Nshapita wa 54

“Diampa dilelela difume mu diulu”

MAKELELA bivua bushuwa dituku diuwule tente ne malu. Yezu uvua mudiishe binunu bia bantu mu tshishima ne muepuke diteta kutekibua mukalenge kudi bantu. Butuku abu uvua muende pa Mbuu wa Ngalileya muvuandulula kudi tshipepele tshikole; mupandishaye Petelo ukavua udiina pavuaye wenda pa mâyi mavuanduluja kudi tshipepele, ne mubatamije mavuala bua kupandisha bayidi bende ku njiwu ya didiina dia buâtu.

Mpindieu, bantu bavua Yezu mudiishe mu tshishima ku Nord-Est wa Mbuu wa Ngalileya badi bamusangana pabuipi ne Kapernaume ne bamuebeja ne: “Kuneku wafiki dîba kayi?” Yezu udi ubakanyina, wamba mudibo balue kumukeba amu ne ditekemena dia kudiishibua tshiakabidi patupu. Udi ubabela bua kuenza mudimu, ki mbua biakudia bidi binyanguka, apo bua biakudia bidi bishala kashidi bua muoyo wa tshiendelele. Pinapo, bantu badi bamuebeja ne: “Tuenze tshinyi bua kukumbaja midimu ya Nzambi?”

Yezu udi utela anu mudimu umue wa mushinga mukole. “Eu udi mudimu wa Nzambi,” ke mudiye umvuija, “nuenze midimu ya ditabuja mu eu Udiye mutume.”

Kadi, nansha mudiye muenze bishima bivule, bantu kabena benza midimu ya ditabuja mu Yezu to. Bualu budi bukemesha, nansha panyima pa malu wonso a kukema adiye muenze, badi bamuebeja ne: “Udi utuleja tshimanyinu kayi bua tuetu kukuitaba? Tshiudi wenza ntshinyi? Bankambua betu bavua badie mana mu tshipela, [anu mudibi bifunda, NW] ne: Ubapele diampa difume mu diulu bua kudiabo.”

Pa kuandamuna ku dilomba diabu dia tshimanyinu, Yezu udi uleja patoke Mpokolo wa biakudia ebi bia mu tshishima, wamba ne: “Mozese kakanupesha diampa difume mu diulu nansha, kadi Tatuanyi ke udi unupa diampa dilelela difume mu diulu. Bualu diampa dia Nzambi ng’eu udi upueka mufume mu diulu ne upesha bukua-bantu muoyo.” (NW)

“Mukalenge,” ke mudi bantu bamba, “ikala anu utupa dine diampa adio.”

“Meme ndi diampa dia muoyo,” ke mudi Yezu umvuija. “Muntu udi uvua kundi kakufua nzala nansha; udi [wenza midimu ya ditabuja mu meme, NW] kakufua nyota to. Kadi nkadi munuambile ne: nudi nummona, kanuyi nuitaba. Tshionso tshidi Tatu umpa, tshidi tshivua kundi, yonso udi uvua kundi tshiena mvua kumuipata. Bualu tshindi mutulukile mu diulu ki mbua kuenza [disua dianyi, NW] meme, apo mbua kukumbaja disua dia udi muntume. Disua dia udi muntume didi ne: tshijimiji muntu nansha umue wa ku badiye mumpe, apo mmubishe mu dituku dia nshikidilu. Bushuwa, [disua dia Tatuanyi ndiedi, NW]: yonso udi umona Muana [ne wenza midimu ya ditabuja mu yeye, NW] apete muoyo wa kashidi.”

Pa kumvua mêyi aa, bena Yuda badi batuadija kunungana bua Yezu, bualu wambi ne: “Ndi diampa difume mu diulu.” Pa kumuangata anu bu muana wa baledi ba pa buloba ne pa kumuela mpata bu muenzele bena mu Nazarete, badi bamba ne: “Muine ewu ki nYezu muana wa [Yozefe, NW] anyi? Tatuende ne mamuende se tudi babamanye. Kadi mmunyi mudiye mua kuamba mpindiewu ne: Ndi mufume mu diulu?”

Yezu udi ubandamuna ne: “Lekelayi manunganyi munkatshi muenu. Muntu nansha umue kena mua kuvua kundi, pikala Tatu udi muntume kayi mumukoke; meme panyi nemmubishe dituku dia nshikidilu. [Mbafunde mu Baprofete ne: ‘Buonso nebikale balongeshibue kudi Yehowa.’ NW] Muntu yonso udi uteleja dilongesha dia Tatu, udilonga, awu udi uvua kundi. Ki mbua ne: muntu ukadi mumone Tatu to, amu [pakumusha yeye udi mufume kudi Nzambi; muine au, NW] ke udi mumone Tatu. Bulelela, bulelela ndi nnuambila: muntu udi witaba, udi ne muoyo wa kashidi.”

Utungunuka, Yezu udi wambulula ne: “Meme ndi diampa dia muoyo. Bankambua benu badile mana mu tshipela [ne kufuabo, NW]. Edi diampa didi difuma mu diulu, bua badi badidia kabamonu lufu. Meme ndi diampa dia muoyo, difume mu diulu. Ukadi diampa edi, neikale ne muoyo kashidi.” Eyowa, pa kuenza midimu ya ditabuja mu Yezu, eu udi Nzambi mutume, bantu badi mua kupeta muoyo wa kashidi. Mana peshi diampa dikuabu dionso, kadiena mua kupetesha muoyo nansha!

Bidi bimueneka se: dikokangana ku mêyi edi pa diampa difume mu diulu divua dituadije tshitupa tshîpi kunyima padi bantu aba basangana Yezu pabuipi ne Kapernaume. Kadi, didi ditungunuka, ditamba kukola pashishe padi Yezu ulongesha mu nsunagoga kampanda mu Kapernaume. Yowanese 6:25-51, 59, Mukenji Mulenga; Musambu wa 78:24; Yeshaya 54:13; Matayo 13:55-57.

▪ Mmianda kayi idi yenzeka kumpala kua Yezu kukokibua ku mêyi pa diampa difume mu diulu?

▪ Pa kumona bionso bidi Yezu ufuma ku dienza, bua tshinyi ki mbikumbanyine bua kumulombabo tshimanyinu?

▪ Bua tshinyi bena Yuda badi banungana padi Yezu wamba ne: yeye udi diampa dilelela difume mu diulu?

▪ Dikokangana pa diampa difume mu diulu didi dienzekela penyi?