Nshapita wa 62

Dilongesha pa budipuekeshi

KUNYIMA kua diondopa nsongalume mukokesha kudi demon mu buloba bua pabuipi ne Sezaré wa ku Filipoi, Yezu udi ujinga kupingana mu buloba buabu ku Kapernaume. Kadi, mmusue kuenza luendu elu anu ne bayidi bende bua kubalongolola bimpe ku lufu luende ne ku majitu ambulabo pashishe. Udi wamba ne: “Muana wa muntu udi ne bua kufidibua mu bianza bia bantu,” ke mudiye ubumvuija, “ne nebamushipe, kadi, nansha muamushipabo, neabiishibue panyima pa matuku asatu.”

Tshidibi, nansha mukadi Yezu muakule pa bualu ebu, ne bapostolo basatu bamone bushuwa dikudimuka diende dia mpala divua muanda wa “diya” diende muedibue mu tshialu, bamulondi ki mbanji kupeta ngumvuilu mujalame pa bualu ebu to. Nansha mudi umue wa kudibo kayi uteta kuvila kushipibua kuende, bu muenzele Petelo matuku mashale, badi batshina bua kutamba kumuebeja pa muanda eu.

Ndekelu wa bionso, badi bafika ku Kapernaume, tshimenga tshivua bu ku-tshitua-dikasa bua Yezu tshikondo tshia dikumbaja mudimu wende. Kabidi, ntshimenga tshivua Petelo ne bamue ba ku bapostolo bafumine. Muinemu, basangishi ba mulambu wa ntempelo badi basemena kudi Petelo. Imue misangu bua kupeta pa kupiishila Yezu bu munyangi wa tshilele tshianyishibue, badi bebeja ne: “Mulongeshi wenu kêna ufuta tshitadi tshia drakma ibidi [bua ntempelo] anyi?”

“Eyowa,” ke diandamuna dia Petelo.

Yezu, ukavua pamu’apa mumane kufika ku nzubu lupolo luipi kunyima, mmumanye tshidi tshienzeke. Nunku, bangabanga ne Petelo kuamba dîyi, Yezu udi webeja ne: “Simone, udi wela meji munyi, bakalenge ba pa buloba batu bapetela milambu peshi bitadi bia ku muntu ku muntu kudi banganyi? Kudi bana babo balela anyi kudi benyi?”

“Kudi benyi,” ke mudi Petelo wandamuna.

“Nanku, bushuwa bana balela kabena bafuta bitadi,” ke mudi Yezu wamba. Bu mudi Tatuende wa Yezu muikale Mukalenge wa bukua-bufuki, Eu udibo batendelela mu ntempelo, kulomba Muana wa Nzambi bua kufuta tshitadi tshia ntempelo kabiena bushuwa mu diumvuangana ne Mikenji. “Kadi, bua katuvu kubalenduisha,” ke mudi Yezu wamba, “ndaku ku mbuu, wele ndobo, ne ukuate mushipa wa kumpala uwafuisha; pawabulula mukana muawu, neusanganemu statere [drakma inayi]. Umuangate, ubapeshaye buanyi ne buebe.”

Padi bayidi basangila, pamu’apa kua Petelo, panyima pa difika diabu mu Kapernaume, badi bebeja ne: “Nnganyi udi bushuwa mutambe bunene mu bukalenge bua mu diulu?” Yezu mmumanye tshidi tshibeleshisha lukonko elu, bualu mmumanye tshivua tshipitakane munkatshi muabo pavuabo munyima muende mu luendu lua difumina ku Sezaré wa ku Filipe. Nanku, udi webeja ne: “Mu njila nuvua nukokangana pa bualu kayi?” Bayidi badi bapuwa, balubakana ne meji, bualu bavua bakokangana munkatshi muabo bua kumanya eu uvua mutambe bunene.

Panyima pa bidimu pabuipi ne bisatu bia dilongeshibua kudi Yezu, kabiena bimueneka bikole bua kuitaba dikokangana edi dia bayidi pa muanda bu nunku anyi? Bushuwa, didi disokolola buenzeji bukole bua bumuntu bupange bupuangane, ne bua ntendelelu ya miaba idibo bakolele. Ntendelelu wa bena Yuda muvua bayidi bakoleshibue uvua uzangika mianzu anyi milongo mibandile mu malu wonso. Kabidi, imue misangu Petelo udi udiumvua muikale ku mutu kua bakuabu bualu Yezu uvua mulaye bua kumupesha imue “nsapi” ya Bukalenge. Yakobo ne Yone badi pabo mua kuikala ne ngenyi ya muomumue bualu bavua bapeshibue muabi wa kumona ne mêsu abo dikudimuka dia Yezu.

Nansha tuamba, Yezu udi wenza dileja dia dikema ne kipatshila ka kululamija mmuenenu yabo. Udi ubikila muana mutekete, umuimanyika munkatshi muabo, umukonga mu maboko ende, wamba ne: “Nuenu kanuyi [batshinguluke, NW], badienze bana batekete, kanuena mua kubuela mu Bukalenge bua mu diulu. Wonso udi udipuekesha bu muana mutekete ewu, yeye ke udi munene mu Bukalenge bua mu diulu. Udi wakidila muana mukese bu ewu bua dina dianyi, udi ungakidila meme.” (Mukenji Mulenga)

Mmushindu kayipu wa dikema wa kululamija bayidi bende! Yezu kêna ubafikila munda ne ubabikila mudibo badibandishi, bena lukuka, peshi balumbidi ba mianzu. Tòo, kadi udi wangata tshimfuanyi bua kubapesha dilongesha dilulamiji dia ngenyi yabo pa kutumika ne tshilejilu tshia bana batekete, badi badisunguluja ku tshikadilu tshia budipuekeshi, kabayi balumbidi ba mianzu ne pa tshibidilu kabayi bamanye kutekangana mu milongo ya bunême munkatshi muabo. Nunku, Yezu udi uleja ne: bayidi bende badi bakengela kudima bikadilu ebi bidi bisunguluja bana, badi badipuekeshi. Yezu udi ukomesha ne: “Udi [udileja, NW] mutambe bukese munkatshi muenu nyeye udi munene.” Matayo 17:22-27; 18:1-5; Mâko 9:30-37; Luka 9:43-48, NW.

▪ Mu dipingana ku Kapernaume, ndilongesha kayi didi Yezu wambulula, ne mmunyi mudidio diangatshibua?

▪ Bua tshinyi Yezu kêna muinshi mua mukenji wa difuta tshitadi tshia ntempelo; kadi bua tshinyi udi utshifuta?

▪ Ntshinyi tshivua pamu’apa tshibuejije bayidi mu dikokangana, ne mmunyi mudi Yezu ubalulamija?