Nshapita wa 114

Didia dia dilolo dia Tshivulukilu

YEZU mumane kuowesha bapostolo bende makasa, udi utela mvese wa Musambu wa 41:9, wamba ne: “Wakadi udia bidia bianyi wakuntua museba.” Pashishe, pa kulubakana mu lungenyi, udi umvuija ne: “Umue wa kunudi neamfile kudi baluishi.”

Bapostolo badi batuadija kubungama bikole ne bambila Yezu ku muntu ku muntu ne: “Ki mmeme to, ki mmuomu’anyi?” Nansha Yudase Iskaryote udi pende wela lukonko bu bakuabu. Yone, udi mudiadije ku mesa pabuipi ne Yezu, udi usendama tshianyima pa tshiadi tshia Yezu ne webeja ne: “Mukalenge, nnganyi awu?”

“Nng’umue wa ku dikumi ne babidi, utudi tutua nende tshianza mu dilonga dimue,” ke mudi Yezu wandamuna. “Bushuwa, Muana wa muntu udi uya, anu mudibi bifunda pa bidi bimutangila, kadi diakabi kudi muntu au udi Muana wa muntu ufidibua ku butuangaji buende! Bivua kuikala bilenga bua muntu au bu yeye kayi muledibue.” Panyima pa muanda eu, Satana udi ubuela tshiakabidi munda mua Yudase, ubabidila kumunzuluila kuende kua mutshima, muine ukavua mubi. Ku shoo dine dilolo adi, Yezu udi ubikila Yudase ku dîna dimuakanyine dia “muana wa kabutu.”

Yezu udi mpindieu wambila Yudase ne: “Tshiwudi wenza utshienze ne lukasa luonso.” Nansha umue wa ku bapostolo bakuabu kêna ujingulula tshidi Yezu usua kuamba. Bamue badi bela meji ne: bu mudi Yudase ulama tshibutshilu, Yezu udi umuambila ne: “Sumba bitudi tukengela bua tshibilu,” peshi udi ne bua kuya kupesha bapele tshintu kampanda.

Yudase mumane kumbuka, Yezu udi ubanjija difesto dipiadipia mu kabujima kaadi, anyi tshivulukilu, pamue ne bapostolo bende ba lulamatu. Udi wangata mulungu wa diampa, wamba disambila dia disakidila, uditshibula ne ubapeshadi, wamba ne: “Angatayi, nudie.” Udi umvuija ne: “Etshi tshidi tshileja mubidi wanyi udi ne bua kufidibua bua bualu buenu. Tungunukayi ne kuenza nunku bua kumvuluka.”

Muntu yonso mumane kudia diampa, Yezu udi wangata lupanza lua mvinyo, anu mudibi bimueneka, lupanza luinayi ludibu batumika nalu mu difesto dia Pasaka. Udi kabidi wamba disambila dia diela tuasakidila, ubapeshalu, ubalomba bua kunua, ne wamba ne: “Lupanza elu ludi luleja tshiovo tshipiatshipia tshijadika ku mashi anyi, adi ne bua kupongolodibua bua bualu buenu.”

Nunku, etshi tshidi bushuwa tshivulukilu tshia lufu lua Yezu. Tshidimu tshionso mu dia 14 Nizan, anu mudi Yezu wamba, tshidi ne bua kuenzuludibua bua kumuvuluka. Netshivuluije batshienji muanda muenza kudi Yezu ne Tatuende wa mu diulu bua kupetesha bukua-bantu mushindu wa kusungidibua ku tshibawu tshia lufu. Bua bena Yuda baalua balondi ba Kristo, difesto edi nedipingane pa muaba wa Pasaka.

Tshiovo tshipiatshipia, tshijadika ne mashi mapongolola a Yezu, ntshipingane pa muaba wa tshiovo tshia kale tshia Mikenji. Yezu Kristo udi mutuangaji wa tshiovo etshi tshidia pankatshi pa bitupa bibidi​—ku lumue luseke, Yehowa Nzambi, ne ku lukuabu, bena nkristo 144 000 balela ku spiritu. Pa kumbusha dibuikidila dia mpekatu, tshiovo etshi tshidi tshiunzulula njila bua kuenjibua kua ditunga dia mu diulu dia bakalenge-bakuidi. Matayo 26:21-29; Mâko 14:18-25; Luka 22:19-23; Yone 13:18-30; 17:12; 1 Kolinto 5:7, NW.

▪ Mmulayi kayi wa mu Bible udi Yezu utela pa bidi bitangila muena diende kampanda, ne ndiumvuija kayi dia mulayi eu didiye ufila?

▪ Bua tshinyi bapostolo badi babungama bikole, ne ntshinyi tshidi yonso wa kudibu webeja?

▪ Ntshinyi tshidi Yezu wambila Yudase bua kuenza, kadi ngumvuilu wa mêyi aa kudi bakuabu bapostolo udi tshinyi?

▪ Padi Yudase umbuka, ndifesto kayi didi Yezu ubanjija, ne mbua kipatshila kayi?

▪ Mbanganyi badi bitupa bidi bidie tshiovo tshipiatshipia, ne ku tshiovo etshi mmalu kayi adi akumbajibua?