Nshapita wa 108

Badi bapangila kukuata Yezu ku mêyi

BU MUVUA Yezu ulongesha mu ntempelo ne utshifuma ku dilondela baluishi bende bena malu a Nzambi mifuanu isatu idi mitandule bubi buabu, Bafarizeyi badi bafika munda ne bela tshifufu bua kumukuata ku mêyi ne kuangula bualu kampanda budi mua kubapa njila wa kumukuata. Badi bakaja buteyi buabu ne batuma bayidi babu, pamue ne bamue bena dia Herodese, bua kutetabu mua kumukuata ku mêyi.

“Mulongeshi,” ke mudibu batuadija, “tudi bamanye ne: udi wamba malu malelela, kabidi udi ulongesha bantu njila wa [Nzambi mu bulelela, kuena ulubakana bua muntu, kuena utangila mpala wa muntu, NW]. Utuambile pebe muudi mumone: bua [tshitadi, mbianyishibue bua tufute Kezare anyi peshi katutshifutshi, NW]?”

Yezu kêna udingibua ku ndaabidilu eu. Mmumanye se: biambaye ne: ‘Tòo, ki mbianyishibue anyi bikumbanyine bua kufuta tshitadi etshi,’ neapiishibue bua disaka bantu ku ditombokela Roma. Kadi, biambaye ne: ‘Eyowa, nudi ne bua kufuta tshitadi etshi,’ bena Yuda, badi bapetula kukokeshibua kuabu kudi Roma, nebamukine. Nunku udi wandamuna ne: “Badingidiji nue, bua tshinyi nudi nunteta? Ndejayi ndenario wa difuta nende tshitadi.” (NW)

Padibu bamutuadila ndenario umue, udi ukonka ne: “Mpala ewu ne miaku idibo bafundepu eyi mbia nganyi?”

“Mbia Kezare,” ke mudibu bandamuna.

“Nunku, pingajayi bintu bia Kezare kudi Kezare, kadi bintu bia Nzambi kudi Nzambi.” (NW) Ee, padi bantu bumvua diandamuna edi dia tshishiki dia Yezu, badi bakatshila. Ne badi baya, bamushiya nkayende.

Bamona mudi Bafarizeyi bapangile kupiisha Yezu bua dîyi dibi, Basaduseyi, badi bamba se: kakuena dibiishibua, badi basemena kudiye ne bebeja ne: “Mulongeshi, Mozese uvua muambe ne: ‘Muntu yeye mufue kayi mushiye bana, muanabo apiane mukajiende, alelele muanabo awu bana.’ Kadi mu ditunga dietu emu muvua bena muntu muanda mutekete. Wa kumpala kusela mukaji, kufua kayi mulele, kushila muanabo mukaji awu. Kuenzekabio mushindu wa muomumue kudi muanabo muibidi ne muisatu, too ne ku wa muanda mutekete. Kunyima kuabo bonso mukaji kufua pende. [Pabiishibua, NW] bantu ku lufu, ku bobo muanda mutekete abo, muena mukaji nganyi? Bualu bonso buabo bavua bamupiane.”

Wandamuna, Yezu udi wamba ne: “Kanuenapu nutupakana mu muanda eu, bualu kanuena bamanye nansha Mifundu peshi bukole bua Nzambi anyi? Bualu padibu bajuka ku lufu, balume kabena basela nansha bakaji kabena bafidibua ku mabaka, apo badi bu banjelu mu muulu. Kadi pa bidi bitangila bafue, bua muanda wa kujudibua kuabu, kanuakabala mu mukanda wa Mozese, pa muyuki wa tshipuka, muakamuambila Nzambi ne: ‘Ndi Nzambi wa Abrahame, Nzambi wa Izaka ne Nzambi wa Yakoba’ anyi? Udi Nzambi, ki ng’wa bafue, kadi ng’wa badi ne muoyo. Nudi mu ditupakana dinene.” (NW)

Misumba idi ikatshila tshiakabidi bua diandamuna dia Yezu. Nansha bamue baskribe badi bitaba ne: “Mulongeshi, wakudi bimpe.” (NW)

Padi Bafarizeyi bamona se: Yezu wapuwishi Basaduseyi, badi balua tshisumbu kudiye. Bua kumuteta tshiakabidi, muskribe umue munkatshi muabu udi ukonka ne: “Mulongeshi, ndîyi-dituma kayi didi dipite bunene mu Mikenji?” (NW)

Yezu udi ukudimuna ne: “Dia kumpala ndiedi: ‘Teleja, O Izalele, Yehowa Nzambi wetu udi Yehowa umue, ne udi ne bua kunanga Yehowa Nzambi webe ne mutshima webe wonso, ne anyima webe wonso, ne lungenyi luebe luonso, ne bukole buebe buonso.’ Dibidi ndiedi: ‘Udi ne bua kunanga muntu nebe bu wewe muine.’ Kakuena dîyi-dituma dikuabu dinene dipite aa.” Nanku, Yezu udi usakidila ne: “Ku mêyi-matuma aa abidi nkudi Mikenji yonso midikudike, ne Baprofete.”

“Mulongeshi, wambi bilenga mu diumvuangana ne bulelela,” ke mudi muskribe eu witaba. “‘Yeye udi Umue, ne kakuena mukuabu anu Yeye’; ne kumunanga ne mutshima webe wonso, ne lungenyi luebe luonso, ne bukole buebe buonso; ne kunanga muntu nebe bu wewe muine, kudi ne mushinga kupita mapa wonso a diosha ne milambu.” (NW)

Ujingulula mudi muskribe muandamune bia meji, Yezu udi umuambila ne: “Kuena kule ne bukalenge bua Nzambi to.” (NW)

Matuku akumbanyi asatu mpindieu​—Dia lumingu, Dimue ne Dibidi—​adi Yezu ulongesha mu ntempelo. Bantu mbamuteleje ne musangelu, pabi bamfumu ba malu a Nzambi badi bajinga kumushipa, kadi too ne mpindieu madikolela abu adi’anu apumbishibua. Matewuse 22:15-40; Markuse 12:13-34; Lukase 20:20-40, MMM.

▪ Mbuteyi kayi budi Bafarizeyi bakobekela Yezu, ne ntshinyi tshivua mua kuenzeka bu yeye mua kuandamuna eyowa peshi tòo?

▪ Mmunyi mudi Yezu upumbisha madikolela a Basaduseyi bua kumukuata?

▪ Mmadikolela kayi makuabu adi Bafarizeyi benza bua kuteta Yezu, ne mbipeta kayi bidi bipatukaku?

▪ Mu mudimu wende wa ndekelu mu Yeruzaleme, Yezu udi ulongesha mu ntempelo matuku bungi munyi, ne dilongesha diende didi ne buenzeji kayi?