Nshapita wa 30

Diandamuna bamubandi

PADI bamfumu ba malu a Nzambi bena Yuda batobolola Yezu mudiye kayi unemekela Nsabatu, udi wandamuna ne: “Tatuanyi mmutungunuke ne kuenza mudimu too ne mpindieu, meme panyi ndi ntungunuka ne kuenza.”

Nansha Bafarizeyi mua kuamba tshinyi, mudimu wa Yezu ki ntshimue tshia ku bintu bikandika kudi mukenji wa Nsabatu to. Nzambi ng’udi mumupeshe bukenji bua kulongesha ne kuondopa, ne pa kulonda tshilejilu tshia Nzambi, udi utungunuka ne kuwenza dituku dionso. Kadi, diandamuna diende didi disaka bena Yuda ku tshiji tshikole kupita tshia diambedi, ne badi bakeba mua kumushipa. Bua tshinyi?

Bualu mpindieu, kabena anu bitaba mudi Yezu usambuka mukenji wa Nsabatu, kadi badi bamba kabidi mudiye usendeka Nzambi pa kuamba ne: udi Muana wa Nzambi. Kayi nansha umvua buôwa, Yezu udi ubapesha diandamuna dialabale pa bidi bitangila malanda a pa buawu adi pankatshi pende ne Nzambi. “Tatu mmunange Muana,” ke mudiye wamba, “udi umuleja bionso bidiye wenza.” (MMM)

“Anu bu mudi Tatu ubiisha bafue,” ke mudi Yezu utungunuka, “ke mudi Muana pende upingaja ku muoyo aba badiye musue kuenzela nunku.” Bushuwa, Muana ukadi ubiisha aba badi bafue mu nyuma! “Eu udi uteleja muaku wanyi ne witaba eu wakantuma,” ke mudi Yezu wamba, “mmumbuke ku lufu ne muvue ku muoyo.” Eyo, udi utungunuka ne: “Dîba didi dilua, ne mpindieu mene, diumvua bafue dîyi dia Muana wa Nzambi ne aba bavua bateye mtema nebikale ne muoyo.”

Tshidibi, kakuena muyuki udi uleja ne: Yezu ukadi mubiishe muntu ku lufu mu ngumvuilu wa pa muaku, kadi udi umvuija bamubandi ne: dibiishibua diena-dîna dia mushindu’eu nedienzeke. “Kanukemi bua bualu ebu,” ke mudiye wamba, “bualu dîba didi dilua diumvua buonso badi mu nkita ya tshivulukilu dîyi diende ne nebapatukemu.”

Bidi bimueneka se: katshia too ne dîba edi, Yezu kavua muanji kumvuija patoke mudimu wende munene mu dilongolola dia Nzambi to. Kadi, bamubandi kabena anu ne bumanyishi buende yeye muine pa malu aa. “Nuakatuma bantu kudi Yone,” ke mudi Yezu ubavuluija, “ne wakafila bumanyishi budi butangila bulelela.”

Kukadi bidimu bibidi, Yone Mubatiji wakambila bamfumu aba ba malu a Nzambi bena Yuda bua Eu uvua ulua panyima pende. Pa kubavuluija muvuabo bangata Yone udi mpindieu mu lukanu ne mushinga mukole kumpala, Yezu udi wamba ne: “Bua lupolo luîpi, nuakasua bua kusanka bikole mu butoke buende.” Yezu udi ubavuluija bualu ebu ne ditekemena dia kubambuluisha, eyo, dia kubapandisha. Kadi, kêna ukengela anu bumanyishi bua Yone to.

“Midimu mine indi ngenza [pamue ne tshishima tshidiye ufuma ku dienza] idi ifila bumanyishi budi buntangila ne: Tatu mmuntume.” Kadi, pa kumusha miaku eyi, Yezu udi utungunuka ne: “Tatu udi muntume yeye muine ufidile bumanyishi budi buntangila.” Nzambi wakafila bumanyishi budi butangila Yezu, tshilejilu dîba dia batismo wende, wakamba ne: “Eu udi Muananyi, munangibue wa pa muoyo.”

Bushuwa, babandi ba Yezu kabena ne kabingila bua kumupidiabo. Mifundu mine idibo bamba mudibo bayikonkonona idi ifila bujadiki budi bumutangila! “Bu nuenu nuitaba Mozese, nuvua kungitaba panyi,” ke mudi Yezu ukomesha, “bualu muine au ufundile pa bidi bintangila. Kadi binuikala kanuyi nuitaba mifundu ya muine au, mmunyi munuitaba miaku yanyi?” Yone 5:17-47; 1:19-27; Matayo 3:17, NW.

▪ Bua tshinyi mudimu wa Yezu ki nkusambuka Nsabatu?

▪ Mmunyi mudi Yezu umvuija mudimu wende munene mu dilongolola dia Nzambi?

▪ Bua kujadika mudiye Muana wa Nzambi, Yezu udi uvuluija bumanyishi bua banganyi?