubutulabu tshimenga atshi to. Buabu bobu kabivua mua kuenzeka to. Kadi udi mumanye ne: Yehowa katu ushima to. Wakenza tshivuaye mupangadije.​—Yel. 52:12-14.

13. (a) Matuku etu aa mmafuanangane ne a Yelemiya ku tshinyi? (b) Bua tshinyi udi ne bua kukonkonona malu avua Nzambi mulaye bamue bantu mu tshikondo tshia Yelemiya?

¹³ Lelu batendeledi ba Nzambi badi mu nsombelu wa muomumue ne wa bantu bavua balamate Yehowa mu tshikondo tshia Yelemiya. Tudi bamanye ne: dikenga dikadi pa kukuata bantu bonso badi babenga kuteleja Yehowa. Kadi milayi  yende idi mua kutukolesha ku muoyo anu muvuayi mikoleshe bena Yuda bavua balamate ntendelelu mulelela mu matuku a Yelemiya. Yehowa Nzambi wakamba ne: bena Lekaba bavua ne bua kupanduka ku kabutu ka Yelushalema bualu bavua bamulamate ne batumikila mikenji ya nkambua wabu. Bakapanduka bushuwa, bualu badi bamba muakalua “Malakiya muana wa Lekaba” kuambuluisha bua kulongolola Yelushalema pavua Nehemiya ngovena. (Neh. 3:14; Yel. 35:18, 19) Yehowa wakashindikila Ebede-meleke ne: yeye pende neapanduke bualu uvua mumueyemene ne muambuluishe Yelemiya. (Yel. 38:11-13; 39:15-18) Bia muomumue, wakajadikila Baluka muenzejanganyi wa mudimu ne Yelemiya ne: neapete ‘muoyo wende bu tshintu tshinyenga mu mvita.’ (Yel. 45:1, 5) Udi mua kuamba tshinyi bua dikumbana dia milayi yonso eyi? Udi wela meji ne: Yehowa neakuenzele tshinyi wewe mushale mumulamate?​—Bala 2 Petelo 2:9.

14. Bua tshinyi malu avua Nzambi muambe bua Babulona avua a pa buawu?

¹⁴ Nzambi wakamba ne: Nebukadenesâ uvua ne bua kukuata bena Yuda ne bena Ejipitu. (Yel. 25:17-19) Bualu ebu buakamueneka bu buvua kabuyi mua kuenzeka to, bualu Ejipitu uvua ne bukole bua bungi, ukokesha too ne bena Yuda. (2 Bak. 23:29-35) Pakabutuka Yelushalema, bena Yuda bakashalamu bakalongolola bua kunyemena mu Ejipitu. Bavua basue kuenza nanku nansha muvua Yehowa mubakandike ne mubambile ne: neababeneshe bobu bashale mu Yuda. Wakabamuija ne: bobu banyemene mu Ejipitu, muele wa mvita uvuabu banyeme uvua ne bua kubalondamu. (Yel. 42:10-16; 44:30) Yelemiya kena uleja mu mikanda yende bikalaye uvua mumone muvua bena Babulona bakuate Ejipitu to. Tshitudi bamanye ntshia se: milayi ya Yehowa yakakumbanyina bena Isalele bavua banyemene mu Ejipitu pavua bena Babulona balue kukuata Ejipitu ku ntuadijilu kua bidimu bia 500 kumpala kua Yezu.​—Yel. 43:8-13.

15, 16. Mmushindu kayi uvua mulayi uvua Nzambi muambe bua kusungila bantu bende mukumbane?

¹⁵ Yelemiya wakamanyisha kabidi malu avua atangila Babulona uvua ne bua kutshimuna bena Ejipitu. Bidimu bitue ku lukama kumpala, wakamanyisha muvuabu ne bua kutshimuna Babulona mu mubunyi wa dîsu. Mmushindu kayi? Yelemiya wakamanyisha ne: musulu wa mâyi uvua mubanyunguluke ne ubalama uvua ne bua ‘kukama’ ne bena mvita bende kabavua mua kuluangana. (Yel. 50:38; 51:30) Milayi eyi yakakumbana mu kanungu ne kanungu pavua bena Medai ne bena Pelasa batshingulule musulu wa Pelata, basabuke ne babuele mu tshimenga pavua benamu mu ditanaji. Mulayi uvua umanyisha kabidi ne: Babulona uvua ne bua kushala tshipela wakakumbana pawu tshishiki. (Yel. 50:39; 51:26) Dishala dia Babulona tshipela  too ne lelu didi dileja mudi milayi ya Nzambi mikumbane yonso.

