Nshapita wa 55

Bayidi bavule badi balekela kulonda Yezu

YEZU udi ulongesha mu nsunagoga kampanda mu Kapernaume pa mudimu udiye ukumbaja bu diampa dilelela difume mu diulu. Bidi bimueneka se: muyuki wende nntungunukilu wa dikokangana ku mêyi ne bantu pavuabo bamusangane mu difumina diabo ku Est wa Mbuu wa Ngalileya, kuvuabo badiishibue ne mampa ne mishipa bivudija mu tshishima.

Yezu udi utungunuka ne diumvuija diende, wamba ne: “Diampa dingafila mmubidi wanyi bua muoyo wa bukua-bantu.” Kukadi bidimu bibidi bulubulu, mu muvu wa disampila mu 30 B.B., Yezu uvua muambile Nikodeme ne: Nzambi wakatamba kunanga bukua-bantu ne kufila Muanende bu Mupandishi. Nunku, Yezu udi umvuija mpindieu ne: muntu yonso munkatshi mua bukua-bantu udi udia mubidi wende, mu ngakuilu wa tshimfuanyi, pa kuenza midimu ya ditabuja mu mulambu udiye pa kufila mu tshitupa tshîpi emu, udi mua kupeta muoyo wa kashidi.

Kadi, bantu badi balenduka pa kumvua mêyi a Yezu aa. Badi bakonka ne: “Mmushindu kayi udi muntu eu mua kutupa mubidi wende bua kudia?” Yezu mmusue bua bamuteleji badijinguluile ne: kudia mubidi wende kudi mua kuenzeka mushindu wa mu tshimfuanyi. Nunku, bua kuzangika muanda eu, udi wamba bualu kampanda budi mua kutamba kujudija mpata bu buobo mua kubuangata bilondeshile ngumvuilu wa pa muaku.

“Nuenu kanuyi badie mubidi wa Muana wa muntu ne kanuyi banue mashi ende,” ke mudi Yezu wamba, “kanuena ne muoyo munda muenu to. Eu udi udia mubidi wanyi ne unua mashi anyi udi ne muoyo wa kashidi, ne meme nemmubiishe mu dituku dia ndekelu; bualu mubidi wanyi udi tshiakudia tshilelela, ne mashi anyi adi tshiakunua tshilelela. Eu udi udia mubidi wanyi ne unua mashi anyi udi ushala nanyi mu buobumue, ne meme mu buobumue nende.”

Bushuwa, dilongesha dia Yezu divua mua kutamba kutua ku muoyo bu yeye ukankamija didia mibidi ya bantu. Kadi, bushuwa kêna wakula bua didia dia mubidi ne dinua dia mashi biena-dîna nansha. Udi’anu uzangika muanda wa se: aba buonso badi bakengela kupeta muoyo wa kashidi badi ne bua kuenza midimu ya ditabuja mu mulambu udiye pa kufila padiye ulambula mubidi wende wa muntu mupuangane ne upumuna mashi ende mapeteshi a muoyo. Kadi, nansha bavule ba ku bayidi bende kabena bakeba mua kujingulula bimpe dilongesha diende, apo, badi batontolola ne: “Eu ngakuilu udi utamba kunyingalajangana; nnganyi udi mua kumuteleja?”

Bu mudiye mumanye ne: bavule ba ku bayidi bende badi banungana, Yezu udi wamba ne: “Mêyi aa adi anulenduisha anyi? Apo panuamona Muana wa muntu ubanda kuvuaye bangabanga? . . . Mêyi andi munuambile adi spiritu ne muoyo. Kadi kudi bamue munkatshi muenu badi kabayi bitabuja nansha.”

Yezu udi utungunuka ne: “Ke bualu kayi nganuambidi ne: muntu nansha umue kêna mua kudivuila kundi, bikalabi kabiyi bimupa kudi Tatu.” Padibo bumvua mêyi aa, bavule ba ku bayidi bende badi bumuka ne balekela kumulonda. Yezu udi ukudimuka kudi bapostolo bende 12 ne ubebeja ne: “Nuenu bine kanuena basue kuya, ki mmuomu anyi?”

Petelo udi wandamuna ne: “Mukalenge, netuye kudi nganyi? Wewe udi ne mêyi a muoyo wa kashidi; kabidi tudi bitabuje ne bafike ku dimanya ne: udi Munsantu wa Nzambi.” Mmêyi kayipu malenga a dileja lulamatu, nansha mudi Petelo ne bapostolo bakuabu kabayi mua kuikala bumvue bimpe menemene dilongesha dia Yezu pa bualu ebu!

Nansha mudi diandamuna dia Petelo dimusankishe, Yezu udi ubakudimuna ne: “Ki mmeme udi munusungule, nuenu dikumi ne babidi aba anyi? Pabi, umue wenu udi mushiminyinyanganyi.” Udi wakula bua Yudase Iskaryote. Bidi bimueneka se: kutuadijila ku mpindieu, Yezu mmubange kukenketa bimanyinu bia “ntuadijilu,” anyi nnundumukilu, wa ngenzelu mubi.

Yezu udi ufuma ku diela bantu mâyi ku makasa pa kuepuka didibamba diabu dia kumuteka mukalenge ne badi mua kuikala bela meji ne: ‘Mmunyi mudi muntu eu mua kuikala Masiya padiye ubenga kukumbaja mudimu mufundila Masiya?’ Ndukonko lukuabu ludi lufuma ku dijudibua mu lungenyi luabu. Yone 6:51-71; 3:16, NW.

▪ Yezu udi ufila mubidi wende bua banganyi, ne mmunyi mudi bine aba ‘badia mubidi wende’?

▪ Mmêyi kayi makuabu a Yezu adi anyingalaja bantu, kadi ntshinyi tshidiye uzangika?

▪ Petelo udi ufila diandamuna kayi padi bavule balekela kulonda Yezu?