Nshapita wa 71

Dibenga kuitaba ku bukole dia Bafarizeyi

BALEDI ba mulombi wa ka pa luse uvua mufofo badi bakuatshika buôwa padibo babikidibua kumpala kua Bafarizeyi. Mbamanye dipangadika divua diangatshibue ne: muntu yonso watonda ditabuja patoke mu Yezu neipatshibue mu nsunagoga. Bidi mua kuikala lutatu lukole, nangananga bua dîku dipele, bua kubenga kudisangisha ne bena ditunga bakuabu. Ke bualu kayi baledi mbadimuke.

“Eu mmuanenu unudi nuamba muvuaye mulela mufofo anyi?” ke mudi Bafarizeyi bebeja. “Kadi, mmunyi mudiye umona mpindieu?”

“Tudi bamanye se: eu mmuanetu uvua mulela mufofo,” ke mudi baledi bajadika. “Kadi, bua mukadiye umona mpindieu katuena bamanye, peshi nganyi wamutabeji mêsu, katuena bamanye.” Bushuwa, muanabo uvua ne bua kuikala mubalondele bionso bivua bienzeke, kadi baledi badi baleja budimu pa kuamba ne: “Muebejayi. Ukadi muntu mukole. Udi ne bua kudiakuila.”

Nunku, Bafarizeyi badi babikila muntu eu tshiakabidi. Musangu eu badi bateta kumukankisha pa kumumanyisha mukadibo basangishe bijadiki bidi bipiishisha Yezu. “Ambika Nzambi butumbi,” ke mudibu bamutshintshimika. “Tudi bamanye ne: muntu eu mmuena mpekatu.”

Kayi uvila kutumpila kuabo, muntu uvua mufofo kale udi umvuija ne: “Ni mmuena mpekatu, tshiena mumanye.” Kadi udi usakidila ne: “Bualu bumue bundi mumanye budi se: mvua mufofo, mpindieu ndi mmona.”

Pa kuteta mua kuangula kalema kampanda mu bujadiki buende, Bafarizeyi badi bamukonka tshiakabidi ne: “Ntshinyi tshivuaye mukuenzele? Mmunyi muvuaye mukutabeje mêsu?”

“Nkadi munuambile,” ke mudi muntu udiabakena, “kadi kanuvua bateleje. Bua tshinyi nudi basue kubumvua tshiakabidi?” Ne dîyi dia nsenda, udi webeja ne: “Nudi penu basue kulua bayidi bende anyi?”

Diandamuna edi didi difikisha Bafarizeyi munda. “Wewe udi muyidi wa muntu au,” ke mudibu bamubanda, “kadi tuetu, tudi bayidi ba Mozese. Tudi bamanye se: Nzambi wakakula ne Mozese; kadi bua muntu eu, katuena bamanye kudiye mufume.”

Pa kuleja kukema kuende, mupele mulombi wa ka pa luse udi ubakudimuna ne: “Tshidi tshikemesha bushuwa ntshia se: kanuena bamanye kudiye ufumina, pende muntabeje mêsu.” Nnkomenu kayi udi mua kufidibua ku miaku eyi? Mulombi wa ka pa luse udi uvuluija dîyi-diludiki dianyishibue: “Tudi bamanye ne: Nzambi katu uteleja bena mpekatu, kadi pikala muntu kampanda uleja ditshina Nzambi ne wenza disua diende, yeye udi uteleja muine eu. Katshia ne katshia katuena banji kumvua se: muntu kampanda mmutabeje mêsu a mufofo wa ku tshileledi.” Nunku, nkomenu mmudimuenekele se: “Bu muntu eu kayi mufume kudi Nzambi, kavua mua kuenza bualu nansha bumue.”

Bafarizeyi kabena bamona tshia kupindulula ku nkomenu eu mujalame ne kayi kutontolola. Bu mudibu kabayi mua kuepuka bulelela bua nkomenu eu, badi bapenda muntu ne: “Ka-wewe kalela kajima mu mpekatu, ukadi pebe katulongesha?” Nunku badi bamukupa pambelu, bimueneka se: mbamukandike bua kubuela mu nsunagoga.

Padi Yezu umvua tshidibo benze, udi uya kutangila muntu eu ne wamba ne: “Udi witabuja Muana wa muntu anyi?”

Mulombi wa kale wa ka pa luse uvua mufofo udi umukudimuna pa kuebeja ne: “Nnganyi au, mukalenge, bua mmuitabuje?”

“Yeye udi wakula nebe, ke yeye muine,” ke mudi Yezu umukudimuna.

Diakamue muntu udi winama kumpala kua Yezu ne wamba ne: “Mukalenge, ndi mmuitabuja!”

Pashishe Yezu udi umvuija ne: “Ndi mulue mu bukua-bantu bua dilumbuluisha edi: bua aba badi kabayi bamona bamone ne aba badi bamona bavue bafofo.”

Bu mudi Bafarizeyi bumvue mêyi aa, badi bebeja ne: “Tuetu petu, tudi bafofo anyi?” Bu buobo mua kuitaba ne: mbafofo mu lungenyi, bavua mua kupeta pa kubingila bua buluishi buabu kudi Yezu. Anu mudi Yezu ubambila ne: “Bu nuenu bafofo, kanuvua kuikala ne mpekatu.” Pabi, badi’anu bafiatutuka ne muoyo umue mudibo kabayi bafofo ne kabayi bakengela butoke bua mu nyuma. Nenku, Yezu udi ujadika ne: “Bu munudi nuamba ne: ‘Tudi tumona.’ Mpekatu wenu udi ushalaku.” Yone 9:19-41, NW.

▪ Bua tshinyi baledi ba mulombi wa ka pa luse uvua mufofo badi batshina padibo babikidibua kumpala kua Bafarizeyi, ne pa nanku, mmunyi mudibo bandamuna ne budimu?

▪ Mmunyi mudi Bafarizeyi bateta kukankisha mufofo wa kale?

▪ Ndiumvuija kayi dijalame difila kudi muntu eu didi difikisha Bafarizeyi munda?

▪ Bua tshinyi Bafarizeyi kabena ne pa kubingila bua buluishi buabu kudi Yezu?