¹⁶ Yehowa uvua mumanyishe ku butuangaji bua Yelemiya ne: bena Yuda bavua ne bua kukuatshila bena Babulona mudimu bidimu 70. Pashishe Nzambi uvua ne bua kubapingaja mu ditunga diabu. (Bala Yelemiya 25:8-11; 29:10.) Danyele uvua ne ditabuja dikole mu mulayi eu, ne wakamuambuluisha bua kujadika tshikondo tshivua “dibutuka dia Yelushalema” ne bua kujika. (Dan. 9:2) Ezela wakamba ne: ‘Bua kushikijabu dîyi dia Yehowa diakambaye mukana mua Yelemiya, Yehowa wakatabuluja mutshima wa Kolesha mukalenge wa Pelasa’ uvua mulue kutshimuna Babulona bua kupingaja bena Yuda mu ditunga diabu. (Eze. 1:1-4) Bena Yuda bavua ne bua kupingana mu ditunga diabu bavua ne bua kusombamu mu ditalala ne kupingajilula ntendelelu mulelela anu muvua Yelemiya muambe.​—Yel. 30:8-10; 31:3, 11, 12; 32:37.

17. Umvuija muvua mêyi a Yelemiya a ‘kudila’ mu Lama akula bua malu abidi mashilangane.

¹⁷ Yelemiya uvua kabidi mufunde milayi ivua ne bua kulua kukumbana pashishe. Wakamba ne: ‘Badi bumvua dîyi mu Lama, madilu ne muadi mukole. Lakela udi udila bana bende; yeye udi upidia bua bamusambe bua bana bende, bualu bua kabenaku.’ (Yel. 31:15) Bidi bimueneka ne: pakabutulabu Yelushalema mu 607 kumpala kua Yezu, bavua basangishe bena Yuda bavuabu bakuate mu tshimenga tshia Lama tshidi mutantshi wa kilometre mitue ku 8 ku Nord kua Yelushalema. Bavua mua kuikala bashipe bamue ba kudibu mu Lama. Bualu ebu buvua mua kuikala dikumbana dia kumpala dia mulayi, bienze anu bu ne: Lakela uvua udila “bana” bende bavua bafue. Kadi bidimu bipite pa nkama isambombo pashishe, mukalenge Helode wakashipesha bana mu Beteleheme. Matayo wakaleja ne: mêyi a Yelemiya akavua mamanyishe muikala bantu ne bua kudila bua bualu abu.​—Mat. 2:16-18.

18. Mmunyi muvua mulayi wa Nzambi bua Edome mukumbane?

 ¹⁸ Mulayi mukuabu wakakumbana kabidi mu bidimu lukama bia kumpala. Nzambi ukavua muakuile mukana mua Yelemiya ne: Edome uvua munkatshi mua bisamba bivua bena Babulona ne bua kukengesha. (Yel. 25:15-17, 21; 27:1-7) Kadi wakamba kabidi ne: Edome uvua ne bua kulua bu Sodoma ne Amola, mbuena kuamba ne: uvua ne bua kushala bikulu ne kujimina bua kashidi. (Yel. 49:7-10, 17, 18) Ke tshiakenzeka menemene. Udi wela meji ne: tudi mua kupeta dîna dia ditunga dia Edome ne bena Edome kuepi lelu eu? Didiku mu tuarte tua matunga a lelu anyi? Tòo. Tudi tudipeta anu mu mikanda ya kale, mu miyuki ya mu Bible anyi mu tuarte tudi tuleja muvua matunga tshikondo atshi. Flavius Josèphe udi wamba ne: mu bidimu bia 100 ne pa mutu kumpala kua Yezu, bakenzeja bena Edome bua kuitaba tshitendelelu tshia bena Yuda. Kadi pakabutulabu Yelushalema mu 70, tshisamba tshiabu tshijima tshiakajimina.

