Nshapita wa 102

Dibuela dia ditshimuna dia Kristo mu Yeruzaleme

DINDA diakalonda mu Dia lumingu dia 9 Nizan, Yezu udi umuka mu Betaniya ne bayidi bende ne uya mutangile ku Yeruzaleme pa kupitshila ku Mukuna wa Olive. Mu katupa kîpi, badi basemena pabuipi ne Betefajé, musoko udi pa Mukuna wa Olive. Yezu udi utumina babidi ba ku bayidi bende dîyi ne:

“Ndayi mu musoko udi kumpala kuenu; nenusangane nyama wa mpunda musuika ne muanende, nuyisulule, nulue nayo kundi. Bianukonka muntu bualu, numuambile ne: ‘Mfumu udi uyikengela.’ [Yeye neayitume diakamue, NW].”

Nansha mudi bayidi bapanga kujingulula ku ntuadijilu se: ngenyi-miludiki eyi idi mu diumvuangana ne dikumbana dia mulayi wa mu Bible, badi bajingulula muanda eu ku shoo. Muprofete Zekaya uvua mumanyishe ne: Mukalenge mulaya kudi Nzambi neabuele mu Yeruzaleme mubande pa mpunda, eyowa, ‘pa nyima pa muana wa nyama wa mpunda mene.’ Bia muomumue, mukalenge Solomo uvua mubande pa muana wa mpunda pakayaye kuedibua manyi.

Padi bayidi babuela mu Betefajé ne bangata muana wa mpunda ne mamuende, bamue ba ku aba badi biimane pabuipi badi bamba ne: “Ntshinyi atshi tshinudi nuenza?” (NW) Kadi padibo babambila ne: nyama idi bua Mukalenge, bantu aba badi balekela bayidi bayituadila Yezu. Bayidi badi batenteka bilamba biabu pa nyima pa mamu wa mpunda ne pa muanende, kadi Yezu udi ubanda pa muana wa mpunda.

Bu mudi Yezu wenda usemena pabuipi ne Yeruzaleme, musumba wa bantu udi wenda udiunda. Bantu bavule badi badija bilamba biabu mu njila, eku bakuabu bakosa matamba a mitshi ne baadija. “Eu udi ulua bu Mukalenge mu dîna dia Yehowa mmubeneshibue!” ke mudibo bela mbila. “Ditalala mu diulu, ne butumbi mu miaba mitambe kutumbuka!” (NW)

Mu musumba, bamue Bafarizeyi badi basuyibua mitshima kudi mêyi aa a disekelela ne badi badiabakena kudi Yezu ne: “Mulongeshi, tandisha balongi bebe.” Kadi, Yezu udi upindulula ne: “Ndi nnuambila ne: bobo bapuwe, mabue neele mbila.”

Padi Yezu usemena pabuipi ne Yeruzaleme, udi ubandila tshimenga ne utuadija kudila bua bualu buatshi, wamba ne: ‘Bu wewe mujingulule mu dituku edi malu adi akupesha ditalala! Kadi mbakusokokau ku mêsu kuebe!’ Yeruzaleme udi ne bua kufuta mushinga wa bupidia buende bua ku budisuile, anu mudi Yezu ubimanyisha mpindieu:

“Baluishi bebe [bena Roma balombola kudi munene wa basalayi Titus] nebiibake lumbu lukunyunguluke ne bipanda bisongoloke ne nebakujingile, bakusinsakaje nseke yonso, nebakuupuile panshi wewe ne bana bebe munda, ne kabakushiya dibue ditenteka pa dikuabu.” (NW) Dibutudibua edi dia Yeruzaleme dimanyisha kudi Yezu ndienzeke bushuwa kunyima kua bidimu 37, mu tshidimu tshia 70 B.B.

Nkupite anu mbingu mikese, bavule mu musumba eu bavua bamone Yezu ubiisha Lazare. Mpindieu, bine aba badi bayukidila bakuabu pa tshishima atshi. Nunku, padi Yezu ubuela mu Yeruzaleme, tshimenga tshijima tshidi tshisalala. “Eu nnganyi?” ke mudi bantu bajinga kumanya. Misumba idi itungunuka ne kuamba ne: “Eu mmuprofete Yezu, wa mu Nazarete wa Ngalileya!” Pa kumona bidi bienzeka ebi, Bafarizeyi badi badiabakena mudibo kabayi bafika ku dienza bualu nansha bumue, anu mudibo buobo nkayabu bamba ne: “Bantu buonso bamulondi mu nyima.” (NW)

Bu musombele tshilele tshiende padiye ukumbula Yeruzaleme, Yezu udi uya ku ntempelo bua kulongesha. Kuin’eku, bafofo ne balema badi balua kudiye, ne udi ubondopa! Bakuidi bamfumu ne baskribe badi bafika munda padibo bamona malu a kukema adi Yezu wenza ne padibo bumvua mbila idi bansongalume bela mu ntempelo ne: “Muana wa Davidi, tudi tukusengelela, upandishe!” Ne badi batontolola ne: “Udi umvua mudibo bamba anyi?” (NW)

“Eyo!” ke mudi Yezu wandamuna. “Kanuena banji kubala diyi edi dia se: ‘Wewe wakapatuisha mukana mua bana bakese ne badi bamua mabele, meyi a [dikusamuna, NW] nawu?” (Muanda mulenga lelu)

Yezu udi utungunuka ne kulongesha, ne udi wendesha mêsu pa bionso bidi mu ntempelo. Mu katupa kîpi dîba didi diya. Nunku udi umuka, pamue ne bapostolo 12, wenda kabidi muine njila wa kilometre isatu peshi kupita apa mutangile ku Betaniya. Kuineku ke kudiye upitshisha butuku bua mu dia lumingu, pamu’apa kua mulunda wende Lazare. Matewuse 21:1-11, 14-17, MMM; Mâko 11:1-11; Luka 19:29-44; Yone 12:12-19; Zekâya 9:9.

▪ Ndîba kayi ne mmushindu kayi udi Yezu ubuela mu Yeruzaleme bu Mukalenge?

▪ Bua tshinyi bidi bia mushinga bua misumba kusamunayo Yezu?

▪ Padiye ubandila Yeruzaleme, mmunyi mudi Yezu udiumvua, ne mmulayi kayi udiye umanyisha?

▪ Ntshinyi tshidi tshienzeka padi Yezu uya ku ntempelo?