Nshapita wa 28

Diebejibua pa dibuela mu tshijila

KUDI mpindieu bu tshidimu tshijima katshia Yezu wabuela mu Pasaka wa 30 B.B. Yone Mubatiji udi mu lukanu kukadi ngondo mivule. Nansha muvuaye ujinga bua bayidi bende balue balondi ba Kristo, buonso ki mbenze nunku to.

Mpindieu, bayidi aba ba Yone muena lukanu badi balua kudi Yezu ne bamuebeja ne: “Bua tshinyi tuetu ne Bafarizeyi tudi tubuela mu tshijila, kadi bayidi bebe kabayi babuela mu tshijila?” (NW) Bafarizeyi badi babuela mu tshijila misangu ibidi ku lumingu, bualu ntshilele tshia ntendelelu wabu. Pamu’apa bayidi ba Yone badi balonda tshine tshilele etshi. Pamu’apa badi kabidi babuela mu tshijila bua kuleja dijabala diabu bua diedibua dia Yone mu lukanu ne badi badiebeja bua tshinyi bayidi ba Yezu kabena badisangisha kudibo bua kubungama nabo.

Pa kuandamuna Yezu udi umvuija ne: “Balunda ba musedi badi ne kabingila ka kujabala padi musedi mutshikale nabo anyi? Kadi, matuku nealue umushibua musedi munkatshi muabu, apo nebashishe kubuela mu tshijila.” (NW)

Bayidi ba Yone badi ne bua kuvuluka muvua Yone yeye muine muakule bua Yezu bu musedi. Nunku bu mutshidi Yezu kuoku, Yone kêna mua kumona bu bikumbanyine bua kubuela mu tshijila to, nansha bayidi ba Yezu pabu. Anu pashishe, padi Yezu ufua, apo bayidi bende badi bajabala ne babuela mu tshijila. Kadi, padiye ubiishibua ku lufu ne ubanda mu diulu, kabena kabidi ne kabingila ka kubuela mu tshijila bua kujabala nansha.

Pashishe Yezu udi ufila mifuanu eyi: “Bantu kabatu ba[p]anda tshi[p]esa tshia tshivualu tshi[p]ia-tshi[p]ia bualu bua kutshitelulula pa tshivualu tshikulukulu; bienzabo nunku, neba[p]ande tshivualu tshi[p]ia-tshi[p]ia, ne tshi[p]esa tshiatshi kabidi katshiena tshiakanangane ne tshikulukulu. Bantu kabatu bela maluvu ma[p]ia-ma[p]ia mu milondo ya biseba bikulukulu; bienzabo nunku, maluvu nea[p]ande biseba, neaye [p]anshi, ne biseba nebifue. Kadi bidi bimpe bia kuelabo maluvu ma[p]ia-ma[p]ia mu milondo ya biseba bi[p]ia-bi[p]ia.” Ndiumvuangana kayi didi pankatshi pa mifuanu eyi ne dibuela mu tshijila?

Yezu uvua wambuluisha bayidi ba Yone Mubatiji bua kujingululabu ne: muntu nansha umue kêna ne bua kutekemena bua bayidi bende kulondabu bilele bia kale bia ntendelelu wa bena Yuda, bu mudi dibuela mu tshijila ku musangu ku musangu to. Kavua mulue bua kukuatakaja ne kutungunuja bilele bitutuke bia kale bia ntendelelu wa bena Yuda bikavua pa kuimanshibua nansha. Buena-nkristo kabuakuakanangana ne ntendelelu wa bena Yuda wa tshikondo atshi ne bilele biende bia bantu nansha. Tòo, kabuakuikala bu tshitetela tshipiatshipia tshitelela pa tshilamba tshikulukulu peshi bu maluvu mapiamapia mela mu mulondo wa kale wa tshiseba. Matayo 9:14-17; Mâko 2:18-22; Luka 5:33-39; Yone 3:27-29.

▪ Mbanganyi badi babuela mu tshijila, ne mbua kipatshila kayi?

▪ Bua tshinyi bayidi ba Yezu kabena babuela mu tshijila patshidiye nabu, ne pashishe mmunyi muajimina mu katupa kîpi kabingila ka dibuela mu tshijila?

▪ Mmifuanu kayi idi Yezu ufila, ne idi yumvuija tshinyi?