Nshapita wa 119

Difikishibua kua Ana, pashishe kua Kayifase

YEZU, musuika bu muena tshibawu mumanyike, udi ulombodibua kua Ana, muakuidi munene wa kale útshidí ne buenzeji bukole. Ana uvua muakuidi mfumu tshikondo tshivua Yezu, pende mutshikale ne bidimu 12, mufikishe balongeshi ba mifundu ya ba Rabbi ku dikatshila mu ntempelo. Bavule ba ku bana ba Ana bakasadila pashishe bu bakuidi banene, ne mpindieu, muku wende wa balume Kayifase ke udi ne muanzu eu.

Yezu udi ulombodibua diambedi kua Ana pamu’apa bualu muakuidi mfumu eu udi ne buenzeji bupitshidile mu mianda ya ntendelelu ya bena Yuda kukadi musangu mule. Dituula edi kua Ana didi diambuluisha Muakuidi Munene Kayifase bua kusangisha Sanhedrin, kabadi kakulu ka bena Yuda kenza ne bantu 71, kusangisha kabidi bajadiki ba dishima.

Muakuidi mfumu Ana udi webeja Yezu mpindieu pa bidi bitangila bayidi bende ne kulongesha kuende. Kadi, bu diandamuna Yezu udi wamba ne: “Ndi muambile bantu malu aa patoke. Matuku onso mvua ndongesha mu [nsunagoga, NW] mudi bena Yuda bonso basangila. Tshiena muambe bualu mu musokoko. Udi ungebeja meme bua tshinyi? Ebeja bavua bumvue bindi mubalongeshe. [Tangila! aba mbamanye bimvua muambe, NW].”

Bua mêyi aa, umue wa ku tupita údí muimane pabuipi ne Yezu udi umutapa dipi mu mpala, wamba ne: “Muudi wandamuna muakuidi mfumu nanku mmunyi?”

“Pangikala muakule bibi,” ke mudi Yezu wandamuna, “uleje mudibio bibi; kadi pangikala muakule bimpe, tshiudi untutshila ntshinyi?” Panyima pa dipindululangana edi, Ana udi utuma Yezu musuika kudi Kayifase.

Mu mutantshi eu, bakuidi bamfumu, ne bakulu ba ditunga ne baskribe, ee, Sanhedrin mujima, badi batuadija kusangila. Muaba wabu wa disangila, anu mudibi bimueneka, nkua Kayifase. Kusangila bua kukosa tshilumbu bu nunku butuku bua Pasaka nkubengangane bushuwa ne mikenji ya bena Yuda. Kadi, ebi kabiena bipumbisha bamfumu ba bitendelelu bua kukumbajabu tshipatshila tshiabu tshibi.

Mbingu mivule kumpala, pakabiishibua Lazare kudi Yezu, bena mu Sanhedrin bakavua basuike dîyi munkatshi muabu ne: udi ne bua kufua. Ne kudi matuku mpindieu abidi patupu, mu Disatu, bakokeshi bena malu a Nzambi bakavua bele tshifufu bua kukuata Yezu ku budimu bukole ne kumushipa. Anjibi kutshinka, bakavua bamufundile tshibawu kumpala kua dilumbuluishibua diende!

Madikolela adi enjibua mpindieu bua kupeta bajadiki bikala ne bua kufila bujadiki bua dishima bua kupiisha nabu Yezu. Kadi, kabena bapeta bajadiki bena dîyi dimue bua kufilabu buabu bujadiki. Ndekelu wa bionso, babidi badi bapatuka ne bajadika ne: “Tuvua bamumvue wamba ne: Nengupule [ntempelo, NW] ewu muasa ku bianza bia bantu, pashishe mu matuku asatu, ngasulule mukuabo udi kayi muasa ku tshianza tshia muntu.”

“Kuena wandamuna anyi?” ke mudi Kayifase ukonka. “Budibo bakufundila kudi bantu aba budi munyi?” Kadi Yezu udi ushala mupuwe. Nansha mudi matumpi aa afidibua, mêyi a bajadiki aba babidi kaena apetangana, ne bundu budi bukuata Sanhedrin. Nunku, Kayifase udi uteta ne muanda mukuabu.

Kayifase mmumanye mutu bena Yuda basalala padi muntu kampanda udiamba mudiye Muana wa Nzambi. Misangu ibidi kumpala, bakadi bambe Yezu mudiye musendeki wa Nzambi mukumbanyine lufu, bualu bakatshinka ne kutupakana se: uvua udiamba mudiye muakanangane ne Nzambi. Kayifase udi utshintshimika Yezu ne budimu ne: “Mu dîna dia Nzambi udi ne muoyo ndi nkutekela mutshipu bua utuambile biwikala Kristo Muana wa Nzambi!” (NW)

Nansha bena Yuda bikale ne ngelelu kayi wa meji, Yezu udi bushuwa Muana wa Nzambi. Kushala mupuwe kudi mua kuangatshibua bu divila dia bu-Kristo buende. Nunku, Yezu udi wandamuna ne dikima ne: “Mmeme; ne nenumone Muana wa muntu musombe ku tshianza tshia balume tshia bukole ne ulua ne matutu a mu diulu.” (NW)

Padiye utula mêyi, ne kunekesha Kayifase udi upanda bilamba biende ne utayika ne: “Mmusendeke [Nzambi, NW], tshituakebela kabidi bamonyi ntshinyi? Nudi badiumvuile mudiye usendeka [Nzambi, NW]. Nudi nuamba penu munyi?”

“Tshiende ndufu,” ke mudi Sanhedrin upunguluja. Pashishe badi batuadija kumuseka, ne bamba malu mavule bua kumusendeka. Badi bamutapa mapi ne bamutuila mata mu mpala. Bakuabu badi bamubuikila mpala mujima, bamututa ne mankomo ne bamuamba mêyi a mineku ne: “Kristo we, jandula tumone udi mukutute nnganyi?” Tshinyangu etshi tshibekesha ne tshibengangane ne mikenji tshidi tshienzeka munkatshi mua dilumbuluisha butuku. Matewuse 26:57-68; 26:3, 4; Markuse 14:53-65; Lukase 22:54, 63-65; Yowanese 18:13-24; 11:45-53; 10:31-39; 5:16-18, MMM.

▪ Nkuepi kudi Yezu ulombodibua diambedi, ne ntshinyi tshidi tshimuenzekela kuine aku?

▪ Nkuepi kudi Yezu ufikishibua pashishe, ne mbua kipatshila kayi?

▪ Mmunyi mudi Kayifase ufikisha Sanhedrin ku dipunguluja mudi Yezu mukumbanyine lufu?

▪ Ntshinyangu kayi tshibekesha ne tshibengangane ne mikenji tshidi tshienzeka munkatshi mua dilumbuluisha?