Bua tshinyi Yezu uvuile pa buloba
Nshapita wa 24
Bua tshinyi Yezu uvuile pa buloba
YEZU mmuenze bivule dituku edi divuaye mupitshishe mu Kapernaume ne bayidi bende banayi, ne dilolo bena mu tshimenga bavua bamutuadile babedi babu bua yeye kubondopa. Kavua mupete dîba dia kushala nkayende to.
Tudi mpindieu mu dinda diakalonda. Pa kabundubundu, Yezu udi ujuuka ne upatuka nkayende. Udi upengama pa nkayende bua kusambila Tatuende. Kadi, Yezu kêna ushala nkayende mutantshi mule bualu padi Petelo ne bakuabu bajingulula mudiye kayi nabu, badi bapatuka bua kumukeba.
Padibu basangana Yezu, Petelo udi wamba ne: “Buonso badi bakukeba.” Bena Kapernaume mbasue bua Yezu anji kushala muabu. Badi banyisha bushuwa bidiye mubenzele! Kadi, Yezu uvuile pa buloba nangananga bua kuenza bishima bia diondopa bu ebi anyi? Yeye muine udi wamba tshinyi?
Bilondeshile umue muyuki wa mu Bible, Yezu udi wandamuna bayidi bende ne: “Tuyayi muaba mukuabo, mu misoko idi pabuipi, bua nye kulongeshamu kabidi, bualu ke tshindi mupatukile.” (MMM) a Nansha mudi bantu bafinakaja bua Yezu kushala muabu, udi ubambila ne: “Ndi ne bua kumanyisha lumu luimpe lua bukalenge bua Nzambi mu bimenga bikuabu kabidi, bualu ke tshiakantuminabo.”
Eyowa, Yezu uvuile pa buloba nangananga bua kumanyisha Bukalenge bua Nzambi, buatumbishisha dîna dia Tatuende ne kujikija kashidi ntatu yonso ya bantu. Kadi, bua kufila tshijadiki tshia se: mmutumibue kudi Nzambi, Yezu udi wenza bishima bia diondopangana. Kukadi siekele mivule, Mozese wakenza pende bishima bua kujadika muvuaye bushuwa musadidi wa Nzambi.
Mpindieu padi Yezu umuka mu Kapernaume bua kulongesha mu bikuabu bimenga, bayidi bende banayi badi baya nende. Banayi aba ke Petelo, ne muanabo André, Yone ne muanabu Yakobo. Kabiyi mpata, nudi nuvuluka se: lumingu lushale Yezu uvua mubabikile bua kuikalabo ba kumpala ba ku benzejanganyi nende ba mudimu ne bena diende mu ngendu.
Luendu elu lua Yezu ne bayidi bende banayi bua kufila bumanyishi mu Ngalileya ndupatule bipeta bimpe bitampe! Kabidi, manunganyi pa midimu yende adi amuangalaka too ne mu Syria mujima. Misumba minene ifumina mu Ngalileya, mu Yudeya ne dia muamua dia Musulu wa Yordane idi ilonda Yezu ne bayidi bende. Mâko 1:35-39; Luka 4:42, 43; Matayo 4:23-25; Ekesode 4:1-9, 30, 31, NW.
[Mêyi adi kuinshi]
a Padi MMM ulonda mvese mutela, bidi bileja ne: mmuangata mu nkudimuinu wa Mukanda wa Mvidi Mukulu.
▪ Ntshinyi tshidi tshienzeka mu dinda panyima pa dituku divua Yezu muenze bivule mu Kapernaume?
▪ Bua tshinyi Yezu uvua mutumibue pa buloba, ne bishima biende bidi bikumbaja tshipatshila kayi?
▪ Mbanganyi badi baya ne Yezu mu luendu luende lua bumanyishi mu Ngalileya, ne ngandamuinu ku midimu ya Yezu udi tshinyi?
