Nshapita wa 103

Dikumbula ntempelo tshiakabidi

YEZU ne bayidi bende badi bafuma ku dipitshisha butuku buisatu mu Betaniya katshia bafumina ku Yeriko. Mpindieu, bunkenke bua dindadinda mu Dimue, dia 10 Nizan, budi bubasangana bakadi mu njila batangile ku Yeruzaleme. Yezu udi umvua nzala. Nunku, padiye umona mutshi wa mfigi ne mabeji, udi uya kudiwu bua kumona né udi ne bimue bimuma bia mfigi.

Mabeji a mutshi eu mmâse kumpala kua dîba, bualu muvu wa bimuma bia mfigi kawutu utuadija kumpala kua Kabalashipu, ne mpindieu, bidi’anu ku ndekelu kua Luabanya. Nansha nanku, anu mudibi bimueneka, Yezu udi utshinka ne: bu mudi mabeji mâse kumpala kua dîba, mfigi idi payi mua kuikalaku kumpala kua tshikondo. Kadi, kêna uyisangana. Mabeji mmapeteshe mutshi eu mmuenekelu wa dishima. Pa nanku, Yezu udi wela mutshi mulawu, wamba ne: ‘Muntu nansha umue kadi tshimuma tshiebe!’ (MMM) Bipeta bia tshienzedi tshia Yezu ne diumvuija diatshi nebimanyike makelela mu dinda.

Batungunuka ne luendu, Yezu ne bayidi bende badi bafika mu Yeruzaleme mu lupolo luîpi. Udi uya ku ntempelo, uvuaye mukontolole mayipi mu mapingaja. Kadi, lelu udi wenza bualu kampanda, anu muvuaye muenze kukadi bidimu bisatu pavuileye mu difesto dia Pasaka mu 30 B.B. Yezu udi wipata aba badi basumba ne basumbisha mu ntempelo ne utonkola mesa a bashintuishi ba mfranga pamue ne bibasa bia bapanyi ba nkudimba. Kêna ulekela muntu wambula tshia-bungenda bua kupatuka natshi mu ntempelo.

Pa kupiisha bashintuishi ba mfranga ne bapanyi ba nyama mu ntempelo, udi wamba ne: “Ki mbafunde ne: ‘Nzubu wanyi neabikidibue nzubu wa disambila bua matunga wonso’ anyi? Kadi nuenu nuamuvuiji lubinga lua bivi.” Mbivi bualu badi balomba mishinga mipite bukole kudi bashikile bakena ne kukuabu kua kuya ne benzejibue bua kusumba amu kudibu nyama idi ikengedibua bua milambu. Nunku Yezu udi wangata bienzedi ebi bia bungenda bu mushindu kampanda wa dinyenga anyi diiba.

Padi bakuidi bamfumu, baskribe ne banene ba ditunga bumvua lumu lua tshidi Yezu muenze, badi bakeba tshiakabidi mushindu wa kumushipesha. Ku ngenzelu eu, mbafile tshijadiki se: kabena mua kululamijibua. Kadi, ki mbamanye mushindu wa kujimija Yezu, bualu bantu buonso mbakudika ku mishiku yende pa kumuteleja.

Pa kumusha bena Yuda ba ku tshileledi, Bampangano mbavue pabo bua Pasaka. Ke ba-prozelite, mbuena kuamba ne: bakudimuki badi bakumbaja ntendelelu wa bena Yuda. Bamue bena Ngreke, ba-prozelite anu mudibi bimueneka, badi basemena mpindieu kudi Filipe ne bamulomba bua kumonangana ne Yezu. Filipe udi uya kudi André, imue misangu bua kumukonka bikala dipetangana dia mushindu’eu dikumbanyine. Bidi bimueneka ne: Yezu utshidi ku ntempelo, mudi bena Ngreke mua kumumuena.

Yezu mmumanye se: nkumushadile anu matuku makese a muoyo, nunku udi ulonda mufuanu mulenga bua kumvuija nsombelu wende: “Dîba diakufika bua Muana wa muntu kutumbishibua. Bulelela, bulelela, ndi nnuambila ne, Bikala lutete lua blé kalui lu[p]one mu buloba, kalui lufue, nelushale nkayalu; kadi biafualu, nelukuamishe maminu makuabo a bungi.”

Lutete lumue lua blé ludi ne mushinga mukese. Kadi, ludi luvua tshinyi bialujiikabo mu buloba ne “lufua,” lulekela kuikala ne muoyo bu dimiinu? Ludi lutoloka ne lukola luandamuka lukolakola ludi lukuama ntete ya blé mivule menemene. Bia muomumue, Yezu mmuntu umuepele udi mupuangane. Kadi, biafuaye mushale muena lulamatu kudi Nzambi, udi uvua musambuluji wa muoyo wa kashidi kudi bena lulamatu bena kudilambula bu yeye muine. Nunku, Yezu udi wamba ne: “Eu udi unanga anyima wende udi umujimija, kadi eu udi ukina anyima wende mu bulongolodi ebu neamukube bua muoyo wa kashidi.”

Mbimueneke patoke se: Yezu ki mmutume lungenyi anu kudiye yeye nkayende, bualu udi umvuija pashishe ne: “Biajinga muntu bua kunsadila, andonde, bua muaba undi meme ke wikala kabidi musadidi wanyi. Biajinga muntu bua kunsadila, Tatu neamuambike lumu.” Ndifutu kayipu dia mpatshi bua eu uvua mulonde Yezu ne mumusadile! Ndifutu dia kuambikibua lumu kudi Tatu pa kusangishibua kudi Kristo mu Bukalenge.

Utuma lungenyi ku ntatu mikole ne lufu lua tshikisu bidi bimuindile, Yezu udi utungunuka ne: “Mpindieu anyima wanyi udi usumpakana, ne nengambe tshinyi? Tatu, nsungile ku dîba edi.” Bu muanda eu udi mumuindile mua kuepukibua! Kadi, kabiakuenzeka, anu mudiye wamba ne: “Bua bualu ebu ke bundi mufikile ku dîba edi.” Yezu udi wanyisha ndongoluelu yonso ya Nzambi, kusangisha ne lufu luende lua mulambu. Matayo 21:12, 13, 18, 19; Mâko 11:12-18; Luka 19:45-48; Yone 12:20-27, NW.

▪ Bua tshinyi Yezu udi utekemena kupeta bimuma bia mfigi pabi kabiyi tshitshia tshiabi?

▪ Bua tshinyi Yezu udi ubikila aba badi basumbisha mu ntempelo ne: “mbivi”?

▪ Mmu ngumvuilu kayi mudi Yezu mufuane lutete lua blé ludi lufua?

▪ Mmunyi mudi Yezu udiumvua padiye utuma lungenyi ku ntatu ne lufu bidi bimuindile?