NSHAPITA WA 35

Ndi mua kulua mulunda wa Nzambi mushindu kayi?

Jeremy wakalua kumona mudi kuikala mulunda wa Nzambi ne mushinga wa bungi pavua nsombelu kampanda mukole mumufikile. Udi wamba ne: “Pamvua ne bidimu 12, papa wetu wakaya kutushiya. Dimue dituku butuku ngakasambila muladile pa bulalu, nsengelela Yehowa bua ambuluishe papa bua apingane.”

Jeremy wakatuadija kubala Bible nansha muvuaye mushikile. Pakabalaye Misambu 10:14, biakamulenga bikole. Mvese au udi wamba bua Yehowa ne: “Kuudi wewe nkudi muena diakabi udibu benzele bibi unyemena; udi muambuluishi wa muana udi mufuishe tatuende.” Jeremy udi wamba ne: “Ngakumvua ne: Yehowa uvua uyukila nanyi unjadikila ne: neangambuluishe; ne uvua Tatu wanyi. Kakuena tatu mukuabu udi mupite Yehowa to.”

NANSHA biobi ne: nsombelu wa Jeremy ukadi mukufikile anyi kayi muanji kukufikila, Bible udi uleja ne: Yehowa mmusue bua wikale mulunda wende. Udi wamba mene ne: “Semenayi pabuipi ne Nzambi ne yeye neasemene pabuipi nenu.” (Yakobo 4:8) Anji elabi meji: Yehowa Nzambi udi ukulomba bua ulue mulunda wende, nansha muudi kuyi mua kumumona anyi kuyi wa mulongo wende mu bibadi bionso!

Kadi mbimpe wikale udienzeja bua kulama bulunda buebe ne Nzambi. Tshilejilu: Udi mumanye ne: wewe mukune tshilongo kumbelu, katshiena mua kukola anu nanku to. Bua tshiotshi kusampila, mbimpe wikale utshiela mâyi misangu yonso ne ulongolola kumpenga kuatshi bua tshikole bimpe. Ke mudibi bikengela kudienzeja kabidi bua kulama bulunda ne Nzambi. Ntshinyi tshiudi mua kuenza bua kukolesha bulunda abu?

Kudilongela kudi ne mushinga

Balunda batu bayukila, mmumue ne: eu wakula mukuabu uteleja. Bulunda ne Nzambi budi kabidi mushindu au. Tudi tuteleja tshidi Nzambi utuambila patudi tubala Bible ne tumulonga.​—Misambu 1:2, 3.

Pamuapa kutu nangananga musue kudilongela to. Nsonga ya bungi itu misue kumona yoyi TV, kunaya, anyi kupitshisha dîba ne balunda. Kadi wewe musue kudia bulunda ne Nzambi, kakuena njila wa tshikoso to. Udi ne bua kumuteleja pa kulonga Dîyi diende.

Nunku kusamishi mutu to. Kudilongela Bible kakuena ne bua kuikala bu muonji mukuela mu nshingu to. Enza bua kukusankishe, nansha wewe udimona muntu utu kayi musue kulonga. Bualu bua kumpala buudi ne bua kuenza nkudikebela dîba dia kulonga Bible. Nsongakaji mukuabu diende Lais udi wamba ne: “Ntu muenze programe. Tshintu tshia kumpala tshintu ngenza mu dinda nkubala nshapita mujima wa Bible.” Maria nsongakaji wa bidimu 15, utu wenza malu wende mushindu. Udi wamba ne: “Ntu mbala ndambu wa mêyi a mu Bible butuku buonso kumpala kua kulala.”

Bua kutuadija programe wa kudilongela nkayebe, tangila kazubu ka ne: “ Tambakana mu Bible webe.” Pashishe ufunde kuinshi eku dîba diudi mua kudilongela Dîyi dia Nzambi nansha bua minite 30.

․․․․․

Kuenza programe ntuadijilu patupu. Paudi anu utuadija kudilongela, udi mua kulua kumona ne: Bible kena anu mupepele misangu yonso bua kubala to. Udi mua kuitaba tshivua Jezreel udi ne bibimu 11 muambe etshi: “Imue nshapita ya mu Bible mmikole bua kuyumvua ne kayena isankisha bua kuyibala to.” Wewe umvua nanku, kutshioki to. Ikala umona misangu yonso didilongela Bible bu tshikondo tshiudi uteleja Yehowa Nzambi, mulunda webe. Ndekelu wa bionso, wewe udienzeja neumone mudi didilongela Bible disankisha ne dikuambuluisha!

