Nshapita wa 12

Batismo wa Yezu

PADI Yone ukumbaja ngondo isambombo mu kulongesha kuende, Yezu, údí mpindieu ne bidimu 30, udi ulua kudiye ku Yordane. Mbua kabingila kayi? Mbua kumukumbula bu mulunda anyi? Yezu udi ukengela kumona patupu mudi mudimu wa Yone ulubuluka anyi? Tòo, Yezu udi ulomba bua Yone amutambuishe.

Diakamue, Yone udi utontolola ne: “Meme ng’udi ukengela kutambuishibua kuudi, wewe ukadi ulua kundi?” Yone mmumanye bua se: Yezu, muana wa mamuende mukuabu, mMuana wa Nzambi wa pa buende. Ee, Yone kakatumpikapu ne disanka mu difu dia mamuende pakalua Mariya, uvua ne dîmi dia Yezu, kubakumbula! Mamuende wa Yone, Elizabete, kabiyi mpata wakamulondela muanda eu pashishe. Uvua kabidi mua kuikala mumulondele bua dimanyisha dienza kudi muanjelu bua diledibua dia Yezu ne bua dimueneka dia banjelu kudi balami ba mikoko mu butuku buakaledibua Yezu.

Nunku, Yezu ki mmuenyi kudi Yone to. Ne Yone mmumanye se: batismo wende kêna bua Yezu to. Udi bua aba badi banyingalala bua mpekatu yabo; pabi Yezu kêna ne mpekatu. Kadi, nansha mudi Yone uleja tshibengu, Yezu udi’anu usuminyina ne: “Lekela bienzeke nunku musangu’eu, bualu ke mudibi bikengela bua tuetu kukumbaja tshionso tshidi tshiakane.”

Bua tshinyi mbiakane bua Yezu kutambuishibua? Bualu, batismo wende udi umvuija, ki ndinyingalala bua mpekatu, apo ndidileja diende patoke bua kuenza disua dia Tatuende. Yezu utshivua muena mudimu wa mabaya, kadi mpindieu, dîba diakumbanyi bua yeye kutuadija mudimu uvua Yehowa Nzambi mumutumine pa buloba bua kuenza. Nudiku nuela meji se: Yone mmutekemene bua kumona muanda wa kukatshila dîba didiye utambuisha Yezu anyi?

Pashishe, Yone udi ulonda ne: “Yeye mene wakantuma bua kutambuisha mu mâyi wakangambila ne: ‘Eu uwamona spiritu munsantu utulukila ne ushala padiye, ke yeye udi utambuisha mu spiritu munsantu.’” Nunku, Yone mmuindile bua kumona spiritu wa Nzambi upueka pa eu udiye utambuisha. Pa nanku, pamu’apa ki mmukemeshibue menemene to padi, anu dîba didi Yezu utundubuka pa mutu pa mâyi, Yone umona ‘spiritu wa Nzambi upueka pa mutu pende bu nkutshi.’

Kadi, malu makuabu a dikema adi enzeka padi Yezu utambuishibua. ‘Diulu didi dimunzulukila.’ Ebi bidi biumvuija tshinyi? Bidi biumvuija patoke se: padibu bamutambuisha, udi uvuluka nsombelu uvuaye nende mu diulu kumpala kua kulua muntu pa buloba. Nunku, mpindieu Yezu udi uvuluka bushuwa nsombelu wende bu muana wa mu nyuma wa Yehowa Nzambi, pamue ne malu wonso avua Nzambi mumuambile mu diulu kumpala kua kulua muntu pa buloba.

Kabidi, dîba dia batismo wende, dîyi difume mu diulu didi dimanyisha ne: “Eu mMuananyi, munangibue wa pa muoyo, undi muanyishe.” Dîyi edi ndia nganyi? Ndia Yezu yeye muine anyi? Nansha kakese! Ndia Nzambi. Mbimueneke patoke se: Yezu mMuana wa Nzambi, apo ki nNzambi yeye muine to, bu mudi bakuabu bela meji.

Tshidibi, Yezu mmuana-muntu wa Nzambi, anu bu muvua muntu wa kumpala, Adama. Mumane kumvuija muvua batismo wa Yezu muenzeke, muyidi Luka udi ufunda ne: “Yezu muine, pabangileye mudimu wende, uvua ne bidimu bu makumi asatu, ne anu muvuabi biambibua, muikale muana wa Yozefe, muana wa Heli, . . . muana wa Davidi, . . . muana wa Abrahama, . . . muana wa Nowa, . . . muana wa Adama, muana wa Nzambi.”

Anu muvua Adama muntu “muana wa Nzambi,” ke mudi Yezu pende. Yezu mmuntu mutambe bunene wa katshia ne katshia, muanda udi ujadikibua patudi tukonkonona nsombelu wa Yezu. Kadi, dîba dia batismo wende, Yezu udi ubuela mu malanda mapiamapia ne Nzambi, ulua kabidi Muana wa mu nyuma wa Nzambi. Mpindieu, Nzambi udi umualukija mu diulu pa kumubueja, mu ngakuilu kampanda, mu nsombelu wamufikisha ku diela muoyo wende wa muntu wa pa buloba nyima bua kashidi, pa kuwufila bu mulambu bua diakalenga dia bukua-bantu bena tshibawu. Matayo 3:3-17; Luka 3:21-38; 1:34-36, 44; 2:10-14; Yone 1:32-34, NW; Ebelu 10:5-9.

▪ Bua tshinyi Yezu ki mmuenyi kudi Yone?

▪ Bua tshinyi Yezu udi utambuishibua, pende kayi muenza mpekatu?

▪ Bilondeshile bidi Yone mumanye pa bidi bitangila Yezu, bua tshinyi kêna mua kuikala mukemeshibue padi spiritu wa Nzambi upuekela Yezu?