Nshapita wa 51

Bumanji mu difesto dia mufikilu wa diledibua

PADIYE ujikija dipesha bapostolo bende ngenyi-miludiki, Yezu udi ubatuma mu teritware babidi babidi. Imue misangu, Petelo udi uya ne muanabo André, Yakobo ne Yone, Filipe ne Bartelemi, Tomase ne Matayo, Yakobo ne Tadeyi, Simone ne Yudase Iskaryote. Kuonso kudibo baya, tusumbu etu tusambombo tua bamuangalaji ba Evangeliyo badi bamba lumu luimpe lua Bukalenge ne benza bishima bia diondopa.

Mu lupolo elu, Yone Mubatiji udi anu mu buloko. Kudi mpindieu bidimu bu bibidi katshia bamuelamu. Nudi mua kuvuluka se: Yone wakamanyisha patoke muvuabi bibi bua mukalenge Herodese Antipase kuangata Herodiade, mukaji wa muanabo Filipe, ne kumuvuija mukajende. Bu muvua Herodese Antipase udibala mudiye mulondi wa Mikenji ya Mozese, Yone uvua ne kabingila ka kupiisha kuselangana mu masandi eku. Bua bualu ebu, Herodese wakelesha Yone mu buloko, imue misangu ku disongakaja dia Herodiade.

Herodese Antipase mmumanye bimpe se: Yone mmuntu muakane, ne udi mene umuteleja ne musangelu. Nanku, udi welakana pa tshidiye mua kumuenzela. Kadi, Herodiade udi anu mukine Yone ne udi ukeba mushindu wa kumushipesha. Ndekelu wa bionso, mpukapuka ivuaye ukebakeba idi ipeteka.

Matuku makese kumpala kua Pasaka wa mu 32 B.B., Herodese udi ulongolola difesto dinene dia mufikilu wa diledibua diende. Udi ubikidisha banene buonso ba mu mbulamatadi, bamfumu ba basalayi ne baludiki bena Ngalileya. Ku dilolo, Salomé, nsongakaji wa Herodiade uvuabu balele ne Filipe, bayende wa kumpala, udi utumibua mu tshialu bua kujiila babikidibue maja. Njiilu wende mulenga udi usankisha balume buonso badi mu difesto.

Herodese udi ukuatshika milowo bua njiilu wa Salomé. “Ndomba tshionso tshiwudi musue, meme nenkupeshetshi,” ke mudiye wamba. Wenza mene ne mutshipu ne: “Tshionso tshiwandomba nenkupeshetshi, too ne ku tshiabibidi tshia bukalenge buanyi.”

Kumpala kua kuenza dilomba, Salomé udi upatuka bua kuanji kuyukila ne mamuende. Umuebeja ne: “Nendombe tshinyi?”

Tshikondo tshindila tshiakumbanyi! “Mutu wa Yone Mubatiji,” ke mudi Herodiade wandamuna kakuyi dielakana.

Diakamue Salomé udi upingana kudi Herodese ne wenza dilomba: “Anu mpindieu, ndi musue umpeshe mutu wa Yone Mubatiji pa dilonga.”

Herodese udi ubungama bikole. Kadi bu muvua babikidibue bende bumvue mutshipu, udi ulubakana biapangaye kuwukumbaja, nansha mudibi bikengela kushipa muntu udi kayi ne bualu. Mushipianganyi udi utumibua ne lukasa luonso mu lukanu ne bukenji ebu bua lufu. Mu katupa kîpi, udi upingana ne mutu wa Yone pa dilonga, ne uwupesha Salomé. Yeye udi uwutuadila mamuende. Padi bayidi ba Yone bumvua lumu lua muanda eu, badi balua kuangata mubidi wa Yone ne bawujika, ne pashishe, badi batuadila Yezu lumu elu.

Ku shoo padi Herodese umvua bakula bua Yezu udi wondopa babedi ne wipata ba-demon, udi ukuatshika buôwa, utshina se: Yezu udi mua kuikala bushuwa Yone mubiishibue ku lufu. Pashishe, udi ujinga menemene bua kumona Yezu, kadi ki mbua kumvua dilongesha diende, apo bua kujadika bikala kutshina kuende kua bushuwa peshi kua patupu. Matayo 10:1-5; 11:1; 14:1-12; Mâko 6:14-29; Luka 9:7-9, NW.

▪ Bua tshinyi Yone udi mu buloko, ne bua tshinyi Herodese ki mmusue kumushipa?

▪ Ndekelu wa bionso, mmunyi mudi Herodiade ufika ku dishipesha Yone?

▪ Kunyima kua lufu lua Yone, bua tshinyi Herodese udi ujinga kumona Yezu?