Nshapita wa 87

Didibutshila bua matuku atshilualua ku meji matue

YEZU udi ufuma ku dilonda muanu wa muana wa bitulatula kumpala kua musumba mudi bayidi bende, balambuishi ba bitadi bapange bululame ne bakuabu benji ba mpekatu ba dilambu, pamue ne baskribe ne Bafarizeyi. Mpindieu, udi ukudimuka kudi bayidi bende, ne ubalondela mufuanu udi wakula bua mubanji kampanda udi upeta luapolo lubi pa mutangidi wa bia mu nzubu wende, peshi mulami.

Bilondeshile Yezu, mubanji udi ubikila mulami wa bintu biende ne umumanyisha mukadiye pa kumuipata ku mudimu. “Padi mfumuanyi ungumbusha ku bulami bua bintu apa, tshimbenza ntshinyi?” ke mudi mulami welangana meji. “Tshiena ne makanda a kudima nawo; kulomba tshia pa luse kudi kunkuata bundu. Ndi mumanye tshia meme kuenza, bua pangumbushabo ku bulami, ngapeta bantu badi mua kungakidila ku nzubu yabo.”

Ntshinyi tshidi mulami eu upangadija bua kuenza? Udi ubikila bena mabanza a mfumuende. ‘Diebe dibanza ne mfumuanyi ndia bintu bungi munyi?’ ke mudiye webeja.

Wa kumpala udi wandamuna ne: ‘Ndia mbungulu ya manyi 100.’

‘Angata mukanda webe, somba lukasa, ufunde 50.’

Udi webeja mukuabu ne: ‘Apu wewe, udi ne dibanza dia bungi munyi?’

Eu udi wamba ne: ‘Ndia ntete ya bukula bibombi 100.’

‘Angata mukanda webe, funda 80.’

Mulami udi ne bukokeshi bua kukepesha mabanza a bidibo ne bua kufuta mfumuende, bualu utshidi mutangidi wa mianda ya mabanji a mfumuende. Pa kukepesha mabanza, udi udivuija mulunda wa bikala mua kumuleja pabo buimpe pajimijaye mudimu wende.

Padi mfumuende umvua muanda udi muenzeke, udi ukema. Pa kuamba, ‘udi wela mulami ka-lumbandi, bualu, nansha mudiye muntu ukena muakane, uvua muenze malu ne meji matue.’ Yezu udi usakidila ne: “Bana ba ndongoluelu eu wa malu badi ne meji mu ngenzelu yabu ya malu kudi bena tshipungu tshiabu kutamba bana ba butoke.” (NW)

Nunku, ufila dilongesha bua bayidi bende, Yezu udi ubakankamija ne: “Dienzelayi balunda ku diambuluisha dia mabanji akena makane, bua dîba diapangikawu, buobo banuakidile mu bisombedi bia kashidi.” (NW)

Yezu kêna wela mulami ka-lumbandi bua ngenzelu wende ukena muakane, apo bua dileja mbabi, meji matue. Misangu mivule, “bana ba ndongoluelu eu wa malu” badi batumika ne mfranga peshi mianzu yabu ne budimu bua kudia malunda ne bantu bikala pabo mua kubaleja buimpe pashishe. Nunku, basadidi ba Nzambi, “bana ba butoke,” badi pabo ne bua kutumika ne bintu biabu bia ku mubidi, “mabanji abu akena makane,” ne meji mu mushindu wa kudipetesha masanka.

Kadi, anu mudi Yezu wamba, badi ne bua kudia malunda ku diambuluisha dia mabanji aa ne aba bikala mua kubakidila mu “bisombedi bia kashidi.” Bua bena mu “kasumbu kakese,” bisombedi ebi bidi mu diulu; bua “mikoko mikuabu,” mmu Mparadizu pa buloba. Yehowa Nzambi ne Muanende ke badi mua kuakidila bantu mu bisombedi ebi, nanku tudi ne bua kudifila ne muoyo umue bua kudia nabu bulunda pa kutumika ne “mabanji akena makane” a mishindu yonso atudi nawu bua kulubuluja bipatshila bia Bukalenge. Nunku, papangika anyi pabutuka mabanji a bintu bia ku mubidi, muanda wenzeka bushuwa, nsombelu wetu wa kashidi mu matuku atshilualua neikale mushindikibue.

Yezu udi utungunuka pa kuamba ne: bantu badi badileje bena lulamatu too ne mu bintu ebi bia ku mubidi, bintu bitambe bukese, nebadileje kabidi bena lulamatu mu mianda ya mushinga mukole. “Nunku,” ke mudiye utungunuka, “binuikala kanuyi badileje bena lulamatu mu mabanji akena makane, nnganyi wanuambika tshidi tshilelela [mmumue ne: bipatshila bia mu nyuma, peshi bia Bukalenge]? Ne binuikala kanuyi badileje bena lulamatu mu bintu bia bende [bipatshila bia Bukalenge bidi Nzambi muambike basadidi bende], nnganyi wanupesha tshidi bu tshienu [difutu dia muoyo mu bisombedi bia kashidi]?” (NW)

Katuena mua kuikala nansha kakese basadidi balelela ba Nzambi ne kuikala kabidi bapika ba mabanji akena makane, mabanji a bintu bia ku mubidi, anu mudi Yezu ukomesha ne: “Musadidi nansha umue kêna mua kuikala mupika wa bamfumu babidi; bualu, neakine umue ne anange mukuabu, anyi nealamate umue ne apetule mukuabu. Kanuena mua kuikala bapika ba Nzambi ne ba mabanji popamue.” (NW) Lukase 15:1, 2; 16:1-13, MMM; Yone 10:16.

▪ Mmunyi mudi mulami wa mu mufuanu wa Yezu udienzela balunda badi mua kumuambuluisha pashishe?

▪ “Mabanji akena makane” ntshinyi, ne ku diambuluisha diawu, mmunyi mutudi mua kudienzela balunda?

▪ Mbanganyi badi mua kutuakidila mu “bisombedi bia kashidi,” ne bine bisombedi ebi mbinganyi?