Nshapita wa 98

Bayidi badi bajula matandu mu kusemena kua lufu lua Yezu

YEZU ne bayidi bende badi pabuipi ne Musulu wa Yordane, udibo basabuka bua kubuela mu Yudeya pa kufumina mu distrike dia Pereya. Bantu bakuabu bavule badi nabu mu luendu bua Pasaka wa mu 33 B.B., udi wenzeka kunyima kua lumingu anu bu lumue anyi ne pa mutu.

Yezu udi wenda kumpala kua bayidi, ne badi bakatshila bua dipangadika diende dikole. Tuvuluke se: kukadi mbingu mikese, pavua Lazare mufue ne pakavua Yezu pa kumuka mu Pereya bua kuya mu Yudeya, Tomase wakakankamija bayidi bakuabu ne: “Tuyayi petu, tuye kufua nende.” Tuvuluke kabidi ne: panyima pa dibiishibua dia Lazare kudi Yezu, Sanhedrin wakela tshitungu bua kushipesha Yezu. Nunku, kabiena bikemesha mudi bayidi bumvua buôwa padibo babuela tshiakabidi mu Yudeya mpindieu.

Bua kubalongolola ku tshikadi pa kuenzeka, Yezu udi usemena pa bule ne bapostolo 12, pa nkayabu, ne ubambila ne: “Ke tuetu aba tuya mu Yeruzaleme; nebafile Muana wa muntu mu bianza bia bakuidi bamfumu ne [baskribe, NW]; nebamufundile lufu, bamufile mu bianza bia bantu ba bisamba bikuabo. Nebamulembakaje, bamutuile mata, bamutute mikaba, bamushipe, kunyima kua matuku asatu neabike.”

Eu mmusangu muisatu mu ngondo mikese udi Yezu wambila bayidi bende bua lufu ne bua dibiishibua diende. Nansha mudibo bamuteleja, kabena bajingulula nansha. Pamu’apa mbua padibo bitabuja se: bukalenge bua Izalele budi bujadikibua tshiakabidi pa buloba, ne badi batekemena ne mutshima kulukulu bua kupeta butumbi ne lumu mu bukalenge kampanda bua pa buloba pamue ne Kristo.

Munkatshi mua bena luendu lua Pasaka, kudi Salomé, mamuende wa bapostolo Yakobo ne Yone. Yezu uvua muinyike bantu aba dîna dia “Bana ba Dikubakuba,” kabiyi mpata mbua tshikadilu tshiabu tshia difunafuna. Kukadi lupolo kampanda, bubidi buabu bavua baleje dilumbila diabu dia kuikala pa muaba munene mu Bukalenge bua Kristo, ne bakamanyisha mamuabo dijinga diabu edi. Mpindieu, mamuabu udi usemena kudi Yezu bua kubakuila, utua binu panshi kumpala kuende, ne ulomba dilejibua buimpe.

“Udi musue tshinyi?” ke mudi Yezu umuebeja.

Udi upindulula ne: ‘Anyisha bua bana banyi babidi aba basombe nebe, umue ku diebe dia balume, mukuabu ku diebe dia bakaji mu bukalenge buebe.’

Pa kujingulula kudi kufumine dilomba edi, Yezu udi wambila Yakobo ne Yone ne: “Kanuena bamanye tshinudi nulomba to. Nuenu nudi mua kunua [lupanza lunkadi pa kunua, NW] anyi?”

‘Tudi mua kulunua,’ ke mudibo bandamuna. Nansha mudi Yezu ufuma ku dibambila se: ukadi pa kuakama dikengeshibua dikole ne ndekelu wa bionso kushipibua, mbamueneke bu badi kabayi bajingulula se: ke tshidiye usua kumvuija pa kuakula bua ‘lupanza’ lukadiye pa kunua.

Nansha nanku, Yezu udi ubambila ne: “Bushuwa, nudi mua kunua [lupanza luanyi, NW]; kadi bua kusomba ku dianyi dia balume nansha ku dianyi dia bakaji, meme ki ngudi mua kunupa miaba eyi to, nya badi Tatu wanyi mulongoluele.”

Pashishe, bapostolo bakuabu dikumi badi bamanya tshivua Yakobo ne Yone balombe, ne badi bafika munda. Misangu mikuabu Yakobo ne Yone bavua bakoleshe dîyi kupita bakuabu mu matandu avua majuke pankatshi pa bapostolo musangu awu bua kumanya eu udi mutambe bakuabu. Dilomba diabu dia musangu eu didi disokolola se: ki mbatumikile mubelu uvua Yezu mubapeshe pa tshilumbu etshi. Bia dibungama, dijinga diabu dia kuikala pa muaba munene ditshidi amu dikole!

Bua kutua tshisala ku matandu aa a ndekelu ne kutuyisha njiya idiwo makebeshe, Yezu udi ubasangisha buonso buabu 12. Udi ubapesha mubelu wa dinanga, wamba ne: “Nudi bamanye mudi bamfumu ba matunga baatumina diyi, baatekesha, ne mudi banene baleja bumfumu buabo. Kabikadi nanku munkatshi muenu nansha; kadi wa ku nuenu udi musue kuikala munene, adienze musadidi wenu, kabidi udi musue kuikala wa kumpala munkatshi muenu, adienze mupika wenu.”

Yezu mmufile tshilejilu tshidibo ne bua kulonda, padiye umvuija ne: “Bia muomumue, Muan’a muntu mmulue, ki mbua kumusadilabo, kadi mbua kusadilangana ne kufila anyima wende bu tshia-bupikudi bua dishintakaja dia ba bungi.” (NW) Yezu kêna anu musadile bakuabu patupu, kadi neenze nunku kabidi pa kufua bua bukua-bantu! Bayidi badi bakengela kuikala ne mmuenenu wa muomumue ne wa Kristo, eu wa kujinga bua kusadilangana pamutu pa kubasadilabo ne kuikala bapuekele pamutu pa kuikala pa muaba munene. Matewuse 20:17-28; Markuse 3:17; 9:33-37; 10:32-45; Lukase 18:31-34; Yowanese 11:16, MMM.

▪ Bua tshinyi bayidi badi mpindieu bakuatshika buôwa?

▪ Mmunyi mudi Yezu ulongolola bayidi bende ku tshikadi pa kuenzeka?

▪ Ntshinyi tshidibu balomba Yezu, ne ngandamuinu wa bakuabu bapostolo udi tshinyi?

▪ Mmunyi mudi Yezu utua tshisala ku tshilumbu tshidi pankatshi pa bapostolo bende?