Nshapita wa 97

Bena mudimu mu budimi bua mvinyo

“BAVULE badi ba kumpala,” ke mudi Yezu ufuma ku diamba, “nebikale ba ndekelu, ne ba ndekelu nebikale ba kumpala.” (NW) Bua kutokesha lungenyi elu, Yezu udi mpindieu ulonda muyuki kampanda. ‘Bukalenge bua mu diulu’ ke mudiye utuadija, ‘budi bufuanangane ne tatu wa nzubu uvua mupatuke ne dinda bua kuangata bena mudimu badi mua kumudimina budimi buende bua mvinyo.’

Yezu udi utungunuka ne: “Kumvuanganaye nabo bua kubafuta [ndenariyo, NW] umue ku dituku, kubatumaye mu budimi buende. Upatuka pa diba disatu, kumonaye bakuabo bimane [pa muaba wa tshisalu, NW] kabayi ne tshia kuenza. Kubambilaye ne: ‘Yayi penu ku budimi buanyi, [tshionso tshidi tshiakane nennupeshe, NW].’ Bobo kuya. Upatuka kabidi pa diba disambombo ne pa dia tshitema, kuenzaye mushindu wa muomumue. Pa diba dia dikumi ne dimue, kupatukaye kabidi, kusanganaye bantu bakuabo bimane . . . Kubakonkaye ne: ‘Munudi bimane apa dituku dijima kanuyi nukuata mudimu mmunyi?’ Ke bobo ne: ‘Bualu muntu ki mmutukuate ku mudimu.’ Muena budimi ne: ‘Ndayi penu ku budimi buanyi bua mvinyo.’”

Muena nzubu, peshi muena budimi bua mvinyo, nYehowa Nzambi, ne budimi bua mvinyo, ntshisamba tshia Izalele. Bena mudimu batuma mu budimi bua mvinyo mbantu babuejibue mu tshiovo tshia Mikenji; nangananga mbena Yuda ba mu matuku a bapostolo. Diumvuangana bua difutu ndienjibue anu ne bena mudimu badi bakumbaja dituku dijima. Difutu ndia ndenariyo umue bua dituku dijima dia mudimu. Bu mudi “dîba isatu” diakanangane ne dîba dia 9 mu dinda, aba badi babikidibue pa dîba 3, 6, dia 9, ne dia 11 badi’anu benza ku muntu ku muntu mêba 9, 6, 3 ne dîba 1.

Bena mudimu badi benze mêba 12, anyi dituku dijima, badi tshimfuanyi tshia bamfumu bena Yuda bavua anu batungunuke ne kukumbaja mudimu wa malu a Nzambi. Mbashilangane ne bayidi ba Yezu, bavua badifile, bua tshitupa tshinene tshia matuku a muoyo wabu, mu diloba peshi mu midimu mikuabu ya ku mubidi. Anu pakumbene muvu wa bimuma mu 29 B.B. ke pakatumibua Yezu Kristo kudi “muena nzubu” bua kubasangisha ne kubavuija bayidi bende. Nunku, bakalua “ba ndekelu,” peshi bena mudimu ba pa dîba dia 11 batuma mu budimi bua mvinyo.

Ndekelu wa bionso, dituku dia mudimu dia mu tshimfuanyi didi dijika ne lufu lua Yezu, ne dîba dia kufuta bena mudimu didi dikumbana. Dîyi-diakaji dikena dilondibua pa tshibidilu dia kufuta ba ndekelu ke didibo batumikila, anu mudi diumvuija edi difidibua: “Dilolo, muena budimi kuambila mulami wa bintu biende ne: ‘Bikila bena mudimu, ubafute; utuadije ne ba ndekelu, ushikidile ne ba kumpala.’ Bena pa diba dia dikumi ne dimue kufikabo, kupetabo muntu [ndenariyo, NW] umue umue. Ba kumpala bafika pabo, kuelabo meji ne: netupete bipitshidile; kadi kupetabo anu [ndenariyo, NW] umue ku muntu. Pavuabo bangata, bavua banungana, bamba muena budimi ne: ‘Ba ndekelu aba mbakuate mudimu diba anu dimue, ubateka mulongo umue netu, tuetu badi baletele dituku dijima, munya mutupuile pambidi!’ Muena budimi kuandamuna umue wa kudibo ne: ‘Mulunda, tshiena mudie kantu kebe to. Katuvua bumvuangane nebe bua [ndenariyo, NW] umue anyi? Angata difutu diebe, uye. Bidi binsankisha panyi bua kupesha wa ndekelu ewu bungi bumue nebe. Tshiena mua kuenza ne bintu bianyi mundi musue anyi? Udi undiwula bua pandi mulenga anyi?’” Bua kukoma, Yezu udi wambulula lungenyi lukavuaye mumanyishe diambedi, wamba ne: “Mushindu’eu, ba ndekelu nebikale ba kumpala, ne ba kumpala nebikale ba ndekelu.” (NW)

Dipeshibua ndenariyo didi dienzeka, ki ndîba dia lufu lua Yezu, apo dia Pentekoste wa 33 B.B., padi Kristo, “mulami wa bintu,” umuangalaja spiritu munsantu pa bayidi bende. Bayidi ba Yezu aba badi bu “ba ndekelu,” peshi bena mudimu ba pa dîba dia 11. Ndenariyo kêna uleja dipa dia spiritu munsantu muine. Ndenariyo ntshintu kampanda tshidi bayidi ne bua kutumika natshi apa pa buloba. Ntshintu tshidi tshileja dibapetesha muoyo, muoyo wabu wa kashidi. Mmuabi wa kulua bena Izalele ba mu nyuma, bela manyi bua kufila bumanyishi pa Bukalenge bua Nzambi.

Katupa kîpi pashishe, aba bavua bangatshibue ku mudimu diambedi badi bajingulula se: bayidi ba Yezu mbamane kufutshibua, ne badi babamona batumika ne ndenariyo wa mu tshimfuanyi. Kadi, badi bajinga bivule kupita spiritu munsantu ne masanka a Bukalenge adi masuikakajaku. Kunungana ne kulandula kuabu kudi kuandamuka dikengeshibua dia bayidi ba Kristo, bena mudimu “ba ndekelu” batuma mu budimi bua mvinyo.

Dikumbana adi dia mu siekele wa kumpala ke dikumbana dimuepele bua mufuanu wa Yezu anyi? Tòo, bamfumu ba Bukua-buena-nkristo mu siekele eu wa 20, pa kujoja mianzu ne majitu abu a mudimu, bavua “ba kumpala” ku diangatshibua bua kuenza mudimu mu budimi bua mvinyo bua mu tshimfuanyi bua Nzambi. Bakangata bamanyishi baditshipe beleshanganyi ba diboko ne Société Watch Tower Bible and Tract bu “ba ndekelu” bapetele bukenji kampanda buakanyine mu mudimu wa Nzambi. Kadi, bushuwa, bine aba bapepeja kudi bamfumu ba bitendelelu ke buobo mene bapetele ndenariyo—lumu lua kusadila bu milopo miela manyi ya Bukalenge bua mu diulu bua Nzambi. Matewuse 19:30–20:16, MMM.

▪ Ntshinyi tshidi tshilejibue bu budimi bua mvinyo? Mbanganyi badi balejibue bu muena budimi bua mvinyo ne bena mudimu bakumbaji ba mêba 12 ne ba dîba 1?

▪ Dituku dia mudimu dia mu tshimfuanyi diakajika dîba kayi, ne difutu diakafidibua dîba kayi?

▪ Ntshinyi tshidi tshilejibue bu difutu dia ndenariyo?