Nshapita wa 106

Batandula ku mifuanu ya budimi bua mvinyo

YEZU udi ku ntempelu. Utshidi ufuma ku difuisha bundu bamfumu ba bitendelelu bavua bamuebeja bua kumanya muena bukole buvuaye wenza nabu malu. Dilubakana diabu kadianji kujika, Yezu udi ukonka ne: “Nudi nuela meji kayi?” (NW) Ne ku diambuluisha dia mufuanu kampanda, udi ubaleja tshidibu bushuwa.

“Muntu kampanda uvua ne bana babidi,” ke mudi Yezu ulonda. “Usemena kudi wa kumpala, kumuambila ne: ‘Muananyi, yaku lelu kuenza mudimu mu budimi buanyi bua mvinyo.’ Yeye kuandamuna e kuamba ne: ‘Nenye, mukalenge,’ kadi yeye nansha kupatuka. Usemena kudi muibidi, kumuambilaye bia muomumue. Muine eu kuandamuna e kuamba ne: ‘Tshiakuya to.’ Pashishe, kumvuaye kanyinganyinga ne kupatukaye. Nnganyi wa ku babidi aba wakenza disua dia tatuende?” (NW) ke mudi Yezu webeja.

“Wa ndekelu,” (NW) ke mudi baluishi bende bandamuna.

Nunku Yezu udi umvuija ne: “Bushuwa ndi nnuambila ne: balambuishi ba bitadi ne bakaji ba ndumba badi badianjila kubuela kumpala kuenu mu bukalenge bua Nzambi.” (NW) Ee, balambuishi ba bitadi ne bakaji ba ndumba bavua ku ntuadijilu babenga bua kusadila Nzambi. Kadi pashishe, anu bu muana muibidi, bakanyingalala ne kutuadija kumusadila. Bishilangane, bamfumu ba bitendelelu, anu bu muana wa kumpala, bakadikokola muvuabu basadila Nzambi, pabi, eku Yezu udi umvuija ne: “Yowanese [Mubatiji] uvua mufike kunudi, kunulejaye njila wa buakane, kadi nuenu nansha kumuitaba; amu balambuishi ba bitadi ne bakaji ba ndumba ke bavua bamuitabe. Nansha munuvua bamone tshilejilu etshi, [kanuakumvua kanyinganyinga, NW] nansha kushoo bua kumuitaba.”

Pashishe Yezu udi uleja ne: dipangila dia bamfumu abu ba bitendelelu kadiena ditangila dilengulula patupu bua kusadila Nzambi. Tòo, kadi mbantu babi bushuwa, bena muoyo mubi. “Muntu mukuabo, [muena nzubu, NW],” ke mudi Yezu ulonda, “uvua ne budimi buende, kukunamu mvinyo, kuelaku lupangu, kumbula tshikaminu tshia tumuma, [kuibakisha tshibumba, NW] mu budimi; pashishe kushiyaye budimi ebu kudi badimi ba mvinyo, kuyaye [ku ditunga dienyi, NW]. Diba dia kupola tumuma dikumbana, kutumaye [bapika bende, NW] kudi badimi bua kuangatabo tumuma. Badimi kukuata [bapika bende, NW], kukuma umue, kushipa mukuabo, kutapa muisatu mabue. Kutumaye kabidi [bapika, NW] bakuabo bapite ba kumpala ku bungi, kadi badimi ba mvinyo kubenzela mushindu wa muomumue.”

“Bapika” mbaprofete bavua “muena nzubu,” Yehowa Nzambi, mutume kudi “badimi” ba “mvinyo” wende. Badimi aba mbamfumu baleji-mpala ba ditunga dia Izalele, dine ditunga didi Bible ufunkuna bu “mvinyo” wa Nzambi.

Bu muvua “badimi” bakengeshe ne bashipe “bapika,” Yezu udi umvuija ne: “Ku ndekelu, kubatuminaye muanende, wela meji ne: ‘[Nebanemeke, NW] muananyi.’ Kadi badimi bamona muana, kuambilanganabo ne: ‘Ke muena bumpianyi awu. Tuyayi tumushipe, bumpianyi buende bushale buetu.’ Kumukuatabo, kuyila nende ku mpenga kua budimi [bua mvinyo, NW], bobo kumushipa.”

Mpindieu, utangila kudi bamfumu ba bitendelelu, Yezu udi webeja ne: “Pafika muena budimi [bua mvinyo, NW], neenzele badimi aba tshinyi?”

“Bu mudibu bantu babi,” ke mudi bamfumu ba bitendelelu bandamuna, “neavuije kabutu kabiakabi kadituta kudibu ne neafile budimi bua mvinyo mu bianza bia badimi bakuabu bamupesha bimuma padi dîba dikumbana.” (NW)

Nunku, kabayi nansha bamanye, mbadifundile tshibawu tshia bulumbuluishi, bu mudibo bamue ba ku “badimi” bena Izalele ba “mvinyo” wa ditunga dia Yehowa, Izalele. Bimuma bidi Yehowa mutekemene bua kupeta kudi badimi aba nditabuja mu Muanende, Masiya mulelela. Bu muapangidibu kukuama bimuma bia mushindu’eu, Yezu udi ubadimuija ne: “Kanuena banji kubala mu Mifundu [mu Musambu wa 118:22, 23] ne: ‘Dibue diakimanshabu kudi bibaki ke diodi didi divue dibue dinene dia mu ditumba. Muanda eu mmuenzeke ku bukole bua Yehowa, ne udi wa dikema ku mêsu kuetu’ anyi? Ke bualu kayi ndi nnuambila ne: Nebanunyenge bukalenge bua Nzambi ne babupeshe ditunga didi dikuama bimuma biabu. Kabidi, muntu wapona pa dibue edi neatshibuke tupesetupese. Bua yonso wakulukiladi, nedimusunsule.” (NW)

Baskribe ne bakuidi banene badi bajingulula mpindieu ne: Yezu udi wakula buabu buobu, ne badi bajinga bua kumushipa, yeye “mupianyi” udi ne bukenji. Ke bualu kayi, bu ditunga, nebabumushe muabi wa kuikala bakokeshi mu Bukalenge bua Nzambi, ne ditunga dipiadipia dia ‘badimi ba mvinyo’ nedienjibue, diodi mene diakuama bimuma bikumbanyine.

Bu mudi bamfumu ba bitendelelu batshina misumba, mine idi yangata Yezu se: mmuprofete, kabena bateta bua kumushipa pa dîba edi nansha. Matewuse 21:28-46, MMM; Mâko 12:1-12; Luka 20:9-19; Yeshaya 5:1-7.

▪ Bana babidi ba mu mufuanu wa kumpala wa Yezu badi baleja banganyi?

▪ Mu mufuanu muibidi, mbanganyi badi balejibue bu “muena nzubu,” “budimi bua mvinyo,” “badimi,” “bapika” ne “mupianyi”?

▪ Ntshinyi tshienzekela “badimi ba mvinyo,” ne nnganyi wabapingana?