Nshapita wa 94

Dikengedibua dia kusambila ne dia kudipuekesha

MUSANGU mushale pavuaye mu Yudeya, Yezu wakafila mufuanu kampanda pa mushinga wa kunanukila mu masambila. Mpindieu, mu luendu luende lua ndekelu ku Yeruzaleme, udi uzangika tshiakabidi dikengedibua dia kusambila kabiyi kulekela. Pamu’apa Yezu utshidi mu Samariya anyi mu Ngalileya padiye ulondela bayidi bende mufuanu mukuabu eu:

“Mu tshimenga kampanda muvua ndumbulula uvua kayi utshina [Nzambi, NW], kayi unemeka muntu. Mu tshimenga amu muvua kabidi mukaji mukamba, [uvu’anu utungunuka ne kuya, NW] kumumona umuambila ne: ‘[Ungakuile mu, NW] tshilumbu tshianyi ne muluishi wanyi.’ Ndumbulula kubengaye matuku a bungi. Pashishe, kudiambilaye munda munda ne: ‘Bushuwa, tshiena ntshina [Nzambi, NW], tshiena nnemeka muntu, kadi bu mudi mukaji mukamba ewu [utungunuka ne kunsuya, ndi mmuakuila, NW], bua kikadi uvua kumpungija misangu ne misangu.’”

Pashishe, Yezu udi ufila dilongesha dia muyuki wende, wamba ne: “Umvuayi tshidi ndumbulula ewu [pende, NW] muntu mubi wamba. Kadi [Nzambi, NW] kakukosa nsambu ya basungula bende badi bamubila munya ne butuku, nansha mudiye [ubaleja muoyo-mule, NW] anyi?”

Yezu kêna usua kumvuija ne: Yehowa Nzambi udi mu mushindu kampanda bu nzuji au ukena muakane nansha. Kadi, bikala too ne nzuji ukena muakane ufika ku diandamuna ku milombo ya munanunanu, kabiyi mpata, Nzambi udi muakane ne muimpe popamue, neandamune bikala bantu bende kabayi balekela kusambila. Nunku, Yezu udi utungunuka ne: “Ndi nnuambila ne: [Nzambi] neabakosele nsambu yabu pa lukasa.”

Misangu mivule, bapele ne bapuekele kabatu bapeta kulumbuluisha kuakane, kadi babanji ne banene ke batu pa tshibidilu bena diese. Nzambi yeye kakutabalela anu bua bantu babi bapete dinyoka dikumbanyine, apo neashindike kabidi bua kuleja basadidi bende buakane pa kubapesha muoyo wa kashidi. Kadi, mbantu bungi munyi badi bitabuja ne muoyo umue ne: Nzambi neabapeteshe kulumbuluisha kuakane kakuyi njingakanyi?

Ushindamena nangananga pa ditabuja disuikakaja ku bukole bua disambila, Yezu udi ukonka ne: “Padi Muana wa muntu ufika, neasangane bushuwa ditabuja pa buloba anyi?” (NW) Nansha mudi lukonko elu kaluyi luandamunyibue, ludi lusua kumvuija ne: ditabuja dia mushindu’eu kadiakuikala kudi bavule padi Kristo ufika mu bukole bua Bukalenge.

Ku aba badi bateleja Yezu, kudi bamue badi badikokola pa tshiadi bua ditabuja diabu. Mbatuishibue munda muabu ne: mbakane, ne badi bapepeja bakuabu. Bamue ba ku bayidi ba Yezu badi mua kuikala pabo munkatshi mua bantu bu nunku. Nanku, udi ulamika bantu ba mushindu’eu mufuanu udi ulonda eu:

“Bantu babidi bavua baye mu [ntempelo, NW] bua kusambila; umue uvua Mufarizeyi, mukuabo mulambuishi wa bitadi. Mufarizeyi kuimana kulu, kuasaye disambila munda muende ne: ‘[O Nzambi, NW] wanyi, ndi nkuanyisha, bualu tshiena bu bantu bakuabo bonso: bivi, babi, bena buendenda; tshiena nansha bu mulambuishi wa bitadi ewu to. Ndi njila biakudia misangu ibidi ku lumingu, [mfila, NW] tshia dikumi tshia bindi mpeta.’”

Bafarizeyi mbamanyike bua diadija patoke dia buakane buabu bua kukemesha bantu. Pa tshibidilu batu banemekela bijila bidibo badifundile nkayabu mu Dimue ne mu Dinayi dionso, ne badi bafuta tshia-dikumi tshia bisekiseki bikese bia pa madimi. Nkupite anu ngondo mikese, kapeja kabo kudi bantu bapuekele kavua kalejibue patoke mu Difesto dia Mitàndà pakambabo ne: “Musumba eu udi kawu mumanye Mikenji [bilondeshile mudi Bafarizeyi nkayabo bayumvuija] mmuedibue mulawu.” (NW)

Utungunuka ne mufuanu wende, Yezu udi wakula bua umue wa ku ‘bedibue mulawu’ aba: “Mulambuishi pende uvua muimanyine pa bule, kayi nansha ukimina mua kutangila mulu, uvua udituta pa tshiadi wamba ne: ‘[O Nzambi, NW] wanyi, umfuile luse, ndi muenji wa bibi.’” Bu mudi mulambuishi wa bitadi muitabe mapanga ende ne budipuekeshi, Yezu udi wamba ne: “Ndi nnuambila ne: wa ndekelu ewu uvua muye kuende muikale [mudileje muakane, NW], kadi mukuabo awu to. Bualu muntu yonso wadibandisha nebamupuekeshe, kadi wadipuekesha nebamubandishe.”

Nunku, Yezu udi uzangika tshiakabidi dikengedibua dia kuikala ne budipuekeshi. Bu mudibo bakolele mu nsangilu wa bantu mudi Bafarizeyi badikokodi mudibo bakane bikale ne buenzeji bukole ne bazangika mianzu ne milongo mu bantu, kabiena bikemesha padi buenzeji bubi bua tshikadilu etshi bulenga nansha bayidi bine ba Yezu. Bushuwa, mmalongesha kayipu bulenga adi Yezu mufile pa budipuekeshi! Lukase 18:1-14, MMM; Yone 7:49.

▪ Bua tshinyi nzuji eu ukena muakane udi ukumbaja dilomba dia mukaji mukamba, ne ndilongesha kayi didi difidibue mu mufuanu wa Yezu?

▪ Nditabuja dia mushindu kayi diakeba Yezu padiye ufika?

▪ Mbanganyi badi Yezu ulamika mufuanu wende wa Mufarizeyi ne mulambuishi wa bitadi?

▪ Nngikadilu kayi wa Bafarizeyi utudi ne bua kuepuka?