Nshapita wa 8

Didiopoka muena tshinyangu

YOZEFE udi ubiisha Mariya bua kumumanyisha lumu lua tshimpitshimpi. Muanjelu wa Yehowa udi ufuma ku dimumuenekela, umuambila ne: “Juka, angata muana mutekete ne mamuende ne nyemena mu Ejipitu, ushaleku too ne pangakupesha dîyi; bualu Herodese udi pa kukeba muana bua kumushipa.”

Kabiyi kujingakana, badi badiopoka buonso basatu. Ke dîba menemene bualu mbamanyishe Herodese ne: bena lubuku lua mitoto mbamudinge ne bakadi bapatuke ditunga. Vuluka, bavua bumvuangane bua kuluabu kumumanyisha pavuabu ne bua kumona Yezu. Herodese mmukuate tshiji tshikole. Nunku, ne ditekemena dia kushipa Yezu, udi utuma dîyi bua kushipabu bana ba balume buonso ba bidimu bibidi ne muinshi, mu Beteleme ne mu misoko ya ku mpenge. Udi ushindika tshipungu etshi bilondeshile mamanyisha avuaye mupete kumpala kudi bena lubuku lua mitoto bavua bafume ku Est.

Kushipa mabumbu eku kua bana ba balume kudi kukuatshisha buôwa bukole! Basalayi ba Herodese badi babuela ku bukole ku nzubu ne ku nzubu. Padibu basangana muana wa balume, badi bamunyenga mu maboko a mamuende. Katuena bamanye bungi bua bana bakashipabu, kadi miadi ne miyenga bia bamamu’abu bidi bikumbaja mulayi wa mu Bible, mumanyisha kudi Yelemiya, muprofete wa Nzambi.

Pinapo, Yozefe ne Mariya mbafike bilenga ku Ejipitu, ne ke kudibo basombele mpindieu. Kadi, bufuku kampanda, muanjelu wa Yehowa udi umuenekela Yozefe tshiakabidi mu tshilota. “Juka, angata muana mutekete ne mamuende,” ke mudi muanjelu wamba, “upingane mu ditunga dia Izalele, bualu bakebi ba anyima wa muana mutekete bamanyi kufua.” Nunku, bua kukumbaja mukuabu mulayi wa mu Bible udi wamba ne: Muana wa Nzambi neabikidibue biangatshile ku Ejipitu, dîku edi didi dipingana mu ditunga diabo.

Bidi bimueneka se: Yozefe udi ne lungenyi lua kuya kuasa mu Yudeya, kuvuabo basombele mu tshimenga tshia Beteleme bangabanga ne kunyemena mu Ejipitu. Kadi, badi bamumanyisha se: Arkelause, muana mubi wa Herodese, ke udi mpindieu mukalenge wa Yudeya, ne mu tshilota tshikuabu, Yehowa udi umudimuija bua njiwu eyi. Nunku, Yozefe ne dîku diende badi balunguluka lua ku nord ne basombela mu tshimenga tshia Nazarete, mu Ngalileya. Kuineku, kule ne muaba udi buonso bapuila bua kudifila mu ntendelelu wa bena Yuda, ke kudi Yezu ukolela. Matayo 2:13-23, NW; Yelemiya 31:15; Hoshea 11:1, NW.

▪ Mbualu kayi bukuate buowa budi mukalenge Herodese wenza bu mudi bena lubuku lua mitoto kabayi bapinganyine kudiye, kadi mmunyi mudi Yezu ukubibua?

▪ Mu difumina ku Ejipitu, bua tshinyi Yozefe ki mmuye kusombela tshiakabidi mu Beteleme?

▪ Mmilayi kayi ya mu Bible idi mikumbane mu tshine tshikondo etshi?