Nshapita wa 14

Bayidi ba kumpala ba Yezu

MUMANE kupitshisha matuku 40 mu tshipela, Yezu udi upingana kudi Yone, eu uvua mumutambuishe. Padiye usemena, anu mudibi bimueneka, Yone udi umufunkuna ne wambila aba badi nende ne: “Monayi, Muan’a mukoko wa Nzambi udi umusha mpekatu wa bukua-bantu! Ke yeye umvua muambe bualu buende ne: Munyima muanyi mudi mulua muntu uvua mundianjidile, bualu yeye ukavuaku kumpala kuanyi.” Nansha mudi Yone mukulu kudi Yezu, muana wa mamuende mukuabu, Yone mmumanye ne: Yezu uvuaku kumpala kuende bu spiritu mu diulu.

Pabi, mbingu mikese kumpala, pavua Yezu mulue bua kutambuishibua, bivua bimueneka se: Yone kavua muanji kumanya ne dishindika ne: Yezu ke uvua ne bua kulua Masiya. “Nansha meme panyi tshivua mumumanye to,” ke mudi Yone witaba, “kadi kabingila kamvua muvuile kutambuisha mu mâyi kavua bua kumanyikaye patoke kudi Izalele.”

Yone udi utungunuka pa kumvuija bamuteleji tshiakenzeka pakatambuishaye Yezu: “Ngakamona spiritu upueka bu nkutshi mufume mu diulu, ne kuikila pa mutu wende. Kadi meme tshivua mumumanye to; apo Eu uvua muntume bua kutambuisha mu mâyi ungambidile ne: ‘Eu uwamona spiritu upuekela ne ushala padiye, ke yeye udi utambuisha mu spiritu munsantu.’ Ne ngakamumona, ne meme kufila bumanyishi ne: muine eu udi Muana wa Nzambi.”

Dituku didi dilonda, Yone mmuimane ne babidi ba ku bayidi bende. Tshiakabidi padi Yezu usemena, udi wamba ne: “Monayi Muan’a mukoko wa Nzambi!” Padibo bumvua nanku, bayidi aba babidi ba Yone Mubatiji badi balonda Yezu. Umue wa kudibu ke André, ne mukuabu, kabiyi mpata, ng’eu wakafunda pashishe mine malu aa, uvua kabidi muinyikibue dîna dia Yone. Bilondeshile mamanyisha, Yone eu udi pende muana wa mamuende mukuabu wa Yezu, bimueneka se: mmuana wa Salomé, muanabo ne Mariya wa bakaji.

Padiye ukudimuka ne umona André ne Yone bamulonda, Yezu udi webeja ne: “Nudi nukeba tshinyi?”

“Rabbi,” ke mudibo bebeja, “udi usombela penyi?”

“Vuayi, nenumone,” ke mudi Yezu wandamuna.

Bu pa iba mulolo, André ne Yone mbasombe ne Yezu munkatshi mua mêba adi mashale dituku adi. Pashishe, André udi udiumvua musakibue bikole bua kuya lukasa too ne kudi muanabo wa balume, udi ubikidibua Petelo. “Tuamonyi Masiya,” ke mudiye umuambila. Ne udi ufikisha Petelo kudi Yezu. Pamu’apa, anu pa dîba adi, Yone mmuye pende kutangila muanabo wa balume Yakobo ne udi uvua nende kudi Yezu; tshidibi, bilondeshile tshikadilu tshiende, Yone udi ububika mamanyisha aa adi amutangila mu Evangeliyo wende.

Dituku didi dilonda, Yezu udi upetangana ne Filipe, muena ku Betesaïda, tshimenga tshibalela tshivua André ne Petelo bafumine. Udi umubikila ne: “Vuaku mundondi.”

Filipe pende udi umonangana ne Natanaele, udi ubikidibua kabidi ne: Bartelemi, ne umuambila ne: “Tuamonyi eu uvuabu bafunde bualu buende kudi Mozese, mu Mikenji, ne Baprofete au, Yezu, muana wa Yozefe, wa mu Nazarete.” Natanaele udi wela mpata. “Tshintu kampanda tshilenga tshidi mua kupatukila mu Nazarete anyi?” ke mudiye webeja.

“Vuaku umone,” ke mudi Filipe ùsàma. Padibo balua batangile kudi Yezu, Yezu udi wamba bua Natanaele ne: “Monayi, muena Izalele wa bushuwa, udi kayi ne kudinga munda muende.”

“Mbishi muudi mummanye?” ke mudi Natanaele webeja.

“Diambedi Filipe kayi muanji kukubikila, pawuvua muinshi mua mutshi wa mfigi, mvua mukumone,” ke mudi Yezu wandamuna.

Natanaele udi upapa. “Rabbi [mbuena kuamba ne: Mulongeshi], udi Muana wa Nzambi, udi Mukalenge wa Izalele,” ke mudiye wamba.

“Witabi bualu ngakuambidi ne: mvua mukumone muinshi mua mutshi wa mfigi,” ke mudi Yezu webeja. “Neumone malu manene mapite aa.” Pashishe, udi ulaya ne: “Bushuwa menemene ndi nnuambila ne: nenumone diulu diunzuluke ne banjelu ba Nzambi babanda ne bapueka batangile kudi Muan’a muntu.”

Lupolo luipi panyima pa muanda eu, Yezu pamue ne bayidi bende bapiabapia badiye ufuma ku dipeta, badi bumuka mu tshibanda tshia Yordane ne benza luendu batangile ku Ngalileya. Yone 1:29-51, NW.

▪ Bayidi ba kumpala ba Yezu mbanganyi?

▪ Mmushindu kayi udi Petelo, ne imue misangu Yakobo pende, bafikishibua kudi Yezu?

▪ Ntshinyi tshidi tshituishisha Natanaele ne: Yezu mMuana wa Nzambi?