Kusambila kudi ne mushinga

Disambila ke mushindu utudi tuambila Nzambi malu. Bushuwa, disambila ndipa dimpe ditambe! Udi mua kubikila Yehowa Nzambi dîba dionso diudi musue mu munya anyi butuku. Utu anuku dîba dionso. Kabidi mmusue kuteleja tshiudi umuambila. Ke bualu kayi Bible udi ukulomba ne: ‘Mu malu onso, ku diambuluisha dia disambila ne disengelela pamue ne disakidila, umanyishe Nzambi milombu yebe.’​—Filipoyi 4:6.

Anu mudi mvese au uleja, kudi malu a bungi audi mua kuambila Yehowa. Udi mua kumukuatshila ntatu yebe ne tunyinganyinga tuebe. Udi kabidi mua kumuambila malu audi mua kumuelela tuasakidila. Kutuku muanji kuela balunda bebe tuasakidila bua malu mimpe avuabu bakuenzele anyi? Udi mua kuenza bia muomumue ne Yehowa udi mukuenzele malu a bungi kupita mulunda kayi yonso.​—Misambu 106:1.

Funda amue malu audi welela Yehowa tuasakidila kuinshi eku.

․․․․․

Kakuyi mpata kudi malu adi akuenza buôwa anyi adi akutonda binyungulula mutu webe misangu yonso. Misambu 55:22 udi wamba ne: “Upuila Yehowa bujitu buebe, ne yeye neakuambuluishe. Yeye kakuitaba bua muntu muakane adishinde nansha kakese.”

Mu mishonyi idi ilonda eyi, funda bualu buonso budi bukutonda buudi musue kuakuila mu disambila.

․․․․․

Malu adi makufikile

Kudi tshibadi tshikuabu tshia bulunda buebe ne Nzambi tshiudi kuyi ne bua kulengulula to. Mufundi wa misambu Davidi wakafunda ne: “Labulayi, numone ne: Yehowa mmuimpe.” (Misambu 34:8) Pavua Davidi mufunde musambu wa 34, uvua mu nsombelu uvua umuenza buôwa. Uvua unyema mukalenge Shaula uvua usua kumushipa, tshivua lutatu lunene lutambe. Kadi uvua ne bua kuya kusokoma muaba uvua bena Peleshete bavua baluishi bende. Mu nsombelu au uvua lufu lumununkila ku diulu, Davidi wakadivuija bu mupale ne kunyemaye.​—1 Samuele 21:10-15.

Davidi kavua muambe ne: uvua mupanduke bua muvuaye munyeme to. Kadi wakatumbisha Yehowa. Wakafunda mu musambu utukadi betele kuulu eku ne: “Ngakebeja Yehowa, yeye wakangandamuna, wakansungila ku malu onso avua angenza buôwa.” (Misambu 34:4) Ku diambuluisha dia bualu buvua bumufikile, Davidi wakakankamija bantu bakuabu bua ‘balabule, bamone ne: Yehowa mmuimpe.’ *

Udiku uvuluka bualu kampanda mu nsombelu webe budi bukujadikila mudi Yehowa utabalelangana anyi? Wewe nabu, bufunda kuinshi eku. Mubelu: Bualu bumonamona kabuena ne bua kuikala anu bunene menemene to. Dienzeja bua kuelangana meji a mabenesha makese audi upeta dituku dionso, amue a kudiwu udi mene mua kuamona bu adi kaayi ne mushinga.

․․․․․

Pamuapa baledi bebe ke bavua bakulongeshe Bible. Biobi nanku, ndibenesha. Kadi udi ne bua kukolesha bulunda buebe ne Nzambi. Wewe kuyi muanji kuenza nanku, malu adi mu nshapita eu adi mua kukuambuluisha bua kutuadija. Yehowa neabeneshe didienzeja diebe. Bible udi wamba ne: “Tungunukayi ne kulomba, nebanupeshe; tungunukayi ne kukeba, nenupete.”​—Matayi 7:7.

[Mêyi adi kuinshi]

MVESE MUNENE

“Badi bamanye ne: badi dijinga ne malu a mu nyuma mba diakalenga.”​—Matayi 5:3.

MUBELU

Wewe ubala anu Bible mabeji anayi dituku dionso, udi mua kujikija dimubala mu tshidimu tshimue.

UDI MUMANYE ANYI?

Muudi ulonga Bible ne utumikila mibelu idimu, bidi bileja ne: Yehowa udi ukutabalela.​—Yone 6:44.