19. Ntshinyi tshidi mukanda wa Yelemiya uleja bua bukole budi nabu Nzambi bua kukumbaja milayi yende?

¹⁹ Anu muudi mua kumona, mu nshapita yonso ya mu  mukanda wa Yelemiya badi bakula bua milayi ivua itangila bantu basunguluke anyi bisamba. Ya bungi ya kudiyi ikadi mikumbane. Bualu ebu nkayabu budi buvuija mukanda wa Yelemiya mukanda muimpe wa wewe kulonga, bualu udi ukujadikila bualu kampanda budi butangila Nzambi webe munene. Yehowa mmuenze bualu buvuaye mupangadije ne ke tshienzaye kumpala eku. (Bala Yeshaya 46:9-11.) Bualu ebu nebukoleshe ditabuja diebe mu malu adi Mukanda wa Nzambi ulaya, bualu dikumbana dia imue milayi ivua Yelemiya mufunde didi dikutangila wewe ne matuku ebe atshilualua. Tukonkononayi imue ya kudiyi mu tshitupa tshia ndekelu tshia nshapita eu.

20-22. Bua tshinyi tudi mua kuamba ne: milayi ya mu Bible bu mudi imue idi mu mukanda wa Yelemiya kayena ikumbana anu musangu umue? Fila tshilejilu.

²⁰ Mulayi wa mu Mukanda wa Nzambi udi mua kukumbana misangu ya bungi. Ke mudibi bua mulayi uvua Yezu mupeshe bayidi bende pavuabu bamuebeje ‘tshimanyinu tshia paluaye tshiakabidi ne tshia ku nshikidilu kua tshikondo etshi.’ (Mat. 24:3) Mulayi eu wakakumbana mu tshidimu tshia 66 too ne mu 70. Kadi bidi bimueneka ne: amue malu adi mu mulayi au neakumbane mu tshikondo tshia “dikenga dinene” didi ne bua kukuata bulongolodi bubi ebu bujima. Nedikale dikenga didi “kadiyi dianji kufika katshia ku ntuadijilu wa buloba too ne mpindiewu. Kashidi, dikenga dia mushindu ewu kadiakufika kabidi.” (Mat. 24:21, MMM) Malu a muomumue adi mu milayi ivua Yelemiya mufunde. Amue a kudiwu akakumbana musangu wa kumpala mu 607 kumpala kua Yezu, ne musangu muibidi  matuku a bungi pashishe anu bu mudibi bua mulayi udi wakula bua ‘Lakela udila bana bende.’ (Yel. 31:15) Bushuwa, amue malu avua Yelemiya mufunde adi akula bua tshikondo tshietu etshi ne dikumbana diawu didi dikutangila pebe.

²¹ Ke tshiudi mua kumona mu mukanda wa Buakabuluibua. Mupostolo Yone wakakula ku bukole bua nyuma wa Nzambi bua milayi ikavua Yelemiya mumanyishe bua dibutuka dia Babulona mu 539 kumpala kua Yezu. Mu Buakabuluibua mudi malu adi mafuanangane ne avua menzeke kumpala ne ikala ne bua kuenzeka mu mushindu wa dikema. Mu milayi ya Yelemiya idi ikumbana mu matuku etu aa mudi udi wakula bua dibutuka dia bukokeshi bunene bua nsangilu wa bitendelelu bia dishima bionso anyi “Babulona munene.” (Buak. 14:8; 17:1, 2, 5; Yel. 50:2; 51:8) Batendeledi ba Nzambi bavua ne bua ‘kulopoka munkatshi muende’ bua kababutuki pamue nende. (Buak. 18:2, 4; Yel. 51:6) Mâyi a mu tshimenga atshi adi aleja bantu badimu avua ne bua ‘kukama.’​—Yel. 51:36; Buak. 16:12.

²² Tudi bindile dikumbana dia mulayi udi uleja muikala Nzambi ne bua kudisombuela kudi tshitendelelu tshia dishima bua muditshi tshikengeshe batendeledi bende. Yehowa ‘neatshifute bu mudi bienzedi biatshi.’ (Yel. 50:29; 51:9; Buak. 18:6) Buloba bua mu tshimfuanyi bua tshitendelelu tshia dishima nebulue tshipela.​—Yel. 50:39, 40.

