Nshapita wa 31

Badi banyapula miepu dia Nsabatu

YEZU ne bayidi bende badi bumuka mu Yeruzaleme mu katupa kîpi ne bapingana ku Ngalileya. Bidi muvu wa disampila, miepu ikadi mipie mu madimi. Bayidi badi ne nzala. Nunku, badi banyapula miepu ne badia ntete. Kadi, bu mudibi dia Nsabatu, ngenzelu wabu udi ukoka ntema ya bamonyi.

Kukadi lupolo luîpi, mu Yeruzaleme bamfumu ba malu a Nzambi bavua bakeba mua kushipa Yezu pa kuamba muvuaye usambuka Nsabatu. Mpindieu, Bafarizeyi badi bamubanda. “Mona mudi balongi bebe benza bualu bukandika dituku dia [nsabatu, NW].”

Bafarizeyi badi bamba mudi kunyapula miepu ne kuyikunya mu bianza bua kudia kumvuija kunowa ne kudiata peshi kutua. Kadi, diumvuija diabu dikolesha dia tshidi bu mudimu buabu buobu ndivuije Nsabatu bujitu bunene budi buzengeja; pabi, divua ne bua kuikala dituku dia disanka ne dia diibakibua mu nyuma. Nunku, Yezu udi ubakudimuna pa kufila bilejilu biangata mu Mifundu bua kuleja ne: Yehowa Nzambi kavua mupangadije bua kutumikabo ne mukenji Wende pa Nsabatu ne disu dikole kabiyi kuleja butshintshikidi to.

Yezu udi wamba ne: Davidi ne bantu bende pumvuilebo nzala, bakatudila ku tabernakle ne kudia mampa a dileja. Mampa aa akavua mumusha kumpala kua Yehowa ne bapingaje mafumfule pa muaba wawu, ne pa tshibidilu anu bakuidi ke bavua ne bukenji bua kuadia. Kadi, mu nsombelu eu, Davidi ne bantu bende kabakapiishibua bualu bakaadia nansha.

Pa kufila tshikuabu tshilejilu, Yezu udi wamba ne: “Kanuena babale ne: [matuku a nsabatu, NW], bakuidi ba mu [ntempelo, NW] bavua bupula mukandu wa dituku edi kabayi babasa tshilema?” Bushuwa, nansha dia Nsabatu bakuidi badi batungunuka ne kukosa nyama muminu ne kuenza mudimu mu ntempelo bua kulongolola milambu ya nyama! “Kadi meme ndi nnuambila ne”: ke mudi Yezu wamba, “patudi apa, padi udi mutambe [ntempelo, NW].”

Pa kutandisha Bafarizeyi, Yezu udi utungunuka ne: “Bu nuenu bajingulule miaku ya ne: Tshindi musue nduse, ki mmulambo, kanuvua mua kuikala nupisha bantu badi kabayi ne bualu.” Pashishe, udi ukoma ne: “Bualu Muana wa muntu udi [Mukalenge wa nsabatu, NW].” Yezu udi usua kumvuija tshinyi ku mêyi aa? Yezu udi ufunkuna bukokeshi bua ditalala bua Bukalenge buende bua bidimu tshinunu.

Kukadi mpindieu bidimu 6 000, bukua-bantu mbumone kasuba bua bupika bua Satana Diabolo, tshikisu ne mvita bikale mianda ya mu nsombelu wa dituku dionso. Bishilangane, Nsabatu munene wa dikokesha dia Kristo neikale tshikondo tshia diikisha ku ntatu ne tshinyangu bia mishindu yonso. Matewuse 12:1-8, MMM; Lewitiki 24:5-9; 1 Samuele 21:1-6; Nomba 28:9; Hoshea 6:6.

▪ Mbualu kayi budibu bashiminyina bayidi ba Yezu, ne mmunyi mudi Yezu wandamuna?

▪ Ndipanga kayi dia Bafarizeyi didi Yezu utandula?

▪ Mmu ngumvuilu kayi mudi Yezu “Mukalenge wa Nsabatu”?