Nshapita wa 93

Dîba didi Muana wa muntu usokolodibua

PATSHIDI Yezu ku nord (mu Samariya peshi mu Ngalileya), Bafarizeyi badi bamukonka pa dilua dia Bukalenge. Badi bela meji ne: nebulue mu musekelelu mukole ne dimueneka dia malu a kukatshila, kadi Yezu udi wamba ne: “Bukalenge bua Nzambi kabuena bulua mushindu udibu mua kudileja ku mêsu, bantu kabakuamba ne: ‘Tangilayi apa!’ anyi: ‘Kuaka!’ Bualu, monayi! bukalenge bua Nzambi budi munkatshi muenu.” (NW)

Mêyi a Yezu “munkatshi muenu” mmakudimuna imue misangu ne: “munda muenu.” Nunku bamue bakela meji ne: Yezu uvua usua kumvuija ne: Bukalenge bua Nzambi budi bukokesha mu mitshima ya basadidi ba Nzambi. Pabi, anu mudibi menemene, Bukalenge bua Nzambi kabuena mu mitshima ya Bafarizeyi babule ditabuja badi Yezu wambila mêyi aa. Kadi, budi munkatshi muabu, bualu Mukalenge musungula wa Bukalenge bua Nzambi, Yezu Kristo, udi munkatshi muabu.

Pamu’apa, padi Bafarizeyi bumuka ke padi Yezu wambila bayidi bende bivule pa dilua dia Bukalenge. Ne lungenyi lutuma nangananga ku dikalaku diende ditshilualua mu bukole bua Bukalenge, udi udimuija ne: “Bantu nebanuambile ne: ‘Tangilayi kuaka!’ anyi, ‘Tangilayi apa!’ Kanupatuki, kanulondi [ba-Masiya ba dishima abu] munyima. Bualu, anu bu mupenyi udi, ku dipenyisha diawu, ukenka biangatshile ku tshitupa tshimue too ne ku tshitupa tshikuabu muinshi mua diulu, ke muikala Muana wa muntu.” Nunku, Yezu udi uleja ne: anu bu mudi mupenyi umueka mu tshipapu tshialabale, bia muomumue, tshijadiki tshia dikalaku diende mu bukole bua Bukalenge, netshimueneke patoke kudi aba buonso bajinga kutshibandila.

Pashishe, Yezu udi wenza mafuanyikija ne mianda ya kale bua kuleja mmuenenu ya bantu mu tshikondo tshia dikalaku diende ditshilualua. Udi umvuija ne: “Kabidi, anu bu muenzekelebi mu matuku a Nowa, ke muikalabi kabidi mu matuku a Muana wa muntu. . . . Bia muomumue, anu bu muenzekelebi mu matuku a Lota: bavua badia, bavua banua, bavua basumba, bavua basumbisha, bavua bakuna, bavua biibaka. Kadi dituku diakapatuka Lota mu Sodome, mvula wa kapia ne sufre wakaloka ufuma mu diulu ne wakababutula buonso. Ke mushindu wikalabi mu dituku didi Muana wa muntu ne bua kusokolodibua.”

Yezu kêna wamba ne: bantu ba mu matuku a Nowa ne a Lota bakabutudibua anu bualu bavua baditue mu malu makumbanyine a kudia, kunua, kusumba, kusumbisha, kukuna ne kuibaka to. Nansha Nowa ne Lota, pamue ne mêku abu bavua benza pabu malu aa. Kadi bakuabu bavua badifila mu midimu eyi ya ku dituku ne ku dituku kabayi bateya ntema nansha mikese ku disua dia Nzambi, ne bua kabingila aka bakabutudibua. Bua kine kabingila aka, bantu nebabutudibue pasokolodibua Kristo dîba dia dikenga dinene diadituta pa ndongoluelu eu wa malu.

Uzangika mudibi bia mushinga bua kuandamuna ne lukasa luonso ku tshijadiki tshia dikalaku diende ditshilualua mu bukole bua Bukalenge, Yezu udi usakidila ne: “Dituku adio, muntu wikala pa mutu pa nzubu, katuluki bua kuya kuangata bintu biende bidi mu nzubu; bia muomumue kabidi, wikala mu budimi, kapinganyi panyima. Nuvuluke bualu bua mukaji wa Lot[a].” (MMM)

Padi tshijadiki tshia dikalaku dia Kristo tshimueneka, bantu kabena ne bua kulekela dilamata ku mabanji abu a ku mubidi dibapumbisha bua kuenza tshidi tshikengedibua diakamue nansha. Pavuabo bapatuka mu Sodome, mbimueneke ne: mukaji wa Lota wakatangila kunyima ne dialakana bua bintu bishiya panyima, ne wakandamuka dikunji dia luepu.

Pa kutungunuka ne kumvuija nsombelu mu tshikondo tshia dikalaku diende ditshilualua, Yezu udi wambila bayidi bende ne: “Mu butuku abu, balume babidi nebikale mu bulalu bumue; umue neangatshibue, kadi mukuabu nealekedibue. Bakaji babidi nebikale bapela ku tshipeledi tshimue; umue neangatshibue, kadi mukuabo nealekedibue.”

Kuangatshibua nkuakanangane ne dibuela dia Nowa ne dîku diende mu buatu ne dipatuibua kudi muanjelu dia Lota ne dîku diende pambelu pa Sodome. Ebi bidi biumvuija kupanduka. Bishilangane, kulekedibua kudi kumvuija kuoko kubutudibua.

Bumvua nanku, bayidi badi bebeja ne: “Mpenyi, Mukalenge?”

Yezu udi wandamuna ne: “Muaba udi mubidi, ke udi mikanku idisangisha payi.” Aba badi “bangatshibue” bua lupandu badi bu mikanku ya lumonu lutue, bualu idi idisangisha muaba udi “mubidi.” Mubidi udi ufunkuna Kristo mulelela tshikondo tshia dikalaku diende dikena dimueka mu bukole bua Bukalenge ne difesto dia mu nyuma didi Yehowa ufila. Luka 17:20-37; Genese 19:26, NW.

▪ Mmu ngumvuilu kayi muvua Bukalenge munkatshi mua Bafarizeyi?

▪ Nku tshinyi kudi dikalaku dia Kristo difuane mupenyi?

▪ Bua tshinyi bantu nebabutudibue bua bienzedi biabo mu tshikondo tshia dikalaku dia Kristo?

▪ Kuangatshibua ne kulekedibua bidi biumvuija tshinyi?