Nshapita wa 29

Dienza midimu milenga dia Nsabatu

TUDI mu muvu wa disampila wa mu 31 B.B. Ngondo mikese yapitshi katshia Yezu wayukila ne mukaji muena Samariya ku tshiina tshia mâyi mu Samariya mu diumuka diende ku Yudeya bua kuya ku Ngalileya.

Mpindieu, mumane kulongesha bivule mu Ngalileya, Yezu udi umuka tshiakabidi bua kuya mu Yudeya, mudiye ulongesha mu nsunagoga. Pa kufuanyikija ne muyuki mufila pa mudimu wende mu Ngalileya, Bible udi wakula kakese pa mudimu wa Yezu mu Yudeya mu dikumbula edi ne mu ngondo idiye upitshishamu panyima pa Pasaka wa musangu mushale. Mbimueneke ne: mu Yudeya mudimu wende kawuvua mulubuluke bilenga bu muvuabi mu Ngalileya to.

Mu katupa kîpi, Yezu udi mu njila mutangile ku Yeruzaleme, tshimenga tshinene tshia Yudeya, bua Pasaka wa mu 31 B.B. Kuineku, pabuipi ne tshiibi tshia tshimenga, Tshiibi tshia Mikoko, kudi dijiba didi dibikidibua Betezata, kudibu baya kudi babedi bavule, bafofo ne balema. Badi bitaba ne: bantu badi mua kuondopibua pa kubuela mu mâyi a dijiba padiwu avuanduluka.

Ndia Nsabatu, ne Yezu udi umona ku dijiba muntu mulume usama kukadi bidimu 38. Pa kumanya se: disama dia muntu eu ndia musangu mule, Yezu udi umuebeja ne: “Udi musue kuonda[p]ibua, anyi?”

Udi wandamuna Yezu ne: “Mukelenge, [p]avuandululabo mai, tshiena ne muntu wa kumbue[j]a mu mpokolo; [p]antshidi nya, munga udi umpita ku mpala.”

Yezu udi umuambila ne: “Bika, ambula bulalu buebe, endaku.” Ku mêyi aa, diakamue muntu udi upetulula makanda a mubidi, wangata kalalu kende, ne utuadija kuenda!

Kadi, padi bena Yuda bamona muntu eu, badi bamba ne: “Lelu ndituku dia Lumingu, kutuala bulalu buebe kudi kushipa muken[j]i.”

Muntu udi ubandamuna ne: “Wakungonda[p]a wakungambila ne, Ambula bulalu buebe, endaku.”

“Nganyi wakukuambila ne, Ambula bulalu buebe, endaku?” Ke mudibo bamuebeja. Bua musumba, Yezu uvua mupengame ku luseke, ne eu uvua muondopibue kavua mumanye dîna dia Yezu. Pashishe, Yezu ne muntu eu badi bapetangana mu ntempelo, ne muntu udi umanya eu uvua mumuondope.

Nenku, muondopibue eu udi uya kudi bena Yuda bua kubambila ne: Yezu ke uvua mumupeteshe makanda a mubidi. Padibu bamanya nunku, bena Yuda badi baya kudi Yezu. Mbua kipatshila kayi? Bua kumanya kudi kufuma bukole budiye wenza nabu malu aa a kukema anyi? Tòo. Kadi, mbua kumutobolola mudiye wenza malu aa malenga dia Nsabatu. Kabidi, badi mene batuadija kumukengesha! Luka 4:44; Yone 5:1-16.

▪ Nkupite lupolo bu bule kayi katshia Yezu wenza dikumbula dia ndekelu mu Yudeya?

▪ Bua tshinyi bantu badi batamba kuya ku dijiba didi dibikidibua Betezata?

▪ Ntshishima kayi tshidi Yezu wenza ku dijiba, ne ngandamuinu wa bena Yuda udi tshinyi?