Nshapita wa 64

Dilongesha pa dibuikidilangana

BIDI bimueneka ne: Yezu utshidi mu nzubu wa mu Kapernaume ne bayidi bende. Ng’utshifuma ku dibumvuija mushindu wa kujikija bilumbu pankatshi pa bana ba muntu padi Petelo umuebeja ne: “Mukalenge, mmisangu bungi munyi yangenzela muanetu mpekatu, meme anu kumubuikidila?” Bu mudi balongeshi ba malu a Nzambi bena Yuda bamba mua kubuikidilangana too ne ku misangu isatu, pamu’apa Petelo udi wangata kufika “too ne ku misangu muanda-mutekete” bu kuleja kalolo kapitshidile.

Kadi, lungenyi luine lua kubadika mushindu’eu ndubi. Yezu udi ululamija mmuenenu wa Petelo nunku: “Ndi nkuambila, tòo, ki nne ku misangu muanda-mutekete, kadi too ne ku misangu makumi muanda-mutekete ne muanda-mutekete.” Udi uleja ne: kakuena mikalu miela pa bungi bua misangu idi Petelo ne bua kufuila muanabo luse.

Bua kutokeshila bayidi bende mudibo benzejibue bua kubuikidilangana, Yezu udi ubapesha mufuanu kampanda. Udi wakula bua mukalenge kampanda udi ufutshisha bapika bende mabanza. Badi bamutuadila mupika kampanda udi ne bua kumufuta dibanza dinenanenayi dia ndenariyo 60 000 000. Muine eu pende mmushikile kayi ne mushindu wa kudifuta. Nunku, anu mudi Yezu umvuija, mukalenge udi utuma dîyi bua kumusumbishabo, yeye ne mukajende ne bana bende, bua dibanza kufutshibuadi.

Padi mupika eu umvua nunku, udi udiela ku makasa a mfumuende ne umusengelela ne: “Ndejaku lutulu ne nenkufute bionso.”

Pa kumumvuila luse, mfumu udi umubuikidila ne ukupula dibanza dinenanenayi dia mupika eu. Kadi, anu patshidi mfumu ufuma ku dimuenzela nunku, ke mudi Yezu utungunuka, mupika eu udi uya ne ututakena ne mupika nende udi ne bua kumufuta ndenariyo 100 patupu. Mulumiana udi ukuata muinende mu nshingu, umufina diminu, umuamba ne: “Mfute bionso bidi bu bianyi.”

Pabi mupika nende kêna ne mfranga ya kumufuta. Nunku, udi upona ku makasa a mupika eu udiye nende dibanza, umusengelela ne: “Ndejaku lutulu ne nenkufute.” Bishilangane ne mfumuende, mupika eu ki mmufuidianganyi wa luse to, ne udi welesha mupika nende mu buloko.

Pa nanku, ke mudi Yezu utungunuka, bapika bakuabu bavua bamone tshivua tshienzeke badi baya kulondela mfumu. Ne tshiji tshikole, udi ubikidisha mupika eu. “Mupika wa muoyo mubi we,” ke mudiye wamba, “ngakupudi dibanza diebe dionso pawansengeledi. Wewe pebe, kuvuaku ne bua kulekelela muinebe mupika, bu mumvua panyi mukulekelele anyi?” Pa kukuata tshiji tshikole, mfumu udi ufila mupika eu mubule luse mu bianza bia balami ba nzubu wa lukanu too ne pafutaye bionso bia dibanza.

Pashishe, Yezu udi ukomesha ne: “Ke mushindu wanuenzela Tatuanyi wa mu diulu binuabenga kubuikidilangana muntu yonso kudi muanabo kumukila mu mitshima yenu.”

Ndilongesha kayipu bulenga pa dibuikidilangana! Pa kufuanyikija ne dibanza dinenanenayi dia mpekatu ditubuikidila kudi Nzambi, tshilema tshionso tshituenzela kudi muanetu muena nkristo ntshikese bushuwa. Kabidi, Yehowa Nzambi mmutubuikidile misangu binunu ne binunu. Misangu mivule, katutu nansha tumanya mpekatu itudi tumuenzela. Pa nanku, katuenaku mua kubuikidila muanetu misangu bungi bukese, nansha tuetu nende tshilumbu tshikumbanyine kudiabakena anyi? Tuvuluke dilongesha difila kudi Yezu mu Muyuki wende wa pa Mukuna ne: Nzambi ‘neatubuikidile mabanza etu anu mushindu utuikala petu babuikidile bena mabanza betu.’ Matayo 18:21-35; 6:12; Kolosai 3:13, NW.

▪ Ntshinyi tshidi tshisaka Petelo ku diebeja pa dibuikidila muanabu, ne bua tshinyi udi mua kuangata lungenyi lua kubuikidila muntu misangu muanda-mutekete bu kuleja kalolo?

▪ Nku tshinyi kudi ngandamuinu wa mukalenge ku musengelelu wa mupika wende bua kumubuikidila mushilangane ne wa muine mupika eu padi muinende mupika umusengelela?

▪ Ntshinyi tshitudi tulongela ku mufuanu wa Yezu?