Nshapita wa 80

Bikumbi ne mulami wa mikoko

YEZU mmuvue mu Yeruzaleme bua difesto dia Dijidila anyi Hanukkah, tshibilu tshia divuluka dijidila tshiakabidi dia ntempelo bua Yehowa. Mu 168 K.B.B. bidimu 200 bimane kupita, Antiochus IV Epifane wakanyenga tshimenga, kunyanga ntempelo ne tshilambuilu tshiende. Kadi, bidimu bisatu pashishe, bakapikula Yeruzaleme ne kujidilabu ntempelo tshiakabidi. Dijidila tshiakabidi edi diakalua tshibilu tshia ku tshidimu ku tshidimu.

Difesto dia Dijidila edi didi dienzeka mu dia 25 Kislev, ngondo wa bena Yuda udi ukumbanangana ne tshiabibidi tshibidi tshia Kasuabanga ne tshiabibidi tshia kumpala tshia Tshisua-munene pa kalandrié ka matuku etu aa. Nunku nkushale anu matuku 100 ne bia pa mutu bua Pasaka ukena kupua muoyo wa mu 33 B.B. kuenzekaye. Bu mudibi mu tshitshia tshia mashika, mupostolo Yone udi uwubikila ne: “muvu wa mvula ne mashika.”

Mpindieu, Yezu udi utumika ne mufuanu kampanda, mu muine eu udi utela bikumbi bisatu ne wakula bua mudimu wende bu Mulami Mulenga wa mikoko. Tshikumbi tshia kumpala tshidiye utela tshidi tshileja ndongoluelu wa tshiovo tshia Mikenji ya Mozese. Mikenji ivua bu lupangu, luvua lutapulula bena Yuda ne bilele bibi bia bantu bavua kabayi banyishibue mu tshiovo etshi tshia pa buatshi ne Nzambi. Yezu udi umvuija ne: “Bushuwa menemenne ndi nnuambila, Eu udi kayi ubuelela ku tshiibi mu tshikumbi, kadi ubandila kukuabo, muine au mmuibi ne mupawudi. Kadi eu udi ubuelela ku tshiibi mmulami wa mikoko.”

Bakuabu bakalua ne badiamba mudibo Masiya, peshi Kristo, kadi kabavua mulami mulelela udi Yezu wamba buende mpindieu ne: “Mulami wa tshiibi udi unzuluila muine au, ne mikoko idi iteleja dîyi diende, ne udi ubikila mikoko yende ku mêna ayi ne uyipatula pambelu. . . . Kayakulonda muenyi nansha kakese, kadi neyimunyeme, bualu ki mmimanye dîyi dia benyi.”

“Mulami wa tshiibi” tshia tshikumbi tshia kumpala uvua Yone Mubatiji. Bu mulami wa tshiibi, Yone ‘wakunzuluila’ Yezu pa kumuleja kudi mikoko ya mu tshimfuanyi ivuaye ne bua kupatula pambelu bua kudiisha. Mikoko eyi idi Yezu ubikila ku mêna ayi ne upatula pambelu, ndekelu wa bionso neyanyishibue mu tshikumbi tshikuabu, anu mudi Yezu umvuija ne: “Bushuwa menemene ndi nnuambila ne: ndi tshiibi tshia mikoko,” mbuena kuamba ne: tshiibi tshia tshikumbi tshipiatshipia. Padi Yezu ubanjija tshiovo tshipiatshipia ne bayidi bende ne kumukila mu diulu ubamuangalajila spiritu munsantu dia Pentekoste uvuavua, badi banyishibua mu tshikumbi etshi tshipiatshipia.

Bua kufila mumvuija a pa mutu pa mudimu wende, Yezu udi wamba ne: “Ndi tshiibi; eu yonso udi ubuelela kundi neasungidibue, neabuele munda ne neapatuke pambelu, neasangane mpata wa bisonsa bia kudia. . . . Ndi mulue bua [mikoko] ikale ne muoyo ne ikale nawu muvule menemene. . . . Ndi mulami mulenga, ndi mumanye mikoko yanyi ne mikoko yanyi idi mimmanye, anu bu mudi Tatu mummanye ne meme panyi mumanye Tatu; ne ndi mfila anyima wanyi bua mikoko.”

Kukadi katupa kîpi, Yezu uvua mukankamije bamulondi, wamba ne: “Kanutshinyi, kasumbu kakese, bualu Tatuenu wanyishile bua kunupa bukalenge.” Kasumbu aka kakese, kenza ndekelu wa bionso ne bantu 144 000, kadi kabuela mu tshikumbi etshi tshipiatshipia peshi tshibidi. Kadi, Yezu udi utungunuka pa kushindika ne: “Ndi ne mikoko mikuabo, idi kayiyi ya mu tshikumbi etshi; mine ayi payi, ndi ne bua kulua nayi, neyiteleje dîyi dianyi, ne neyivue tshisumbu tshimue, mulami umue.”

Bu mudi “mikoko mikuabo . . . kayiyi ya mu tshikumbi esthi,” idi ne bua kuikala ya mu tshikuabu tshikumbi, tshisatu. Bikumbi ebi bibidi bia ndekelu, anyi bipangu bia mikoko, bidi ne matekemena a muoyo mu miaba mishilangane. “Kasumbu kakese” kadi mu tshikumbi tshimue nekakokeshe ne Kristo mu diulu, ne “mikoko mikuabo” ya mu tshikumbi tshikuabu neyikale ne muoyo mu Mparadizu pa buloba. Kadi, nansha mudiyi mu bikumbi bibidi, mikoko kayena ne lubabu munkatshi muayi, ne kayena idiumvua bu mitapulula bua kansungasunga, bualu, anu mudi Yezu wamba, idi “ivua tshisumbu tshimue” ku bulombodi bua “mulami umue.”

Mulami Mulenga, Yezu Kristo, udi ufila muoyo wende ku budisuile bua mikoko ya mu bikumbi ebi bibidi. “Ndi ngufila ku budisuile,” ke mudiye umvuija. “Ndi ne bukokeshi bua kuwufila, ne ndi ne bukokeshi bua kuwupetulula. Dîyi-dituma mu muanda eu ndi mudipetele kudi Tatuanyi.” Padi Yezu wamba miaku eyi, ditapuluka didi dibuela munkatshi mua bena Yuda.

Bavule mu musumba badi bamba ne: “Udi ne demon ne mmupaale. Bua tshinyi nudi numuteleja?” Kadi bakuabu badi bandamuna ne: “Eyi ki mmiaku ya muntu udi ne demon to.” Pashishe, pa kuvuluka kabiyi mpata kuondopa kuende kua mufofo wa ku tshileledi kukadi ngondo mikese, badi basakidila ne: “Demon udi mua kutabeja mesu a mufofo anyi?” Yone 10:1-22; 9:1-7; Luka 12:32; Buakabuluibua 14:1, 3; 21:3, 4; Musambu wa 37:29, NW.

▪ Difesto dia Dijidila ntshinyi, ne didi dienjibua tshikondo kayi?

▪ Tshikumbi tshia kumpala ntshinyi, ne mulami wa tshiibi tshiatshi nnganyi?

▪ Mmunyi mudi mulami wa tshiibi unzuluila Mulami wa mikoko, ne mmuaba kayi udi mikoko yanyishibua pashishe?

▪ Mbanganyi badi benza bikumbi bibidi bia Mulami mulenga, ne badi balua bipangu bungi munyi?