Nshapita wa 83

Didia dia disanka kua Mufarizeyi

YEZU utshidi mu nzubu wa Mufarizeyi munene ne udi ufuma ku diondopa muena disama dia munana. Pa kumona mudi babikidibue nende basungula miaba ya kumpala, udi ufila dilongesha kampanda pa didipuekesha.

“Padi muntu ukubikila ku didia dia dibaka, kuyi kusomba muaba wa kumpala, bualu kudi mua kuikala munga mubikila nebe mukupite yeye ku buneme, uvua munubikile nende kavu kukuamba ne: ‘Umushile muaba!’ Diba adio neuvue kujuka ne bundu, uye kusomba mu muaba wa ndekelu.”

Pa nanku, Yezu udi ufila mubelu eu: “Kadi wewe mubikila, uye amu kusomba mu muaba wa ndekelu; bua nanku, pavua mukubikidi webe, amone mua kukuamba ne: ‘Mulunda, bandila kumpala.’ Pinapo newikale ne lumu ku meso a badi basombe nebe bonso.” Bua kukomesha, Yezu udi wamba ne: “Bualu yonso udi udibandisha neapuekeshibue ne eu udi udipuekesha neabandishibue.” (NW)

Pashishe, Yezu udi ukudimuka kudi Mufarizeyi udi mumubikile ne umumvuija mushindu wa kulongolola didia didi ne mushinga wa bushuwa ku mêsu kua Nzambi. ‘Paudi ulongolola didia né ndikese né ndinene, lekela kubikila anu balunda bebe, nansha bana benu, nansha balela bebe, nansha bena mutumba babanji, bua kabavu kukubikila pabo, bakupingajila biudi mubenzele. Paudi ulongolola didia, bikila bapele, balema, batebuki ne bampofo; ke diakalenga diebe, bualu kabena ne tshia kukupingajila.’

Kulongoluela bapele didia dia mushindu’eu nekupeteshe mulambi diakalenga bualu, anu mudi Yezu umvuija mumubikidi, “Nebakupingajilebio [dia dibiishibua dia bakane, NW].” Diumvuija difila kudi Yezu pa didia edi dikumbanyine ka-lumbandi didi divuluija umue wa ku babikidibue nende didia dia mushindu mukuabu. “Muena disanka ng’eu udi udia diampa mu bukalenge bua Nzambi,” (NW) ke mudi mubikidibue eu wamba. Pabi, anu mudi Yezu utungunuka ne kumvuija mu mufuanu, buonso kabena bangata ditekemena edi dia disanka ne mushinga udi mudikumbanyine.

“Muntu kampanda uvua [mulongolole didia dinene dia dilolo, NW], e kubikilaye bantu ba bungi. . . . kutumaye musadidi wende bua kumanyisha babikila ne: ‘Vuayi, bualu bionso biamanyi kuakana.’ Kadi bonso bu bapunge diyi, e kuasabo anu dilaya. Wa kumpala kumuamba ne: ‘Ndi musumbe budimi, ntshiyaya kubumona; ndi nkulomba se: undekele.’ Mukuabo ne: ‘Ndi musumbe ngombe ya mudimu dikumi, ndi nya bua kuyiteta; ndi nkulomba ne: undekele.’ Mukuabu e kuamba ne: ‘[Ntshidi nselelaku mukaji, NW], nanku awu tshiena mua kuvua to.’”

Ndilomba dilekela kayipu dia tshianana! Pa tshibidilu, batu bakenketa nyama anyi budimi kumpala kua disumba, nunku, ki mbia lukasa bushuwa bua kuya kubitangila pakadibi bimana kusumba. Bia muomumue, disela kadiena mua kukanda musedi bua kuitaba ku dibikila dia mushinga mukole bu edi nansha. Nunku, padiye umvua mudi buonso balombe dilekela, mfumu udi ufika munda ne utumina mupika wende dîyi ne:

“‘Ndaku lukasa mu [misesu minene ne tujila tua tshimenga, NW], uvue ne bapele, balema, bampofo ne batebedi.’ [Pashishe, NW], musadidi e kuamba ne: ‘Mukalenge, mbakumbaji muuvua muambe, kadi muaba utshidi mushale.’ Ke mukalenge kuambila musadidi wende ne: ‘Ndaku mu njila ne mu mpangu, ubambidike bantu bua kubuela, bua nzubu wanyi uule tente. . . . nansha umue wa ku bavua babikila abo, kakulabula didia dianyi [dia dilolo, NW].’”

Nnsombelu kayi udi mufuanu eu umvuija? Ee, “mfumu” udi ulongolola didia udi uleja Yehowa Nzambi; “mupika” udi usambuluja dibikila nYezu Kristo; ne “didia dinene dia dilolo,” mmuabi muteka kumpala bua kulua muena mu Bukalenge bua mu muulu.

Aba bakenzelabo diambedi dibikila dia kulua bena Bukalenge bavua bamfumu ba bitendelelu bena Yuda ba mu matuku a Yezu. Kadi, bakabenga kuitaba ku dibikila edi. Nunku, kubangila nangananga dia Pentekoste wa 33 B.B., dibikila dibidi diakatangijibua kudi bapepejibue ne bapuekele ba mu ditunga dia Yuda. Kadi, aba bakitaba ku dibikila kabavua bungi bukumbane bua kuwuja miaba 144 000 milongolola mu Bukalenge bua mu diulu bua Nzambi nansha. Pa nanku, mu 36 B.B., panyima pa bidimu bisatu ne tshitupa, dibikila disatu ne dia ndekelu diakafidibua kudi badi kabayi bena Yuda bakena batengula, ne disangisha dia bine aba nditungunuke too ne mu matuku etu aa. Lukas 14:1-24, Mukenji Mulenga.

▪ Ndilongesha kayi pa didipuekesha didi Yezu ufila?

▪ Mmunyi mudi mubikidi mua kulongolola didia didi ne mushinga ku mêsu kua Nzambi, ne bua tshinyi nedimutuadile disanka?

▪ Bua tshinyi dilomba dilekela dia babikidibue didi dia tshianana?

▪ Ntshinyi tshidi Yezu umvuija ku mufuanu wa “didia dinene dia dilolo”?