Nshapita wa 67

Badi bapangila kumukuata

DIFESTO dia Mitàndà kadiyi dianji kujika, bamfumu ba bitendelelu badi batuma tupita tua bampulushi bua kukuata Yezu. Yeye muine kêna ukeba mua kusokoma. Pamutu pa nanku, Yezu udi utungunuka ne kulongesha patoke, wamba ne: “Ntshidi nenu bua matuku makese, pashishe nenye kudi Uvua muntume. Nenunkebe kanuyi numpeta, kabidi muaba undi meme, nuenu kanuena mua kufika.”

Bena Yuda kabena bajingulula mêyi aa, pa nanku badi bebejangana munkatshi muabu ne: “Nkuepi kudiye uya kutuapanga kumumona? Neaye kudi bena Yuda badi batangalake munkatshi mua bena Ngreka ne bua kulongesha bena Ngreka anyi? Tshidiye musue kuamba ntshinyi padiye wamba ne: ‘Nenunkebe kanuyi numpeta, kabidi muaba undi meme, nuenu kanuena mua kufika’?” Bushuwa, Yezu udi wakula bua lufu luende lukadi pabuipi ne bua dibiishibua bua kuikala ne muoyo mu diulu, mudi baluishi bende kabayi mua kumulonda.

Dituku dia muanda-mutekete ne dia ndekelu dia difesto didi dikumbana. Dinda dionso dia difesto, muakuidi umue uvua upongolola mâyi masuna ku Dijiba dia Siloame, nunku avua apueka kuinshi kua tshilambuilu. Bienze bu bua kuvuluija bantu tshilele etshi tshia ku dituku ne ku dituku, Yezu udi wela lubila ne: “Bikala muntu ne nyota, alue kundi ne anue! Misulu ya mai a muoyo nei[p]atuke munda mua wangitabu[j]a, bu muakamba Mukanda wa Nzambi.”

Bushuwa, apa Yezu udi wakula bua bipeta bia dikema biamueneka pamuangalajibua spiritu munsantu. Tshidimu tshidi tshilonda dimuangalaja edi dia spiritu munsantu didi dienzeka dituku dia Pentekoste. Dîba adi, misulu ya mâyi a muoyo idi ipueka padi bayidi 120 batuadija kulongesha bantu. Kadi too ne ku tshikondo etshi, kakuena spiritu, mu ngumvuilu wa se: nansha umue wa ku bayidi ba Kristo ki mmuedibue manyi a spiritu munsantu ne mubikibue bua kuikala ne muoyo mu diulu.

Pa kuandamuna ku dilongesha dia Yezu, bamue badi batuadija kuamba ne: “Yeye udi bushuwa Muprofete,” bimueneka bu badi bafunkuna muprofete munene mutambe Mozese uvuabo balaye kulua kuende. Banga badi bamba ne: “nKristo muine.” Kadi bakuabu badi batontolola ne: “Kristo udi bushuwa mua kufumina mu Ngalileya anyi? Mifundu ki mmiambe ne: Kristo neafume mu ndelanganyi ya Davidi, mu Beteleme mu musoko muvua Davidi anyi?” (NW)

Musumba udi udiabulula. Bamue mbasue bua Yezu akuatshibue, kadi kakuena udi umulenga tshianza. Padi tupita tua bampulushi tupingana katuyi ne Yezu, bakuidi banene ne Bafarizeyi badi babebeja ne: “Kanuena bafike ne Yezu bua tshinyi?”

“Katshia, kakuena muntu muanji kuakula bu mudi muntu’eu,” ke mudi tupita tuandamuna.

Bamfumu ba bitendelelu badi bakuata tshiji tshikole, babapepeja mudibo tupumbe, badingidiji ne tupita ku dîna. Badi babasendeka ne: “Ne nuenu kabidi, mbaye kunudinga! Ku banene ba musoko nansha Bafarizeyi kudi muntu mumuitabe anyi? Kadi bantu aba badi kabayi bamanye [Mikenji, NW], mba diakabi!”

Padiye umvua nunku, Nikodeme, Mufarizeyi ne mfumu wa bena Yuda (mbuena kuamba ne: muena mu Sanhedrin), udi uleja dikima bua kuakuila Yezu. Nudi mua kuvuluka se: kukadi bidimu bibidi ne tshitupa, Nikodeme wakalua kudi Yezu butuku ne kuleja patoke ditabuja diende kudiye. Mpindieu, Nikodeme udi wamba ne: “Mikenji yetu itu ipiisha muntu diambedi kabayi bamuteleje ne bamanye tshidiye muenze anyi?” (NW)

Bafarizeyi badi bakuata tshiji tshikole pakumona umue wabo wakuila Yezu. “Nenku wewe pebe udi muena Ngalileya anyi?” ke mudibo bamusamina. “Ukonkonone ne ujingulule ne: muprofete nansha umue kêna mua kufumina mu Ngalileya.” (NW)

Nansha mudi Mifundu kayiyi yamba buludi ne: muprofete kampanda neapatukile mu Ngalileya, idi ifunkuna Kristo bu eu udi ufuminamu, yamba ne: nebamone “butoke bunene” mu buloba ebu. Kabidi, Yezu wakaledibua mu Beteleme, muikale mene ndelanganyi wa Davidi. Bu mudi Bafarizeyi pamu’apa bamanye malu aa wonso, badi mua kuikala ne bujitu bua dimuangalaka dia ngenyi mibi idi nayi bantu pa bidi bitangila Yezu. Yowanese 7:32-52, MMM; Yeshaya 9:1, 2; Matayo 4:13-17.

▪ Ntshinyi tshidi tshienzeka dinda dionso dia difesto, ne mmunyi mudi pamu’apa Yezu ukoka ntema pa muanda eu?

▪ Bua tshinyi tupita tua bampulushi tudi tupangila kukuata Yezu, ne ngandamuinu wa bamfumu ba bitendelelu udi tshinyi?

▪ Nikodeme nnganyi, udi ne mmuenenu kayi pa bidi bitangila Yezu, ne mmunyi mudi binende Bafarizeyi bamuangata?

▪ Ntshijadiki kayi tshidi tshileja se: Kristo udi ne bua kufumina mu Ngalileya?