Nshapita wa 47

Binsonji biandamuki milowo mikole

PADI Jairuse umona mudi mukaji muena disama dia mashi muondopibue, kabiyi mpata, dieyemena diende mu bukole bua dienza bishima bua Yezu didi ditamba kukoleshibua. Ku ntuadijilu wa dine dituku adi, Jairuse uvua mulombe Yezu bua kulua kuambuluisha muanende wa bakaji munanga wa pa muoyo wa mvula 12, ukavua ubunga ne lufu. Kadi mpindieu, bualu buvua Jairuse utshina bikole buenzeki. Patshidi Yezu wakula ne mukaji, bamue bantu badi balua kumanyisha Jairuse ku luseke ne: “Muanebe wa bakaji wafu! Bua tshinyi udi mutungunuke ne kutatshisha mulongeshi?”

Ndumu kayipu lusunsudi lua mutshima! Anjibi kuela meji: muntu eu, munemekibue bikole kudi bena diende, kêna ne mukuabu wa kutekela mutshima mpindieu bu mudibu bamumanyisha bua lufu lua muanende wa bakaji. Kadi, Yezu udi umvua kuyukila kuabo. Nunku, udi ukudimuka kudi Jairuse, umuambila ne dîyi dikoleshi dia muoyo ne: “Kutshinyi to, ikala amu ne ditabuja.”

Yezu udi uya ne muntu eu musunsuke mutshima ne tshinyongopelu kuende. Padibo bafika, badi basangana lukutukutu luvule lua didila ne didiabakena. Bantu musumba munene mbasangile, badituta bianza pa tshiadi bua tshinyongopelu. Padi Yezu ubuela, udi webeja ne: “Bua tshinyi nudi nuenza diyoyo ne muadi? Muana ki mmufue to, mmulale.”

Pa kumvua mêyi aa, bantu badi batuadija kuseka Yezu ne kapeja, bualu mbamanye ne: nsongakaji mmufue bushuwa. Pabi, Yezu udi wamba se: mmulale patupu. Pa kutumika ne makole mamupa kudi Nzambi, nealeje se: bantu badi mua kubiishibua ku lufu bipepele anu mudibu mua kujudibua ku tulu tukole.

Yezu udi upatula mpindieu bantu buonso, pa kumusha Petelo, Yakobo, Yone, mamuende ne tatuende wa nsongakaji mufue. Pashishe udi usemena ne batanu aba muaba udi nsongakaji muladika. Umukuata ku tshianza, Yezu udi wamba ne: “Talʹi·tha cuʹmi,” miaku idi ikudimunyibua ne: “Nsongakaji, ndi nkuambila, Juka!” Diakamue, nsongakaji udi ujuka ne utuadija kuenda! Muanda eu udi wamba kupaadisha baledi bende ne milowo mikole.

Yeye mumane kufila dîyi bua kupeshabo muana tshiakudia, Yezu udi ukandika Jairuse ne mukajende bua kabambidi muntu nansha umue tshidi tshienzeke. Kadi, nansha mudi Yezu mukandike, muyuki wa muanda eu udi umuangalaka mu rejon eu mujima. Edi ndibiisha dibidi didi Yezu wenza. Matayo 9:18-26; Mâko 5:35-43; Luka 8:41-56, NW.

▪ Ndumu kayi ludi Jairuse upeta, ne mmunyi mudi Yezu umukolesha ku muoyo?

▪ Nsombelu udi tshinyi padibo bafika kua Jairuse?

▪ Bua tshinyi Yezu udi wamba ne: muana údí mufue mmulale patupu?

▪ Bamonyi batanu ba dibiishibua edi bàdì ne Yezu mbanganyi?