Nshapita 5

Diledibua dia Yezu​—Mpenyi ne ndîba kayi?

AMPERERE wa Ampire wa Roma, Kezare Ogiste, mmutume dîyi ne: muntu yonso udi ne bua kupingana mu tshimenga tshiakamulelabo bua dibadikibua. Nunku, Yozefe udi wenza luendu too ne ku muaba wakamulelabo, tshimenga tshia Beteleme.

Bantu bavule mbalue mu Beteleme bua dibadikibua edi, ne muaba umuepele udi Yozefe ne Mariya mua kupeta bua kutudila ntshikumbi tshia nyama. Apa, muaba udibo balama mpunda ne nyama mikuabu, ke mudi Yezu uledibua. Mariya udi umujingila mu mikusu ne umuladika mu tshidiilu tshia nyama, muaba udibu belela nyama biakudia.

Bushuwa, ku bulombodi bua Nzambi ke kuvua Kezare Ogiste mutume dîyi bua dibadika dia bantu dienjibue. Ebi bidi biambuluisha bua Yezu kuledibua mu Beteleme, tshimenga tshivua Mifundu midianjile kufunkuna ku kale bu muaba uvua mfumu mulaya ne bua kuledibua.

Mbutuku kayipu ebu bua mushinga! Pambelu mu madimi, bukenke kampanda budi butokesha musumba wa balami ba mikoko. Mbutumbi bua Yehowa! Ne muanjelu wa Yehowa udi ubambila ne: “Kanutshinyi to, bualu, tangilayi! Ndi nnumanyisha lumu luimpe lua disanka dinene dikala nadi bantu buonso. Bualu lelu’eu, mu tshimenga tshia Davidi, mbanulelele Mupandishi, udi Kristo Mukalenge. Etshi ntshimanyinu buenu nuenu: nenusangane muana mutekete mujingila mikusu ne muladika mu tshidiilu tshia nyama.” Diakamue, banjelu bakuabu bavule badi bamueneka ne bimba ne: “Butumbi muulu mule kudi Nzambi, ne pa buloba ditalala kudi bantu ba disua dimpe!”

Padi banjelu babashiya, balami ba mikoko badi bambilangana ne: “Tuyayi too ne mu Beteleme, tumone bualu ebu budi buenzeke budi Yehowa mutumanyishe.” Badi baya ne lukasa luonso, basangana Yezu pa muaba menemene uvua muanjelu mubambile. Padi balami balonda tshivua muanjelu mubambile, buonso bàdì bumvua bualu ebu badi bakema. Mariya udi ulama bimpe mêyi aa wonso ne uananga mu mutshima wende.

Lelu’eu, bantu bavule badi bitaba ne: Yezu uvua muledibue mu dia 25 Tshisua-munene. Pabi, mu Tshisua-munene mmu muvu wa mvula ne mashika makole ku Beteleme. Balami kabavua mua kuikala pambelu mu madimi butuku ne bisumbu biabo bia nyama mu tshikondo etshi tshia tshidimu. Kabidi, Kezare wa Roma kavua mua kulomba bantu bakávua ne lungenyi lua kumutombokela bua kuenza luendu munkatshi mua muvu wa mvula ne mashika makole bua kuya kubadikibua nansha. Bionso bidi bileja se: Yezu uvua muledibue ku ntuadijilu kua muvu wa bimuma [anyi automne] wa tshidimu atshi. Luka 2:1-20, NW; Mika 5:2.

▪ Bua tshinyi Yozefe ne Mariya badi baya ku Beteleme?

▪ Mbualu kayi bua dikema budi buenzeka butuku budi Yezu uledibua?

▪ Mmunyi mutudi bamanye se: Yezu kavua muledibue mu dia 25 Tshisua-munene?