Nshapita wa 33

Dikumbaja mulayi wa Yeshaya

PADI Yezu umanya mudi Bafarizeyi ne tshisumbu tshia balondi ba Herodese bele tshifufu bua kumushipa, yeye ne bayidi bende badi bumuka baya ku Mbuu wa Ngalileya. Kuineku, misumba minene mifumine mu Palestine mujima too ne kusambuka mikalu yende idi ipuila kudiye. Udi wondopa bavule, bisaka mene aba buonso badi ne masama makole ku didifinya too ne kudiye bua kumulenga.

Bua bunene bua misumba idi mipuile, Yezu udi wambila bayidi bende bua kumulaminabu buatu pabuipi. Pa kusemena katantshi ne muelelu, udi mua kuepuka dimufinakaja. Udi mua kubalongeshila mu buatu peshi kubanda anyi kupueka bua kuambuluisha bantu badi ku muelelu.

Muyidi Matayo udi ujadika ne: mudimu wa Yezu udi ukumbaja “tshivua tshiambibue ku butuangaji bua muprofete Yeshaya.” Pashishe, Matayo udi utela mulayi udi Yezu ukumbaja:

“Monayi! Musadidi wanyi undi musungule, munangibue wanyi wa pa muoyo, udi anyima wanyi muanyishe! Nenteke spiritu wanyi pambidi pende, neatuadile matunga butoke pa tshidi kulumbuluisha kuakane. Kakujula diyoyo, peshi kakuela lubila, peshi muntu nansha umue kakumvua dîyi diende mu misesu minene. Kakusunsula tshituta tshivinga, ne kakujima mukaba wa muendu wa lina udi ufuiima, too ne padiye ulubuluja buakane. Bushuwa, matunga neatekemene mu dîna diende.”

Bushuwa, Yezu ke musadidi munangibue wa pa muoyo udi Nzambi muanyishe. Yezu udi ufila butoke pa tshidi buakane bulelela, budi bufikishibue kudi bilele bia bitendelelu bia dishima. Bua ditumika dikonyangale ne mikenji ya Nzambi, Bafarizeyi kabena nansha mua kuambuluisha mubedi dia Nsabatu! Pa kufila butoke pa buakane bua Nzambi, Yezu udi upetesha bantu disulakana ku bujitu bua bilele bikena biakane, ne bua kabingila aka, bamfumu ba malu a Nzambi badi bateta mua kumushipa.

Mêyi aa: ‘kakujula diyoyo, peshi kakuela lubila, peshi muntu nansha umue kakumvua dîyi diende mu misesu minene,’ adi umvuija tshinyi? Padiye wondopa bantu, Yezu udi ‘ubakandika ne disu dikole bua kumumanyishabu ku bantu.’ Kêna wanyisha bua bamujudile diyoyo dia dimusuyisha mu misesu anyi bendeshe manunganyi makodiakane pa bidi bimutangila.

Kabidi, Yezu udi utuala mukenji wende mukankamiji kudi bantu badi, mu ngakuilu wa mu tshimfuanyi, bafuane tshituta tshivinga, tshibunya ne tshidiatakaja mu makasa. Badi bu mukaba wa muendu wa lina udi utshiima, muena kantoletole ka ndekelu ka muoyo kakâdi pa kujima. Yezu kêna usunsula tshituta tshivinga peshi ujima mukaba wa muendu udi ubuitshidila, udi ufuiima. Kadi, ne diengeleka ne dinanga, udi ubandisha ne nzanzu yonso bakokedi-badipuekeshi. Bushuwa, Yezu ng’eu udi matunga mua kutekela ditekemena! Matayo 12:15-21; Mâko 3:7-12; Yeshaya 42:1-4, NW.

▪ Mmunyi mudi Yezu ufila butoke pa kulumbuluisha kuakane, eku kayi ujula diyoyo anyi wela lubila mu misesu minene?

▪ Mbanganyi badi bu tshituta tshivinga ne bu mukaba wa muendu wa lina ne mmalu kayi adi Yezu ubenzela?