Nshapita wa 26

Dialukila mu Kapernaume

MPINDIEU lumu lua Yezu ndumuangalake too ne ku miaba ya kule, ne bantu bavule badi baya mu miaba mipengame mudiye utuula. Kadi, panyima pa matuku makese, udi walukila mu Kapernaume pa kupitshila ku Mbuu wa Ngalileya. Lumu lua dipingana diende ludi lumuangalaka diakamue mu tshimenga, ne bantu bavule badi bavua ku nzubu kudiye. Bafarizeyi ne balongeshi ba Mikenji badi bafumina kule, bu mudi ku Yeruzaleme.

Bua bunene bua musumba, kakuena mushindu wa kubuelela ku tshiibi, ne kakutshiena muaba bua muntu mukuabu kubuela. Ebi bidi bifikisha ku bualu bua dikema bushuwa. Muanda udi wenzeka pa dîba edi udi ne mushinga mukole mutambe, bualu udi utuambuluisha bua kujingulula ne: Yezu udi ne bukokeshi bua kumusha tshiledi tshia makenga a bantu ne kupetesha aba badiye usungula makanda a mubidi.

Padi Yezu ulongesha musumba, bantu banayi badi batuala muena tuneke muambula pa kalàlu ku nzubu kudiye. Badi bajinga bua Yezu wondope mulunda wabu, kadi bua musumba wa bantu, kabena mua kubuela munda. Nditekeshibua mu mikolo kayipu! Kadi, kabena balekela to. Badi babanda pa mutu pa nzubu, benza disoso, ne bapuekesha kalàlu ne muena tuneke muladikapu too ne pabuibi ne Yezu.

Yezu udi ufika munda bua dimukosa muaku anyi? Nansha kakese! Kadi, udi ukemeshibua bikole bua ditabuja diabu. Udi wambila muena tuneke ne: “Mpekatu yebe yabuikidibu.” Kadi, Yezu udi bushuwa mua kubuikidilangana mpekatu anyi? Ki ntshidi ngeledi wa meji wa baskribe ne Bafarizeyi nansha. Badi belangana meji mu mitshima yabu ne: “Bua tshinyi muntu eu udi wakula mushindu’eu? Udi usendeka Nzambi. Nnganyi udi mua kubuikidilangana mpekatu kabiyi kumusha anu umuepele, Nzambi?”

Bu mudiye mumanye ngenyi yabu, Yezu udi ubambila ne: “Bua tshinyi nudi nuelangana meji aa mu mitshima yenu? Ntshiepi tshidi tshitambe kupepela, nkuambila muena tuneke ne: ‘Mpekatu yebe yabuikidibu,’ anyi nkuamba ne: ‘Juka, ambula kalàlu kebe ne enda’?”

Pashishe, Yezu udi upesha musumba, pamue ne bamupepeji, mushindu wa kudimuenena muanda wa dikema wabasokoluela ne: udi ne bukokeshi bua kubuikidilangana mpekatu pa buloba, kabidi ne: udi bushuwa muntu mutambe bunene wa katshia ne katshia. Udi ukudimuka kudi muena tuneke ne umutumina dîyi ne: “Juka, ambula kalàlu kebe ne enda kuebe.” Udi wenza diakamue, upatuka ne kalàlu kende ku mesu kuabu buonso! Ne kukatshila, bantu badi batumbisha Nzambi ne batua tshikemu ne: “Katshia katuena banji kumona bia nunku.”

Nudiku batabalele mudi Yezu uleja se: masama mmasuikakane ne mpekatu, kabidi ne: kubuikidila kua mpekatu nkusuikakane ne dipetulula makanda a mubidi anyi? Bible udi umvuija ne: muledi wetu wa kumpala, Adama, wakenza mpekatu ne buonso buetu tudi bapiane bipeta bibi bia mpekatu eu, mbuena kuamba ne: kusama ne lufu. Kadi, mu bukokeshi bua Bukalenge bua Nzambi, Yezu neabuikidile aba buonso badi bananga Nzambi ne badi bamusadila mpekatu yabu, ne pashishe kusama kuonso nekumushibue. Mmushindu kayipu wikalabi bilenga! Mâko 2:1-12; Luka 5:17-26; Matayo 9:1-8; Lomo 5:12, 17-19, NW.

▪ Nnsombelu kayi uvua mufikishe ku muanda wa dikema bushuwa?

▪ Mmunyi mufikile muena tuneke muaba uvua Yezu?

▪ Bua tshinyi buonso tudi bena mpekatu, kadi mmunyi muakatupetesha Yezu ditekemena dia dibuikidibua dia mpekatu yetu ne dipetulula makanda a mubidi mapuangane?