Nshapita wa 40

Dilongesha pa difuilangana luse

YEZU utshidi pamu’apa mu Nayine, mudiye ufuma ku dibiisha ku lufu muana wa mukamba, anyi imue misangu udi ukumbula tshimenga kampanda tshiena mutumba. Mufarizeyi kampanda, diende Simone, mmusue kumuenena pabuipi eu udi wenza midimu ya dikema ya mushindu’eu. Nunku, udi ubikila Yezu bua badie biakudia pamue.

Pa kuangata dibikila edi bu mushindu mukumbanyine mua kukumbaja mudimuu wende bua diakalenga dia aba bikalaku, Yezu udi wanyisha dibikila edi, anu muvuaye muanyishe mabikila a kudia ne balambuishi ba bitadi ne bena mpekatu. Kadi, padi Yezu ubuela mu nzubu wa Simone, kabena bamuakidila ne kanemu kajalame katu babikidibue bapeshibua pa tshibidilu to.

Padi benyi benda njila mule wa lupuishi ne bavuale sandala, makasa abu adi ne luya ne lupuishi, nunku, bilondeshile tshilele tshia diakidila benyi, badi buoweshibua makasa ne mâyi matalale. Kadi, padi Yezu ufika, kabena bamuowesha makasa. Kabidi, kabena bamutua mishiku bua kumujingila difika dilenga, tshienzedi tshia dileja muenyi bukalanga. Bia muomumue, kabena bamulaba mafuta mu nsuki, bilondeshile tshilele tshia diakidila benyi.

Munkatshi mua didia, padi babikidibue badiadije ku mesa, mukaji kampanda kayi mubikila udi ubuela tshimùmà mu tshibambalu. Mmumanyike mu tshimenga bu muena nsombelu mubipe. Bidi bimueneka se: uvua mumvue malongesha a Yezu, pamue ne dibikila diende dia ‘aba buonso badi bazengele ne majitu balue kudiye bua kupeta disulakana.’ Bu muvuaye mulengibue mutshima bikole kudi malu avuaye mumone ne mumvue, wakatuadija kukeba Yezu too ne pafikileye muaba eu.

Mukaji udi upita kunyima kua Yezu údí mudiadije ku mesa, ne utua binu ku makasa ende. Bu mudi binsonji biende bimata pa makasa a Yezu, udi ubikupula ne nsuki yende. Udi wangata kabidi mafuta a dipembu mu kalangi kende, ne pa kutua makasa ende mishiku ne diengeleka, udi upongololapu mafuta aa. Simone udi utangila muanda eu ne dipetu. “Muntu eu, bu yeye muprofete,” ke mudiye welangana meji, “uvua kumanya né nnganyi ne tshidi mukaji eu udi umulenga, ne: mmuenji wa mpekatu.”

Pa kujandula ngeledi wende wa meji, Yezu udi wamba ne: “Simone, ndi ne bualu bua kukuambila.”

“Mulongeshi, ambaku!” ke mudiye wandamuna.

“Bantu babidi bavua bena dibanza dia musombeshi kampanda,” ke mudi Yezu utuadija. “Umue uvua ne dibanza dia ndenariyo nkama itanu, kadi mukuabu dia makumi atanu. Bu muvuabu kabayi ne tshintu tshia kumupingajila, bubidi buabu wakabalekelela ku budisuile. Nunku, nnganyi wa kudibo wamunanga bipitshidile?”

“Ndi ntshinka,” ke mudi Simone wamba, pamu’apa ne kupungakana mudi lukonko lumueneka lubengangane ne bualu budi panshi, “ng’eu uvuaye mulekelele bivule ku budisuile.”

“Wakoshi biakane,” ke mudi Yezu wamba. Pashishe, ukudimuka kudi mukaji, udi wambila Simone ne: “Udi mumone mukaji ewu? Meme kubuela mu nzubu muebe, wewe nansha kungowesha mayi ku makasa; kadi yeye e kumpuekeshila binsonji biende ku makasa, kuakupula ne nsuki yende. Wewe kuena muntue mishiku; kadi yeye, katshia ngabuela, kena mulekele dintua mishiku ku makasa. Wewe kuena mundabe manyi ku mutu; kadi yeye wandabi manananshi ku makasa.” (Mukenji Mulenga)

Nunku, mukaji eu wafidi tshijadiki tshia dinyingalala difume mu mutshima bua nsombelu wende mubipe wa matuku mashale. Nunku, Yezu e kukoma pa kuamba ne: “Bua muanda eu, ndi nkuambila ne: mpekatu yende, nansha mudiyi ya bungi, mmibuikidibue, bualu wanangi bia bungi; kadi eu udibo babuikidila bikese, udi unanga bikese.”

Yezu kêna uleja dibingisha anyi dilengulula bua nsombelu mubipe to. Kadi, muanda eu udi usokolola tshikadilu tshiende tshia diumvuilangana dileji-luse kudi bantu bavua benze bilema mu nsombelu wabu, kadi badi baleja pashishe dijoboka dia mutshima bua bilema ebi ne balua kudi Kristo bua kupeta disulakana. Pa kupetesha mukaji dikankamija dia bushuwa, Yezu udi wamba ne: “Mpekatu yebe mmibuikidibue. . . . Ditabuja diebe diakusungidi; ndaku mu ditalala.” Luka 7:36-50; Matayo 11:28-30, NW.

▪ Mmunyi mudi Simone, mubikidi wa Yezu, umuakidila?

▪ Nnganyi udi ukeba Yezu, ne mbua tshinyi?

▪ Mmufuanu kayi udi Yezu ulonda, ne ndilongesha kayi didiye upatuilaku?