Nshapita wa 39

Baditambishi ne badipuekeshi

MUMANE kuakula bua ngikadilu milenga ya Yone Mubatiji, Yezu udi utuma ntema kudi baditambishi, bantu bena kukudimuka badi bamunyunguluke. “Bena tshipungu etshi,” ke mudiye wamba, “badi bu bana batekete badi basombe mu miaba ya tshisalu bela bena manaya nabo dîyi ne: ‘Tuetu kunuelela nshiba, kadi nuenu nansha kuja maja; tuetu kuela kasala ka muadi, kadi nuenu nansha kudituta bua kuleja kunyongopala kuenu.’”

Yezu udi usua kuamba tshinyi? Udi umvuija ne: “Yone kuluaye kayi nansha udia anyi unua, kadi bantu kuamba ne: ‘Udi ne demon’; Muan’a muntu e kulua udia ne unua, pabi bantu kuamba ne: ‘Monayi! Mudiavi ne munu wa mvinyo, mulunda wa balambuishi ba bitadi ne benji ba mpekatu.’”

Mbikole bua kusankisha bantu. Kakuena tshidi tshibalengelela. Yone uvua ne nsombelu wa didibudisha masanka pa kudipua muoyo bu Munazi, pa kulama dimanyisha dia muanjelu dia se: “kêna ne bua kunua mvinyo peshi maluvu makole nansha kakese.” Pabi, bantu kuamba ne: udi ne demon. Kadi, Yezu udi ne nsombelu bu wa bantu bakuabu, kayi mudikengeshi, ne badi bamubanda mudiye munekeshi.

Mmunyipu mudibi bikole bua kusankisha bantu! Badi bu bana bena manaya, bamue ba kudibo babenga kuja maja padi bakuabu bela nshiba anyi babenga kunyongopala padi bena-diabo bela kasala ka muadi. Nunku, Yezu udi wamba ne: “Meji adi adileja makane ku midimu yawu.” Eyo, malu makumbaja​—midimu—​adi aleja patoke ne: malu adibo babambidika Yone ne Yezu ng’a dishima.

Yezu udi utungunuka pa kuseeja bimenga bisatu bidiye ukanyina: Korazine, Betesaida ne Kapernaume, muvuaye mukumbajile mivule ya ku midimu yende ya bukole. Bu yeye muenze midimu eyi mu Tire ne Sidona, ke mudi Yezu wamba, bimenga ebi bia Fenisi bivua mua kuikala binyingalale pa kuvuala bibombi ne pa kudiela butu. Bua kupiisha Kapernaume, muvuaye mushindamene mu lupolo luvua mudimu wende munenge, Yezu udi wamba ne: “Mu Dituku dia Dilumbuluisha, nebatambe kuleja dilengulula bua ditunga dia Sodome kupita buebe wewe.”

Pashishe, Yezu udi usamuna Tatuende wa mu diulu patoke. Mmusakibue bua kuenza nunku bualu Nzambi udi usokoka bena meji ne bamanyi ba mikanda malelela a mushinga mukole a mu nyuma, kadi usokoluela, mu ngakuilu kampanda, badipuekeshi ne bana batekete bintu ebi bia mushinga mukole.

Bua kujikija, Yezu udi wenza dibikila disengeledi ne: “Vuayi kundi meme, nuenu buonso badi bakenga ne bazengele ne bujitu, ne nennupeteshe disulakana. Angatayi tshikokedi tshianyi ne nulongele kundi meme, bualu ndi mupole-malu ne mudipuekeshi mu mutshima, ne nenupete disulakana bua anyima yenu. Bualu tshikokedi tshianyi ntshinefuke ne bujitu buanyi mbupepele.”

Mmunyi mudi Yezu upeteshangana disulakana? Udi wenza nunku pa kupikula bantu ku bupika bua bilele bidi bamfumu ba malu a Nzambi bapungija nabi bantu, bu mudi mikandu mibambidiki ya Nsabatu. Udi uleja kabidi njila wa kupeta disulakana kudi aba badi bakenguluka ne bujitu bupungiji muinshi mua bukokeshi bua bamfumu ba tshididi ne kudi aba badi bapungile ne bujitu bua mpekatu yabu pa kuikala ne kuondo ka muoyo kajabale. Udi usokoluela bantu bajabale ba munshindu’eu mudibu mua kubabuikidila mpekatu yabu ne mudibu mua kudia malanda masheme ne Nzambi.

Tshikokedi tshinefuke tshidi Yezu upangadijila bantu nkudifila bajima kudi Nzambi, kuikala bakumbane mua kusadila Tatuetu wa mu diulu muena kulejangana luse ne muena kubuikidilangana mpekatu. Ne bujitu bupepele budi Yezu upangadijila aba badi balua kudiye ke kutumikila kua malu adi Nzambi ulomba bua kupeta muoyo, mêyi-matuma Ende mafunda mu Bible. Ne kuatumikila ki mbujitu bupungiji to. Matayo 11:16-30; Luka 1:15; 7:31-35; 1 Yone 5:3, NW.

▪ Mmunyi mudi bena tshipungu tshia Yezu, baditambishi ne bakudimuki, bafuane bana?

▪ Bua tshinyi Yezu mmusakibue ku disamuna Tatuende wa mu diulu?

▪ Mmu mishindu kayi mudi bantu bapungijibue ne bujitu, ne ndisulakana kayi didi Yezu upeteshangana?