Nshapita wa 126

“Bushuwa, eu uvua Muana wa Nzambi”

YEZU udi pa mutshi kutshidi lupolo luîpi padi mîdima ya mu tshishima yenzeka munkatshi mua mêba asatu pa dîba dia mujalamu. Mine eyi ki mmikebesha kudi dijimina dia dîba nansha, bualu diodi ditu dienzeka anu ku dibala dia ngondo, pabi tshikondo tshia Pasaka, ngondo utu tshijengu. Kabidi, didimbakana dia dîba ditu dinenga anu minute mikese. Nunku, eyi mîdima mmifume kudi Nzambi! Imue misangu muanda eu udi welesha baseki ba Yezu meji, ukosesha mene tuseku tuabu.

Bikala muanda mukuate buôwa eu muenzeke kumpala kua muenji wa malu mabi umue kubela muinende ne kulomba Yezu bua kumuvuluka, pamu’apa ke tshisonsodi tshia dinyingalala diende. Imue misangu mu lupolo ludi mîdima eyi inenga ke dîba didi bakaji banayi, mmumue ne: mamuende wa Yezu, ne muanabu wa bakaji Salomé, Mariya Magdelene, ne Mariya mamuende wa mupostolo Yakobo Mukese, basemena pabuipi ne mutshi wa tshinyongopelu. Yone, mupostolo munangibue wa pa muoyo wa Yezu, udi nabu muaba eu.

Mmunyipu mudi mutshima wa mamuende wa Yezu ‘musompola’ padiye utangila muana uvuaye muamushe ne mukoleshe mukudika ku mutshi eu wenda usumpakana! Pabi, Yezu udi uditatshisha, ki mbua bisama biende, apo bua nsombelu wikala nende mamuende. Pa kuenza madikolela a bungi, udi winyika mutu mutangije kudi Yone ne wambila mamuende ne: ‘Mukaji, ke muanebe ewu!’ Pashishe, winyika mutu mutangije kudi Mariya, udi wambila Yone ne: ‘Ke mamuebe ewu!’ (MMM)

Pa kuenza nunku, Yezu udi wambika bujitu bua kukubibua kua mamuende, udi mukamba mpindieu anu mudibi bimueneka, pa makaya a mupostolo udiye munange ne dinanga dia pa buadi. Udi wenza nunku bualu bana bakuabu ba Mariya ki mbanji kuleja ditabuja diabu kudiye patoke. Nunku, udi ufila tshilejilu tshilenga pa kutabalela, ki ng’anu bua kupetesha mamuende bintu bia ku mubidi bidiye ukengela, apo ne bia mu nyuma kabidi.

Pa dîba bu isatu mu mapingaja, Yezu udi wamba ne: “Nyota mminsume.” (MMM) Yezu udi umvua se: Tatuende mmumupale, mu ngakuilu kampanda, bukubi buvuaye upeta kudiye bua muoyo-mutoke wende utetshibue tshishiki. Nunku, udi ubila ne dîyi dikole ne: “Nzambi wanyi, Nzambi wanyi, wandekedi bua tshinyi?” (NW) Padibu bumvua mêyi aa, bamue ba ku aba badi biimane muaba au badi batua tshikemu ne: “Monayi! Udi ubikila Eliya.” (NW) Diakamue umue wa kudibu udi unyema, ubueja musukulampampa mutua mu mvinyo wa buanji ku lusongo lua tshituta, ne umupesha bua kunua. Kadi bakuabu badi bamba ne: ‘Lekelayi! Tumone Eliya né walua kumutulula panshi.’

Padi Yezu ulabula maluvu a buanji, udi wela lubila ne: “Biakumbanyi!” (NW) Eyowa, wakumbaji bualu buonso buvua Tatuende mumutumine pa buloba bua kuenza. Ndekelu wa bionso, udi wamba ne: “Tatu, ndi nteka muoyo wanyi mu bianza biebe.” Nunku, Yezu udi uteka bukole bua muoyo wende mu bianza bia Nzambi, mushindike ne: Nzambi neamupingajilebu. Pashishe udi winyika mutu ne ukula muoyo.

Dîba didi Yezu ukula muoyo, tshikumina tshikole tshidi tshienzeka, ne mbuebue idi ipandika. Bua bukole bua tshikumina etshi, nkita ya tshivulukilu idi pa mpenga pa Yeruzaleme idi yunzuluka diakamue ne bitalu bikupibua pambelu payi. Bapitakanyi badi bamona bine bitalu ebi bivua bidianyike patoke, ne padibu babuela mu tshimenga, badi bamanyisha muanda eu.

Kabidi, dîba mene didi Yezu ufua, tshilamba tshikudika tshidi tshitapulula Muaba Munsantu ne Muaba Mutambe-Bunsantu mu ntempelo wa Nzambi tshidi tshipandika bipese bibidi, kumukila kuulu too ne kuinshi. Tshilamba tshikudika etshi tshilengeja bimpe ne mekala kabukabu tshidi mua kuikala ne bule bua metre bu 18 ne tshineme bujitu bua bungi! Tshishima etshi tshia dikema katshiena anu tshileja tshiji tshia Nzambi kudi bashipi ba Muanende, apo tshidi tshiumvuija kabidi ne: njila wa dibuela mu Muaba Mutambe-Bunsantu, diulu dine, mmunzulula mpindieu ku diambuluisha dia lufu lua Yezu.

Bushuwa, padi bantu bumvua munyuku wa tshikumina ne bamona malu adi enzeka, badi bakuatshika buôwa bukole. Mfumu wa basalayi uvua mulombole diedibua ku mitshi udi wambika Nzambi butumbi. “Bushuwa, eu uvua Muana wa Nzambi,” (NW) ke mudiye wamba. Pamu’apa uvuaku dîba divua muanda wa dikala muana wa Nzambi dia Yezu muedibue mu tshialu pavuaye ulumbulula kumpala kua Pilato. Ne mpindieu mmutuishibue se: Yezu udi Muana wa Nzambi, eyowa, udi bushuwa muntu mutambe bunene wa katshia ne katshia.

Bakuabu pabu badi bakema bikole bua mianda eyi ya tshishima, ne badi batuadija kupingana ku nzubu yabu benda badituta pa tshiadi, bu tshimanyinu tshia kanyinganyinga kabu kakole ne bundu. Bakaji bavule bayidi ba Yezu mbimanyine pa bule babandila mianda eyi ya tuyayi tukamone ne mitshima misunsuke. Mupostolo Yone udiku pende. Matayo 27:45-56; Mâko 15:33-41; Luka 23:44-49; 2:34, 35; Yone 19:25-30.

▪ Bua tshinyi mîdima idi mienzeke mu mêba asatu kayena mua kuikala mikebesha kudi dijimina dia dîba?

▪ Lupolo luîpi kumpala kua lufu luende, ntshilejilu kayi tshilenga tshidi Yezu ufila bua aba badi ne baledi banunu?

▪ Mbiambilu kayi binayi bidi Yezu ujikula kumpala kua yeye kufua?

▪ Mbipeta kayi bidi tshikumina tshipatuisha, ne dipandika bipese bibidi dia tshilamba tshikudika tshia ntempelo didi diumvuija tshinyi?

▪ Mbuenzeji kayi budi nabu bishima kudi mfumu wa basalayi mulombodi wa diedibua ku mitshi?