MALU A MEME KUENZA

Bua meme kumvua buimpe menemene bua kulonga kuanyi kua Bible, ndi ne bua ․․․․․

Bua meme kuikala nsambila bikole pa tshibidilu, ndi ne bua ․․․․․

Tshingikala ne bua kuebeja baledi banyi mu bualu ebu ․․․․․

UDI WELA MEJI KAYI?

● Ntshinyi tshiudi mua kuenza bua dilonga dia Bible dikusankishe bikole?

● Bua tshinyi Yehowa utu uteleja masambila a bantu bapange bupuangane?

● Mmunyi muudi mua kuakaja mushindu webe wa kusambila?

[Lungenyi lunene]

“Pantshivua muana, mvua ngambulula malu amue amue au mu masambila. Mpindieu ndi nsambila bua malu mimpe ne mabi adi amfikila dituku dionso. Bu mudi matuku abidi kaayi mafuanangane, bidi bingambuluisha bua kubenga kuambulula anu malu amue amue au.”​—Eve

[Kazubu/​Tshimfuanyi]

 Tambakana mu Bible webe

1. Sungula bualu kampanda budibu balonde mu Bible buudi musue kubala. Sambila bua upete meji a wewe kumvua bualu abu bimpe.

2. Bala bualu abu bimpe bimpe. Kuyi lukasa lukasa to. Paudi ubala, difuanyikijila bualu buvua buenzeke abu mu lungenyi. Enza mudimu ne biumvuilu biebe bia bungi mudibi bikengedibua: Dienzeja bua kumona bualu abu, kumvua mêyi a badibu bakuilamu, kununkila mupuya, kulabula biakudia, ne bikuabu. Dienzeja bua kumona muvua bualu abu buenda buenzeka mu lungenyi!

3. Elangana meji a biudi ufuma ku dibala. Diela nkonko idi ilonda eyi:

● Bua tshinyi Yehowa wakafundisha bualu ebu mu Dîyi diende?

● Mbanganyi batudi ne bua kuidikija? Mbanganyi bakuabu badi bu bilejilu bia kutudimuija nabi?

● Bualu ebu budi bundongesha malu kayi a mushinga?

● Bualu ebu budi bundongesha tshinyi bua Yehowa ne mushindu udiye utuenzela malu?

4. Sambila mu tshikoso. Ambila Yehowa biudi mulonge mu Bible ne muudi mulongolole bua kubitumikila. Musakidila misangu yonso bua dipa didiye mukupeshe edi, tuambe ne: Bible, Dîyi diende dia tshijila!

[Tshimfuanyi]

“Dîyi diebe didi muendu bua dikasa dianyi, ne didi butoke mu njila wanyi.”​—Misambu 119:105.

[Kazubu/​Tshimfuanyi]

Teka malu adi ne mushinga pa muaba wa kumpala

Tshiena ne dîba dia kusambila to! Tshiena ne dîba dia kulonga Bible to! Misangu ya bungi, tshilumbu tshitu tshia kumanya mua kuteka malu adi ne mushinga pa muaba wa kumpala.

Teta kuenza bualu ebu: Angata mbeketshi, welamu mabue a manene a bungi. Mpindieu uwuja mbeketshi au ne lusenga, luwula too ne pa mutu. Mpindieu udi ne mbeketshi muwule ne mabue ne lusenga.

Mpindieu bipumuna, ushiye mbeketshi munda mutupu, kadi ulame lusenga alu ne mabue. Enzulula kabidi, kadi musangu eu tuadija ne lusenga, luwuja mu mbeketshi mpindieu utuadije kuteka mabue mu mbeketshi au. Neumone ne: kaena kabidi ne muaba to. Bualu musangu eu udi muanji kuela lusenga kumpala.

Tudi tupeta dilongesha kayi? Bible udi wamba ne: “Nukebe mua kumanya malu adi ne mushinga wa bungi.” (Filipoyi 1:10) Wewe muteke tumalu tukese bu mudi dipita kapepe pa muaba wa kumpala, udi mua kumona bu ne: kuena ne muaba mukumbane mu nsombelu webe bua malu a mushinga to. Mmumue ne: malu a mu nyuma. Kadi wewe mulonde didimuija didi mu Filipoyi 1:10 neumone ne: udi ne dîba dia kuenza malu a Bukalenge bua Nzambi ne dia kupita kapepe mu mushindu mukumbanyine. Tshilumbu ntshia tshiudi wela mu mbeketshi kumpala!

[Tshimfuanyi]

Anu bu tshilongo tshidi muntu ukuna kuende, bidi bikengela kudiisha bulunda ne Nzambi bua kukolabu