Nshapita wa 22

Bayidi banayi badi babikidibua

MUMANE kuepuka tshiupa tshia lufu mu Nazarete, tshimenga tshiakakolelaye, Yezu udi uya ku Kapernaume, tshimenga tshidi pabuipi ne Mbuu wa Ngalileya. Ebi bidi bikumbaja mulayi mukuabu wa Yeshaya. Muine eu udi umanyisha ne: bena Ngalileya badi basombele pabuipi ne mbuu nebamone butoke bunene.

Mu kutungunuka ne kukumbaja mudimu wende wa mutuadi wa butoke wa dimanyisha Bukalenge muin’emu, Yezu udi umona banayi ba ku bayidi bende. Bine aba bakamufila mu ngendu diambedi, kadi pakalukilabu ne Yezu bafumina ku Yudeya, bakapingana ku mudimu wabu wa diloba. Anu mudibi bimueneka, Yezu udi ubakeba mpindieu, bualu dîba diakumbanyi dia kuikala ne bambuluishi ba dilambu, ba dîba dionso, bua kubibidija bua kutungunukabo ne mudimu wa buambi panyima pa diya diende.

Nunku, padi Yezu wenda ku muelelu wa mbuu, udi umona Simone Petelo ne bena diende basukula tupamba tuabu, udi uya kudibu. Ubuela mu buatu bua Petelo, udi umulomba bua kusemena katantshi ne ku mpata. Padibu basemena katantshi, Yezu udi usomba mu buatu ne utuadija kulongesha misumba idi ku muelelu.

Pashishe, Yezu udi wambila Petelo ne: “Semena muaba muondoke, ne elayi tupamba tuenu bua kukuata [mishipa].”

“Mulongeshi,” ke mudi Petelo umukudimuna, “tudi batate butuku bujima nansha kukuata kantu, kadi ku dîyi diebe nengele tupamba.”

Padibu bela tupamba, mishipa mivule menemene idi ikuatshibua ne tupamba tuine tutuadija kupandika. Balume nebe badi bakobuela balobi nabu badi mu buatu bukuabu pabuipi bua kulua kubambuluisha. Mâtu wonso abidi adi uwula tente ne mishipa mivulavulayi ne atuadija mene kudiina. Padiye umona muanda eu, Petelo udi upona kumpala kua Yezu, wamba ne: “Semena kule nanyi, Mukalenge, bualu ndi muena mpekatu.”

“Lekela kutshina,” ke mudi Yezu umuandamuna. “Bituadije ku mpindieu, newikale ukuata bantu ne muoyo.”

Yezu udi ubikila kabidi André, muanabu ne Petelo. “Vuaku undonde,” ke mudiye ubatendekena, “ne nennuvuije balobi ba bantu.” Yezu udi ubikila kabidi benzejanganyi nabu ba mudimu, Yakobo ne Yone, bana ba Zebedeyi, buobu pabu kabena bajingakana bua kumulonda. Nunku, balume aba banayi badi balekela mudimu wabu wa kuloba ne balua bayidi banayi ba kumpala ba Yezu ba pa muoyo, bende ba pa tshibidilu. Luka 5:1-11; Matayo 4:13-22; Mâko 1:16-20, NW; Yeshaya 9:1, 2.

▪ Bua tshinyi Yezu udi ubikila bayidi bende bua kumulonda, mbanganyi abu?

▪ Ntshishima kayi tshidi tshikuatshisha Petelo buôwa?

▪ Yezu udi ubikila bayidi bende bua diloba dia mushindu kayi?