Nshapita wa 76

Didia ne Mufarizeyi

YEZU mumane kuandamuna bamutobolodi bavua bamukonka pa mpokolo wa bukole buvuaye muondope nabu muntu uvua kayi mua kuakula, Mufarizeyi kampanda udi umubikila kuende bua kudia. Kumpala kua kudia, Bafarizeyi badi buowa mâyi ku bianza, bilondeshile tshilele tshia kabukulu, too ne ku lukengibua. Badi benza nunku kumpala ne kunyima kua didia, nansha bua kupita ku tshiakudia tshikuabu tshishilangane. Nansha mudi tshilele etshi katshiyi tshishipa mikenji mifunda ya Nzambi, tshidi tshisambuka malu malomba kudi Nzambi pa didikezula mu mianda ya ntendelelu.

Bu mudi Yezu upanga kutumikila tshilele etshi, mumubikidi udi ukema. Nansha mudiye kayi mujikule ne dîyi, Yezu udi ujingulula kukema kuende ne udi wamba ne: “Nuenu Bafarizeyi ke muenu munudi! Nudi nusukula pambidi pa dikopo ne dilonga, kadi munda muenu muule ne buivi ne bubi. Nuenu batshimbakane! Udi muenze pambidi ki ngudi muenze kabidi ne munda anyi?”

Nunku, Yezu udi utandula budingidiji bua Bafarizeyi badi buowa bianza bilondeshile bilele bia kabukulu, kadi bapanga kukezula mitshima yabo ku bubi. Udi ubabela ne: “Filayi bu mapa a luse bintu bidi munda, ne monayi! bintu bienu bikuabu bionso bidi bikezudibua.” (NW) Badi ne bua kufila mapa basakibue kudi dinanga difume mu mutshima, apo ki nkudi dijinga dia kukemesha bakuabu ku buakane buabu budingidiji.

“Kadi nuenu Bafarizeyi, nudi ba diakabi,” ke mudi Yezu utungunuka, “bualu nudi nufila tshia dikumi tshia luenyi, tshia tshidibi-a-luenyi ne tshia bisekiseki bionso, nulengulula buakane ne dinanga bia [Nzambi, NW]. Ke malu anuvua ne bua kuenza, kanuyi nushiya makuabo awu.” Mikenji ya Nzambi mipesha Izalele ivua ilomba difuta bia-dikumi peshi tshitupa tshimue pa dikumi, bia bintu binowa mu madimi. Luenyi ne tshidibi-a-luenyi mbikunyibua bikese peshi bisekiseki bidibo batumika nabi bua kuvuija biakudia bisheme ne dipembu. Bafarizeyi badi bafuta ne muoyo umue tshia-dikumi tshia bisekiseki ebi bipite bukese, kadi Yezu udi ubapiisha bua dipanga kukumbaja malu malomba a mushinga mukole, kuleja dinanga, buimpe ne budipope.

Pa kubapiisha kabidi, Yezu udi wamba ne: “Nuenu Bafarizeyi, diakabi dienu! Nudi banange kusomba mu nkuasa ya kumpala mu nzubu ya disambila, kabidi banange bua kunuelabo mioyo mu [miaba ya bisalu, NW]. Diakabi dienu, bualu nudi bu nkita [ya tshivulukilu idibo kabayi bamona, NW], bantu bendelapu kabayi bamanye!” Dipanga bukezuke diabo kadiena dimueneka ku mêsu a bantu. Ntendelelu wa Bafarizeyi ng’wa ku mêsu patupu, kêna ne miji kumukila munda muabu! Mmuashila pa budingidiji.

Padiye umvua kupiishibua eku, mushikuluji kampanda wa Mikenji, umue wa ku bamanyi bapiluke ba Mikenji ya Nzambi, udi udiabakena ne: “Mulongeshi, paudi wakula nanku, udi utupenda ne tuetu kabidi.”

Yezu udi wela kabidi bamanyi bapiluke ba Mikenji aba muonji mu nshingu, wamba ne: “[Diakabi dienu kabidi, nuenu bamanyi bapiluke ba Mikenji, NW], bualu nudi nuambuisha bantu majitu mapite bukole, nuenu bine kanuyi nutua nansha munu ku majitu awu! Diakabi dienu, [bualu nudi nuibaka nkita ya tshivulukilu ya baprofete, pabi bankambua benu ke bakabashipa, NW]!”

Majitu adi Yezu utela apa mbilele bia kabukulu bisambuluja ku mêyi a mukana, kadi bidi bamanyi ba Mikenji aba kabayi basua kutekesha nansha kakese bua kupepejila bantu bujitu. Yezu udi usokolola ne: bamanyi ba Mikenji bavua banyishe mene dishipibua dia baprofete, ne udi ubadimuija se: “‘Mashi a baprofete buonso akapumunabo katshia ku ntuadijilu wa bukua-bantu nealombibue kudi bena tshipungu etshi, kumukila ku mashi a Abele too ne ku mashi a Zekariya, wakashipabo pankatshi pa tshilambuilu ne nzubu.’ Eyowa, ndi nnuambila ne: nealombibue kudi bena tshipungu etshi.” (NW)

Bukua-bantu bakumbanyine kupikudibua buakatuadija ne dilela bana kudi Adama ne Eva; nunku Abele uvua ne muoyo ku “diasa dia tshishimikidi tshia bukua-bantu.” Panyima pa dishipibua dia tshikisu dia Zekariya, makole a biluilu a bena Syrie akabutula Yuda. Kadi, Yezu udi umanyisha se: bua bubi buabo bupitshidile, bena tshipungu tshiende nebapawudibue bibi menemene. Dine dipawula nedienzeke panyima pa bidimu bitue ku 38, mu 70 B.B.

Pa kutungunuka ne kubapiisha, Yezu udi wamba ne: “[Diakabi dienu bamanyi bapiluke ba Mikenji, NW], bualu nudi bumushe nsapi wa kunzulula nende tshiibi tshia dimanya. Nuenu bine kanuena nubuela, nudi nukandika badi basue kubuela.” Bamanyi bapiluke ba Mikenji badi ne bujitu bua kumvuija bantu Dîyi dia Nzambi ne kubunzuluila ngumvuilu wadi. Kadi, kabena anu bapanga kuenza nunku, apo, badi kabidi bapangisha bantu mushindu wa kumvua.

Bafarizeyi ne bamanyi bapiluke ba Mikenji badi bafikila Yezu munda bua dibela patoke. Padiye umuka ku nzubu, badi batuadija kumusinsakaja bikole ne bamukudika nkonko mivule. Badi bakeba pa kuangula mu mêyi ende tshilema tshidi mua kubapesha njila wa kumukuatshisha. Lukase 11:37-54, MMM; Dutelonome 14:22; Mika 6:8; 2 Kulondolola 24:20-25.

▪ Bua tshinyi Yezu udi upiisha Bafarizeyi ne bamanyi bapiluke ba Mikenji?

▪ Mmajitu kayi adi bashikuluji ba Mikenji buomekela bantu?

▪ “Diasa dia tshishimikidi tshia bukua-bantu” diakabanga dîba kayi?