Nshapita wa 19

Dilongesha mukaji muena Samariya

MU LUENDU luabu padibu bumuka ku Yudeya bua kuya ku Ngalileya, Yezu ne bayidi bende badi bapitshila mu distrike dia Samariya. Bua dipungi dia luendu, munda-munya badi batula bua kuikisha ku luseke lua tshiina tshia mâyi pabuipi ne tshimenga tshia Sishare. Tshiina etshi tshivua tshiumbula kudi Yakoba kukadi siekele mivule, ne tshitshidiku too ne lelu’eu, pabuipi ne tshimenga tshia Naplouse tshia matuku aa.

Yezu udi ushala muikishe muaba eu padi bayidi bende baya mu tshimenga bua kusumba biakudia. Padi mukaji kampanda muena Samariya udi muvue kusuna mâyi ufikilapu, udi umulomba ne: “Mpeshaku mâyi a kunua.”

Pa tshibidilu, bena Yuda ne bena Samariya kabatu ne buobumue nansha bukese bua lukuna ne mbipishilu bia katshiakatshia. Ke bualu kayi mukaji udi webeja ne kukema ne: “Mbishi wewe, nansha muudi muena Yuda, undomba mâyi a kunua, panyi mukaji muena Samariya?”

“Bu wewe mumanye,” ke mudi Yezu wandamuna, “eu udi ukuambila ne: ‘Mpeshaku mâyi a kunua,’ wewe ke uvua kumulomba, ne yeye uvua kukupesha mâyi a muoyo.”

“Mukalenge,” ke mudiye ukudimuna, “kuena nansha ne kanti ka kutunta naku mâyi, tshiina patshi ntshiondoke. Mmpokolo kayi uudi mupetele mâyi au a muoyo? Kuena mutambe nkambua wetu Yakoba wakatupesha tshiina etshi ne wakanua mâyi atshi yeye muine pamue ne bana bende ne bimuna biende, ki mmuomu’anyi?”

“Yonso udi unua mâyi aa neumvue nyota tshiakabidi,” ke mudi Yezu umvuija. “Eu udi unua mâyi angamupesha kakumvua nyota nansha kakese, kadi mâyi angamupesha neavue munda muende mpokolo udi upatula mâyi adi apetesha muoyo wa kashidi.”

“Mukalenge, mpeshaku mine mâyi awu, bua tshikadi nansha ngumvua nyota peshi ntungunuka ne kulua muaba eu bua kusuna mâyi,” ke mudi mukaji ulomba.

Yezu udi mpindieu umuambila ne: “Ndaku, ubikile bayebe ne nulue muaba eu.”

“Tshiena ne bayanyi,” ke mudi mukaji wandamuna.

Yezu udi ushindika mêyi ende. “Udi wamba bushuwa, ‘Tshiena ne bayanyi.’ Bualu uvua ne balume batanu, ne mulume uudi nende mpindieu ki mbayebe to.”

“Mukalenge, ngajinguludi se: udi muprofete,” ke mudi mukaji wamba ne kukema. Pa kuleja disankidila diende dia malu a mu nyuma, udi umvuija ne: bena Samariya “bakatendelela mu mukuna eu [wa Guerizime, udi pabuipi apu]; kadi nuenu [bena Yuda] nudi nuamba ne: mu Yeruzaleme ke muaba udi bantu ne bua kutendelela.”

Yezu udi umujadikila ne: muaba wa kutendelela ki ntshidi ne mushinga to. “Dîba didi dilua,” ke mudiye wamba, “dikala batendeledi balelela ne bua kutendelela Tatu ne spiritu ne bulelela, bualu, bushuwa, Tatu udi ukeba batendeledi ba mushindu’au bua kumutendelelabu. Nzambi udi Spiritu, ne aba badi bamutendelela badi ne bua kumutendelela ne spiritu ne bulelela.”

Mukaji udi ukemeshibua bikole. “Ndi mumanye ne: Masiya udi ulua, eu udi ubikidibua ne: Kristo,” ke mudiye wamba. “Pafika muine au, neatumanyishe malu wonso patoke.”

“Meme udi wakula nebe ndi yeye,” ke mudi Yezu umujadikila. Anjibi kutshinka! Mukaji eu udi mulue kusuna mâyi munda-munya, imue misangu bua kubenga kutuilangana ne bakaji ba mu tshimenga badi bamupepeja bua nsombelu wende, mmupeshibue muabi wa pa buawu kudi Yezu. Udi umuambila patoke malu adiye kayi muanji kujadikila muntu mukuabu. Mbipeta kayi bidi bipatukilaku?

