Nshapita wa 50

Dilongolodibua bua kuakama dikengeshibua

YEYE mumane kuleja bapostolo bende mishindu kabukabu ya kufila bumanyishi, Yezu udi ubadimuija bua baluishi. Udi wamba ne: “Monayi! Ndi nnutuma bu mikoko munkatshi mua mibuabua . . . Nudimukile bantu; bualu nebanufile ku nzubu ya dilumbuluisha, ne nebanukume mu nsunagoga yabu. Eyowa, nebaye nenu kumpala kua ba-nguvernere ne kua bakalenge bua bualu buanyi.”

Nansha muikala bamulondi ne bua kuakama dikengeshibua dikole, Yezu udi ulaya ne dishindika dionso ne: ‘Panufilabo nunku, kanutambi kuelangana meji ne, Netuambe munyi? Netuambe tshinyi? Tshia nuenu kuamba nebanupetshi pa dine dîba adi; bualu, ki nganu nuenu bakula, kadi spiritu wa Tatuenu ke udi wakula ku butuangaji buenu.’

“Kabidi,” ke mudi Yezu utungunuka, “muntu neafile muanabo ku lufu, ne tatu neafile muanende; bana nebalundukile baledi babo, babashipeshe.” Udi usakidila ne: “Nebanukine kudi bantu buonso bua dîna dianyi; kadi, wikala munanukile too ne ku ndekelu, yeye ke wasungidibua.”

Bumanyishi budi ne mushinga kupita wa bintu bionso. Bua kabingila aka, Yezu udi uzangika dikengedibua dia kuikala badimuke bua kukuba budikadidi bua kumona mua kukumbaja mudimu eu bimpe. “Padibo banukengesha mu tshimenga tshimue, nunyemene mu tshikuabu,” ke mudiye wamba, “bualu, bushuwa ndi nnuambila ne: Nansha bia munyi kanuakunyunguluka bimenga bionso bia Izalele Muana wa muntu kayi muanji kufika.”

Kabiyi mpata, ngenyi-miludiki eyi, madimuija aa ne makankamija aa, Yezu uvua mubipeshe bapostolo bende 12, kadi uvua mubifile kabidi bua aba buonso bavua ne bua kuditua pashishe mu mudimu wa difila bumanyishi ebu pa buloba bujima panyima pa lufu luende ne pa dibiishibua diende. Ke tshidi mêyi ende aleja padiye wamba ne: bayidi bende ‘nebakinyibue kudi bantu buonso,’ kabiyi anu kudi bena Izalele bavua bapostolo batumibue kudibo bua kulongeshibua. Mbimueneke kabidi ne: bapostolo kabavua bafidibue kudi ba-nguvernere ne bakalenge pakabatuma Yezu mu kampanye ka bumanyishi ebu bua tshitupa tshîpi to. Kabidi, bena kuitabuja kabakashipeshibua kudi mêku abu mu tshikondo atshi to.

Nunku, padiye wamba ne: bayidi bende kabakujikija dinyunguluka diabo dia difila bumanyishi “Muana wa muntu kayi muanji kufika,” Yezu uvua utumanyisha mu mulayi ne: bayidi bende kabakunyunguluka buloba bujima ne dimanyisha Bukalenge bua Nzambi bujadika kumpala kua yeye muine, Mukalenge mutumbishibue, kufikaye bu mukumbaji wa malumbuluisha a Yehowa ku Armaguedon nansha.

Utungunuka ne difila ngenyi-miludiki pa mudimu wa buambi, Yezu udi wamba ne: “Muyidi kêna ku mutu kua mulongeshi wende, nansha mupika ku mutu kua mukalenge wende.” Nanku, balondi ba Yezu badi ne bua kumanya se: buobu pabo nebakame makengeshibua ne tshinyangu anu muakabiakamaye bualu uvua umanyisha Bukalenge bua Nzambi. Kadi, udi ubasengelela ne: “Kanutshinyi aba badi bashipa mubidi eku kabayi mua kushipa anyima; kadi tshinayi eu udi mua kubutula mubidi ne anyima mu Ngena.”

Yezu uvua pa kufila tshilejilu mu muanda eu. Kayi mua kutshina, uvua ne bua kuakama lufu pamutu pa kujimija lulamatu luende kudi Eu udi ne bukokeshi buonso, Yehowa Nzambi. Eyowa, Yehowa ke udi mukumbane mua kubutula “anyima” wa muntu (mbuena kuamba ne: ditekemena dia kuikala tshiakabidi dimue dituku anyima udi ne muoyo) anyi kubiisha muntu ku lufu bua kuikalaye ne muoyo wa kashidi. Ndinanga kayipu, nduse kayipu elu kudi Tatuetu wa mu diulu, Yehowa!

Pashishe, Yezu udi ukolesha bayidi bende ku muoyo ne mufuanu udi uzangika dinanga didi Yehowa uleja pa kubatabalela. ‘Kabatu bapana mishamisha ibidi ku dikuta [dia mushinga mukese, NW] anyi?’ ke mudiye webeja. ‘Pabi, mushamusha umue kawena upona panshi, Tatuenu kayi mumanye. Nsuki ya ku mutu wenu mene idi mibala yonso. Nunku kanutshinyi, mushinga wenu mmutambe wa mishamisha ya bungi.’

Mukenji wa Bukalenge udi Yezu upeshela bayidi bende bukenji bua kumanyisha neutapulule bena dîku dimue, bualu bamue bena mu dîku nebawitabe, bakuabu nebawubenge. “Kanuedi meji se: mvuile kuteka ditalala pa buloba,” ke mudiye umvuija. “Mvuile kuteka, ki nditalala, kadi muele wa nkanza.” Nunku, bidi bikengela dikima kudi muena dîku udi ulonda, anu yeye nkayende, bulelela bua mu Bible. “Eu udi ne dinanga dia bungi bua tatuende anyi mamuende kuntamba meme ki mmungakanyine to,” ke mudi Yezu umvuija, “ne eu udi ne dinanga dia bungi bua muanende wa balume anyi wa bakaji kuntamba meme ki mmungakanyine to.”

Bua kujikija difila ngenyi-miludiki, Yezu udi umvuija ne: aba badi bakidila bayidi bende badi bamuakidila yeye kabidi. “Yonso udi upesha umue wa ku bakese aba dikopo dia mâyi matalale patupu bualu udi muyidi wanyi, bulelela ndi nnuambila ne: kakujimija difutu diende nansha.” Matayo 10:16-42, NW.

▪ Mmadimuija kayi adi Yezu upesha bayidi bende?

▪ Ndikoleshibua ku muoyo ne mmakankamija kayi adiye ubapesha?

▪ Bua tshinyi ngenyi-miludiki ya Yezu idi itangila kabidi bena nkristo ba matuku etu aa?

▪ Mmu ngumvuilu kayi mudi muyidi wa Yezu kayi ku mutu kua mulongeshi wende?