23. Mmulayi kayi wa Yelemiya uvua uleja muvua ntendelelu mulelela ne bua kujadikibua tshiakabidi udi mukumbane matuku etu aa?

²³ Anu muukadi mumone, milayi ya Yelemiya ivua yakula kabidi bua malu mimpe. Tshilejilu, wakamanyisha muvua ntendelelu mulelela ne bua kujadikibua tshiakabidi mu matuku etu aa. Dipatuka dia bena Yuda mu bupika mu Babulona wa kale didi dipetangana ne dipatuka dia batendeledi ba Nzambi ba lelu mu Babulona  munene panyima pa dijadikibua dia Bukalenge bua Nzambi mu diulu. Mu ngumvuilu kampanda, Yehowa wakapingaja batendeledi bende ku ntendelelu mulelela ne bobu kusanka bikole ne kumuela tuasakidila. Mmubeneshe mudimu udibu benze bua kuambuluisha bakuabu bua balue kumutendelela ne kudia ku mêsa ende. (Bala Yelemiya 30:18, 19.) Udi mudimuene ne ebe abidi mudi Yehowa mmukumbaje mu matuku etu aa mulayi wende wa kupesha batendeledi bende balami badi bashindame mu ditabuja badi badisha tshisumbu ne batshilama bimpe.​—Yel. 3:15; 23:3, 4.

24. Mmêyi kayi a Yelemiya adi ne bua kukumbana kumpala eku?

²⁴ Mêyi avua Yelemiya muambile bena Yuda avua aleja muvua Nzambi mulaye bantu bavua bamulamate malu mimpe ne kabutu bua bantu bavua bashipe nende malanda. Ke mudibi kabidi lelu. Mbitekete bua muntu kumona didimuija didi mu mêyi a ne: ‘Badi Yehowa ushipa mu dituku adi nebikale  pa buloba ku ditengu diabu dimue too ne ku mfudilu kuabu. Kabena babajinga, kabena babasangisha, kabena babajika, kadi nebikale anu bu tumvi panshi pa buloba.’​—Yel. 25:33.

25. Mmudimu kayi udi nawu Bantemu ba Yehowa lelu?

²⁵ Anu bu Yelemiya, tudi mu tshikondo tshikole. Anu bu muvuabi mu matuku ende, bantu badi mua kupeta muoyo anyi lufu bilondeshile tshidibu benza padibu bumvua dîyi dia Yehowa. Bantemu ba Yehowa ki mbaprofete bu muvua Yelemiya to, bualu nyuma wa Nzambi kena ubasaka bua kukumbaja mêyi ku adi mu Dîyi diende to. Kadi Nzambi mmutupeshe mudimu wa kuyisha lumu luimpe lua Bukalenge buende too ne ku nshikidilu kua tshikondo etshi. (Mat. 28:19, 20) Katuena basue ‘kuiba mêyi a Yehowa’ pa kusokoka bantu malu akadi pa kuenzeka. (Bala Yelemiya 23:30.) Tudi badisuike bua kubenga kutekesha anyi kupepeja bukole budi nabu mêyi a Nzambi. Milayi ya bungi ivua Nzambi mupeshe Yelemiya ikadi mikumbane. Bualu ebu budi butushindikila ne: idi mishale neyikumbane payi. Nunku, tudi ne bua kujadikila bantu ne: Nzambi neakumbaje ‘bualu buakupangadijaye bua kuenza ne mukenji wakelaye kale.’​—Muad. 2:17.

26. Mmulayi kayi udi mushale bua tuetu kukonkonona?

²⁶ Katuena mua kuamba ne: tudi bajikije dikonkonona dia mudimu wa buprofete bua Yelemiya ne milayi yende patudi katuyi bakule bua mulayi munene wa Yehowa wa ‘tshipungidi tshipiatshipia’ tshivuaye ne bua kudia ne bantu bende ne kufunda mikenji yatshi mu mioyo yabu to. (Yel. 31:31-33) Mulayi eu ne dikumbana diawu udi ukutangila ne ke utuakonkonona mu nshapita udi ulonda.