Bena Samariya bavule badi bitabuja

Padibu bafumina mu Sishare ne biakudia, bayidi badi basangana Yezu ku tshiina tshia Yakoba, muabu uvuabo bamushiye, wenda uyukila mpindieu ne mukaji muena Samariya. Padi bayidi bafika, udi ushiya mulondo wende wa mâyi panshi ne uya mutangile mu tshimenga.

Bu mudiye mulengibue mutshima bikole kudi malu adi Yezu mumuyukidile, udi wambila bena mu tshimenga ne: “Luayi numone muntu udi mungambile bintu bionso bimvua muenze.” Bua kujula dijinga diabu dia kujingulula, udi webeja ne: “Kêna mua kuikala Kristo anyi?” Lukonko elu ludi lukumbaja kipatshila kalu​—bantu badi baya bua kudimuena.

Mu mutantshi eu, bayidi badi bakankamija Yezu bua kudia biakudia bidibo balue nabi mu tshimenga. Kadi Yezu udi umvuija ne: “Ndi ne tshiakudia tshindi ne bua kudia tshinudi kanuyi bamanye.”

“Muntu mmumutuadile tshintu kampanda tshia kudia anyi?” ke mudi bayidi bebejangana. Yezu udi umvuija ne: “Tshianyi tshiakudia nkuenza disua dia eu wakantuma ne kujikija mudimu wende. Kanutu nuamba ne: Kutshidi ngondo inayi bangabanga ne dinowa anyi?” Kadi, pa kufunkuna dinowa dia mu nyuma, Yezu udi wamba ne: “Bandishayi mêsu enu nutangile madimi, adi matoke bua kunowa. Munowi ukadi upeta difutu diende ne udi ukungija mamuma bua muoyo wa kashidi, bua mumiaminyi ne munowi basanke popamue.”

Misangu mikuabu, Yezu ukadi mudianjile kumona buenzeji bunene bua kuyukidilangana kuende ne mukaji muena Samariya​—bantu bavule badi bamuitabuja ku bumanyishi buende. Udi ufila bumanyishi kudi bena mu tshimenga, wamba ne: “Wangambidi bintu bionso bimvua muenze.” Nunku, padi bena mu Sishare balua kudiye ku tshiina, badi bamulomba bua kushalaye nabu lupolo kampanda bua kubambila malu mavule. Yezu udi wanyisha dilomba diabu ne ushala muabu matuku abidi.

Bu muvua bena Samariya bateleja Yezu, bavule badi bitabuja. Pashishe, badi bambila mukaji ne: “Katutshiena tuitaba bua miaku yebe kabidi nansha; tuetu nkayetu tuadiumvuidi, tudi bajadike se: yeye mene ke Mupandishi wa bantu.” (Mukenji Mulenga) Bushuwa, mukaji eu muena Samariya mmufile tshilejilu tshilenga pa mushindu utudi mua kufila bumanyishi budi butangila Kristo pa kujula dijinga dia kujingulula dia batuteleji bua kukebabu mua kumanya bivule!

Tuvuluke ne: muanda eu udi wenzeka ngondo inayi kumpala kua dinowa​—imue misangu dinowa dia orge didi, mu Palestine, dienzeka mu muvu wa disampila. Nunku, mpindieu bidi mua kuikala mu Kasuabanga peshi Tshisua-munene. Ebi bidi biumvuija ne: panyima pa Pasaka wa mu 30 B.B., Yezu ne bayidi bende badi bashala mu Yudeya ngondo muanda-mukulu anyi mivule kupita benda balongesha ne batambuisha bantu. Mpindieu, badi bumuka ne bapingana muabu mu Ngalileya. Ntshinyi tshidi tshibindileku? Yone 4:3-43, NW.

▪ Bua tshinyi mukaji muena Samariya udi ukema padi Yezu wakula nende?

▪ Yezu udi umulongesha tshinyi pa bidi bitangila mâyi a muoyo ne muaba wa kutendelela?

▪ Mmushindu kayi udi Yezu umujadikila tshidiye, ne bua tshinyi dimujadikila edi didi dikemesha bikole?

▪ Mbumanyishi kayi budi mukaji muena Samariya ufila, ne budi bupatula bipeta kayi?

▪ Mmunyi mudi tshiakudia tshia Yezu tshisuikakane ku dinowa?

▪ Mmunyi mutudi mua kupima lupolo ludi mudimu wa Yezu unenga mu Yudeya panyima pa Pasaka wa mu 30 B.B.?