Nshapita wa 81

Badi bakeba kabidi bua kushipa Yezu

BIDI mu muvu wa mashika, Yezu udi wendakana mu lutanda ludibo babikila ne: mbalanda wa Solomo. Muine eu mmutangilangane ne ntempelo. Apa, bena Yuda badi bamunguila ne batuadija kuamba ne: “Neutushiye anyima kulukulu musangu bule munyi? Biwikala Kristo, utuambile patoke.”

“Nkadi munuambile,” ke mudi Yezu wandamuna, “kadi kanuena nuitabuja.” Yezu kavua mubambile buludi mudiye Kristo, bu muvuaye muambile mukaji muena Samariya ku tshiina tshia mâyi. Kadi, wakasokolola tshidiye pakabumvuijaye se: yeye ng’wa mu miaba ya mulu ne uvuaku kumpala kua Abrahame.

Tshidibi, Yezu mmusue bua bantu badijinguluile nkayabo mudiye Kristo pa kufuanyikija midimu yende ne eyi ivua Mifundu mimanyishe ne: Kristo neakumbaje. Bua kabingila aka, wakadianjila kukandika bayidi bende bua kabambidi muntu nansha umue mudiye Kristo. Ke bualu kayi udi mene utungunuka pa kuambila bena Yuda aba baluishi ne: “Midimu indi ngenza mu dîna dia Tatuanyi, ke idi injadikila. Kadi kanuena nuitabuja.”

Bua tshinyi kabena bitabuja? Mbua dipanga kupeshibua bijadiki bia se: Yezu udi Kristo anyi? Tòo, apo mbua kabingila kadi Yezu ufila padiye wamba ne: “Kanuena ba ku mikoko yanyi. Mikoko yanyi idi iteleja dîyi dianyi, ndi muyimanye, ne idi indonda. Ndi ngipesha muoyo wa kashidi, ne kayakubutudibua nansha kakese, ne muntu nansha umue kakuyinyenga ku tshianza tshianyi. Tshidi Tatuanyi mumpeshe ntshintu tshinene kutamba bikuabu bionso, ne muntu nansha umue kêna mua kuyinyenga ku tshianza tshia Tatu.”

Pashishe, Yezu udi umvuija malanda masheme adi amusuikakaja ne Tatuende: “Meme ne Tatu tudi umue.” Bu mudi Yezu pa buloba ne Tatuende mu diulu, bushuwa kêna wamba ne: yeye ne Tatuende badi umue mu ngumvuilu wa pa muaku nansha. Kadi udi uleja ne: badi umue pa kusadila dilongolola dimuepele, badi mu buobumue.

Bafikishibue munda kudi miaku ya Yezu, bena Yuda badi bangula mabue bua kumushipa, anu muenzelebo dîba dia Difesto dia Mitàndà, anyi Bitandatanda. Ne dikima dionso, Yezu udi utuisha mesu pa mpala ya badi bakeba kumushipa, wamba ne: “Ndi munuleje midimu milenga ya bungi ya kudi Tatu. Mbua wepi wa ku midimu eyi bunudi nungashila mabue?”

“Tudi tukuasa mabue, ki mbua mudimu mulenga to,” ke mudibo bandamuna, “kadi mbua disendeka Nzambi, bualu wewe, nansha muudi muntu tshianana, udi udienza nzambi.” Bua tshinyi bena Yuda badi bamba nunku, padi Yezu kayi muambe musangu nansha umue mudiye nzambi?

Bidi bimueneka se: mbua padi Yezu udipesha makole adibo bela meji se: mmakumbanyine amu Nzambi nkayende. Tshilejilu, udi ufuma ku diamba bua “mikoko” yende ne: “Ndi ngipesha muoyo wa kashidi,” bualu budi muntu tshianana nansha umue kayi mua kuenza. Kadi, bena Yuda badi bapua muoyo ne: Yezu udi witaba mudiye mupete bukokeshi ebu kudi Tatuende.

Bua kuleja mudiye mumanye se: udi mukese kudi Nzambi, Yezu udi webeja pashishe ne: “Ki mbafunde mu Mikenji yenu [mu Musambu wa 82:6] ne: ‘Ngambi ne: “Nudi banzambi” anyi’? Bikalaye mubikile “banzambi” aba bavua dîyi dia dipiishibua kudi Nzambi divuile, . . . nudi nungamba meme udi Tatu mutumbishe ne mutume mu bukua-bantu ne: ‘Udi usendeka Nzambi,’ bualu ngambi ne: Ndi Muana wa Nzambi anyi?”

Bu mudi Mifundu ibikila nansha bantu banzuji bakena bakane ne: “banzambi,” mbubi kayi budi bena Yuda aba mua kusuikila Yezu padiye wamba ne: “Ndi Muana wa Nzambi”? Yezu udi usakidila ne: “Bingikala tshiyi ngenza midimu ya Tatuanyi, kanungitabuji to. Kadi bingikala nyenza, nansha kanuyi nungitabuja meme, itabayi midimu, ke bua numanye ne nutungunuke ne kumanya ne: Tatu udi nanyi mu buobumue ne ndi mu buobumue ne Tatu.”

Padi Yezu wamba nunku, bena Yuda badi bakeba mua kumukuata. Kadi udi ubadiapuka, anu bu muenzeleye dîba dia Difesto dia Mitàndà. Nunku, udi umuka mu Yeruzaleme ne usabuka Musulu wa Yordane, uya dia muamua divua Yone mutuadije kutambuisha kukadi bidimu bu binayi. Bidi bimueneka se: muaba eu kawena mutantshi mule ne luseke lua ku Sud wa Mbuu wa Ngalileya, apo mmuaba udi kuenda anu mu matuku bu abidi pa kufumina ku Yeruzaleme.

Bantu bavule badi balua kudi Yezu mu muaba eu ne batuadija kuamba ne: “Bushuwa, Yone kavua muenze tshishima nansha tshimue, kadi malu mavule avua Yone muambe bua muntu eu avua wonso malelela.” Kuneku, bavule badi bitabuja Yezu. Yone 10:22-42; 4:26; 8:23, 58; Matayo 16:20, NW.

▪ Yezu udi ujinga bua bantu bajingulule mudiye Kristo ku diambuluisha dia tshinyi?

▪ Mmu ngumvuilu kayi mudi Yezu ne Tatuende bikale umue?

▪ Anu mudibi bimueneka, bua tshinyi bena Yuda badi bamba ne: Yezu udi udienza nzambi?

▪ Mmunyi mudi mvese wa mu Misambu mutela kudi Yezu uleja ne: kêna uodiamba mudiye wa mulongo umue ne Nzambi?