Nshapita wa 104

Dîyi dia Nzambi didi diumvuika musangu muisatu

PATSHIVUAYE ku ntempelo, Yezu wakumvuija muvua mutshima wende usumpakana bua lufu ludiye ne bua kuakama mu katupa kîpi emu. Tshidi tshitamba kumutonda mbuenzeji buikala nabu muanda eu pa lumu lua Tatuende, nunku udi usambila ne: “Tatu, tumbisha dîna diebe.”

Padiye utula mêyi aa, dîyi dikole didi difuma mu diulu, diamba ne: “Nkadi muditumbishe ne nenditumbishe tshiakabidi.” (MMM)

Badi biimane musumba pinapu badi bakemangana. “Muanjelu mmuakule nende,” ke mudi bamue batuadija kuamba. Bakuabu pabu badi bamba mudi dikubakuba ditute. Kadi, bushuwa Yehowa Nzambi ng’uvua muakule! Pabi, ki mmusangu wa kumpala udi dîyi diende diumvuika bua Yezu.

Dia batismo wa Yezu, kukadi bidimu bisatu ne tshitupa, Yone Mubatiji wakumvua Nzambi wamba bua Yezu ne: “Eu ke Muananyi musuibue, undi muanyishe.” Pashishe, lupolo luîpi kunyima kua Pasaka wa musangu mushale, pavua Yezu mukudimuke mpala kumpala kuabu, Yakobo, Yone ne Petelo bakumvua Nzambi ujadika ne: “Eu ke Muananyi musuibue, undi muanyishe, numuteleje.” Ne mpindieu, bua musangu muisatu, dia 10 Nizan, matuku anayi kumpala kua lufu lua Yezu, dîyi dia Nzambi didi diumvuika tshiakabidi kudi bantu. Kadi musangu’eu, Yehowa mmuakule mushindu wa kumumvuabo kudi misumba ya bantu!

Yezu udi umvuija ne: “Dîyi edi ndiumvuike, ki mbuanyi meme, apo buenu nuenu.” Didi difila tshijadiki tshia se: Yezu udi bushuwa Muana wa Nzambi, Masiya mulaya. “Mpindieu kulumbuluishibua kua bulongolodi ebu kudi kuenzeka,” ke mudi Yezu utungunuka, “mpindieu mukokeshi wa bulongolodi ebu neimanshibue pambelu.” Bushuwa, nsombelu wa lulamatu wa Yezu udi ujadika se: Satana Diabolo, mukokeshi wa bulongolodi ebu, mmukumbanyine “kuimanshibua pambelu,” peshi kushipibua.

Pa kufunkuna bipeta bia lufu luende lukadi pabuipi, Yezu udi wamba ne: “Ne meme panyi, bingabandishibua kumukila pa buloba, nenkoke bantu ba mishindu yonso kundi.” Lufu luende kaluena lumvuija ditshimunyibua nansha kakese, bualu ku diambuluisha dialu, neakoke bantu bakuabu kudiye bua bapete muoyo wa kashidi.

Kadi musumba udi utontolola ne: “Mu Mikenji tudi bumvue ne: Kristo udi wikalaku kashidi; apu mmunyi muudi wamba ne: Muana wa muntu udi ne bua kubandishibua? Muana wa muntu eu nnganyi?”

Nansha mudi bijadiki bionso ebi bifidibue, pamue ne kumvuika kua dîyi dia Nzambi yeye muine, bavule kabena bitaba ne: Yezu udi Muana wa muntu mulelela, Masiya mulaya. Kadi, anu muvuaye muenze kukadi ngondo isambombo dîba dia Difesto dia Mitàndà, Yezu udi udiamba tshiakabidi mudiye “butoke” ne udi ukankamija bamuteleji ne: “Panutshidi ne butoke apa, enzayi midimu ya ditabuja mu butoke, bua nuvue bana ba butoke.” Yeye mumane kuamba malu aa, Yezu udi umuka ne usokoma, kabiyi mpata, bualu muoyo wende udi mu njiwu.

Dibula ditabuja mu Yezu dia bena Yuda didi dikumbaja mêyi a Yeshaya adi akula bua ‘mêsu a bantu mafofomija ne mitshima yabo mipapisha bua kabatshinguluki bua kuondopibuabo.’ Yeshaya wakamona mu tshikena-kumona mbanza ya Yehowa ya mu diulu, pamue ne Yezu mu butumbi buende bua diambedi kayi muanji kulua muntu pa buloba, muikale ku luseke lua Yehowa. Pabi, mu dikumbana dia tshivua Yeshaya mufunde, bena Yuda badi babenga ne tshitshiu tshionso bijadiki bidi bishindika ne: Yeye eu ke Mubapikudi wabu mulaya.

Ku lukuabu luseke, bavule badi bushuwa bitabuja Yezu, too ne bamfumu (kabiyi mpata bena mu Sanhedrin, kabadi kakulu ka bena Yuda). Nikodeme ne Yozefe wa ku Arimateya mbabidi ba ku bamfumu aba. Kadi, bua mpindieu bamfumu kabena batonda ditabuja diabu patoke, bua buôwa bua kujimija mianzu yabu ne kuipatshibua mu nsunagoga. Mmunyipu mudibu badipangishisha bivule!

Yezu udi utungunuka pa kuamba ne: “Eu udi ungitabuja udi witabuja, ki ng’anu meme, apo kabidi yeye wakantuma; ne eu udi ummona udi umona kabidi yeye wakantuma. . . . Kadi biumvua muntu mêyi anyi ne kayi walama, meme tshiena mmulumbuluisha; bualu ndi mulue, ki mbua kulumbuluisha bukua-bantu, apo bua kusungila bukua-bantu. . . . Dîyi dindi muambe, ke diamulumbuluisha mu dituku dia ndekelu.”

Dinanga dia Yehowa bua nsangilu wa bukua-bantu diakamusaka ku dituma Yezu bua aba badi bamuitabuja bikale mua kusungidibua. Kusungidibua anyi kubenga kusungidibua kua bantu nkusuikakaja ku ditumikila peshi ku dibenga kutumikila dia malu adi Nzambi mulongeshe Yezu bua kuamba. Dilumbuluisha nedienzeke “mu dituku dia ndekelu,” mu Bukokeshi bua Bidimu Tshinunu bua Kristo.

Yezu udi ukomesha pa kuamba ne: “Tshiena muakule ku bukole buanyi meme nkayanyi, kadi Tatu udi muntume ke udi mumfundile tshindi ne bua kuamba ne kulongesha kabidi. Ndi mumanye ne: diyi diende didi dipeteshangana muoyo wa kashidi. Nenku, miaku indi ngamba, ndi ngamba anu muvua Tatu mungambile.” (MMM) Yone 12:28-50; 19:38, 39; Matayo 3:17; 17:5; Yeshaya 6:1, 8-10, NW.

▪ Mmisangu kayi isatu ivua dîyi dia Nzambi diumvuike bua Yezu?

▪ Mmushindu kayi uvua muprofete Yeshaya mumone butumbi bua Yezu?

▪ Bamfumu badi bitabuja Yezu mbanganyi, kadi bua tshinyi kabena batonda ditabuja diabu kudiye patoke?

▪ “Dituku dia ndekelu” ntshinyi, ne bantu nebalumbuluishibue dîba adi pa kushindamena pa tshinyi?