Nshapita wa 17

Dilongesha Nikodeme

YEZU udi wenza bimanyinu bia kukema, peshi bishima binene mu difesto dia Pasaka wa mu 30 B.B. udiye usekelela. Bu tshipeta, bavule badi bamuitabuja. Nikodeme, umue wa ku badi benza Sanhedrin, kabadi kakulu ka bena Yuda, udi ulengibua mutshima ne mmusue kumanya bivule. Nunku, udi ukumbula Yezu munkatshi mua mîdima ya butuku, pamu’apa udi utshina bua lumu luende kaluvu kunyanguka kudi bamfumu bakuabu ba bena Yuda biamumonabo.

“Rabbi,” ke mudiye wamba, “tudi bamanye ne: udi mupatukile kua Nzambi bu mulongeshi; bualu muntu nansha umue kêna mua kuenza bimanyinu ebi biwudi wenza, bikala Nzambi kayi nende.” Yezu udi wambila Nikodeme ne: Bua muntu kubuela mu Bukalenge bua Nzambi, udi ne bua ‘kuledibua tshiakabidi.’

Kadi, mmunyi mudi muntu mua kuledibua tshiakabidi? “Kêna mua kubuela musangu muibidi mu lukùtù lua mamuende ne kuledibua, ki mmuomu anyi?” ke mudi Nikodeme webeja.

Tòo, ki ntshidi kuledibua tshiakabidi kumvuija nansha. “Muntu yeye kayi muledibue ku mâyi ne spiritu,” ke mudi Yezu umvuija, “kêna mua kubuela mu bukalenge bua Nzambi.” Pakatambuishibua Yezu ne pakamupuekela spiritu munsantu, nunku wakaledibua “ku mâyi ne ku spiritu.” Ku dimanyisha difume mu diulu se: ‘Eu mMuananyi undi muanyishe,’ Nzambi wakamanyisha se: waledi muana wa mu nyuma uvua ne ditekemena dia kubuela mu Bukalenge bua mu diulu. Pashishe, dia Pentekoste wa mu 33 B.B., batambuishibue bakuabu nebapete spiritu munsantu ne nunku nebaledibue tshiakabidi bu bana ba mu nyuma ba Nzambi.

Kadi, mudimu wa Muan’a muntu wa pa buende wa Nzambi udi wa mushinga mukole. “Anu muvua Mozese muele nyoka kuulu mu tshipela,” ke mudi Yezu wambila Nikodeme, “nunku ke mudi Muan’a muntu ne bua kuedibua kuulu, bua muntu yonso udi umuitabuja apete muoyo wa kashidi.” Eyowa, anu muvua bena Izalele abu bakasumibua kudi nyoka ya lulengu ne bua kutangila nyoka wa tshiamu tshia tshiombo bua kupanduka, bia muomumue, bantu buonso badi ne bua kuenza midimu ya ditabuja mu Muana wa Nzambi bua kupandishibua ku nsombelu wabu wa bantu bafundila lufu.

Pa kuzangika dinanga didi Nzambi muleje mu muanda eu, Yezu udi wambila Nikodeme pashishe ne: “Nzambi wakananga bukua-bantu bikole e kufila Muanende umuepele bua muntu yonso udi wenza midimu ya ditabuja kudiye kabutudibu, kadi apete muoyo wa kashidi.” Nunku, muine mu Yeruzaleme, panyima pa ngondo isambombo katshia utuadija mudimu wende, Yezu udi uleja patoke ne: udi tshiamu tshidi Yehowa ukuata natshi mudimu bua kupandisha bukua-bantu.

Yezu udi utungunuka ne kumvuija Nikodeme ne: “Bualu Nzambi wakatuma Muanende mu bukua-bantu, ki mbua yeye kulumbuluisha bukua-bantu,” mbuena kuamba ne: ki mbua kukumbaja bulumbuluishi bua kubapiisha nabu, anyi kubafundila tshibawu, ne kumanyisha dipangadika dia bulumbuluishi dia kubutula bukua-bantu. Kadi, anu mudi Yezu wamba, uvua mutumibue “bua bukua-bantu kusungidibua ku butuangaji buende.”

Nikodeme, ne kutshina, mmulue kudi Yezu mu mîdima. Nunku, mbia mushinga padi Yezu ukomesha kuyukidilangana kuende nende pa kuamba ne: “Pabi, etshi ke nshindamenu wa dilumbuluishibua, bualu butoke [budi Yezu udileja tshimfuanyi tshiabu ku nsombelu wende ne ku malongesha ende] mbulue mu bukua-bantu, kadi bantu e kunanga mîdima kupita butoke, bualu midimu yabu ivua mibi. Bualu bua muenji wa malu mabi udi ukina butoke ne kêna ulua kudi butoke, bua kabavu kudiwula midimu yende. Kadi eu udi wenza tshidi tshilelela udi ulua kudi butoke, bua midimu yende ilejibue patoke bu ivua mienza mu diumvuangana ne Nzambi.” Yone 2: 23–3:21; Matayo 3:16, 17, NW; Bienzedi 2:1-4; Nomba 21:9.

▪ Ntshinyi tshidi tshisaka Nikodeme ku dienza dikumbula, ne bua tshinyi udi ulua butuku?

▪ “Kuledibua tshiakabidi” kudi kumvuija tshinyi?

▪ Mmunyi mudi Yezu ufuanyikija mudimu udiye ukumbaja bua lupandu luetu?

▪ Miaku eyi: Yezu ki mmulue bua kulumbuluisha bukua-bantu, idi yumvuija tshinyi?